आजादी के अमृत महोत्सव म राजभवन म आज ‘मेरी माटी-मेरा देश‘ अभियान म राज्य स्तरीय कार्यक्रम आयोजित करे गीस। सीआरपीएफ अउ नेहरू युवा केन्द्र के समन्वय ले आयोजित ए कारीकरम म प्रदेस के 33 जिला ले 146 विकासखंड के सबो गांव ले सकेले गे माटी ल राजभवन लाय गीस। ए कार्यक्रम के मुख्य अतिथि राज्यपाल विश्वभूषण हरिचंदन रीहिन। यंे मउका म राज्यपाल ह कीहिन कि मेरी माटी मेरा देश अभियान के सूत्र वाक्य मिट्टी को नमन वीरो का वंदन- छत्तीसगढ़ बर विशेष हे। छत्तीसगढ़ के युवा मन ह राष्ट्र निर्माण के गतिविधि म सक्रियता ले भाग लेवत हे।
आजादी के अमृत महोत्सव के तहत सबो ग्राम पंचायत ले भारत के शहीद मनके सम्मान म घर-घर जाके कलश म माटी इकट्ठा करे गेहे। ए अमृत कलश ल नई दिल्ली के कर्त्तव्य पथ म पहुंचाय जाही, जिहंा आने-आने राज्य ले लाये गे माटी ले शहीद मनके सम्मान म अमृत वाटिका के निर्माण करे जाही।
विस चुनाव प्रचार
प्रदेश म विधानसभा चुनाव बर मतदान के तारीख पास आय के संगेच आने आने राजनीतिक दल मन ह अपन प्रचार ल तेज कर दे हवय। भारतीय जनता पार्टी अउ कंाग्रेस के राष्ट्रीय नेता मन ह आने आने जगा चुनावी सभा लेके मतदाता मनके समर्थन पाय के प्रयास करत हे।
केंद्रीय स्वास्थ्य मंत्री मनसुख मांडविया ह आज मुंगेली जिला के लोरमी म पार्टी प्रत्याशी मनके पक्ष म प्रचार करीन अउ जनसभा ल संबोधित करीन। एखर पहिली ओमन ह भाजपा प्रदेश अध्यक्ष अरूण साव के नामंाकन रैली म शामिल होइन। इही दउरान श्री साव ह अपन नामंाकन दाखिल करीन ।
उंहे केंद्रीय मंत्री मीनाक्षी लेखी ह आज गरियाबंद म एक ठन जनसभा ल संबोधित करीन अउ भाजपा प्रत्याशी मनके पक्ष म समर्थन मंागीन।
उंहे कोरबा म भाजपा डहार ले रैली निकालके नामंाकन दाखिल करे गीस। एमा कोरबा विधानसभा क्षेत्र के पार्टी प्रत्याशी लखनलाल देवांगन, रामपुर ले ननकीराम कंवर, कटघोरा ले प्रेमचंद पटेल, पाली तानाखार ले रामदयाल उइके, संघरा, भाजपा के कार्यकर्ता मन शामिल होइन। ये मउका म लखनलाल देवंागन ह नाम निर्देशन पत्र के एक ठन अउ सेट जमा करीन।
ओति अंबिकापुर म आज मुख्यमंत्री भूपेश बघेल ह प्रत्याशी मनके नामंाकन रैली म शामिल होइन ए दौरान जिला के तीनों विधानसभा क्षेत्र के प्रत्याशी टी.एस. सिंहदेव, अमरजीत भगत अउ डॅाक्टर प्रीतम राम ह अपन नामांकन पत्र दाखिल करीन।
इही बीच कंाग्रेस के पूर्व राष्ट्रीय अध्यक्ष राहुल गांधी काली अठाईस अक्टूबर के छत्तीसगढ़ दौरा म आवत हे। ए दौरान ओमन भानुप्रतापपुर, फरसगांव म जनसभा ल संबोधित करही। उंहे उनतीस अक्टूबर के राजनंादगंाव अउ कवर्धा म आयोजित जनसभा म शामिल होही।
नामंाकन प्रक्रिया
प्रदेश म विधानसभा चुनाव के तहत दूसर चरण बर नामंाकन जमा करे के प्रकिया चलत हे। मुख्य निर्वाचन पदाधिकारी कार्यालय ले मिले जानकारी के अनुसार दूसरइया चरण बर काली दू सौ तीन नामंाकन जमा होइस। ए चरण बर अब तक तीन सौ सड़सठ नामंाकन दाखिल करे जा चुके हे।
खबर के मुताबिक दूसर चरण म रायपुर, बिलासपुर, दुर्ग अउ सरगुजा संभाग के सत्तर ठन विधानसभा क्षेत्र म चुनाव होना हे। ए क्षेत्र म उम्मीदवार मन ह तीस अक्टूबर तक नामंाकन दाखिल कर सकत हे। नामंाकन पत्र के जांच इकतीस अक्टूबर के होही। उंहे प्रत्याशी मन ह दू नवंबर तक अपन नाव ल वापस ले सकही। दूसर चरण म सतरा नवंबर के मतदान होही।
पर्यवेक्षक
विधानसभा चुनाव ल देखत निर्वाचन आयोग ह छत्तीसगढ़ म निष्पक्ष चुनाव कराय बर पर्यवेक्षक मनके नियुक्ति करे हे । एमा सामान्य पर्यवेक्षक के रूप म तिरसठ झन आईएएस अधिकारी मनके तैनाती करे गेहे। उंहे तैंतीस झन आईपीएस अधिकारी मन ल पुलिस पर्यवेक्षक के रूप म नियुक्त करे गेहे।
विस चुनाव प्रवर्तन एजेंसी कार्रवाई
छत्तीसगढ़ म विधानसभा चुनाव बर आदर्श आचार संहिता लागू होय के बाद ले अभी तक प्रवर्तन एजेंसी ह बत्तीस करोड़ पचहत्तर लाख रूपिया ले जादा के अवैध धनराशि अउ दूसर जीनिस जब्त करे हे। एमा करीबन आठ करोड़ चौवन लाख रूपिया के नकद राशि घलो शामिल हे।
मुख्य निर्वाचन पदाधिकारी कार्यालय ले मिले जानकारी के अनुसार प्रवर्तन एजेंसी ह निगरानी के दउरान करीबन छिहत्तर लाख रूपिया कीमत के करीबन पच्चीस हजार लीटर अवैध शराब जब्त करे हे। उंहे दू हजार नौ सौ छियांलिस किलोग्राम ले जादा के नशीला जीनिस जब्त करे हे। जेखर कीमत लगभग दू करोड़ सैंतालिस लाख रूपिया बताय गेहे। एखर अलावा चौदा करोड़ छियांलिस लाख रूपिया ले जादा कीमत के करीबन एक सौ इक्यासी किलोग्राम गहना-गूठा घलो जब्त करे गेहे।
मतदाता जागरूकता
प्रदेश म ए बार के विधानसभा चुनाव म शत प्रतिशत मतदान निश्चित करे बर स्वीप कार्यक्रम म आने आने जागरूकता कार्यक्रम कराये जातव हे। इही कड़ी म धमतरी जिला के कुरूद म संत गुरू घासीदास शासकीय महाविद्यालय के विद्यार्थी मन ह नारा अउ स्लोगन बनाके लोगन ल मतदान बर प्रेरित करीन। उंहे भखारा के छत्तीसगढ़ महतारी महाविद्यालय के लईका मन ह घलो रैली निकाल के जिला धमतरी-वोट सर्वोपरि के नारा लगाइन। अइसने जिला के सबो आयुर्वेदिक अस्पताल म जतन कार्यक्रम म इलाज कराये बर गे सियान मन ल मतदान के शपथ देवाय गीस।
इही बीच शांतिपूर्ण अउ निष्पक्ष चुनाव कराय के उद्देश्य ले नारायणपुर जिला म सुरक्षा बल ह शहर म फ्लैग मार्च निकालिस। ए दउरान जिला पुलिस बल, डीआरजी अउ बीएसएफ के जवान मन शहर के बखरूपारा, सोनपुर, कुम्हारपारा, बंग्लापारा अउ शहर के दूसर क्षेत्र ले निकलिन।
पटाखे निर्देश
ए बखत दिवाली म सिर्फ हरित पटाखा के इस्तेमाल के मंजूरी दे गेहे। राष्ट्रीय हरित न्यायाधिकरण के अनुसार प्रदेश म पर्यावरण सुरक्षा बर ये निर्देश जारी करे गेहे । एमा सिर्फ दू घंटा फटाका फोड़े के मंजूरी दे गेहे। ये निर्देश दीवाली के अलावा छठ पूजा, गुरू पर्व, अउ नवा बछर के संग क्रिसमस बर घलो लागू रीही।
न्यायाधिकरण के अनुसार रायपुर, बिलासपुर, भिलाई, दुर्ग, रायगढ़ अउ कोरबा के नगरी क्षेत्र म अवइया एक दिसंबर ले इकतीस जनवरी तक फटाका फोड़े म रोक रीही। उच्चतम न्यायालय अउ राष्ट्रीय हरित न्यायाधिकरण के आदेश के अनुसार जिला प्रशासन ल ए निर्देश के कड़ाई ले पालन करे बर केहे गेहे। मिले निर्देश के अनुसार दीपावली अउ गुरू पर्व बर रतिहा आठ बजे ले दस बजे तक, छठ पूजा बर बीहनिया छै बजे ले आठ बजे तक अउ क्रिसमस के संग नवा बछर बर रात ग्यारा बजके पचपन मिनट ले रात साढ़े बारा बजे तक के समय तय करे गेहे।
उच्चतम न्यायालय डहार ले बछर दू हजार अठारा म जारी करे गे आदेश के अनुसार केवल उही फटाका बजार म बेचे जा सकही, जेखर आवाज निर्धारित सीमा के अंदर रहय। लड़ी वाले फटाका के बिक्री, उपयोग अउ निर्माण उपर रोक लगाय गेहे।
अउ अब थोरकुन समाचार सार म –
– कोरबा जिला के रामनगर के शराब दुकान म बिक्री के रकम लेबर पहुंचे एक झन सुरक्षा गार्ड ह लाइसेंसी बंदूक ले हवाई फायरिंग कर दीस। पुलिस ह आरोपी गार्ड ल गिरप्तार करे के संग ओखर बंदूक ल घलो जब्त कर ले हवय।
अउ
– बालोद जिला के डौंडी चेकपोस्ट तीर काली होय एक ठन सड़क दुर्घटना म तीन झन मनखे के मउत होगे हे। बताय जात हे कि तेज रफ्तार एक कार के टक्कर ले मोटर साइकिल सवार एक मनखे के घटनास्थल म ही मउत होगे। उंहे दू आने मनखे मन अस्पताल ले जाय के दौरान दम तोड़ दीस।