प्रदेस म विधानसभा चुनई के दूसरईया चरण बर नामांकन पत्र जमा करे के आज आखिरी दीन रिहीस। जमा नामांकन पत्र के जांच काली इकत्तीस अक्टूबर के होही अउ प्रत्यासी मन दू नवंबर तक अपन नाम वापस ले सकही। दूसरईया चरण बर रईपुर, बिलासपुर, दुर्ग अउ सरगुजा संभाग के सत्तर विधानसभा क्षेत्र मन म सतरहा 17 नवंबर के वोट डाले जाही।
इही बीच, मुख्यमंत्री भूपेश बघेल ह आज दुर्ग कलेक्टोरेट म पाटन विधानसभा क्षेत्र ले अपन नामांकन दाखिल करीन। उहें, ताम्रध्वज साहू ह दुर्ग ग्रामीण, अरूण वोरा दुर्ग शहर, मुकेश चंद्राकर वैशाली नगर, देवेन्द्र यादव ह भिलाई नगर अउ निर्मल कोसरे ह अहिवारा विधानसभा क्षेत्र ले अपन नाम-निर्देसन पत्र जमा करीन।
उहें, जनता कांग्रेस छत्तीसगढ़-जे, के प्रमुख्य अमित जोगी ह पाटन विधानसभा क्षेत्र ले अपन नामांकन पत्र दाखिल करे हे।
प्रधानमंत्री-छत्तीसगढ़ प्रवास
प्रधानमंत्री नरेंद्र मोदी अवईया दू नवंबर के कांकेर अउ चार नवंबर के दुरूग आय के कारीकरम प्रस्तावित हे। ए दौरान श्री मोदी कांकेर अउ दुरूग म राखेगे जनसभा ल संबोधित करही। दुरूग जिला भाजपा अध्यक्ष जितेन्द्र वर्मा ह बताइन हे कि प्रधानमंत्री नरेंद्र मोदी के जनसभा ल लेके काली कलेक्टर पुष्पेन्द्र मीणा अउ पुलिस अधीक्षक रामगोपाल गर्ग ह आमसभा के जघा ल देखिन अउ अधिकारी मन ल जरूरी दिसा-निरदेस दीन।
प्रदेस म विधानसभा चुनाव के पहिली चरण के मतदान सात नवंबर के होही। मतदान के तारीख तीर आए के संगेच कांग्रेस अउ भाजपा समेत आने-आने पार्टी मनके चुनाव प्रचार म तेजी आ गेहे। इही कड़ी म कांग्रेस के महासचिव प्रियंका गांधी ह आज खैरागढ़ अउ बिलासपुर म आमसभा ल संबोधित करत किहीन कि राज्य म फेर कांग्रेस के सरकार बनही त महतारी न्याय योजना के तहत गैस सिलेंडर म पांच सौ रूपिया के सब्सिडी दे जाही। ओमन दू सौ यूनिट तक मुफत म बिजली समेत कई ठिन घोषणा घलो करीन। ओमन ह राज्य के छह हजार ले जादा स्कूल मन ल स्वामी आत्मानंद अंग्रेजी स्कूल मन ल अपग्रेड कराय जाए के संग सात सौ नवा ग्रामीण औद्योगिक पार्क बनाय, अउ स्व-सहायता समूह मनके कर्जा माफी करे के संगेसंग सड़क दुर्घटना म घायल मन के फोकट म ईलाज करे अउ तिवरा के खरीदी समर्थन मूल्य म करे के ऐलान करीन।
इही बीच, पूर्व मुख्यमंत्री डॉक्टर रमन सिंह ह प्रियंका गांधी के घोषणा मन उपर हे किहीन कि कांग्रेस सिर्फ वादा करके जनता ल छलत हे। ओमन किहीन कि गैस सिलेंडर म सब्सिडीच ह नही फेर गरीब मन ल उज्जवला योजना के माध्यम ले गैस सिलेंडर देके काम प्रधानमंत्री नरेंद्र मोदी के अगुवई म भाजपा के सरकार ह करे हे। ओमन किहीन कि कांग्रेस ह अपन पाछू घोषणा पत्र के एको ठिन वादा ल पूरा नइ करे हे। श्री सिंह ह किहीन कि छत्तीसगढ़ के जनता उंखर झूठा वादा म नइ आवय।
दूसर कोति, महाराष्ट्र के उप मुख्यमंत्री देवेन्द्र फडणवीस ह आज धमतरी म भाजपा प्रत्यासी मनके समर्थन म आमसभा ल संबोधित करीन। ए मउका म ओमन ह राज्य के कांग्रेस सरकार उपर निसाना साधत किहीन हे कि ए सरकार भ्रष्टाचार म डूबे हे। ओमन प्रधानमंत्री आवास योजना के बात करत किहीन हे कि राज्य ह सरकार केंद्र सरकार ले मंजूर होय गरीब मनके आवास ल बनाय के मंजूरी नइ दीस।
विस-प्रचार-02
उहें, भाजपा के प्रदेस प्रभारी ओम माथुर ह आज एक दिन के प्रवास म बीजापुर पहुंचिन। ए दौरान ओमन स्थानीय भाजपा कार्यालय म पार्टी के कोर कमेटी के बइठका लीन अउ चुनाव रणनीति उपर गोठबात करीन। ए मउका म श्री माथुर ह केंद्र के एनडीए सरकार के विकास कार्य के उल्लेख करत किहीन हे कि छत्तीसगढ़ म घलो पांच बछर पहिली भाजपा के सरकार ह सुघ्घर काम करे हे। उहें, पाछू पांच बछर म राज्य के कांग्रेस सरकार ह भ्रष्टाचार ल बढ़ावा देहे। ओमन किहीन कि भाजपा ह राज्य के विकास कर सकत हे। बइठका म प्रदेस सह प्रभारी नितिन नबीन, संगठन महामंत्री पवन साय समेत स्थानीय पदाधिकारी अउ कार्यकता मौजूद रिहीन।
मतदाता-जागरूकता
विधानसभा चुनई म शत-प्रतिसत वोटिंग कराय बर स्वीप कारीकरम म आने-आने जागरूकता कारीकरम आयोजित करे जावत हे। इही कड़ी म आज भिलाई विधानसभा क्षेत्र म वाहन रैली निकाले गीस। ए रैली ल निर्वाचन अधिकारी रोहित व्यास ह हरीयर झंडी दिखाके रवाना करीन। ए मउका म श्री व्यास ह अधिकारी-कर्मचारी मन ल बिना भेदभाव के शत-प्रतिशत मतदान करे के सपथ दिलाइन। रैली के दौरान गाड़ी मन म चुनाव आयोग डहार ले जारी प्रचार-प्रसार के स्लोगन अउ गीत के संग मतदान करे के अपील लिखे गे रिहीस।
ओति, खैरागढ़-छुईखदान-गंडई जिला म बिहान समूह के बहिनी अउ माईलोगिन मन ल रंगोली बनाके, मेहंदी लगाके अउ सामूहित सपथ लेके मतदाता मन ल मतदान बर जागरूक करीन।
एति, कवर्धा म आज अधिकारी-कर्मचारी अउ स्कूली लइका मन ह मतदाता जागरूकता साईकिल रैली निकालीन। ए रैली के माध्यम ले स्लोगन, नारा अउ मतदाता जागरूकता गीत के संगेसंग शत-प्रतिसत मतदान के संदेस दे गीस।
ओति, बलरामपुर जिला म राज्य के सबले ऊंचा चोटी गौरलाटा म मतदाता जागरूकता कारीकरम के आयोजन करे गीस। ए दौरान मतदाता मन ह मानव श्रंृखला बनाके शत-प्रतिसत मतदान करे के संकल्प लीन। ए अभियान ल गोल्डन बुक ऑफ वर्ल्ड रिकॉर्ड म दर्ज करे गीस।
हाईस्कूल/हायर सेकेंडरी-परीक्षा
छत्तीसगढ़ माध्यमिक शिक्षा मंडल डहार ले राखेगे हाई अउ हायर सेकेंडरी स्कूल परीक्षा बर प्राईवेट विद्यार्थी मन काली इकतीस अक्टूबर तक परीक्षा फारम भर सकही। उहें, लेटफीस के संग विद्यार्थी मन अवईया पन्द्रह नवंबर तक आवेदन कर सकत हे।
सतर्कता जागरूकता सप्ताह
सतर्कता जागरूकता सप्ताह आज ले सुरू होगे हे, जउन ह पांच नवंबर तक चलही। सरदार वल्लभभाई पटेल के जयंती इकतीस अक्टूबर के उंखर सुरता म हरेक बछर सतर्कता जागरूकता सप्ताह के रूप म मनाय जाथे। ए बछर के थीम हे-भ्रष्टाचार को न कहें, राष्ट्र के प्रति प्रतिबध्द रहें। ए सप्ताह के दौरान नागरिक मनबर सत्यनिष्ठा के सपथ आने-आने कार्यालय अउ विभाग मनके सबो अधिकारी अउ कर्मचारी देवाय गेहे। आकाशवाणी भवन म सबो अधिकारी अउ कर्मचारी मल ल घलो सत्यनिष्ठा के सपथ देवाय गीस।
बस्तर दशहरा
विश्व प्रसिध्द बस्तर दशहरा काली सिराही। ए परब के आखिरी दिन काली मावली माता के डोली अउ मां दंतेश्वरी के छत्र के विदाई के रसम अदा करे जाही। बस्तर दशहरा परब के आखिरी रसम के विधान म परंपरा के मुताबिक राजगुरू, पुजारी अउ सेवादार मन डहार ले माता मावली के डोली ल कंाधा म रखके दंतेश्वरी मंदिर परिसर ले बाहिर लाय जाही। ए दौरान जवान मन डहार ले परंपरा के मुताबिक बंदूक चलाके माता ल सलामी दे जाही।
गांजा-बरामद
दुर्ग पुलिस ह पुरी-अहमदाबाद एक्सप्रेस म करीबन बीस किलोग्राम गांजा बरामद करे हे। मिले खबर के मुताबिक जांच के दौरान पुलिस ल तीन बैग लावारिस हालत म मिलिस, जेमा करीबन चार लाख रूपिया के गांजा बरामद करे गेहे।