भाजपा डहार ले जारी घोषणा पत्र ल नाम दे गेहे -मोदी के गांरटी- धान के कटोरा कहे जाने वाले छत्तीसगढ़ के धान उत्पादन करइया किसान मन बर सबले बड़े घोषणा होय हे। घोषणा पत्र म कहे गेहे कि भाजपा के सरकार बने ले कृषक उन्नति योजना शुरू करे जाही अउ किसान मनले इक्कीस कुंटल प्रति एकड़ के हिसाब ले तीन हजार एक सौ रूपिया म धान खरीदी करे जाही। एखर अलावा महतारी वंदन योजना शुरू कर राज्य के प्रत्येक विवाहित महिला ल बारा हजार रूपिया के वार्षिक वित्तीय सहायता दे जाही । गरीब परिवार के महिला मन ल पांच सौ रूपिया म गैस सिलेंडर देवाय जाही। एखरे संग रानी दुर्गावती योजना के शुरूआत कर बीपीएल वर्ग के बालिका के जनम म डेढ़ लाख रूपिया दे जाही। ये राशि बालिका के वयस्क होय म दे जाही। एक लाख रिक्त शासकीय पद म समयबद्ध अउ पारदर्शी तरीका ले भर्ती कराय जाही। एखरे संग छत्तीसगढ़़ उद्यम क्रांति योजना के तहत प्रदेश के युवा मन ल पचास प्रतिशत सब्सिडी के संग ब्याजमुक्त ऋण दे जाही। तेंदूपत्ता के संग्रहण पांच हजार पांच सौ रूपिया प्रति मानक बोरा के हिसाब ले करे जाही अउ अतिरिक्त संग्रह करइया मन ल चार हजार पांच सौ रूपिया के बोनस दे जाही। नवा रायपुर ल सेंट्रल भारत के इनोवेशन हब बनाय जाही।
एखर अलावा आगामी जनवरी माह म अयोध्या के श्रीराम मंदिर म प्राण प्रतिष्ठा कार्यक्रम संपन्न होय के बाद छत्तीसगढ़वासी मन ल श्रीराम लला के दर्शन कराय बर अयोध्या ले जाय के संबंध म योजना बनाय जाही।
भाजपा घोषणा पत्र-02
घोषणा पत्र म केहे गेहे कि प्रदेश म एक हजार किलोमीटर लंबा शक्तिपीठ परियोजना के शुरूआत करे जाही, जेखर माध्यम ले पांच शक्तिपीठ ल जोडे़ के संगेसंग विकसित घलो करे जाही।
भाजपा ह अपन घोषणा पत्र म केहे हे कि प्रदेश के हर परिवार ल अब दस लाख रूपिया तक के स्वास्थ्य सुविधा प्रदान करे जाही। एखरे संग सस्ता दवाई उपलब्ध कराय बर प्रदेश म पांच सौ नवा जनऔषधि केंद्र खोले जाही।
एखरे संग हर संभाग म एम्स के तर्ज म सिम्स अउ हर लोकसभा क्षेत्र म आईआईटी के तर्ज म सीआईटी के निर्माण करे के बात केहे गेहे। उंहे प्रदेश म भाजपा के सरकार बने ले प्रधानमंत्री आवास योजना के लंबित अठारा लाख घर के निर्माण पूरा करे बर धनराशि आबंटित कर दे गेहे। दू साल के अंदर हरएक घर म पीये के साफ पानी उपलब्ध कराय जाही।
घोषणा पत्र म केहे गेहे कि प्रदेश म भाजपा के सरकार बने ले तुहर दुआर योजना के तहत ग्राम पंचायत अउ वार्ड स्तर म डेढ़ लाख बेरोजगार युवा मनके भर्ती करके घर पहुंच सार्वजनिक सेवा सुनिश्चित करे जाही।
भारतीय जनता पार्टी ह छत्तीसगढ़ म बस्तर अउ सरगुजा संभाग के संगेसंग राज्य के सबो नब्बे विधानसभा क्षेत्र बर स्थानीय जरूरत ल ध्यान म राखत हुए अलग ले घोषणा पत्र जारी करे हे।
कंाग्रेस बयान
इही बीच कंाग्रेस ह भारतीय जनता पार्टी के घोषणा पत्र ल लेके केहे हे कि भाजपा ह कंाग्रेस के नकल करे के कोसिस करे हे। प्रदेश कंाग्रेस संचार विभाग के अध्यक्ष सुशील आनंद शुक्ला ह कीहिन कि ये ह भूपेश बघेल सरकार के उपलब्धि आय कि धान के बोनस के विरोध करइया मन आज धान के खरीदी ल तीन हजार एक सौ रूपिया म करे के बात करत हे। ओमन ह भाजपा के घोषणा पत्र ल झूठा वादा बताइन।
विस चुनाव प्रचार
छत्तीसगढ़ म होवइया विधानसभा चुनाव म राजनीतिक दल के स्टार प्रचारक मनके दौरा लगातार जारी हे। इही कड़ी म भाजपा के वरिष्ठ नेता अउ प्रधानमंत्री नरेंद्र मोदी काली चार नवंबर के छत्तीसगढ़ के दौरा म आवत हे। ये दउरान ओमन दुर्ग म भाजपा प्रत्याशी मनके पक्ष म चुनावी सभा ल संबोधित करही।
उंहे भाजपा के वरिष्ठ नेता अउ केंद्रीय रक्षामंत्री राजनाथ सिंह काली सुकमा म आमसभा ल संबोधित करहीं। एखर बाद श्री सिंह सीतापुर अउ मनेन्द्रगढ़ म आयोजित सभा म शामिल होही।
दूसर डहार मुख्यमंत्री भूपेश बघेल ह आज अभनपुर कांकेर अउ दुर्ग जिला के दौरा म रीही। ये दउरान ओमन कंाग्रेस के उम्मीदवार मनके पक्ष म तीन ठन बड़े सभा ल संबोधित करही।
विस चुनाव उम्मीदवार
छत्तीसगढ़ म होवइया विधानसभा चुनाव के तहत दूसर चरण के सत्तर विधानसभा क्षेत्र मन म नाम वापसी के बाद अब नौ सौ अंठावन उम्मीदवार चुनाव मैदान म हे। पाछू दू नवंबर के नाम वापसी के अंतिम दिन कुल एक सौ आठ अभ्यर्थी मन अपन नाम वापिस ले लेहे। ये विधानसभा क्षेत्र मन म सतरा नवंबर के मतदान होही।
इही बीच विधानसभा चुनाव के पहिलइया चरण के तहत सात नवंबर के दस ठन विधानसभा क्षेत्र मन म बीहनिया सात ले मंझनियंा तीन बजे तक अउ दस ठन विधानसभा क्षेत्र मन म बीहनिया आठ बजे ले संझा पांच बजे तक वोट डारे जाही। मोहला-मानपुर, अंतागढ़, भानुप्रतापपुर, कंाकेर, केशकाल, कोंडागांव, नारायणपुर, दंतेवाड़ा, बीजापुर अउ कांेटा विधानसभा क्षेत्र म बीहनिया सात बजे ले मंझनियंा तीन बजे तक वोट डारे जाही।
उंहे पंडरिया, कवर्धा, खैरागढ़, डोंगरगढ़, राजनंादगंाव, डोंगरगांव, खुज्जी, बस्तर, जगदलपुर अउ चित्रकूट विधानसभा क्षेत्र म बीहनिया आठ बजे ले संझा पांच बजे तक मतदान होही। पहिलइया चरण के बीस ठन विधानसभा क्षेत्र म कुल दू सौ तेइस उम्मीदवार चुनाव मैदान म हे। पहिलइया चरण म राज्य के कुल चालीस लाख अठहत्तर हजार छै सौ इक्यासी मतदाता अपन मताधिकार के इस्तेमाल कर सकही।
इही बीच, भारत निर्वाचन आयोग ह छत्तीसगढ़ बर तीन विशेष प्रेक्षक नियुक्त करे हे। सेवा निवृत्त आईएएस अधिकारी धर्मेन्द्र एस. गंगवार ल छत्तीसगढ़ बर विशेष सामान्य प्रेक्षक नियुक्त करे गेहे। उंहे सेवा निवृत्त आईपीएस अधिकारी अनिल कुमार शर्मा ल विशेष पुलिस प्रेक्षक अउ भारतीय राजस्व सेवा के सेवानिवृत्त अधिकारी राजेश टूटेजा ल विशेष व्यय प्रेक्षक नियुक्त करे गेहे।
ओपन स्कूल परिणाम
छत्तीसगढ़ राज्य ओपन स्कूल डहार ले कक्षा दसवी अउ बारहवीं के परीक्षा परिणाम घोषित कर दे गेहे। कक्षा बारहवीं म सतरा हजार आठ सौ इकतालीस परीक्षार्थी शामिल होय रीहिन। जेमा पांच हजार एक सौ उनतालीस परीक्षार्थी पास होय हे।
उंहे कक्षा दसवीं के परीक्षा म शामिल पंद्रह हजार पांच सौ अस्सी परीक्षार्थी मन म तीन हजार आठ सौ तेरह परीक्षार्थी पास होय हे।
गौरतलब हे कि कक्षा दसवीं अउ बारहवीं के ओपन स्कूल के परीक्षा ए साल सितंबर-अक्टूबर म आयोजित होय रीहिस हे।
प्रदेश म अवइया चौबीस घंटा के दौरान एक दू ठन जगा म हल्का बरसा होय या गरज चमक के संग छींटा पड़े के संभावना हे। मौसम विभाग ले मिले जानकारी के अनुसार एक ठन पश्चिमी विक्षोभ मध्य क्षोभ मंडल म स्थित हे। एखर असर ले प्रदेश म बंगाल के खाड़ी ले नमी आवत हे। उंहे प्रदेश म अधिकतम अउ न्यूनतम तापमान म कोई विशेष परिवर्तन होय के संभावना नइ हे।