जानबा के मुताबिक दूसरईया चरण म 70 ठिन विधानसभा क्षेत्र मन म पूरा 958 उम्मीदवार मन चुनई मैदान म हवय। दूसरईया चरण म 1 करोड़ 63 लाख 14 हजार चार सौ उनयासी मतदाता मन अपन मताधिकारी के परयोग कर सकही। दूसरईया चरण के मतदान खातिर प्रदेस म पूरा 18 हजार 833 मतदान केंद्र बनाय गे हवय। इही बीच, मतदान खातिर दूरिहा क्षेत्र मन म मतदान दल मन ल रवाना करे जात हवय।
राज्य शासन डहार ले 17 नवंबर के मतदान के दिन 70 विधानसभा क्षेत्र के जम्मों शासकीय कार्यालय अउ संस्थान मन म सामान्य छुट्टी घोषित करे गे हवय। एखर अलावा प्राइवेट संस्थान, औद्योगिक अउ व्यवसायिक प्रतिष्ठान मन म घलो अधिकारी-कर्मचारी मन ल सवैतनिक छुट्टी दे जाय के निरदेस जारी करीन हे। जारी करे गे आदेस के मुताबिक अइसन कारखाना जउन सप्ताह म सातों दिन काम बूता करथे, उहां पहिली अउ दूसर पाली के मजदूर मन ल मतदान के दिन दू-दू घंटा के अवकाश दे जाय अउ जउन कारखाना सरलग प्रक्रिया म आथे, ओमा काम करईया श्रमिक मन ल बारी-बारी ले मतदान करे के सुविधा दे जावय।
मतदाता फोटो पहचान पत्र
प्रदेस म विधानसभा चुनई के दूसरइया चरण बर चुनाव आयोग ह सबो मतदाता मनके फोटोयुक्त पहचान पत्र जारी कर देहे। राज्य के मुख्य निर्वाचन पदाधिकारी रीना बाबा साहेब कंगाले ह बतईन कि चुनाव म वोट डाले बर सबो मतदाता मन ल अपन निर्वाचक फोटो पहचान पत्र देखाना जरूरी होही। एखर अलावा बारह आने दस्तावेज ल देखाके घलो मतदाता अपन मताधिकार के प्रयोग कर सकही। ओमन ह कहिन कि सामान्य स्थिति म चुनाव आयोग के इही अपेक्षा रइही कि सबो मतदाता मतदान स्थल म अपन वोट डाले ले पहिली अपन पहिचान बताय बर आयोग डहार ले जारी निर्वाचक फोटो पहिचान पत्र दिखाय।
मुख्य निर्वाचन पदाधिकारी ह किहीन कि अगर कोनो मतदाता फोटो पहिचान पत्र नइ दिखा पाथे, त अइसन स्थिति म ओह 12 ठिन आने-आने दस्तावेज मन ले कोनों एक दस्तावेज ल देखाके घलो वोट डाल सकत हे। एखर बर आधार कार्ड, मनरेगा जॉब कार्ड, ड्राईविंग लाइसेंस, पैन कार्ड अउ भारत सरकार डहार ले जारी पासपोर्ट ल वैध दस्तावेज माने गेहे। एखर अलावा सरकारी अउ सार्वजनिक क्षेत्र के कंपनी डहार ले जारी करे गे सेवा पहिचान पत्र यानि आईकार्ड के संगेसंग बैंक अउ डाकघर ले जारी फोटोयुक्त पासबुक, स्वास्थ्य बीमा, स्मार्ट कार्ड अउ आने सरकारी पहिचान पत्र ल घलो मान्य करे गे हवय।
मीडिया प्रमाणन
भारत निर्वाचन आयोग ह विधानसभा चुनई बर इलेक्ट्रानिक अउ सोशल मीडिया के संगेसंग प्रिंट मीडिया म विज्ञापन मनके प्रकाशन संबंधी दिसा-निरदेस जारी करीन हे। एखर तहत मतदान दिवस अउ उंखर एक दिन पहिली पिं्रट मीडिया म प्रकाशित होवईया राजनीतिक विज्ञापन मन ल प्रकाशन ले पहिली प्रमाणित कराना जरूरी होही। ए संबंध म मुख्य निर्वाचन पदाधिकारी रीना बाबासाहेब कंगाले ह बताइन कि 16 अउ 17 नवंबर के प्रकाशित होवईया विज्ञापन ल पहिली, जिला या फेर राज्य स्तरीय मीडिया प्रमाणन समिति ले प्रमाणन सर्टिफिकेट लेना जरूरी होही। श्रीमती कंगाले ह बताइन कि मतदान होय के पहिली दिन अउ मतदान तिथि के प्रिंट मीडिया म कोनो भ्रम पेैदा करइया विज्ञापन प्रकासित होथे, त अइसन राजनीतिक दल अउ प्रत्यासी, जउन एखर ले प्रभावित होथे, उंखर तीर कोनो तरह के खंडन करे के अवसर नइ होही। अइसन म स्वतंत्र, निष्पक्ष अउ पारदर्सी चुनई खातिर विज्ञापन मन ल पहिली ले प्रमाणन कराना जरूरी हे।
भाई-दूज
आज भाईदूज के तिहार पारंपरिक अउ बड़ उछाह के संग मनाय जावत हे। राजधानी रईपुर के संगेसंग जम्मों प्रदेस के आने-आने जिला मन म भाईदूज के मउका म बहिनी मन अपन भाई मन के माथा म तिलक लगाके उंखर मनके उज्जवल भविष्य के कामना करीन। ए मउका म भाई मन घलो अपन बहिनी मन ल उपहार दीन।
कार्तिक मास के सुक्ल पक्ष के द्वितीया तिथि के मनाय जाने वाला ए तिहार ल यम द्वितीया घलो कहे जाथे। भाई मन खातिर बहिनी मन के मया दुलार के ए तिहार के बारे म अइसन मानता हे कि, यम देवता ह अपन बहिनी यमी ल लंबा इंतेजार के बाद इही दिन दरसन दे रिहीस, तभे ले ए प्रथा चलत हवय।
ऐति प्रदेस के आने-आने जिला मन म आज मातर के तिहार घलो बड़ उछाह के संग मनाय जावत हे। ए मउका म कुछू-कुछू जघा मन म अखाड़ा के मनखे मन जोरदरहा करतब घलो दिखइन, उहें, गांव वाला मन देवी-देवता के पूजा-अर्चना कर सुख-समृध्दि के कामना करीन।
जानबा के मुताबिक आजेच के दिन राउत मन मैदान म गाय गरवा के बरदी के बीच म हैरतअंगेज करतब दिखाथे। संगेसंग पारंपरिक लोकनृत्य राउत नाचा करथे। उहें, संझा के मेला-मड़ई के आयोजन घलो करे जाथे।
निर्वाचन आयोग-दौरा
भारत निर्वाचन आयोग डहार ले छत्तीसगढ़ म विधानसभा निर्वाचन खातिर नियुक्त बिसेस सामान्य प्रेक्षक धर्मेन्द्र गंगवार, बिसेस व्यय प्रेक्षक राजेश टुटेजा बिसेस पुलिस प्रेक्षक अनिल कुमार शर्मा अउ मुख्य निर्वाचन अधिकारी रीना बाबासाहेब कंगाले ह काली कोरबा अउ बिलासपुर के दौरा कर निर्वाचन के तियारी के समीक्षा करीन। ओमन दूनों जिला मन म जिला निर्वाचन अधिकारी अउ आने बड़का अधिकारी मनके बइठका लेके ओमन ल जरूरी निरदेस दीन। जम्मों अधिकारी मन मतदान केंद्र मन म जाके मतदाता मन ल दे जात सुविधा के जायजा घलो लीन। प्रेक्षक मन ह दिव्यांग मतदाता मन खातिर रैम्प के बेवस्था, वोटिंग के दिन मतदाता मनके पोलिंग बूथ म जाय-आय के बेवस्था, सुरक्षा बेवस्था, वेब कास्टिंग, पेयजल बेवस्था समेत निर्वाचन ले जुड़े आने-आने गतिविधि के जानकारी लीन।
बिसेस प्रेक्षक मन 80 बछर अउ ओखर ले जादा उमर के सियान अउ दिव्यांग जन जउन मन होम वोटिंग नइ कर पाय रिहीन अइसन मतदाता ल मतदान केंद्र तक लाय ले जाय खातिर गाड़ी के सुविधा उपलब्ध कराय के निरदेस घलो दीन हवय।
बिसेस सामान्य पर्यवेक्षक मन के ए टीम आज रायगढ़ पहुंचिस। ए दौरान ओमन कलेक्टोरेट सभा कक्ष म विधानसभा चुनई के तियारी के संबंध म समीक्षा बइठका लीन।
अउ अब थोरकुन समाचार सार म –
– राजनांदगांव म रहईया एक ठिन परिवार के 3 झिन मनखे मन के एक सड़क हादसा म मउत होगिस। ए सबो मन राजनांदगांव ले विशाखापट्टनम जावत रिहीन। इही दौरान आंध्रप्रदेस के विजय नगर तीर एखर मनके कार हादसा होगिस। हादसा म गंभीर रूप ले घायल एक झिन महिला के ईलाज विशाखापट्टनम के अस्पताल म चलत हवय।
– मनेन्द्रगढ़-चिरमिरी-भरतपुर जिला म मतदान दल ल लेके मनेन्द्रगढ़ ले भरतपुर खातिर रवाना होइस, एक ठिन बस के धोवाताल तीर हादसा होगिस। ए घटना म दल के जम्मों मनखे मन सुरक्षित हवय।
अउ
– बेमेतरा म चुनई काम म लापरवाही बरते के मामला म जिला निर्वाचन अधिकारी ह जिला उद्योग विभाग के प्रबंधक समेत 5 झिन शिक्षक मन ल निलंबित कर दीन हवय।