सुप्रीम कोर्ट ह झीरम घाटी हत्याकांड मामला ल लेके राष्ट्रीय जांच एजेंसी-एनआईए के अपील याचिका ल खारिज कर देहे, जेखर ले अब छत्तीसगढ़ पुलिस ह ए मामला के जांच कर सकत हे। झीरम घाटी हमला म जान गवइंया कांग्रेस नेता उदय मुदलियार के बेटा ह बछर दू हजार बीस म दरभा थाना म एफ.आई.आर. दर्ज कराय रिहीस, जेमा केहे गे रिहीस कि एनआईए ह जांच म हत्या अउ राजनीतिक षड़यंत्र ल नइ जोड़े रिहीस हे। ए एफआईआर अउ छत्तीसगढ़ पुलिस के जांच के अधिकार ल एनआईए ह ए काहत चुनौती दे रिहीस कि ए प्रकरण के जांच पहिली ले करे जात हे अउ एखर अलग ले जांच करे जरूरत नइ हे। हाईकोर्ट ह एनआईए के याचिका ल खारिज कर दे गे रिहीस अउ एखर खिलाफ ओमन सुप्रीम कोर्ट म अपील करे रिहीस। सुप्रीम कोर्ट ह किहीन कि ओमन ए मामला म दखल नइ देवय।
सुप्रीम कोर्ट म अपील याचिका खारिज होय म मुख्यमंत्री भूपेश बघेल ह किहीन कि सुप्रीम कोर्ट के फइसला ले अब सही न्याय मिलही। ओमन किहीन कि अब सच्चाई ह जनता के आगू म आ जही।
उहें, रायपुर सांसद सुनील सोनी ह किहीन कि कांग्रेस सरकार डहार ले एनआईए ल जांच म मदद नइ करीन हे अउ उपर ले राजनीति करत हे।
खबर के मुताबिक पच्चीस मई दू हजार तेरह के दिन झीरम घाटी म कांग्रेस के नेता मन उपर परिवर्तन यात्रा के दउरान नक्सली मन ह हमला करे रिहीन, जेमा पूर्व प्रदेस अध्यक्ष नंदकुमार पटेल, विद्याचरण शुक्ल अउ महेन्द्र कर्मा के संगेसंग बत्तीस झिन नेता अउ कार्यकर्ता मनके मउत होगे रिहीस।
धान खरीदी
विधानसभा चुनई अउ देवारी तिहार के सेती धान खरीदी के काम ह थोकन कमती होगे रिहीस हे, फेर अब धान खरीदी के काम म तेजी आ गेहे। मिले खबर के मुताबिक काली संझा धान खरीदी केन्द्र मन म एक लाख बाईस हजार मीटरिक टन ले जादा धान के आवक दरज करे गेहे।
खाद्य सचिव ह बतईन कि ए सत्र म काली सबले जादा धान खरीदी करे गेहे। राज्य के मैदानी जिला – बिलासपुर, मुंगेली, बेमेतरा, दुरूग, कवर्धा अउ राजनांदगांव म सबले जादा धान खरीदे गेहे। उहें, सरगुजा अउ बस्तर म सबले कमती धान खरीदे गेहे।
मतगणना-प्रशिक्षण
छत्तीसगढ़ विधानसभा चुनई के तहत दूनों चरण के मतदान पूरा होय के बाद चुनाव आयोग ह मतगणना के तियारी सुरू कर देहे। जिला मन म चुनाव अधिकारी, सहायक निर्वाचन अधिकारी अउ नोडल अधिकारी के संगेसंग कर्मचारी मन ल प्रसिक्षण मतगणना के प्रसिक्षण दे जात हे। बस्तर म आज ले प्रसिक्षण काम ल सुरू करे गेहे। उहें, तेईस नवंबर के कोंडागांव अउ दिगर जिला मन म मतगणना के प्रसिक्षण दे जाही। रईपुर जिला म पच्चीस नवंबर के प्रसिक्षण दे जाही।
मुख्य निर्वाचन पदाधिकारी के निरदेस के मुताबिक विधानसभा चुनाव के मतगणना बर अधिकारी मन ल मतगणना ले जुड़े जरूरी जानकारी दे जाही। उहें, मतगणना बर प्रत्याशी मनके एजेंट के चुनई खातिर आवेदन घलो मंगाय जाही। एखर बर प्रत्याशी मन ल निर्धारित आवेदन म एजेंट मनके नाव दे बर पड़ही। निर्वाचन आयोग डहार ले राज्य के जम्मों नब्बे ठन विधानसभा क्षेत्र मनके मतगणना ल तीन दिसंबर के एके संघरा बिहनिया आठ बजे सुरू करे जाही।
माओवादी-समाचार
बीजापुर जिला के गोरना-मनकेली के जंगल म आज सुरक्षा बल के टीम डहार ले एक झिन माओवादी ल गिरफ्तार करे गीस। ए माओवादी तीर ले बारूद अउ साहित्य के संगेसंग अउ दूगर जिनीस बरामद करे गेहे।
उहें, इही जिला के भैरमगढ़ थाना क्षेत्र म एक झन जनमिलिशिया सदस्य ह पुलिस के आगू म आत्मसमर्पण कर दीन।
राष्ट्रीय एकता शिविर
त्रिपुरा के सांस्कृतिक विभाग युवा विकास केन्द्र डहार ले आज ले अगरतला म सुरू होय राष्ट्रीय एकता सिविर बर दुरूग जिला के दू झन स्वयंसेवक – योगेश कुमार साहू अउ छत्रपाल साहू ल चुने गेहे। ओनतीस नवंबर तक चलइया ए सिविर म भारत के कई ठन राज्य के अलावा बांग्लोदश, नेपाल, इंडोनेशिया, श्रीलंका, अफगानिस्तान के प्रतिभागी मन ह सामिल होही। ए सिविर म जवान लइका मन ल एनआईसी ले जुड़े कई ठन गतिविधि मनके बारे म जानकारी दे जाही।
राष्ट्रीय सेवा योजना के स्वयंसेवक योगेश कुमार साहू अउ छत्रपाल साहू ह ए सिविर म छत्तीसगढ़ के अगुवई करत हे। ए दूनों झन स्वयंसेवक ल यूनिसेफ अउ जिला प्रशासन डहार ले चलाय जात युवोदय दुरूग के दूत बनके अपन टीम के संग जिला के विकास बर, मतदाता जागरूकता के संगेसंग कई ठन जरूरी बिसय उपर काम करे हे। एखर काम ल देखत यूनिसेफ ह ए दूनों झन ल नोनी जोहार कार्यक्रम के माध्यम ले राज्य स्तर म सम्मानित करे हे।
राष्ट्रीय लोक अदालत
राष्ट्रीय लोक अदालत के आयोजन अवइया सोलह दिसंबर के राज्यभर के जम्मों न्यायालय मन म करे जाही। राज्य विधिक सेवा प्राधिकरण बिलासपुर डहार ले ए संबंध म आदेस जारी कर देहे। एखर पहिली नौ दिसंबर के लोक अदालत के कारीकरम होवइया रिहीस हे। फेर, विधानसभा चुनाव के सेती उच्च न्यायालय के आदेस म तारीख ल आगू बढ़ाय हे। ए बछर के ए ह आखिरी लोक अदालत हरय। लोक अदालत के तैयारी ल लेके जम्मों विभाग के अधिकारी मनके संग बइठका करे जात हे। लोक अदालत म पेस करे बर दावा आपत्ति, पारिवारिक झगरा, श्रम, बैंक, यातायात, जलकर अउ नगर निगम के संगेसंग बिजली विभाग के प्रकरण मन ह सामिल हे।
ट्रेन परिचालन
दक्षिण पूर्व मध्य रेलवे के बिलासपुर मंडल के तहत चांदिया रोड स्टेशन म प्री-एनआई अउ एनआई कमीशनिंग के तहत तीसरा लाइन म पच्चीस नवंबर ले चार दिसंबर तक काम करे जाही, जेखर सेती कोनों-कोनों यात्री रेलगाड़ी मनके अवई-जवई ह प्रभावित होही। तीस नवंबर के लखनऊ ले चलइया लखनऊ-रायपुर गरीब रथ एक्सप्रेस नइ चलय।
वइसने, ईस्ट-कोस्ट रेलवे के संबलपुर रेलमंडल के तहत सरला-संबलपुर सेक्शन म घलो छब्बीस नवंबर तक ब्लॉक करे गेहे। ए दउरान टिटलागढ़-बिलासपुर पैसेंजर रेलगाड़ी ल संबलपुर म रोक दे जाही। ए रेलगाड़ी ल संबलपुर ले बिलासपुर टिटलागढ़ पैसेंजर बनाके टिटलागढ़ तक चलाय जाही।
कुश्ती प्रतियोगिता
रोहतक म होय उत्तर-पूर्वी क्षेत्र अंतर विश्वविद्यालय कुश्ती प्रतियोगिता म दुरूग के हिमांशु यादव ह संतानवे किलोग्राम म बढ़िया खेल के प्रदर्सन करे हे। हिमांशु यादव ल अखिल भारतीय अंतर विश्वविद्यालय कुश्ती प्रतियोगिता बर चुने गेहे। ए प्रतियोगिता ल सात दिसंबर के पंजाब के मोहाली म सुरू करे जाही। दू दिन के ए प्रतियोगिता म भाग लेबर श्री यादव ह चार दिसंबर के रवाना हो जही।
खबर के मुताबिक हिमांशु यादव ह दुरूग के हेमचंद यादव विश्वविद्यालय म पढ़ाई करत हे। ए उपलब्धि खातिर विश्वविद्यालय के कुलपति डॉक्टर अरूणा पल्टा ह ओमन ल सुभकामना दीन हे।
उहें, महिला वर्ग म ग्रेसी पटेल ह घलो ओनसठ किलोग्राम वर्ग म बढ़िया प्रदर्सन करे हे। ओमन ल घलो अखिल भारतीय अंतर विश्वविद्यालय महिला कुश्ती प्रतियोगिता बर चुने गेहे। ग्रेसी पटेल ह एक दिसंबर के मोहाली बर रवाना होही।
मौसम
प्रदेस म हवा के दिसा ह बदल गेहे। हिमालय कोति ले आवत ठंडा हवा ह उत्तरी छत्तीसगढ़ म आ गेहे। मौसम विभाग ले मिले खबर के मुताबिक अवइया चौबीस घंटा के दउरान प्रदेस के जम्मों क्षेत्र म ए ठंडा हवा के असर देखे जाही। मौसम विज्ञानी एच.पी. चन्द्रा ह बतईन कि अवइया तीन दिन तक प्रदेस के न्यूनतम तापमान म गिरावट होही। ए दउरान रात म जाड़ म बढ़ोत्तरी होही अउ दिन म थोर बहुज जाड़ ह जनाही। उहें, अधिकतम तापमान म बिसेस बदलाव के अनुमान नइ हे।
उहें, राजधानी रईपुर के संगेसंग प्रदेस के अधिकांश हिस्सा म आज हल्का बादर छाय रिहीस। खाड़ी म बने एक ठन सिस्टम के सेती जम्मों जगह तापमान म सामान्य ले करीबन तीन डिग्री सेल्सियस तक बाढ़ गेहे। फेर, हवा के दिसा बदले के बाद बादर सफा होय बर धर लीही।