छत्तीसगढ़ म विधानसभा चुनाव के पहलइया चरण के तहत आज नाम वापसी के अंतिम दिन रिहीस।
गौरतलब हे कि पाछू इक्कीस अक्टूबर के नामांकन पत्र के जांच करे गे रिहीस। जांच के बाद दू सौ तिरपन उम्मीदवार मन के नामांकन वैध पाएगे रिहीस। पहलइया चरण के तहत बीस ठन विधानसभा सीट म सात नवंबर के मतदान होही। मतगणना तीन दिसंबर के होही, अउ इही दिन चुनाव परिणाम के घोषणा घलो करे जाही।
कांग्रेस-सूची
अखिल भारतीय कांग्रेस कमेटी ह छत्तीसगढ़ विधानसभा चुनाव बर सात झन प्रत्यासी मन के अंतिम सूची जारी कर देहे। एखरे संग कांग्रेस ह अब प्रदेस के सबो नब्बे सीट म अपन प्रत्यासी मनके घोषणा कर देहे। कांग्रेस ह जेन सात झन उम्मीद्वार मनके घोषणा करे हे, ओमा चार झन महिला घलो सामिल हे। पार्टी ह महासमुंद ले डॉक्टर रश्मी चंद्राकर, सरायपाली ले चतुरी नंद, सिहावा ले अंबिका मरकाम अउ बैकुंठपुर ले अंबिका सिंहदेव ल अपन उम्मीदवार बनाय हे। उहे, रायपुर उत्तर ले कुलदीप जुनेजा, कसडोल ले संदीप साहू अउ धमतरी ले ओमकार साहू ल प्रत्यासी घोषित करे गेहे। पार्टी ह अंतिम सूची म चार झन विधायक-कसडोल ले सकुंतला साहू, सिहावा ले लक्ष्मी धु्रव, सरायपाली ले किसमत लाल नंद अउ महासमुंद ले विनोद चंद्राकर के टिकिट काट देेहे। ए बखत के चुनाव म कांग्रेस के बाईस झन विधायक मनके टिकिट काट के नवा चेहरा मन ल मउका दे गेहे।
उहें, भारतीय जनता पार्टी ह अब तक प्रदेस के नब्बे मे से छियासी सीट म उम्मीदवार मन के घोषणा कर चुके हे।
ओति, आम आदमी पार्टी ह घलो अपन बारह झन प्रत्यासी मन के चौथा सूची काली देर रात जारी कर देहे।
हमर राज-जय छत्तीसगढ़ पार्टी
चुनाव आयोग ह छत्तीसगढ़ के नवोदित हमर राज पार्टी ल ‘‘बाल्टी‘‘ चुनाव चिन्ह आबंटित करे हे। उहें, जय छत्तीसगढ़ पार्टी ल ‘‘छड़ी‘‘ चुनाव चिन्ह मिले हे। गौरतलब हे कि पूर्व केंद्रीय मंत्री अरविंद नेताम ह विधानसभा चुनाव के घोषणा के पहिली ही हमर राज पार्टी के गठन करे हे। सेवानिवृत्त आईपीएस अकबर राम कोर्राम पार्टी के प्रदेस अध्यक्ष हावय।
उहें, चुनाव आयोग ह छत्तीसगढ़ ले विधानसभा चुनाव लड़त कुछ अउ पार्टी मन ल घलो चुनाव चिन्ह आबंटित करे हे। एमा अखंड लोकतंत्र पार्टी ल ‘‘ऑटो-रिक्शा’‘ अउ ऑल इंडिया फारवर्ड ब्लाक ल ‘‘शेर‘‘ चुनाव चिन्ह दे गेहे।
भाजपा-ज्ञापन
भाजपा के छत्तीसगढ़ इकाई ह आज मुख्य निर्वाचन पदाधिकारी ले पुलिस महानिदेसक अउ गृह विभाग के सचिव ल हटाय के मांग करे हे। संगेसंग मोहला-मानपुर-अंबागढ़ चौकी अउ धमतरी जिला के पुलिस अधीक्षक ल घलो हटाय के मांग करे हे।
भाजपा सांसद सुनील सोनी, संतोष पांडे अउ विधायक अजय चंद्राकर ह मुख्य निर्वाचन पदाधिकारी ल सौंपे ज्ञापन म केहे हे कि प्रदेस म विधानसभा चुनाव के घोषणा के संग ही, हिंसा के घटना बाढ़ गेहे। प्रदेस म कानून व्यवस्था लचर होगे हे। आम जनता म घलो भय के महौल हे, अइसना म राज्य म सांतिपूर्ण चुनाव बर उचित कदम उठाय जाना चाही। ओमन भाजपा नेता बिरझू तारम के हत्यारा मन उपर कार्यवाही करे अउ विधानसभा चुनाव के दौरान नक्सल प्रभावित क्षेत्र के संवेदनसील अउ अति संवदेनसील मतदान केंद्र मन म केंद्रीय सुरक्षा बल के तैनाती के घलो मांग करे हे।
मतदाता जागरूकता
प्रदेस म सत-प्रतिसत मतदान सुनिश्चित करे बर स्वीप कार्यक्रम के तहत अलग-अलग जागरूकता कार्यक्रम मनके आयोजन करे जात हे। इही कड़ी म कोंडागांव म रंगोली, मेहंदी, चित्रकला अउ पोस्टर मेकिंग प्रतियोगिता के आयोजन कर लोगन मन ल मतदान करे बर जागरूक करे जात हे। एखर अलावा चार हजार दिया जला के दीपोत्सव के आयोजन घलो करे गीस। उहें, एनएसएस इकाई अउ युवोदय कोंडानार चैम्प्स के स्वयंसेवक मन डहार ले नुक्कड़ नाटक के प्रदर्सन करे गीस।
उहें, भारत स्काउट गाईड अउ कब बुलबुल टीम ह जागरूकता रैली के संगेसंग सफाई अभियान चला के मतदान के संदेस दीन।
विस चुनाव-निगरानी समिति
राज्य म विधानसभा चुनाव के मद्देनजर अलग-अलग प्रवर्तन एजेंसी के माध्यम ले धन अउ वस्तु मन के अवैध परिवहन अउ संग्रहण उपर कड़ी नजर रखे जात हे। संगे संग निगरानी दल मन डहार ले प्रदेस के सब्बों जघा म जांच के कार्रवाही घलो करे जात हे। राज्य म आदर्श आचार संहिता लागू होय के बाद ले काली इक्कीस अक्टूबर तक चौदह करोड़ तैंतीस लाख रूपिया ले जादा के अवैध धन रासि अउ वस्तु मन ल जब्त करे गेहे। जेमा चार करोड़ छप्पन लाख रूपिया ले जादा के नगद रासि सामिल हे। मुख्य निर्वाचन पदाधिकारी कार्यालय ले मिले जानकारी के अनुसार प्रवर्तन एजेंसी डहार ले करीब बांसठ लाख रूपिया मूल्य के बीस हजार लीटर ले जादा के अवैध सराब जब्त करे गेहे। उहें, लगभग दो करोड़ रूपिया मूल्य के छब्बीस सौ किलोग्राम ले जादा के नसीला पदार्थ घलो बरामद करे गे रिहीन।
ओति, जांजगीर-चांपा जिला म निगरानी दल के टीम ह पामगढ़ के अंबेडकर चौक करा एक ठन कार ले सात सौ पच्चीस नग साड़ी अउ गमछा जब्त करे हे।
उहें, बिलासपुर जिला म सिरगिट्टी थाना क्षेत्र के तिफरा म जिला निर्वाचन आयोग के टीम ह करीब दू लाख अठ्ठाइस हजार रूपिया कीमत के दू सौ पच्यासी नग साड़ी जब्त करे हे।
नवरात्र-दशहरा
शारदीय नवरात्र के आखिरी दिन आज प्रदेस म महानवमी मनाय जात हे। आज सिध्दीदात्री रूप म मां दुर्गा के पूजा-अर्चना करे जाथे। राजधानी रायपुर म जघा-जघा कन्या भोज अउ भंडारा के आयोजन करे जात हे। काली ले जंवारा विसर्जन के संग पूजा पंडाल मन म विराजे देवी प्रतिमा मन के विसर्जन के सिलसिला सुरू हो जही।
उहें, विजयादशमी के परब काली मनाय जाही। ए मउका म राजधानी म अनेक जघा म रावण, कुंभकरण अउ मेघनाथ के पुतला दहन करे जाही। आधा दर्जन ले जादा जघा म बड़े स्तर म दशहरा उत्सव मनाय जाही। कई ठिन जघा म रावण दहन ले पहिली रामलीला के मंचन घलो करे जाही। राजधानी रायपुर के डब्लू.आर.एस. कॉलोनी म दशहरा उत्सव ल लेके विसेस तैयारी करे जात हे। ए बखत एक सौ दस फीट के रावण अउ सत्तर-सत्तर फीट के कुंभकरण अउ मेघनाथ के पुतला बनाय गेहे। रावण दहन ले पहिली सांस्कृतिक कार्यक्रम के अलावा आतिसबाजी घलो करे जाही। उहें, रायपुर के रावणभांटा मैदान म घलो दशहरा उत्सव के कार्यक्रम आयोजित करे जाही।
बस्तर-दशहरा
इही बीच, पचहत्तर दीन तक चलइया विश्व प्रसिध्द बस्तर दशहरा पर्व के तहत आज जोगी उठाई अउ मावली परघाव के रस्म अदा करे जाही। एखर तहत नवरात्र के पहलइया दिन ले सिरासार भवन म मां दंतेश्वरी के अराधना म बैठे युवक ल विधि-विधान पूर्वक पूजा-अर्चना के बाद उठाय जाही। एला जोगी उठाई कहे जाथे। एखर बाद मावली परघाव होही। एमा शक्तिपीठ दंतेवाड़ा ले बस्तर दशहरा म सामिल होय बर आय मावली माता अउ मां दंतेश्वरी के डोली अउ छत्र ल विधि-विधान पूर्वक परघाय जाही।
एखर पहिली काली रतिहा निशा जात्रा के रस्म अदा करे गीस।
वीनू मांकड़ ट्रॉफी
भारतीय क्रिकेट कंट्रोल बोर्ड डहार ले आयोजित वीनू मांकड़ ट्रॉफी अंडर-नाइंटीन म छत्तीसगढ़ के टीम ह पहिली बार क्वार्टर फाइनल म प्रवेस करे हे। क्वार्टर फाइनल म छत्तीसगढ़ के मैच काली चौबीस अक्टूबर के हरियाणा संग होही। ए प्रतियोगिता म छत्तीसगढ़ ह अब तक खेले पांच ठन मैच म सौराष्ट्र, गोवा, अरूणाचल प्रदेस अउ ओड़िसा के खिलाफ जीत हासिल करे हे। छत्तीसगढ़ के टीम ह अंकतालिका म पहलईया स्थान हासिल कर सीधा क्वार्टर फाइनल म प्रवेस करे हे। ए सबो मैच म राजनांदगांव के ऑलराउंडर विकल्प तिवारी ह सानदार प्रदर्सन करे हे।