प्रदेश के सरकारी कर्मचारी मनके महंगाई भत्ता चार प्रतिशत बढ़ाय ल लेके निर्वाचन आयोग ह अपन मंजूरी दे देहे। ए मंजूरी मिले के बाद अब राज्य के शासकीय कर्मचारी मनके महंगाई भत्ता बंयालिस प्रतिशत ले बाढ़के छियांलिस प्रतिशत हो जाही। एखर ले प्रदेश के करीबन पांच लाख अधिकारी अउ कर्मचारी मनके संगेसंग पेंशन पवइया मन ल घलो फायदा मिलही।
ए बारे म राज्य शासन ह जल्दीच आदेश जारी कर सकथे। राज्य सरकार ह मतदान के पहिली सरकारी कर्मचारी मनके महंगाई भत्ता के भुगतान बर चुनाव आयोग ले परमीशन मंागे रीहिन। जेखर बाद छत्तीसगढ़ कर्मचारी-अधिकारी फेडरेशन ह महंगाई भत्ता ल लेके निर्वाचन आयोग ल चिट्ठी घलो लिखे रीहिन।
मतगणना प्रशिक्षण
प्रदेश म विधानसभा चुनई होय के बाद अब निर्वाचन आयोग ह मतगणना के तियारी शुरू कर देहे। इही कड़ी म प्रदेश के जम्मों जिला मन म चुनाव काम म लगे निर्वाचन अधिकारी, सहायक निर्वाचन अधिकारी अउ नोडल अधिकारी मनके संगेसंग आने कर्मचारी मन ल मतगणना के प्रशिक्षण दे जात हे।
काली जांजगीर-चंापा के जिला पंचायत सभागार म होवइया प्रशिक्षण म जाजंगीर-चंापा जिला के छियांलिस, सक्ती जिला के छब्बीस अउ कोरबा जिला के छियांलिस अधिकारी-कर्मचारी मन प्रशिक्षण लीही। अइसने काली कोंडागंाव जिला म घलो मतगणना के प्रशिक्षण दे जाही। त उंहे रायपुर जिला म पच्चीस नवंबर के प्रशिक्षण दे जाही।
मुख्य निर्वाचन पदाधिकारी के निर्देश उपर विधानसभा चुनई के मतगणना बर अधिकारी मन ल मतगणना ले जुड़े छोटे छोटे बात बताय जाही। प्रशिक्षण के बाद मतगणना बर प्रत्याशी मनके एजेंट के नियुक्ति बर अर्जी ले जाही। एखर बर प्रत्याशी मन ल राखे गे प्रपत्र म अर्जी करके अपन एजेंट के नाव देना होही। निर्वाचन आयोग के मुताबिक जम्मों नब्बे विधानसभा क्षेत्र के मतगणना तीन दिसंबर के बीहनिया आठ बजे ले शुरू होही। मतगणना के एक दिन पहिली उम्मीदवार मनके एजेंट ल पास जारी कर दे जाही।
दुर्घटना
प्रदेश म पाछू चौबीस घंटा के दौरान होय आने आने सड़क दुर्घटना म आठ झिन लोगन के मउत होगे त उंहे छै झिन आने मनखे मन घायल होगे, जउन मन ल अस्पताल म भर्ती कराय गेहे।
हमर संवाददाता ले मिले जानबा के मुताबिक मनेन्द्रगढ़-चिरमिरी-भरतपुर जिला म आज बीहनिया राष्ट्रीय राजमार्ग के तीर गांव बरबसपुर म एक ठिन कार ह दू ठिन फटफटी ल टक्कर मार दीस। ए घटना म एक झिन नोनी के संग तीन झन लोगन के मउकाच म प्राण छूटगे। उंहे तीन झिन आने मनखे मन घायल होगे। घटना के सूचना मिलतेच पुलिस ह मउका म पहुंच के घायल मन ल इलाज बर अस्पताल भेजीन।
उंहे इही जिला के नागपुर चौकी थाना क्षेत्र म पाछू रतिहा एक ठिन फटफटी ह खड़े ट्रक ले जाके टकरागे। ए घटना म फटफटी म बइठे दू ठिन मनखे के मउकाच म प्राण छूटगे।
ओति अंबिकापुर-बिलासपुर राष्ट्रीय राजमार्ग उपर आज उदयपुर थाना क्षेत्र के गांव खरहरी के तीर बस अउ कार म होय टक्कर म चौदा साल के एक झिन बाबू के मउत होगे। उंहे कार म बइठे तीन झिन आने मनखे मन घायल होगे । ये मन बिहार ले छठ परब मनाके रायपुर लहुटत रीहिन।
एति महासमुंद जिला के कोतवाली थाना क्षेत्र म आज एक ठिन ट्रक के चपेट म आय ले माइलोगिन के मउत होगे। त उंहे, घायल मनखे के अस्पताल ले जात खानी मउत होगे।
जवान घायल-आईईडी बरामद
दंतेवाड़ा जिला म आज माओवादी मन डहार ले लगाए गे आईईडी के चपेट म आय ले दू झिन जवान घायल होगे। जवान मन ल अस्पताल म भर्ती कराय गेहे। जिला के अतिरिक्त पुलिस अधीक्षक ह बताइन कि जिला के जगरगुंडा सड़क मार्ग के तीर कमारगुड़ा म विस्फोट के सूचना मिले हे। ए घटना म दू झिन जवान घायल होगे।
उंहे इही जिला म किरंदुल थाना क्षेत्र के लोहागांव के तीर सुरक्षा बल मन ह चार ठिन आईईडी बरामद करेे हे। एला बम निरोधक दस्ता के टीम ह मउकाच म निष्क्रिय कर दीन।
देवउठनी एकादशी
देवउठनी एकादशी के परब काली प्रदेश म भक्ति भाव अउ उछाह के संग मनाये जाही। प्रदेश म एला जेठौनी या छोटे देवारी तिहार के रूप म घलो जाने जाथे। ए मौका म घरोघर तुलसी अउ भगवान शालिग्राम के प्रतिकात्मक रूप म बिहाव करे जाथे। जेखर बर जम्मों घर म गन्ना के मंडप बनाये जाथे। अइसन मानता हे कि ए दिन भगवान विष्णु लंबा बेरा के बाद नींद ले जागथे। जेठौनी के बाद काली ले बिहाव जइसन शुभ काम घलो शुरू हा जाथे।
विधानसभा अध्यक्ष डॅाक्टर चरणदास महंत ह तुलसी विवाह अउ देवउठनी एकादशी के प्रदेशवासी मन ल बधाई अउ शुभकामना दे हवय।
धान खरीदी
प्रदेश म विधानसभा चुनई के बाद समर्थन मूल्य म धान बिसाय के काम म तेजी आगे हे। धान खरीदी केंद्र मन म धान के आवक बाढ़ गेहे।
जानबा के मुताबिक अब तक प्रदेश के उपार्जन केंद्र मन म राज्य सरकार ह धान खरीदी के बदला एक हजार छै सौ चार करोड़ रूपिया के भुगतान कर देहे। पाछू दू दिन म धान के आवक म घलो बढ़ोत्तरी होय हे। प्रदेश म अब तक एक लाख इकसठ हजार किसान मन ले छै लाख बत्तीस हजार मीटरिक टन धान के खरीदी करे गेहे।
विभागीय जानकारी के मुताबिक रायपुर, धमतरी, महासमुंद, दुर्ग अउ बेमेतरा जिला म सबले जादा धान के खरीदी होय हे। जानबा के मुताबिक पाछू एक नवंबर ले धान बिसाय के काम शुरू होगे हे, जउन ह इकतीस जनवरी तक चलही। राज्य सरकार ह एसो प्रदेश म एक सौ तीस लाख मीटरिक टन धान के लक्ष्य राखे हे।
क्रीड़ा प्रतियोगिता
तेईसवंा राज्य स्तरीय शालेय क्रीड़ा प्रतियोगिता आज ले कवर्धा म शुरू होगे हे। प्रतियोगिता के उद्घाटन जिला शिक्षा अधिकारी एम.के. गुप्ता ह करीन। पच्चीस नवंबर तक चलइया ये प्रतियोगिता म वॉलीबाल, सॉफ्टबॉल अउ बेसबॉल जइसन खेल होही। ए प्रतियोगिता म तीन सौ बालक अउ बालिका के संगेसंग छै सौ खिलाड़ी मन भाग लेवत हे।
महिला क्रिकेट मैच
भारतीय क्रिकेट कंट्रोल बोर्ड-बीसीसीआई डहार ले चलत महिला अंडर फिफटीन एक दिवसीय क्रिकेट प्रतियोगिता म छत्तीसगढ़ के टीम ह काली मिजोरम ल दस विकेट ले हरा दीन।
ग्वालियर म खेले गे ए मैच म छत्तीसगढ़ के टीम ह टास्क जीतके पहिली बॉलिंग करे के फैसला लीन। मिजोरम के टीम ह पहिली बल्लेबाजी करत बत्तीस ओवर अउ दू गेंद म पचहत्तर रन बनाके आउट होगे। छत्तीसगढ़ कोति ले रिशिका श्रीवास्तव ह चार, अउ नाजिया ह दू विकेट लीन। जवाब म छत्तीसगढ़ के टीम ह पंद्रह ओवर अउ दू गेंद म बिना विकेट गंवाये छिहत्तर रन बनाके ए मैच ल जीत लीन।
मौसम
हवा के एति-ओति बदले के सेती प्रदेश के मौसम म उतार चढ़ाव होवत हे। मौसम विभाग के मुताबिक पाकिस्तान म बने पश्चिमी विक्षोभ के उत्तर भारत ले आगू बढ़े के संभावना हे। जेखर बाद हवा के दिशा बदलही। हवा के दिशा म बदलाव के सेती जाड़ा बाढ़ही। ए बेरा प्रदेश म हवा के दिशा पूर्वी अउ उत्तर पूर्वी बने हे। जेखर सेती दिन अउ रात के तापमान म उतार चढ़ाव देखे जात हे। उंहे बस्तर संभाग के कोनो कोनो जगा म पश्चिमी विक्षोभ के सेती हल्का बारिश होय के संभावना हे।
संक्षिप्त समाचार
– कोंडागांव जिला म काली इक्कीस नवंबर ले पुरूष नसबंदी पखवाड़ा के आयोजन करे जात हे, जउन ह चार दिसंबर तक चलही।
अउ
– दुर्ग जिला म सुपेला थाना क्षेत्र ले पुलिस ह चार किलोग्राम गांजा के संग एक झिन आरोपी ल गिरप्तार करे हे। जब्ती करे गे गांजा के कीमत करीबन अड़तीस हजार रूपिया बताय गेहे।