प्रदेस म किसान मन ले समर्थन मूल्य म धान अउ मक्का के खरीदी ह आज ले सुरू होगे हे। ए धान खरीदी ह अवइया बछर म इकतीस जनवरी अउ मक्का के खरीदी अट्ठाईस फरवरी तक करे जाही। राज्य के खाद्य सचिव टी.पी. वर्मा ह कलेक्टर मन ल चिट्ठी लिखके उपार्जन केन्द्र म धान खरीदी के बेवस्था सुनिश्चित करे के निरदेस दीन हे। ए धान खरीदी बिना बायोमेट्रिक के होवत हे।
नामांकन प्रक्रिया
प्रदेस म विधानसभा चुनई के दूसर चरण के चलत जउन सत्तर विधानसभा क्षेत्र म मतदान होना हे, उहां नाव वापसी के काली दू नवंबर के आखिरी दिन हे। एखर ले पहिली काली इकतीस अक्टूबर के नामांकन पत्र के जांच होइस। एमा एक हजार छियासठ झिन अभ्यर्थी मनके नामांकन विधिमान्य पाय गीस।
जानबा के अनुसार दूसर चरण म नामांकन पत्र जमा करे के आखिरी दिन तीस अक्टूबर तक एक हजार दो सौ उन्नीस अभ्यर्थी मन ह नामांकन दाखिल करे रिहीन। दूसर चरण म रायपुर बिलासपुर, दुरूग अउ सरगुजा संभाग के सत्तर ठिन विधानसभा क्षेत्र म सत्रह नवंबर के चुनई होही।
विस-प्रचार
उहें, उत्तराखंड के मंत्री अउ धर्मगुरू सतपाल महराज ह आज लोरमी म भाजपा प्रत्याशी अरूण साव के समर्थन म जनसभा ल संबोधित करीन। असम के मुख्यमंत्री हिमंत बिस्वा सरमा काली राजनांदगांव जिला के मोहला म रोड-शो करही। एखर बाद ओमन ह कौड़ीकसा अउ खुज्जी विधानसभा क्षेत्र म आमसभा ल संबोधित करइया हे।
अइसने, उत्तरप्रदेश के मुख्यमंत्री योगी आदित्यनाथ के चार अउ पांच नवंबर के छत्तीसगढ़ दउरा प्रस्तावित हे। ए बेरा म ओमन ह चार नवंबर के कवर्धा अउ डोंगरगांव म जनसभा ल संबोधित करही। संगेसंग भिलाई म भाजपा प्रत्याशी प्रेमप्रकाश पांडेय के संग रोड-शो म सामिल होही। उहें, पांच नवंबर के योगी आदित्यनाथ ह राजनांदगांव म पूर्व मुख्यमंत्री डॉक्टर रमन सिंह के संग रोड-शो करइया हे।
दूसरी कोति, कांग्रेस के राष्ट्रीय अध्यक्ष मल्लिकार्जुन खड़गे ह आज सुकमा म जनसभा ल संबोधित करीन। कार्यक्रम म मुख्यमंत्री भूपेश बघेल ह घलो सामिल होइन।
उहें, मुख्यमंत्री ह काली राजनांदगांव म कांग्रेस प्रत्याशी गिरीश देवांगन के समर्थन म रोड-शो करही।
भाजपा-निर्वाचन आयोग ज्ञापन
भारतीय जनता पार्टी ह मुख्य निर्वाचन पदाधिकारी ल ज्ञापन सौंप के प्रदेस के प्राथमिक कृषि साख सहकारी समिति म नियुक्त अशासकीय सदस्य मन ल पद ले हटाय के मांग करे हे। ए पत्र म केहे गेहे कि प्रदेस म धान खरीदी एक नवंबर से सुरू होगे हे। अइसन म ए जम्मों अशासकीय सदस्य मन ल नइ हटाय ले निष्पक्ष चुनई के काम ह प्रभावित होही। पत्र म ए घलो कहे गेहे कि अशासकीय सदस्य मन ल हटाय म राज्य सहकारी निर्वाचन आयोग ह सहकारी समिति के निर्वाचन छह महीना के भीतरी अउ सहकारी बैंक के निर्वाचन अधिकतम एक बछर के भीतरी कराय बर बाध्य होही।
जानबा के अनुसार प्रदेस म कुल दू हजार अंठावन प्राथमिक कृषि साख सहकारी समिति हवय। ए जम्मों समिति के संचालक मंडल के कार्यकाल खतम होय के बाद बछर दू हजार बाईस म जून महीना तक ही चुनई हो जाना रिहीस। फेर अभू तक चुनाव नइ कराय गेहे।
डाक मतपत्र-मतदान
चुनई आयोग कोति ले अस्सी बछर ले जादा उमर के मतदाता मन बर एसो डाक मतपत्र के सुविधा दे गेहे। एखर चलत राजनांदगांव जिला के भर्रेगांव के रहइया पच्यासी बछर के सेवानिवृत्त सिक्षक भुखऊराम चंद्राकर ह डाक मतपत्र ले अपन मताधिकार के उपयोग करीन। उहें, पेंड्री के रहइया दिव्यांग कृष्णा राम साहू अउ बजरंगपुर-नवागांव के रहइया नब्बे बछर के ननुहा देवांगन, सहदेव नगर के रहइया तिरासी बछर के विजय लक्ष्मी श्रीवास्तव अउ अनुपम नगर के रहइया बयासी बछर के जगजीत कौर ह घलो घर म बइठ के डाक मतपत्र ले मतदान करीन।
मतदाता जागरूकता
विधानसभा चुनई म शत-प्रतिशत मतदान होय एखर बर स्वीप कार्यक्रम के चलत कतकोन जागरूकता कार्यक्रम चलाय जात हे। अइसने, कोरिया जिला म अधिकारी-कर्मचारी मन ह ‘‘संगवारी चलव वोट डाले बर‘‘ थीम के चलत दीया जलईन अउ लोगन मन ल मतदान बर प्रेरित करीन। ओमन ह ‘मतदान करबो-कराबो‘ के संकल्प घलो लीन।
उहें, सरगुजा जिला के घड़ी चउक म स्वीप कार्यक्रम के तहत चिराग सोशल वेलफेयर सोसायटी, छत्तीसगढ़ प्रचार अउ विकास संस्थान, ब्रम्हाकुमारी ईश्वरी विश्वविद्यालय, नवा बिहान टीम अउ सिविल सोसायटी कोति ले मतदाता जागरूकता कार्यक्रम चला के लोगन ल शत-प्रतिशत मतदान करे बर जागरूक करे गीस।
ओति, राजनांदगांव जिला के खैरागढ़ विधानसभा क्षेत्र म एन.एस.एस. के स्वयंसेवक मन ह चालीस ठिन गांव के दीवार म चित्र बनाके अउ नारा लिखके मतदाता जागरूकता के संदेस देवत हे।
उहें, भिलाई के खुर्सीपार म काली राष्ट्रीय शहरी आजीविका मिशन के माईलोगिन मन ह हाथ म मेंहदी लगाके लोगन ले सत्रह नवंबर के मतदान करे के अपील करीन। ए माईलोगिन मन ह काली मानव श्रृंखला बनाके आने-आने मोहल्ला म मतदाता जागरूकता के संदेश दीहीं।
ओति, बीजापुर जिला के मिनी स्टेडियम म स्कूली लइका मन ह रंगोली बनाके लोगन मन ले मतदान करे के अपील करीन। ए बेरा म कलेक्टर राजेन्द्र कुमार कटारा ह विजेता प्रतिभागी मन ल इनाम घलो दीन।
भाजपा/कांग्रेस-प्रेसवार्ता
भारतीय जनता पार्टी के वरिष्ठ नेता धर्मगुरू अउ उत्तराखंड के मंत्री सतपाल महराज ह राज्य के कांग्रेस सरकार के उपर पांच साल म घोटाला करे के आरोप लगाय हे। आज रायपुर म पत्रकार मन ले गोठबात करत हुए श्री महाराज ह कहिन कि केन्द्र सरकार ह छत्तीसगढ़ ल दू लाख करोड़ रूपिया दीन। फेर, कांग्रेस ह ए पइसा ल लोगन मन तक पहुंचे बर नइ दीन। धर्मांतरण के बिसय म ओमन ह कहिन कि छत्तीसगढ़ म धर्मांतरण होना दुखद हे। एखर खिलाफ कांग्रेस सरकार ह कोनों कार्रवाई नइ करीस।
उहें, अखिल भारतीय कांग्रेस कमेटी के महासचिव जयराम रमेश ह आज रायपुर म पत्रकार मन ले गोठबात करत किहीन कि कांग्रेस ह छत्तीसगढ़ ले जुड़े बिसय उपर विधानसभा चुनई लड़ही। ओमन कहिन कि भाजपा करा छत्तीसगढ़ म धु्रवीकरण के अलावा कोनों मुद्दा नइ हे। भाजपा ह मुद्दा विहीन पार्टी हे। इही बेरा म ओमन ह प्रदेसवासी मन ल राज्य स्थापना दिवस के घलो बधाई दीन।
राज्य स्थापना दिवस
आज छत्तीसगढ़ राज्य के स्थापना दिवस हवय। ए बेरा म राज्यपाल विश्वभूषण हरिचंदन अउ मुख्यमंत्री भूपेश बघेल ह प्रदेसवासी मन ल बधाई अउ सुभकामना दीन हे। उहें, भारतीय जनता पार्टी के प्रदेस अध्यक्ष अरूण साव, पार्टी के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह अउ नेता प्रतिपक्ष नारायण चंदेल ह घलो प्रदेसवासी मन ल राज्य स्थापना दिवस के बधाई दीन हे।
जिला पंचायत सदस्य-निष्कासित
राजनांदगांव जिला के खुज्जी विधानसभा क्षेत्र ले निर्दलीय चुनई लड़त जिला पंचायत सदस्य ललिता कंवर ल भाजपा ह छह साल बर पार्टी ले निकाल देहे। पार्टी कोति ले ओमन ल अधिकृत उम्मीदवार के खिलाफ चुनई नइ लड़य अउ नामांकन वापिस लेके अनुरोध करे गे रिहीस। फेर, ओमन ह पार्टी के निरदेस के पालन नइ करीन, जेखर बाद पार्टी ह ओखर खिलाफ फइसला लीस।