पीएम कांकेर
भाजपा के वरिष्ठ नेता अउ प्रधानमंत्री नरेंद्र मोदी ह आज छत्तीसगढ़ के कंाकेर म भाजपा के विजय संकल्प रैली ल संबोधित करत कीहिन कि छत्तीसगढ़ बर ये विधानसभा चुनई सिरिफ विधायक, मंत्री या मुख्यमंत्री बनाय के नइ हे, भलुक प्रदेश के लोगन मनके भविष्य के फैसला करे के चुनाव हरय। ओमन कीहिन कि भाजपा के संकल्प छत्तीसगढ़ के पहिचान हर गरीब, आदिवासी अउ पिछड़ा वर्ग के मनखे मनके कल्याण करे अउ प्रदेश ल देश के विकसित राज्य के श्रेणी म लाय के प्रयास हवय।
प्रधानमंत्री ह कीहिन कि प्रदेश के लोगन मन ह पाछू पांच साल के कंाग्रेस शासनकाल के दउरान भ्रष्टाचार, वादाखिलाफी अउ घोटाला ले परेसान होगे हे। ए मउका म प्रधानमंत्री ह कीहिन कि प्रदेश म विधानसभा चुनई के बाद यदि भाजपा के सरकार बनही त राज्य म प्रधानमंत्री आवास योजना के काम बने ढंग ले होही। जउन गरीब परिवार मन ल अब तक पक्का घर नइ मिले हे ओमन ल पक्का घर दे जाही। ओमन कीहिन कि राज्य म मातृभाषा म इंजीनियरिंग अउ मेडिकल के पढ़ई उपर जोर दे जाही। तेंदूपत्ता बिसाय उपर अउ जादा विस्तार करे जाही अउ संगेसंग राज्य म नवा उद्योग घलो स्थापित होही। श्री मोदी ह कंाग्रेस उपर गाय के नाव उपर घोटाला करे के आरोप लगाइन।
ओमन कीहिन कि कंाग्रेस सरकार ह दावा करथे कि राज्य म तीन सौ गोबर प्लांट लगाय गेहे। फेर जब केंद्र सरकार ह एखर जांच कराथे त एमा ले दू सौ पचास प्लांट फर्जी मिलथे।
कांग्रेस नियुक्ति
कंाग्रेस ह विधानसभा चुनई ल देखत प्रदेश कंाग्रेस कमेटी के मुख्यालय म आज कोनो कोनो के नियुक्ति करे हे । अखिल भारतीय कंाग्रेस कमेटी के सचिव राजेश तिवारी ल प्रभारी बनाय गेहे, त उंहे पूर्व विधायक गुरूमुख सिंह होरा ल संयोजक अउ राज्य कंाग्रेस के महासचिव सुबोध हरितवाल ल समन्वयक बनाय गेह। ये आदेश कंाग्रेस के महासचिव अउ राज्य प्रभारी कुमारी सैलजा ह जारी करीन।
नामांकन प्रक्रिया
प्रदेस म विधानसभा चुनई के दूसर चरण के तहत जउन सत्तर विधानसभा क्षेत्र म मतदान होना हे, उंहा उम्मीदवार मनके नाम वापसी के आज आखरी दिन रीहिस। एखर पहिली इकतीस अक्टूबर के नामंाकन पत्र मनके जांच करे गे रीहिस, जेमा एक हजार छियासठ अभ्यर्थी मनके नामंाकन सही पाय गीस।
विस-चुनाव प्रेक्षक नियुक्त
प्रदेस म स्वतंत्र अउ निष्पक्ष चुनाव करवाय बर निर्वाचन आयोग ह एक सौ उनतालीस प्रेक्षक नियुक्त करे हे, जेमा तिरसठ सामान्य प्रेक्षक, तैंतीस पुलिस प्रेक्षक अउ तिरालिस झिन व्यय प्रेक्षक शामिल करे गेहे। राज्य के मुख्य निर्वाचन पदाधिकारी कार्यालय डहार ले ये प्रेक्षक मनके मोबाइल नंबर घलो जारी कर दे गेहे। प्रेक्षक मनके मोबाइल नंबर उपर जुड़े क्षेत्र म आदर्श आचार संहिता के उल्लंघन अउ निर्वाचन म खर्चा ले जुड़े सिकइत ल सूचित करे जा सकथे ।
विस चुनाव-एक्जिट पोल
छत्तीसगढ़ के संगेसंग पांच राज्य मन म विधानसभा चुनई ल देखत चुनाव आयोग ह अवइया सात ले तीस नवंबर तक कोनो भी प्रकार के एक्जिट पोल के आयोजन अउ प्रसारण उपर रोक लगा देहे। ये बेरा म विधानसभा चुनई के बारे म कोनो भी प्रकार के एक्जिट पोल के आयोजन करे या इलेक्ट्रानिक मीडिया डहार ले कोनो प्रकार के परिणाम के प्रसारण अउ प्रकाशन उपर रोक रीही। आयोग डहार ले जारी अधिसूचना म केहे गेहे कि पांच राज्य म चुनई के दउरान मतदान क्षेत्र मन म मतदान खतम होय के बाद अड़तालिस घंटा के दउरान कोनो भी इलेक्ट्रानिक मीडिया म ओपिनियन पोल या कोनो आने मतदान सर्वेक्षण के परिणाम के प्रदर्शन उपर घलो प्रतिबंध रीही।
माओवादी ग्रामीण हत्या
कंाकेर नारायणपुर सीमा क्षेत्र म लगे महाराष्ट्र के गढ़चिरौली म माओवादी मन ह पाछू रतिहा तीन झिन गांव के लोगन के अपहरण करे के बाद हत्या कर दीन। पुलिस ह बताइन कि माओवादी मन ह चार झिन गांव के लोगन मनके अपहरण करे रीहिन। फेर एक झिन लोगन ल छोड़ दीन। मृतक गांव के लोगन मनके शव ल जिला मुख्यालय ले तेरा किलो मीटर दूरिहा मोरखंडी गांव ले बरामद करे गेहे।
रायगढ़ अंतर्राज्यीय बैठक
चुनाव आयोग के निर्देश उपर रायगढ़ जिला मुख्यालय म पड़ोसी राज्य के पुलिस अधिकारी मनके एक ठिन जरूरी बइठका होइस। ए बइठका म रायगढ़ अउ पड़ोसी राज्य ओडिशा के सीमावर्ती जिला मनके पुलिस अधिकारी मन वीडियो कॉन्फ्रेंस के माध्यम ले शामिल होइन। बइठका म छत्तीसगढ़ ले धरमजयगढ़ के एसडीओ पुलिस के संगेसंग लैलूंगा तमनार अउ घरघोड़ा के थानाप्रभारी मन शामिल होइन । त उंहे ओडिशाा के सुंदरगढ़ जिला के एसडीओ पुलिस के संगेसंग हिमगीर के थाना प्रभारी ह घलो वीडियो कॉन्फ्रेंस के माध्यम ले बइठका म शामिल होइन।
बइठका म अतिरिक्त पुलिस अधीक्षक संजय महादेवा ह ओडिशा के संपर्क म अवइया रायगढ़ जिला के ग्यारा ठिन जगा मन म मतदान के दउरान सुरक्षा के बारे म गोठबात करीन। ओमन बताइन कि जिला म पाछू बेरा ले फरार आरोपी मन ल हिरासत म ले जात हे। फेर कोनो कोनो आरोपी मन ह ओडिशा म जाके लुका जाथे, जेला देखत पड़ोसी राज्य के पुलिस ले मदद करे के बात कीहिन।
मतदाता जागरूकता रैली
विधानसभा चुनई म मतदाता मन ल जादा ले जादा संख्या म भाग लेवाय बर निर्वाचन आयोग डहार ले सरलग जागरूकता कार्यक्रम करे जात हे। ये अभियान के तहत शत प्रतिशत मतदान बर घलो लोगन मन ल आगू लाये जात हे। इही कड़ी म कोंडागंाव जिला के भंडारशिवनी गांव म आने आने प्रतियोगिता के माध्यम ले मतदाता मन ल जागरूक करे गीस। जिला प्रशासन डहार ले बोरगांव म रंगोली अउ मेंहदी प्रतियोगिता के माध्यम ले लोगन मन ल अपन वोट के प्रयोग करे के शपथ देवइन। ये मउका म स्कूली छात्र मन डहार ले रैली निकाले के संगेसंग मानव श्रृंखला घलो बनाय गीस।
ओति मतदाता जागरूकता बर आज जगदलपुर म घलो एक ठिन रैली निकाले गीस। रैली के अगवई करत कलेक्टर विजय दयाराम के. अउ पुलिस अधीक्षक जितेंद्र मीणा ह लोगन मन ल चुनाव म जादा ले जादा संख्या म वोट डारे के अपील करीन। ये रैली म इंहा के खिलाड़ी अउ छात्र मनके संगेसंग तृतीय लिंग समुदाय के लोगन मनके अलावा माइलोगिन अउ दिव्यांगजन मन घलो शामिल होइन। त उंहे राजनंादगंाव जिला म डोंगरगांव के डॅाक्टर बी.आर. अंबेडकर शासकीय महाविद्यालय म मानव श्रृंखला बनाके लोगन मन ल शत प्रतिशत वोट डारे के बात कीहिन।
ए मउका म जिला निर्वाचन अधिकारी डोमन सिंह ह जम्मों लोगन मन ल मतदान करे के संगेसंग आने मतदाता मन ल घलो वोट डारे बर आगू लाय के शपथ देवइन। नगर के स्टेट हाइस्कूल मैदान म घलो स्वच्छता दीदी मन ह मानव श्रृंखला बनाके लोगन मन ल अपन मत के प्रयोग करे के अपील करीन।
विस चुनाव मतदाता
ए बार प्रदेश म विधानसभा चुनई के दउरान करीबन ढाई हजार अइसन मतदाता घलो अपन मताधिकार के प्रयोग करहीं, जेखर उमर सौ साल पूरा हो चुके हे। राज्य म दू चरण म होवइया विधानसभा चुनई म दू करोड़ तीन लाख तिरानबे हजार एक सौ साठ मतदाता मन अपन मताधिकार के प्रयोग कर सकही। एखर संगेसंग प्रदेश म तृतीय लिंग समुदाय के सात सौ तिरपन मतदाता मन घलो अपन मत के प्रयोग कर सकही।
राज्य के मुख्य निर्वाचन पदाधिकारी कार्यालय ले मिले जानबा के मुताबिक रायपुर उत्तर विधानसभा क्षेत्र म सबले जादा छियानबे झिन तृतीय लिंग के मतदाता हे। त उंहे रायपुर शहर के चारो विधानसभा क्षेत्र मन म कुल दू सौ पचहत्तर तृतीय लिंग समुदाय के मतदाता हवय।
ए बार के चुनाव म अठारा ले उन्नीस साल के उमर वाले मतदाता मनके संख्या सात लाख उन्नीस हजार दू सौ सड़सठ हवय। एमन पहिली घांव अपन मत के प्रयोग करहीं। अयोग ह अस्सी साल ले जादा उमर के संगेसंग चालीस प्रतिशत ले जादा दिव्यांग वाले मतदाता मन ल घर बइठे डाक मतपत्र के माध्यम ले वोट डारे के सुविधा देहे।