भारतीय जनता पार्टी ह छत्तीसगढ़ विधानसभा चुनई बर चार झिन प्रत्यासी के चौथा अउ आखिरी सूची ल घलो जारी कर देहे। एखर संग भाजपा ह अब प्रदेस के सबो 90 ठिन सीट म अपन उम्मीदवार के घोसना कर देहे। पार्टी ह आज जउन चार प्रत्यासी मनके सूची ल जारी करे हे, ओमा अंबिकापुर ले राजेश अग्रवाल, बेलतरा ले सुशांत शुक्ला, कसडोल ले धनीराम धीवर अउ बेमेतरा ले दीपेश साहू हवय।
उहें, कांग्रेस पार्टी ह पहिली ही प्रदेस के सबो 90 ठिन सीट म अपन उम्मीदवार के घोसना कर चुके हे।
इही बीच जनता कंाग्रेस छत्तीसगढ़ ह घलो आज अपन दूसर सूची जारी कर देहे। पार्टी ह रेणु जोगी ल कोटा, रिचा जोगी ल अकलतरा अउ चंादनी भारद्वाज ल मस्तूरी ले अपन प्रत्याशी बनाय हे एखर संगेसंग ग्यारा झिन प्रत्याशी के घोषणा करे गेहे।
युवा मतदाता
भारत निर्वाचन आयोग ह युवा मतदाता मन बर ध्यान केंद्रित करे बर चुनई वाले राज्य म हरएक जिला म एक मतदान केंद्र म युवा कर्मी मनके ड्यूटी लगाय के निर्देश दीन हे। छत्तीसगढ़ समेत मिजोरम, मध्यप्रदेश, राजस्थान, तेलंगाना म कुल मतदाता मन म दू दशमलव छै प्रतिशत युवा मतदाता हे।
एसो एक अक्टूबर के अठारा बछर पूरा करइया युवा मतदाता मनके नामंाकन म विशेष ध्यान दे जात हे। निर्वाचन आयोग के चुनाव साक्षरता क्लब स्कूल के लईका मन बर कतकोन गतिविधि करत हे। ए क्लब ह कालेज अउ गांव वाले मन ल घलो मतदान बर जागरूक करत हे।
विस चुनाव-प्रवर्तन एजेंसी कार्रवाई
राज्य म विधानसभा चुनई ल देखत हुए लागू करे गे आदर्श आचार संहिता के बाद से अभू तक प्रवर्तन एजेंसी ह 30 करोड़ 52 लाख रूपिया ले जादा के अवैध धनराशि अउ आने-आने जिनीस जब्त करे हे। मुख्य निर्वाचन पदाधिकारी कार्यालय ले मिले जानकारी के अनुसार प्रवर्तन एजेंसी ह निगरानी के बेरा लगभग 66 लाख 43 हजार रूपिया के 21 हजार 848 लीटर अवैध सराब जब्त करे हे। उहें, दू हजार सात सौ किलोग्राम ले जादा के नसीला सामान जब्त करे हे, जेखर कीमत लगभग सवा दू करोड़ रूपिया बताय गेहे। एखर अलावा 14 करोड़ 25 लाख रूपिया ले जादा के 158 किलोग्राम गहना घलो जब्त करे गेहे।
नामंाकन प्रकिया
प्रदेश म विधानसभा चुनई के चलत दूसरा चरण बर नामंाकन पत्र भरे के प्रक्रिया चलत हे। इही कड़ी म मुख्यमंत्री भूपेश बघेल ह आज बेमेतरा पहुंचीन जिहंा ओमन ह तीनो विधानसभा क्षेत्र म प्रत्याशी मनके नामंाकन रैली म शामिल होइन अउ आमसभा ल संबोधित करीन। बेमेतरा ले कंाग्रेस प्रत्याशी आशीष छाबड़ा, साजा ले रविंद्र चौबे अउ नवागढ़ ले गुरू रूद्रकुमार ह आज अपन नामंाकन दाखिल करीन।
दूसर कोति भारतीय जनता पार्टी के प्रदेश अध्यक्ष अरूण साव ह सक्ति म आयोजित आमसभा ल संबोधित करीन। ए मउका म सक्ति विधानसभा क्षेत्र ले डॅाक्टर खिलावन साहू, जैजेपुर ले कृष्णकांत चंद्रा अउ चंद्रपुर ले संयोगिता सिंह जूदेव ह नामंाकन दाखिल करीन। श्री साव ह ए सबो प्रत्याशी के नामंाकन रैली के बेरा उपस्थित रीही।
जानबा के अनुसार दूसर चरण के चलत प्रदेश के बाकी सत्तर ठिन सीट म नामंाकन पत्र जमा करे के आखरी तारीख तीस अक्टूबर हरय। दूसर चरण के चलत सतरा नवंबर के मतदान होही।
मतदाता जागरूकता
प्रदेश म शत प्रतिशत मतदान बर स्वीप कार्यक्रम के चलत आने-आने जागरूकता कार्यक्रम के आयोजन करे जात हे। आज दुर्ग के इंदिरा मार्केट म कुंआ चौक करा दुर्ग नगर निगम के अधिकारी कर्मचारी मन ह व्यापारी मन ल शत प्रतिशत मतदान के संकल्प दिलाइन। ए बेरा म व्यापारी मन ह अपन परिचित अउ तीर तार के लोगन मन ल मतदान करे बर प्रेरित करे के संकल्प लीन।
सी-विजिल ऐप-कार्रवाई
छत्तीसगढ़ विधानसभा चुनाव के चलत भारत निर्वाचन आयोग के सी-विजिल ऐप म लोगन मन ले मिलत सिकायत उपर तुरते कार्रवाई करे जात हे। ए ऐप ले अभू तक 771 ठन सिकायत मिले चुके हे, जेमा ले 761 ठिन सिकायत के निराकरण करे जा चुके हे। उहें, बाकी बचे सिकायत उपर घलो कार्रवाई चलत हे।
जानबा के अनुसार आयोग ल आचार संहिता के उल्लंघन के सिकायत सी-विजिल ऐप ले मिलत हे। ए सिकायत के निराकरण बर मुख्य निर्वाचन पदाधिकारी कार्यालय म अलग ले नियंत्रण कक्ष बनाय गेहे। मुख्य निर्वाचन पदाधिकारी रीना बाबा साहेब कंगाले ह खुदे ए जम्मों सिकायत उपर होवइया कार्रवाई ल देखत हे।
राष्ट्रीय मीडिया सम्मान
राष्ट्रीय मीडिया सम्मान बर भारत निर्वाचन आयोग ह मीडिया संस्थान ले दस दिसंबर तक आवेदन बलाय हे। ए बारे म आयोग डहार ले जारी करे गे चिट्ठी म बताय गेहे कि मीडिया संस्थान ह आने-आने श्रेणी म पुरस्कार बर आवेदन कर सकत हे। मीडिया संस्थान ह चार ठिन श्रेणी- प्रिंट मीडिया, इलेक्ट्रॉनिक मीडिया, रेडियो अउ सोशल मीडिया म पुरस्कार बर आवेदन दे सकत हे। एखर बर इच्छुक मीडिया संस्थान अपन आवेदन भारत निर्वाचन आयोग के अवर सचिव, राजेश कुमार सिंह के नाव ले नई दिल्ली के पता म भेज सकत हे। आखिरी तारीख तक मिले आवेदन अउ अनुसंसा ल आयोग कोति ले बनाय गे निर्णायक मंडल के आगू पेस करे जाही। निर्णायक मंडल कोति ले चयनित संस्था ल अवइया बछर म 25 जनवरी के राष्ट्रीय मतदाता दिवस के मउका म सम्मानित करे जाही।
मेरी माटी-मेरा देश
आजादी के अमृत महोत्सव के चलत राजभवन म सत्ताईस अक्टूबर के ‘मेरी माटी-मेरा देश‘ अभियान के चलत राज्य स्तरीय कार्यक्रम के आयोजन करे जाही। सीआरपीएफ अउ नेहरू युवा केन्द्र के समन्वय ले आयोजित ए कारीकरम के चलत प्रदेस के 33 जिला ले 146 विकासखंड के सबो गांव ले इकट्ठा करे माटी ल राजभवन लाय जाही। सीआरपीएफ के अधिकारी मन ह आज राजभवन म राज्यपाल विश्वभूषण हरिचंदन ले भेंट करके ओमन ल कारीकरम बर नेवता दीन। ए बेरा म सीआरपीएफ सेक्टर मुख्यालय रायपुर के डीआईजी एन.के. सिंह, पैंसठवां बटालियन के कमांडेंट व्ही.के. सिंह अउ नेहरू युवा केन्द्र रायपुर के जिला समन्वयक अर्पित तिवारी मौजूद रिहीन।
जानबा के अनुसार आजादी के अमृत महोत्सव के चलत सबो ग्राम पंचायत ले भारत के सहीद मनके सम्मान म घर-घर जाके कलश म माटी इकट्ठा करे गेहे। ए सबो अमृत कलश ल नई दिल्ली के कर्तव्य पथ पहुंचाय जाही, जिहां कतकोन राज्य ले लाय गे माटी ले सहीद मनके सम्मान म अमृत वाटिका बनाय जाही।
आईईडी बरामद
नारायणपुर जिला म सुरक्षा बल ह चार किलो आईईडी बरामद करे हे। जेला मउका म ही निष्क्रिय कर दे गीस। जानबा के अनुसार माओवादी मन ह ए आईईडी ल ओरछा थाना क्षेत्र के गोटुलपारा के जंगल म जवान मन ल नुकसान पहुंचाय बर लगाय रीहिन।