मतदान के बाद सबो पोलिंग पार्टी मनके वापसी होगे हे अउ ईवीएम मसीन ल जिला मुख्यालय के स्ट्रांग रूम म कड़ा सुरक्षा म राखेगे हवय। खबर के मुताबिक पहिली चरण म बीस विधानसभा क्षेत्र म पाछू सात नवंबर के होय मतदान म छिहत्तर प्रतिसत ले जादा वोट पड़े रिहीस। पहिली अउ दूसर चरण म नब्बें ठन विधानसभा क्षेत्र म कुल मतदान छिहत्तर दसमलव तीन-एक प्रतिसत रिहीस। दूनों चरण के मतगणना अवईया तीन दिसंबर के होही अउ इही दिन चुनाव परिणाम घलो घोषित कर दे जाही।
राज्य के मुख्य निर्वाचन पदाधिकारी रीना बाबा साहेब कंगाले ह बतइन कि दूसर चरण के मतदान बर मतदाता मन म जबरदस्त उछाह रिहीस। लइका, सियान, माईलोगिन, दिव्यांग अउ तृतीय लिंग समुदाय सब्बों झन ह मतदान म अपन जिम्मेंदारी निभाइन, ओमन बतइन कि दूसर चरण के मतदान बर कुल अठ्ठारा हजार आठ सौ तैंतीस मतदान केंद्र बनाय गे रिहीस। ऐमा ले नौ हजार चार सौ चौबीस मतदान केंद्र म वेबकॉस्टिंग के सुविधा देवाय गे रिहीस। सबो मतदान केंद्र म सांतिपूर्ण अउ निष्पक्ष मतदान कराय बर सुरक्षा के कड़ा इंतेजाम करे गे रिहीस। मतदान दल के अलावा करीबन दू हजार सेक्टर ऑफिसर मनके घलो तैनाती करे गे रिहीस। श्रीमती कंगाले ह बतइन कि मतदान के दौरान तकनीकी समस्या के सेति एक सौ सैंतीस बैलेट यूनिट, एक सौ तेरा कंट्रोल यूनिट अउ तीन सौ उनचास वीवीपैट बदले गीस।
खबर के मुताबिक प्रदेस म चालू खरीफ विपणन बछर म समर्थन मूल्य म धान खरीदी एक नवंबर ले सुरू होय हे, जउन ह अवईया इकतीस जनवरी तक चलही। धान खरीदी बर दू हजार सात सौ उनचालीस उपार्जन केंद्र बनाय गे हवय। धान बेचे बर छब्बीस लाख सत्यासी हजार ले जादा किसान मन ह पंजीयन कराइन हे। ए बखत एक सौ तीस लाख मीट्रिक टन धान खरीदे के लक्ष्य राखे गे हवय।
केशकाल-भारी वाहन प्रतिबंध
कोंडागांव जिला के राष्ट्रीय राजमार्ग क्रमांक तीस म केशकाल घाटी म आज ले सड़क बनाय के काम सुरू होगे हवय। इही दौरान केशकाल घाटी रद्दा म अवईया तीस नवंबर तक यात्री बस अउ छोटे चार पहिया गाड़ी ल छोड़के मालवाहक गाड़ी मनके अवई-जवई म रोक रइही। मालवाहक गाड़ी मन ल रईपुर लाय बर केशकाल के विश्रामपुरी चौक ले होवत विश्रामपुरी, बोरई, सिहावा नगरी, धमतरी रद्दा के उपयोग करे जा सकत हे। उहें, कोंडागांव अउ जगदलपुर जाय बर कांकेर जिला के माकड़ी ढ़ाबा तीर ले बने रद्दा ले भानुप्रतापपुर, अंतागढ़ अउ नारायणपुर ले कोंडागांव पहुंचे जा सकत हे।
जिले की चिट्ठी
प्रादेसिक समाचार एकांश, आकाशवाणी रईपुर डहार ले प्रस्तुत कारीकरम जिले की चिट्ठी के प्रसारण काली संझा छै बजके पांच मिनट ले छै बजके दस मिनट तक करे जाही। कारीकरम ल छत्तीसगढ़ के आकाशवाणी के सबो केंद्र मन ह रिले करही। ए बखत के अंक म ‘‘बेमेतरा‘‘ जिला के गतिविधि के बारे म जानकारी दे जाही।
छठ पर्व
छत्तीसगढ़ संघरा देस के आने-आने जघा म चार दिन तक चलईया छठ पूजा उछाह के संग मनाय जावत हे। लोक आस्था के महापर्व छठ पूजा के दूसर दिन आज खरना के अनुष्ठान करे जावत हे। छठ पूजा के तीसर दिन काली लोगन घुटना तक गहरा पानी म खड़े होके डूबत सूर्य ल अरग दिही। उहें, परनदीन सोमवार के उगत सूर्य ल अरग देके संग छठ पूजा अनुष्ठान सिरा जही। छठ पूजा के सेति तालाब अउ नदी मनके घाट के सफई करे गेहे।
विश्व कप क्रिकेट टूर्नामेंट
विश्व कप क्रिकेट टूर्नामेंट के फाइनल मुकाबला काली भारत अउ आस्ट्रेलिया के बीच गुजरात के अहमदाबाद के नरेंद्र मोदी स्टेडियम म खेले जाही। भारत ह सेमीफाइनल मुकाबला म न्यूजीलैंड ल सत्तर रन लेे हराके फाइनल म जघा बनाय हे। उहें, आस्ट्रेलिया के टीम, दक्षिण अफ्रीका ल हराके फाइनल म पहुंचे हे। भारत अउ आस्ट्रेलिया के बीच होवइया मुकाबला ल लेके क्रिकेट प्रेमी मन के बीच उछाह देखे जावत हे।
विधिक साक्षरता जागरूकता शिविर
राज्य अउ जिला विधिक सेवा प्राधिकरण डहार ले कवर्धा म आज विधिक साक्षरता जागरूकता सिविर के आयोजन करे गीस। सिविर के दउरान स्कूली लइका मन ल राज्य विधिक सेवा प्राधिकरण डहार ले बने कहानी नाबालिग लैंगिक अपराधों से बालको का संरक्षण अधिनियम-दू हजार बारा के प्रावधान के बारे म बने लघु फिल्म के प्रदर्सन करे गीस। एखर माध्यम ले पाक्सो कानून के जानकारी दे गीस। सिविर म अतिरिक्त जिला अउ सत्र न्यायाधीस उदय लक्ष्मी सिंह परमार ह विद्यार्थी मन ल असुरक्षित स्पर्स अउ सुरक्षित स्पर्स के संदर्भ म लघु फिल्म ‘‘खुसी’’ के प्रदर्सन करके विस्तार ले जानकारी दीन।
ट्रेन परिचालन
दक्षिण पूर्व मध्य रेलवे के बिलासपुर मंडल म चंदिया रोड स्टेशन म प्री-एन.आई. अउ एन.आई. कमीसनिंग म तीसरा लाइन कनेक्टिविटी के काम ल पच्चीस नवंबर ले चार दिसंबर तक करे जाही। ए दउरान तीस ले जादा गाड़ी मन रद्द रहहीं। उहंे, राजनांदगांव अउ कन्हान तीसरा रेललाइन परियोजना म नागपुर रेलमंडल के कन्हान स्टेसन म नॉन इंटरलॉकिंग काम बीस ले उनतीस नवंबर तक करे जाही। जेखर सेती बीस ले उनतीस नवंबर के दउरान ए रूट म चलइया अड़तालीस ठन गाड़ी मन ह रद्द रइहीं।
भारतीय सेना-कोर इंजीनियर दिवस
भारतीय सेना आज दू सौ तैंतालीसवां कोर के इंजीनियर दिवस मनावत हे। सेना प्रमुख मनोज पाण्डे ह ए मउका म कोर के सबो रैंक के अधिकारी, पूर्व सैनिक अउ परिवार वाला मन ल बधई दीन हे। आकाशवाणी समाचार ले होय गोठबात म कोर के मुख्य इंजीनियर लेफ्टिनेंट जनरल अरविंद वालिया ह किहीन कि कोर के इंजीनियर सेना ल इंजीनियरिंग सहायता प्रदान करथें, सशस्त्र बल अउ दूसर रक्षा संगठन बर बुनियादी सुविधा देथें अउ देस के विसाल सीमा म संपर्क सुविधा बनाके के रखथे। ए सबो काम कोर के चार प्रमुख स्तम्भ- कोम्बेट इंजीनियर, सैनिक इंजीनियर सेवा, सीमा सड़क संगठन अउ मीलिट्री सर्वे के माध्यम ले करे जाथे।
हल्बी/गोण्डी-समाचार बुलेटिन
सुनईया मन ल बतादन काली ईतवार के ‘‘हल्बी अउ गोण्डी‘‘ म समाचार बुलेटिन प्रसारित करे जाही। ए दूनों बुलेटिन ल आकाशवाणी केंद्र जगदलपुर ले प्रसारित करे जाही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छै बजे ले प्रसारित करे जाही।
महिला अग्निवीर-भर्ती रैली
सेना भर्ती कार्यालय जबलपुर डहार ले अग्निवीर सैन्य पुलिस के रूप म महिला उम्मीदवार मन बर इही महिना उनतीस नवंबर के रैली के आयोजन करे जाही। मध्य प्रदेस के अउ छत्तीसगढ़ के नोनी मन दू हजार तेईस-चोबीस के भर्ती चक्र म सैन्य पुलिस म सामिल होय बर प्रतिस्पर्धा करही। भर्ती रैली बिहनिया सात बजे ले जबलपुर के रानी दुर्गावती विश्वविद्यालय शारीरिक शिक्षा विभाग के मैदान म होही। उम्मीदवार मन ल एयरपोर्ट रोड जबलपुर के प्रवेस द्वार म बिहनिया पांच बजे तक रिपोर्ट करना होही।