ओति, केंद्रीय मंत्री राजनाथ सिंह आज एक दिन के दौरा म छत्तीसगढ़ पहुंचिन तह ओमन सरगुजा जिला के सीतापुर म भाजपा प्रत्यासी रामकुमार टोप्पो के पक्ष म सभा लीन। एखर बाद श्री सिंह मनेंद्रगढ़-चिरमिरी-भरतपुर जिला के सलगावान कला अउ दुरूग जिला के पाटन विधानसभा के दरबार मोखली म जनसभा ल संबोधित करीन।
दूसर डहार मुख्यमंत्री भूपेश बघेल ह आज प्रदेस के कई ठिन जिला मन म पार्टी प्रत्यासी मनके पक्ष म जनसभा लीन। ए दौरान कई ठिन जघा मन म कार्यकर्ता मन रैली घलो निकालीन।
ऐति, जांजगीर-चांपा जिला के अकलतरा म बहुजन समाज पार्टी के कार्यकर्ता मन पार्टी प्रत्यासी के पक्ष म रैली निकालीन। ए रैली म बसपा के प्रदेस अध्यक्ष म हेमंत पोयाम घलो सामिल होईन।
विस-दूसर चरण मतदान
छत्तीसगढ़ म विधानसभा चुनाव के दूसर चरण बर अवईया सतरा नवंबर के सत्तर ठिन विधानसभा क्षेत्र म वोट डाले जाही। एखर बर बिहनिया आठ बजे ले संझा पांच बजे तक के बेरा राखे गेहे। फेर बिन्द्रानवागढ़ विधानसभा क्षेत्र के नौ ठिन मतदान केंद्र-कामरभौदी, आमामोरा, ओढ, बड़े गोबरा, गंवरगांव, गरीबा, नागेश, सहबीनकछार, अउ कोदोमाली म बिहनिया सात बजे ले मंझनिया तीन बजे तक ले वोटिंग होही। एखर संगे बिन्द्रानवागढ़ के बांचे मतदान केंद्र मन म आने उनहत्तर ठिन विधानसभा क्षेत्र असन बिहनिया आठ बजे ले संझा पांच बजे तक ले वोट दे जाही।
राज्य म विधानसभा चुनाव के दूसर चरण म मतदान वाले सत्तर ठिन विधानसभा क्षेत्र म कुल नौ सौ अंठावन झिन उम्मीदवार मैदान म हे। दूसर चरण म राज्य के कुल करीबन एक करोड़ तिरसठ लाख चौदह हजार चार सौ उनयासी झिन मतदाता मन अपन मताधिकार के इस्तेमाल करही। एमा इकयासी लाख एकचालीस हजार ले जादा पुरूष मतदाता अउ इकयासी लाख बहत्तर हजार ले जादा माईलोगिन मतदाता के संगे छै सौ चौरासी झिन तृतीय लिंग याने ट्रांस जेंडर सामिल हावय।
मतदाता जागरूकता
प्रदेस म विधानसभा चुनाव के तहत सत-प्रतिसत मतदान तय करे खातिर स्वीप कारीकरम के चलत अब्बड़ अकन जागरूकता कारीकरम राखे जात हे। इही, कड़ी म अवईया सतरा नवंबर क होवइया विधानसभा चुनाव म सबो मतदाता मन वोट दे बर जाय, तेखर बर जिला निर्वाचन अधिकारी डॉक्टर सर्वेश्वर नरेंद्र भुरे के अगुवई म रईपुर के धरमपुरा ले जोरा तक बाईक रैली निकाले गीस। रैली के सुभारंभ ल मुख्य निर्वाचन पदाधिकारी रीना बाबासाहेब कंगाले ह हैप्पी वोटिंग लिखाय गुब्बारा मन ल हवा म उड़ा के करीन। एखर बाद उंखर हाथ म चुनई-चिरई मतदान बंधन बांधे गीस। ए बाईक रैली म बड़ झिन माईलोगिन मन भाग लीन।
उहें, सारंगढ़-बिलाईगढ़ जिला के शासकीय उच्चतर माध्यमिक विद्यालय हरदी म मतदाता जागरूकता अभियान राखे गीस।
इही बीच, ओति, बिलासपुर पुलिस ह निष्पक्ष अउ शांतिपूर्ण वोटिंग बर शहर म फ्लैग मार्च करीस।
सी-विजिल ऐप
छत्तीसगढ़ विधानसभा चुनाव के तहत केंद्रीय निर्वाचन आयोग के सिटीजन विजिल ऐप-सी विजिल म मिलत सिकइत मन उपर तेजी ले कार्रवाई करे जात हे। अधिकारीक जानकारी मुताबिक सी-विजिल ऐप के माध्यम ले अब तक राज्य म कुल तीन हजार आठ सौ इंक्यान्वे सिकइत मिले हावे। जेमा ले तीन हजार दू सौ अठ्ठारा सिकइत के निराकरण कर दे गेहे। उहें, आने सिकइत मन उपर कार्रवाई करे जात हे।
इहां ए बतादन कि सी-विजिल ऐप म मिलइया सिकइत मनके तुरते कार्रवाई तय करे बर मुख्य निर्वाचन पदाधिकारी कार्यालय म अलग ले कंट्रोल रूम बनाय गेहे। ऐमा आम लोगन मन आचार संहिता उल्लंघन के मामला के सिकइत सोझे फोटू अउ वीडियो ऑडियो क्लिप के माध्यम ले करत हे। ए सिकइत गुप्त रूप ले घलो करे जा सकत हे।
नरक-चौदस
आज छोटे देवारी हरय। एला रूप चौदस अउ नरक चौदस के नांव ले घलो जाने जाथे। परंपरा मुताबिक रूप चौदस म घर-दुवारी के अंगना, बाहिर म चउंक पुर के माटी या फेर पिसान के चौदह ठिन दिया बनाके जलाय जाही। रोसनी के ए तिहार बेरा छोटे-बड़े दुकान अउ घरोघर बिजली के झालर ले सुघ्घर सजाए जावत हे।
उहें, दीया के तिहार दीपपर्व सुरहूत्ती याने दीवाली काली मनाय जाही। सुरहूती अउ देवारी ल लेके लोगन मन म भारी उत्साह राजधानी रईपुर समेत प्रदेसभर के बाजार मन म जोरदरहा चहल-पहल अउ रौनक देखे ल मिलत हे।
पटाखे-निर्देश
ए बेर के सुरहूती अउ देवारी म काली हरित पटाखा चलाए के परमिसन दे गेहे। राष्ट्रीय हरित न्यायाधिकरण के मुताबिक छत्तीसगढ़ म पर्यावरण के सुरक्षा खातिर ए निर्देस निकाले गेहे। ए निरदेस के चलत काली, दूवे घंटा फटाखा फोड़े के परमिसन दे गेहे। ए निरदेस देवारी के संगे छठ पूजा, गुरू परब अउ क्रिसमस के संगे नवा बछर बर घलो लागू रइही। सुप्रीम कोर्ट अउ एन.जी.टी. के आदेस मुताबिक जिला प्रशासन ल ए हिदायत ल पालन कराय बर केहे गेहे। अदालत के निरदेस मुताबिक देवारी अउ सुरहूती अउ गुरू परब बर रतिहा आठ बजे ले दस बजे तक छठ पूजा म बिहनिया छै बजे ले आठ बजे तक अउ क्रिसमस के संगे नवा बछर बर रतिहा ग्यारा बजके पचपन मिनट ले रतिहा साढ़े बारा बजे तक के बेरा फटाखा चलाय बर तय राखे गेहे। सुप्रीम कोर्ट डाहर ले बछर दू हजार अठ्ठारा म जारी आदेस मुताबिक काली उंही फटाखा ल बाजार म बेचे जा सकही, जेमा फटाखा फुटे के आवाज तय सीमा भीतर होय। लरी वाले फटाखा के बनई, बेचई अउ बौरई उपर बेन लगाय गेहे।
इही बीच, नेत्ररोग विशेषज्ञ डॉक्टर मन देवारी तिहार म फटाखा जलाय के बेरा आंखी के सुरक्षा बर बिसेस सावाधानी राखे के सलाह देहे। डॉक्टर मन केहे हे कि फटाखा चलात बेरा संग म साफ पानी तीन म ढांक के जरूर राखे। संगे रस्ता बांट अउ भीड़भाड़ वाले जघा म फटाखा झन फोड़य। उहें, डॉक्टर मन यहू किहीन कि फटाखा फोड़त बेरा नान्हे लईका मन उपर खास ध्यान राखय।
ट्रेन-परिचालन
छठ पूजा ल देखत दुरूग अउ पटना के बीच एक फेरा बर छट पूजा स्पेसल एक्सप्रेस ट्रेन के सौहलियत दे गेहे। ए ट्रेन ह पन्दरा नवंबर के मंझनिया दू बजके पैंतालीस मिनट म दुरूग ले छुटही अउ राउरकेला, रांझी, गया होवत बिहान दिन सोला नवंबर के बिहनिया साढ़े नौ बजे पटना पहुंचही।
अइसने ए ट्रेन ह सोला नवंबर के बिहनिया साढ़े दस बजे पटना ले छुटही अउ सत्तरा नवंबर के बड़े फजर दुरूग पहुंचही।
उहें, पैसेंजर मन के सौहलियत ल ध्यान म राखत केंसल होय बिलासपुर सहडोल-बिलासपुर मेमू स्पेसल के आज ले चलई सुरू होगे हे।
इही बीच, यात्री मनके मांग उपर आज ले खोंगसरा टेसन म नर्मदा एक्सप्रेस के स्टापेज दे गेहे।
कोंडागांव-स्वर्ण पदक
गोवा म राखेगे सैंतीसवां राष्ट्रीय खेल मन म कोंडागांव के शिक्षक ह मिनी गोल्फ प्रतियोगिता म गोल्ड मेडल जीतके जिला अउ प्रदेस के नांव उज्जर करे हे। शिक्षक मेहुल साहू के ए उपलब्धि उपर कलेक्टर दीपक सोनी ह उंखर सम्मान करीन हे।
इहा ए बतादन कि शिक्षक मेहुल साहू के पोस्टिंग जिला के शासकीय उच्च प्राथमिक शाला देवडोंगर म हवय।