प्रदेस म विधानसभा चुनई के दूसरइया चरण के प्रचार अभियान बड़ जोरदरहा चलत हवय। भारतीय जनता पार्टी के एक झिन बड़का नेता अउ प्रधानमंत्री नरेंद्र मोदी काली 13 नवंबर के एक दिन खातिर छत्तीसगढ़ आवत हे। ए दउरान श्री मोदी मुंगेली जिला के जमकुही गांव म भाजपा प्रत्यासी मनके पक्ष म आमसभा ल संबोधित करही। भाजपा के प्रदेस उपाध्यक्ष भूपेन्द्र सवन्नी ह बताइन कि प्रधानमंत्री के कारीकरम ले मुंगेली विधानसभा के जम्मों क्षेत्र म जबरदस्त उछाह देखे ल मिलत हे।
प्रधानमंत्री काली महासमुंद जिला के बेमचा भाठा मैदान म घलो जनसभा ल संबोधित कर पार्टी प्रत्यासी मन के पक्ष म समर्थन मांगही। इही बीच, कांग्रेस के एक झिन बड़का नेता भूपेश बघेल जघा-जघा जनसभा करत हवय।
कांग्रेस-गृह लक्ष्मी योजना
मुख्यमंत्री भूपेश बघेल ह घोषणा करीन हे, कि अगर राज्य म फेर कांग्रेस के सरकार बनही त, प्रदेस म ‘‘छत्तीसगढ़ गृह लक्ष्मी योजना‘‘ सुरू करे जाही। ए योजना म जम्मों माईलोगिन मन ल हर बछर 15 हजार रूपिया के रासि दे जाही। आज राजधानी रईपुर म पत्रकार मन ले गोठबात करत श्री बघेल ह किहीन कि कांग्रेस के सरकार बने म सर्वे कराय जाही। जेखर बाद माईलोगिन मनके खाता म रासि सीधा ऑनलाइन ट्रांसफर कर दे जाही।
चुनाव आयोग-भाजपा/कांग्रेस
चुनाव आयोग ह प्रदेस के दू ठिन जिला-सारंगढ़ अउ धरमजयगढ़ के भाजपा प्रत्यासी मन ल नोटिस देके पार्टी डहार ले माईलोगिन मन ल रासि दे खातिर फॉर्म भरवाए जाय के जवाब मांगे हे।
जानबा के मुताबिक भाजपा डहार ले महिला मतदाता मन ल लुभाय के कोसिस करत फर्जी फॉर्म भरवाए जाय म कांग्रेस ह चुनई आयोग ले सिकाइत करे रिहीन। अपन सिकाइत म कांग्रेस ह केहे रिहीस कि ए फॉर्म पूरा तरीका ले अवैध हवय अउ महिला मतदाता मन ल लालच देवय के परयास हवय। बतादन कि प्रदेस म होवत विधानसभा चुनई खातिर भाजपा डहार ले जारी घोषणा पत्र म प्रदेस के सादी-सुदा माईलोगिन खातिर ‘‘महतारी वंदन योजना‘‘ सुरू करे के घोषणा करे गे रिहीस।
उहें, भारतीय जनता पार्टी ह कांग्रेस डहार ले किसान मनके कर्जा माफी खातिर फॉर्म भराय जाय के जानकारी देवत आदर्स आचार संहिता के उल्लंघन के सिकाइत चुनई आयोग ले करीस हे। भाजपा के डॉक्टर विजय शंकर मिश्रा ह ‘‘मुख्य निर्वाचन आयुक्त अउ मुख्य निर्वाचन पदाअधिकारी छत्तीसगढ‘‘़ ले कांग्रेस के खिलाफ अपन सिकाइत दर्ज करावत किहीन हे कि ए ह आदर्स आचार संहिता के उल्लंघन हवय।
प्रसारण दिवस
आज लोक सेवा प्रसारण दिवस मनाय जावत हे। ए दिन राष्ट्रपिता महात्मा गांधी के 1947 म ऑल इंडिया रेडियो दिल्ली, जेला अब आकाशवाणी के नांव ले जाने जाथे, ओ स्टूडियो म पहिली अउ आखिरी बार आय के याद म हर बछर मनाय जाथे। ओ दिन ओमन विभाजन के बाद हरियाणा के कुरूक्षेत्र म अस्थाई रूप ले बसाय गे विस्थापित लोगन मन ल संबोधित करे रिहीन।
ए मउका म आज नई दिल्ली के आकाशवाणी भवन परिसर म एक ठिन समारोह के आयोजन करे गीस।
दीपावली
कार्तिक अमावस्या के दिन मनाय जाने वाला दीया के तिहार देवारी आज छत्तीसगढ़ समेत जम्मों देसभर म बड़ उछाह के साथ मनाय जावत हे। ए तिहार अंधकार अउ निरासा ल दूर भगा के लोगन मनके जिनगी म सुख, सांति अउ समृद्धि लाय के तिहार हरय। देवारी के मउका म आज लोगन मन के घर-बार म दीया अउ बिजली के रंग-बिरंगा झालर मनके रोसनी ह जगमगावत हे। अइसन मान्यता हवय कि लंका म जीत हासिल करे के बाद भगराम राम के अयोध्या पहुंचे के खुसी म लोगन मन दीया बार के उंखर सुवागत करे रिहीन। तेखरे सेती ए खुसी म आज के दिन देवारी तिहार मनाय जाथे।
देवारी के मउका म ए बेरा छत्तीसगढ़ के आने-आने शहर अउ गांव म लोगन मन लक्ष्मी पूजा के तियारी करत हवय। घर अउ अंगना ल दीया बार के रोसन करे गे हवय। घर के बाहिर सुघ्घर रंगोली घलो बनाय गे हवय, अउ लइका मन ह आतिसबाजी घलो सुरू कर दे हवय।
देवारी के मउका म आज बिहनिया ले लोगन मन खरीददारी करत रिहीन। बाजार म ग्राहक मनके भीड़ देखे ल मिलत हे। लोगन मन मिठाई, पटाखा अउ कपड़ा के संगेसंग मौसमी फल के घलो खरीदी करत हे। उहें, पूजा बर देवी लक्ष्मी के आकर्षक मूर्ति अउ अपन घर ल सजाय केे जिनिस घलो खरीदत हवय।समृध्दि के प्रतीक धान के बाली ले बने झालर, याने फाता के मांग घलो हवय। ज्योति पर्व देवारी म लोगन मन ह सोना-चांदी के संग बर्तन के घलो खरीददारी करत हवय।
राष्ट्रपति द्रौपदी मुर्मू, उप राष्ट्रपति जगदीप धनखड़ अउ प्रधानमंत्री नरेन्द्र मोदी ह देसवासी मन ल अपन बधाई अउ सुभकामना दीन। उहें, छत्तीसगढ़ के राज्यपाल विश्वभूषण हरिचंदन अउ मुख्यमंत्री भूपेश बघेल ह घलो प्रदेसवासी मन ल देवारी तिहार के अपन सुभकामना दीन हे।
प्रधानमंत्री-दिवाली
प्रधानमंत्री नरेंद्र मोदी ह आज हिमाचल प्रदेस के लेपचा म सुरक्षा बल के संग देवारी तिहार मनाइन। श्री मोदी ह सोशल मीडिया पोस्ट म किहीन हे कि देस के बहादुर सुरक्षा बल के संग देवारी तिहार मनाना बड़ गौरव के अनुभव हवय। ओमन किहीन कि सुरक्षा बल के जवान अपन-अपन परिवार ल दूरिहा रहिके राष्ट्र के प्रहरी बनके अपन समर्पन ले हमर जीवन ल उज्जवल अउ सुरक्षित करथे। प्रधानमंत्री ह किहीन कि सुरक्षा बल मनके साहस अटूट होथे, दुर्गम क्षेत्र म तैनात अउ अपन परिवार ले दूरिहा रहिके जवान मनके बलिदान, समर्पण लोगन मन ल सुरक्षा प्रदान करथे। श्री मोदी ह किहीन कि भारत अपन वीर जवान मनके सदैव आभारी रइही।
एनजीटी-पटाखा निर्देश
राष्ट्रीय हरित प्राधिकरण-एनजीटी ह देवारी, छठ पूजा, गुरूपर्व, नवा वर्ष अउ क्रिसमस ल देखत पटाखा फोड़े के संबंध म निरदेस जारी करे हे। एनजीटी के दिसा-निरदेस के मुताबिक राज्य सासन डहार ले देवारी के दउरान पटाखा फोड़े बर रतिहा आठ बजे ले दस बजे के बीच दू घंटा के बेरा तय करे गे हवय। उहें, छठ पूजा म बिहनिया 6 ले 8 बजे तक, गुरूपरब म रतिहा 8 ले 10 बजे तक, नववर्ष अउ क्रिसमस के मउका म रतिहा 11 बजके 55 मिनट ले साढ़े बारह बजे तक पटाखा फोड़े के अनुमति दे गे हवय।
इही, बीच नेत्ररोग डॉक्टर मन ह देवारी तिहार म पटाखा जलात समय आंखी के सुरक्षा खातिर सावधानी बरते के सलाह दीन हे। ओमन किहीन हे कि पटाखा ल खुला जघा म ही जलाय जाना चाही। पटाखा जलाय के बेरा म सफा पानी ल अपन तीर म ढाक के राखय। एखर अलावा रोड म अउ अवईया- जवईया जघा म पटाखा ल नइ फोड़य, आतिसबाजी करत समय सादा चस्मा घलो पहिरे। संगेसंग पटाखा जलाय खातिर लंबा लकड़ी के इस्तेमाल करय। उहें, डॉक्टर मन ह पटाखा जलाय के बेरा म लइका मन उपर खास ध्यान देवय के बात घलो किहीन हे।
दिव्यांगजन-ब्याज छूट
केंद्र सरकार ह ‘राष्ट्रीय दिव्यांग वित्त अउ विकास निगम‘ ले कर्जा लेवइया दिव्यांगजन मन ल ब्याज दर म 1 प्रतिसत छूट देकेे घोषणा करीन। दिव्यांग मन के वित्तीय समावेसन अउ आर्थिक सशक्तिकरण ल बढ़ावा दे खातिर ए निर्णय लेगे हवय। दिव्यांगजन सशक्तिकरण विभाग के सचिव राजेश अग्रवाल ह किहीन हे कि ए पहल करे ले वित्तीय मदद चाहने वाला दिव्यांग मनखे मन उपर आर्थिक बोझ कम करे अउ ऋण चुकाय के अपन जिम्मेदारी के भावना ल प्रोत्साहित करना हे।
प्रदेस के न्यूनतम तापमान म आज ले गिरावट सुरू होगे हवय। रईपुर स्थित मौसम विज्ञान केंद्र के मौसम विज्ञानी एच.पी.चन्द्रा ह बताइन कि प्रदेस के न्यूनतम तापमान म अवईया तीन दिन के दौरान दू ले तीन डिग्री सेल्सियस के गिरावट आय के संभावना हवय। उहें, अधिकतम तापमान म एक ले दू डिग्री सेल्सियस के कमी आ सकथे। श्री चंद्रा ह बताइन कि उत्तरी छत्तीसगढ़ के कुछेक हिस्सा मन म बिहनिया कोहरा छाय रेहे के संभावना हावय।