सुनईया मन ल बतादन कि अनुराग प्रसाद ह छत्तीसगढ़ ले ऐके झन दिव्यांग खिलाड़ी हवय जेन ह जर्मनी म दिव्यांग स्पेसल ओलंपिक म देस के प्रतिनिधित्व करीन हे।
प्रधानमंत्री ह ए कारीकरम म देसभर के आने-आने सामाजिक सरोकार अउ योगदान के गोठ के संगेसंग ‘‘लोकल फॉर वोकल‘‘ के बारे म किहीन कि हमन अवईया तिहार म जतना जादा देस म बने समान बउरबो ओतके जादा लघु उद्योग अउ घरेलू उत्पाद के व्यापार ह बाड़ही।
इही बीच, दू दिन बर छत्तीसगढ़ आय भारतीय जनता पार्टी के राष्ट्रीय अध्यक्ष जगत प्रकाश नड्डा ह रईपुर के डॉक्टर राजेन्द्र प्रसाद वार्ड के बुथ नंबर 223 म ‘‘मन की बात‘‘ कारीकरम के सीधा प्रसारण सुनिन। उहें, भाजपा प्रदेस अध्यक्ष अरूण साव ह ए कारीकरम ल मुंगेली जिला के लोरमी म सुनीन।
विस चुनाव प्रचार-01
विधानसभा चुनई बर आने-आने दल के प्रचार-प्रसार ह अउ जोरदरहा होगे हे। भाजपा राष्ट्रीय अध्यक्ष जगत प्रकाश नड्डा ह काली दू दिन बर रईपुर पहुंचिन। आज ओमन ह डोंगरगढ़ विधानसभा के ठेलकाडीह म विजय संकल्प महारैली ल संबोधित करत हुए राज्य के कांग्रेस सरकार उपर निसाना साधिन अउ केंद्रीय योजना के फायदा आम लोगन तक नई पहुंचाय के आरोप लगाइन।
एखर ले पहिली, श्री नड्डा ह रईपुर के भाजपा कार्यालय म रईपुर क्षेत्र के चारो विधानसभा के कोर कमेटी के बइठका लीन अउ कुशाभाऊ ठाकरे परिसर म रईपुर ग्रामीण विधानसभा के समन्वय समिति, संचालन समिति अउ प्रवासी प्रभारी मन के बइठका लीन। जेमा वरिष्ठ नेता रविशंकर प्रसाद, सांसद सरोज पांडे अउ सुनील सोनी समेत पार्टी के बड़का नेता मन जुरे रिहीन।
बाद म श्री नड्डा ह कबीरधाम जिला के पंडरिया म घलो जनसभा ल संबोधित करीन।
विस चुनाव प्रचार-02
इही बीच, कांग्रेस के बड़का नेता राहुल गांधी ह किहीन हे कि अगर राज्य म कांग्रेस के सरकार फेर बनही त राजीव गांधी भूमिहीन कृषि मजदूर न्याय योजना म मिलईया पइसा ल बढ़ाके दस हजार रूपिया करे जाही। आज कबीरधाम जिला म चुनई सभा ल संबोधित करत हुए ओमन किहीन कि डॉक्टर खूबचंद बघेल स्वास्थ्य सहायता योजना म गरीब वर्ग ल दस लाख रूपिया तक के अउ आने मन ल पांच लाख रूपिया तक के ईलाज के सुविधा फोकट म दे जाही। एखर अलावा ओमन ह प्रदेस के सब्बों जिला म फूड प्रोसेसिंग यूनिट खोले के घोषणा घलो करीन।
श्री गांधी ह आज राजनांदगांव म घलो जनसभा ल संबोधित करीन। जेमा ओमन ह किहीन कि अवईया बेरा म तीन हजार रूपिया प्रति क्विंटल के हिसाब ले धान बिसाय जाही।
ओति, पंजाब के मुख्यमंत्री भगवंत मान ह कबीरधाम जिला म आम आदमी पार्टी के प्रत्यासी के पक्ष म रोड-सो करीन।
साड़ी-जब्त
महासमुंद जिला के सिंघोड़ा थाना क्षेत्र के पुलिस ह एक करोड़ रूपिया के साड़ी पकड़े हे। मिले जानकारी अनुसार अंतर्राज्यीय चेक पोस्ट रेहटीखोल म जांच म बरगढ़ ले सरायपाली आवत एक ट्रक ले सोला हजार नग साड़ी जब्त करे गीस। जेन ह निनान्वे बोरी म भराय रिहीस, जेखर अनुमानित कीमत एक करोड़ रूपिया बताय जावत हे।
मतदाता-जागरूकता
विधानसभा चुनई म शत-प्रतिसत वोटिंग कराय बर स्वीप कारीकरम म आने-आने जागरूकता कारीकरम आयोजित करे जावत हे। इही कड़ी म राजनांदगांव जिला के दिग्विजय स्टेडियम म मतदाता जागरूकता बर स्वीप टीम ह आसमान म अनिवार्य मतदान के संदेस लिखे फुग्गा उड़ाके मतदाता जागरूकता के संदेस दीन। दुरूग जिला के खालसा स्कूल म लगभग डेढ़ हजार कॉलेज के लइका मन ह सौ प्रतिसत मतदान बर मनखे मन ल जागरूक करे के संकल्प लीन।
ओति, खैरागढ़ म स्वीप महाकार्निवाल के आयोजनक करे गीस। जेमा नारा, रंगोली, नुक्कड़ नाटक, चुनई सेल्फी जोन जइसन आने-आने कारीकरम होइस।
ऐति, बिलासपुर म मतदाता जागरूकता बर स्वीप इलेवन अउ मीडिया इलेवन के बीच रघुराज सिंह स्टेडियम सद्भावना क्रिकेट मैच खेले गीस। मैच ल पहिली जिला निर्वाचन अधिकारी अवनीश शरण ह खिलाड़ी युवा अउ दर्शक मन ल शत-प्रतिशत मतदान के शपथ दिलाइन।
उहें, कोंडागांव जिला के दिव्यांग अउ सियान मतदाता मनले घर-घर जाके तीस अउ इकत्तीस अक्टूबर के डाक मतपत्र ले जाही। जेखर बर मतदान दल बनाय गेहे। जिला निर्वाचन अधिकारी दीपक सोनी ह बताइन कि जेन वोटर ह घर म मतदान सुविधा बर आवेदन करे रिहीन ओमन ल घर म ही वोट डलवाय जाही।
नामांकन प्रक्रिया
प्रदेस म विधानसभा चुनई के दूसरईया चरण बर नामांकन पत्र जमा करे के काली तीस अक्टूबर के आखिरी तारीख हे। जमा नामांकन पत्र के जांच इकत्तीस अक्टूबर के होही अउ प्रत्यासी मन दू नवंबर तक अपन नाम वापस ले सकथे। दूसरईयार चरण बर सत्रह नवंबर के वोट डाले जाही।
सुनईया मन ल बतादन कि दूसरईया चरण म रईपुर, बेलासपुर, दुरूग अउ सरगुजा संभाग के कुल सत्तर विधानसभा क्षेत्र बर चुनई होना हे।
संगवारी-मतदान केंद्र
विधानसभा चुनई म माईलोगिन दिव्यांग अउ युवा सहित सबो नागरिक ल सहभागी बनाय बर भारत निर्वाचन आयोग कोति ले सरलग प्रयास करे जावत हे। जेमा आायोग ह महिला सशक्तिकरण ल बढ़ावा देबर प्रदेस म 900 संगवारी मतदान केंद्र बनाय के निर्णय लीन हे। एमा राज्य के सब्बों विधानसभा क्षेत्र म दस-दस संगवारी मतदान केंद्र बनाय जाही। जेमा मतदान दल अउ सुरक्षा बल समेत आने स्टाफ घलो माईलोगिन मन होही।
मुख्य निर्वाचन पदाधिकारी रीना बाबासाहेब कंगाले ह बताइन कि अइसन केंद्र म माईलोगिन कोति ले ही पीठासीन अधिकारी अउ चुनई के आने काम करे जाही। पोलिंग बूथ के चुनई ले जुड़े वीडियो रिकार्डिंग अउ फोटोगा्रफी माईलोगिन ही करही। सहर अउ गांव-गवंई दूनों म अइसन संगवारी मतदान केंद्र बनाय जाही।
वोटर-ऐप्लीकेशन
छत्तीसगढ़ म विधानसभा चुनई बर मतदान के दिन लक्ठा आवत हे। दू चरण म होवइया चुनई बर वोटर मन म बड़ उछाह हे। अइसना म ओमन ह ए जानना चाहथे कि मतदान बर कोन सा केंद्र हे, उंखर नांव कोन भाग संख्या अउ क्रमांक म हे। अइसना प्राथमिक जानकारी समेत अउ कतकोन जानकारी मोबाइल फोन म घलो देखे जा सकथे।
सुगम मतदान बर भारत निर्वाचन आयोग के वोटर हेल्पलाइन ऐप उपयोगी ऐप्लीकेसन हवय जेन ह मतदाता मन ल जरूरी जानकारी देवत हे। मुख्य निर्वाचन पदाधिकारी रीना बाबासाहेब कंगाले ह बताइन कि वोटर ह अपन मतदाता परिचय पत्र नंबर डाल के अपन विधानसभा, पोलिंग बूथ अउ लिस्ट म सरल क्रमांक पता कर सकथे। ओमन बताइन कि ए ऐप ले वोटर ह अपन चुनई क्षेत्र के संगेसंग आने क्षेत्र के प्रत्यासी मन के बारे म जानकारी ले सकथे। एमा चुनई संबंधी सिकायत घलो करे जा सकथे।
अउ अब थोरकुन समाचार सार म –
– धार्मिक भावनाओ ल आहत पहुंचाय के मामला म मोहला-मानपुर-अंबागढ़ चौकी जिला के आदिवासी नेता सरजू टेकाम ल पुलिस ह गिरफ्तार करे हे।
– कांकेर के रांवभांट थाना क्षेत्र के सरगीपाल म बीएसएफ जवान कोति ले ख्ुाद ल गोली मारके आत्म हत्या करे के मामला पता चले हे।
अउ
– प्रदेस के सीतानदी-उदंती अभ्यारण्य म सांभर के शिकार मामला म एक आरोपी ल पकड़े गेहे अउ दस झन आरोपी फरार बताय जावत हे।