प्रवर्तन निदेशालय-ईडी ह बयान जारी कर किहीन हे कि मार्कफेड के पूर्व एम.डी. आईएएस मनोज सोनी अउ कई झिन राईस मिलर्स उपर करे गे छापामारी म तलासी के दउरान 1 करोड़ 6 लाख रूपिया नगद बरामद करे गेहे। एखर अलावा दस्तावेज, इलेक्ट्रॉनिक उपकरण अउ लेनदेन के प्रमाण पत्र मिले हे, जेला जब्त कर ले गे हवय। जानबा के मुताबिक ईडी के आने-आने टीम ह 20 अउ 21 अक्टूबर के रायपुर म 3, दुरूग म दू, कोरबा अउ राजनांदगांव म एक-एक झिन राईस मिल कारोबारी मनके इहां छापा मारे हवय।
हाईकोर्ट-सिम्स जवाब
छत्तीसगढ़ उच्च न्यायालय ह मेडिकल कॉलेज अस्पताल सिम्स के अबेवस्था उपर नाराजगी जतईन हे। उच्च न्यायालय ह खुदे संज्ञान लेके ए मामला के सुनवाई करत हवय।
मुख्य न्यायाधीश रमेश सिन्हा अउ न्यायाधीश रविन्द्र कुमार अग्रवाल के युगल खंडपीठ ह मामला के सुनवाई करत किहीन कि समाचार अउ सोशल मीडिया के जरिया सिम्स के खराब कामबूता के स्थिति अउ चिकित्सा सुविधा म कमी के लगातार खराब रिपोर्ट आवत रिहीस। उच्च न्यायालय ह डॉक्टर मनके संख्या, सुविधा अउ पाछु तीन बछर म सिम्स ल आवंटित धन अउ ओखर उपयोग के संबंध म प्रदेस के मुख्य सचिव, स्वास्थ्य सचिव अउ समाज कल्याण विभाग ल व्यक्तिगत सपथ पत्र दू दिन के भीतर दे बर केहे हे।
इही बीच, सिम्स प्रबंधन ह अस्पताल अधीक्षक डॉक्टर नीरज शिंदे ल हटा दे हवय अउ उंखर जघा नवा नियुक्ति करे गे हवय।
विस चुनाव-नाम वापसी/नामांकन
छत्तीसगढ़ म विधानसभा चुनाव के पहिली चरण म नाम वापसी के बाद अब 223 उम्मीदवार चुनाव मैदान म हवय। नाम वापसी के आखिरी दिन काली 30 उम्मीदवार मन अपन-अपन नाम वापस लीन। मुख्य निर्वाचन पदाधिकारी कार्यालय ले मिले जानबा के मुताबिक राजनांदगांव विधानसभा क्षेत्र ले सबले जादा 6 झिन उम्मीदवार मन अपन नाव वापस ले हवय। नाम वापसी के बाद अंतागढ़ विधानसभा क्षेत्र म 13, भानुप्रतापपुर म 14, कांकेर अउ नारायणपुर म 9-9, केशकाल म 10, कोंडागांव अउ बस्तर म 8-8, जगदलपुर म 11, चित्रकोट अउ दंतेवाड़ा म 7-7, बीजापुर अउ कोंटा विधानसभा क्षेत्र म 8-8 उम्मीदवार मैदान म हवय। उहे, खैरागढ़ म 11, डोंगरगढ़ म 10, राजनांदगांव म 29, डोंगरगांव म 12, खुज्जी म 10, मोहला-मानपुर म 9, कवर्धा म 16 अउ पंडरिया विधानसभा क्षेत्र म 14 झिन उम्मीदवार मनके बीच मुकाबला होही।
जानबा के मुताबिक पहिली चरण म 7 नवंबर के जउन 20 ठिन विधानसभा क्षेत्र म चुनई होवइया हे, उहां मतदाता मनके कुल संख्या 40 लाख 78 हजार 681 हवय। मतदान खातिर ए विधानसभा क्षेत्र मन म 5 हजार 304 मतदान केन्द्र बनाय गे हवय।
उहें, प्रदेस म दूसरइया चरण म बाचे 70 सीट मन म नामांकन पत्र भरे के प्रक्रिया चलत हवय। काली 23 अक्टूबर तक उनसठ नामांकन पत्र दाखिल करे जा चुके हे। नामांकन पत्र जमा करे के आखिरी तारीख 30 अक्टूबर हवय। दूसरइया चरण म 17 नवंबर के मतदान होही अउ दूनों चरण के मतगणना 3 दिसंबर के होही अउ उहीच दिन परिणाम के घोसना घलो करे जाही।
मतदाता पहचान पत्र
प्रदेस म होवइया विधानसभा चुनाव म केन्द्रीय निर्वाचन आयोग ह फोटोयुक्त मतदाता पहिचान पत्र जारी कर दे हवय। राज्य के मुख्य निर्वाचन पदाधिकारी रीना बाबा साहेब कंगाले ह किहीन हे कि अगर कोनो मतदाता पहिचान पत्र नइ दिखा पात हे, त ओला विकल्प म बारह आने-आने पहिचान पत्र दिखाय के अनुमति दे गे हवय। एमा आधार कार्ड, मनरेगा जॉब कार्ड, ड्राईविंग लाइसेंस, पैन कार्ड, भारतीय पासपोर्ट, फोटोयुक्त पेंशन दस्तावेज, केन्द्र या राज्य सरकार अउ लोक उपक्रम, पब्लिक लिमिटेड कंपनी डहार ले अपन कर्मचारी मन ल जारी करे गे फोटोयुक्त सेवा पहिचान पत्र, बैंक या डाकघर डहार ले जारी फोटोयुक्त पासबुक, स्मार्ट कार्ड, स्वास्थ्य बीमा कार्ड, स्वास्थ्य, विधायक अउ विधान परिषद सदस्य मन ल जारी करे गे सरकारी पहिचान पत्र के अलावा केन्द्रीय सामाजिक न्याय अउ अधिकारिता मंत्रालय डहार ले दिव्यांगजन मन ल जारी यूनिक डिसएबिलिटी आईडी कार्ड सामिल हवय। मतदाता मन एमा ले कोनों भी दस्तावेज प्रस्तुत कर मतदान कर सकही।
कांग्रेस-भाजपा बयान
प्रदेस कांग्रेस अध्यक्ष दीपक बैज ह किहीन हे कि प्रदेस म कहूं कांग्रेस के सरकार बनही, त हर किसान के करजा एक बार फेर माफ करे जाही। उहें, अवइया पांच साल के दउरान 15 लाख लोगन मन ल रोजगार दे जाही। संगेसंग जातिगत जनगणना घलो करवाय जाही।
उहें, भाजपा के प्रदेस अध्यक्ष अरूण साव ह किहीन हे कि भाजपा के घोषणा पत्र जारी होय के बाद किसान मन ल भाजपा ले जतका उम्मीद हवय, सबो पूरा होही। ओमन किहीन कि गांव, गरीब अउ किसान के विकास होही। श्री साव ह किहीन कि भाजपा अइसन योजना लाही, जेखर ले किसान मन ल करजा म फंसे के जरूरत ही नइ पड़ही।
असम मुख्यमंत्री-छत्तीसगढ़
भारतीय जनता पार्टी के स्टार प्रचारक अउ असम के मुख्यमंत्री हिमंता बिस्वा सरमा अवइय्या 26 अक्टूबर के छत्तीसगढ़ प्रवास म रइही। श्री सरमा महासमुंद, बिलासपुर अउ खैरागढ़ म जनसभा ल संबोधित करही अउ नामांकन रैली म घलो सामिल होही। अपन प्रवास के दउरान श्री सरमा महासमुंद म आयोजित जनसभा ल संबोधित करही। एखर बाद ओ ह जिला के चारों विधानसभा क्षेत्र म भाजपा प्रत्यासी मनके नामांकन दाखिल करे के दउरान आयोजित होवइया रैली म सामिल होय के बाद बिलासपुर म एक ठिन जनसभा ल संबोधित करही। एखर बाद भाजपा प्रत्सासी मनके नामांकन रैली म भाग लीहीं। इही दिन श्री सरमा खैरागढ़ म जनसभा ल घलो संबोधित करही।
विजयादशमी
बुराई उपर अच्छाई के जीत के प्रतीक दशहरा तिहार ल आज छत्तीसगढ़ संघरा जम्मों देस म बड़ उछाह के संग मनाय जावत हे। ए मउका म रावण, मेघनाद अउ कुंभकर्ण के पुतला के दहन करे जाही।
उहें, राजधानी रईपुर संघरा प्रदेस के सबो जिला म दशहरा उत्सव के आयोजन करे जावत हे। राजधानी रईपुर के डब्ल्यू.आर.एस. कॉलोनी म 110 फीट के रावण अउ 70-70 फीट के कुंभकर्ण अउ मेघनाद के पुतला दहन करे जाही। उहें, रावणभाटा मैदान म 70 फीट के रावण बनाय गे हवय।
दशहरा के मउका म आज रईपुर, राजनांदगांव, रायगढ़ संघरा प्रदेस के आने-आने थाना, चौकी अउ शस्त्रागार म राखे शस्त्र के साफ-सफाई करके विधिविधान ले पूजा करे गीस।
राज्यपाल विश्वभूषण हरिंचदन ह विजयादशमी के मउका म राजभवन म राखे गे शस्त्र पूजा अउ हवन म सामिल होईन। ए मउका म ओमन देस अउ प्रदेस के सुख-समृद्धि के कामना करीन। ओमन राजभवन परिसर म विधि-विधान ल शस्त्र पूजा घलो करीन। ओमन राजभवन सचिवालय के अधिकारी अउ कर्मचारी मन ल विजयादशमीं के सुभकामना दीन। ए मउका म राज्यपाल ह किहीन असत्य उपर सत्य के जीत के ए तिहार हमन ल अहंकार अउ अधर्म के नास करे के सीख देथे।
बस्तर दशहरा
विश्व प्रसिद्व बस्तर दशहरा पर्व के चलत आज रतिहा भीतर रैनी की रस्म अदा करे जाही। ए रस्म म आठ पहिया वाला दू मंजिला बड़का रथ म मां दंतेश्वरी के छत्र ल राख के विधि विधान ले परिक्रमा कराय जाही। एखर बाद रथ ल दंतेश्वरी मंदिर के सामने सिंह ड्योढ़ी म रोककर ओमा ले माई के छत्र ल रथ ले उतारकर मंदिर में राखे जाही अउ रथ ल सिंह ड्योढ़ी म ही छोड दे जाही। एखर बाद ए रथ ल चोरी कर आदिवासी मन, कुम्हड़ाकोट के जंगल म ले जाही
एखर पहिली बस्तर दशहरा के म काली रतिहा मावली परघाव के रस्म अदा करे गीस।