विस चुनाव-नामांकन
छत्तीसगढ़ म विधानसभा चुनई के दूसरा चरण खातिर अधिसूचना जारी होय के बाद नामांकन पत्र भरे के प्रक्रिया सुरू होगे हवय। मुख्य निर्वाचन पदाधिकारी कार्यालय ले प्राप्त जानबा के मुताबिक काली पहिली दिन पांच ठिन नामांकन पत्र दाखिल करे गीस। जेमा प्रेमनगर, रायगढ़,मरवाही, बिलाईगढ़ अउ राजिम विधानसभा क्षेत्र ले एक-एक ठिन नामांकन पत्र दाखिल करे गीस। दूसरइया चरण म नामांकन पत्र जमा करे के आखिरी तारीख 30 अक्टूबर हवय। उहें, 31 अक्टूबर के नामांकन पत्र के जांच करे जाही। अभ्यर्थी मन दू नवंबर तक तक अपन नांव वापस ले सकहीं। दूसरइया चरण म रईपुर, बिलासपुर, दुर्ग अउ सरगुजा संभाग के कुल 70 ठिन विधानसभा सामिल हवय। ए सीट मन म 17 नवंबर के वोट डाले जाही।
उहें, विधानसभा चुनई के पहिली चरण म काली नामांकन पत्र के जांच करे गीस। एखर बाद दू सौ तिरपन उम्मीद्वार मनके नामांकन सही पाय गीस। काली 23 अक्टूबर तक ए अभ्यर्थी मन अपन नांव ले सकथे। जानबा के मुताबिक पहिली चरण म 20 ठिन विधानसभा सीट मन म 7 नवंबर के मतदान होही। दूनों चरण के मतगणना 3 दिसंबर के होहीं, अउ उही दिन चुनई परिणाम के घोषणा करे जाही।
निर्वाचन कर्मचारी-निःशुल्क चिकित्सा
छत्तीसगढ़ म होवइया विधानसभा चुनई के दौरान ड्यूटी म तैनात शासकीय अधिकारी अउ करमचारी मनके स्वास्थ्य बिगड़े के स्थिति म ओमन ल शासकीय अस्पताल म निःसुल्क चिकित्सा सुविधा दे जाही। स्वास्थ्य विभाग के आदेस के अनुसार राज्य के शासकीय अस्पताल मन म आवश्यक स्वास्थ्य सुविधा उपलब्ध नइ होय म अउ आपातकालीन स्थिति म अधिकारी-करमचारी मन ल रईपुर के चार निजी अस्पताल-बालाजी अस्पताल, नारायण अस्पताल, रामकृष्ण केयर अस्पताल अउ एन.एच.एम.एम.आई. अस्पताल म ईलाज के सुविधा उपलब्ध रइहीं। एखर अलावा राज्य ले बाहिर दू निजी अस्पताल-हैदराबाद स्थित केयर हॉस्पिटल अउ विशाखापट्टनम के अपोलो अस्पताल म घलो अधिकारी-करमचारी मन ल ईलाज के सुविधा उपलब्ध कराय जाही।
खबर के मुताबिक छत्तीसगढ़ विधानसभा चुनई ल संपन्न कराय के उद्देस्य ले निर्वाचन आयोग के निरदेस म आने-आने विभाग के अधिकारी-करमचारी मनके ड्यूटी लगाय गे हवय।
मतदाता जागरूकता
प्रदेस म सत-प्रतिसत मतदान कराय खातिर स्वीप कारीकरम के चलत आने-आने जागरूकता कारीकरम के आयोजन करे जावत हे। इही कड़ी म कोंडागंाव म राष्ट्रीय आजीविका मिसन-बिहान के माईलोगिन डहार ले गांव गांव म दीवार म लिखके लोगन मन ल मतदान करे खातिर जागरूक करे जावत हे। एखर तहत माईलोगिन मन डहार ले 7 नवंबर के होवइया मतदान के तारीख के संगेसंग अपन नजदीकी मतदान केंद्र ल अंकित करे जावत हे। अब तक 102 गांव के 537 स्थान मन म दीवार म लिखे के काम करे जा चुके हवय।
ऐति राजनांदगांव जिला के डोंगरगढ़ के मेला ग्राउण्ड म शासकीय पंडित जवाहर लाल नेहरू महाविद्यालय अउ स्वामी आत्मानंद स्कूल के पढ़ईया लइका डहार ले मतदाता जागरूक अभियान के चलत नुक्कड़ नाटक के जरिया लोगन मन ल मतदान के महत्व बताके प्रेरित करे गीस। कारीकरम म जिला कलेक्टर डोमन सिंह घलो सामिल रिहीन।
हाईकोर्ट-याचिका खारिज
छत्तीसगढ़ उच्च न्यायालय ह सरगुजा जिला के सीतापुर विधानसभा क्षेत्र के भाजपा प्रत्यासी राजकुमार टोप्पो के जाति प्रमाण पत्र ल लेके दायर करे गे याचिका ल खारिज कर दे हवय। न्यायालय के मानना हे कि जाति प्रमाण पत्र मामला म अधिकारी मन ल दे गे आवेदन अउ हाईकोर्ट म लगाय गे रिट के तिथि म अंतर नइ हवय। ए मामला के सुनवाई करत न्यायधीश पार्थ प्रीतम साहू ह किहीन कि संबंधित अधिकारी के सामने आवेदन दाखिल करे के तारीख ल ध्यान म राखत ए याचिका ल अस्वीकार करे गीस हवय।
गौरतलब हवय कि भाजपा प्रत्यासी राजकुमार टोप्पो के खिलाफ जाति प्रमाण पत्र मामला म बिहारी लाल तिर्की अउ सहदेव राम ह हाईकोर्ट म याचिका दायर करे रिहीन।
महाअष्टमी
छत्तीसगढ़ समेत देसभर म आज दुर्गा अष्टमी श्रध्दा अउ धार्मिक उछाह के संग मनाय जावत हे। आज के दिन महागौरी के रूप म शक्ति के उपासना करे जाथे। राजधानी रईपुर समेत प्रदेस के आने-आने सक्तिपीठ अउ मंदिर मन म आज हवन-पूजा कि बिसेस कारीकरम के आयोजन होवत हे। मंदिर अउ दुर्गा उत्सव समिति मन के संगेसंग व्रत उपवास रखइया श्रध्दालु मन ह आज कन्या भोज घलो कराइन।
मतदान-शराब दुकान बंद
भारत निर्वाचन आयोग ह प्रदेस म होवइया विधानसभा चुनई के मतदान सिराय के 48 घंटा पहिली सुष्क दिवस घोषित करे के निरदेस दीन हे। ए संबंध म वाणिज्यिक कर विभाग डहार ले प्रदेस के जम्मों जिला कलेक्टर मन ल निरदेस जारी कर दे गे हवय। विभाग ह विधानसभा चुनई के दौरान सराब के बेचई म प्रतिबंधात्मक कार्रवाई करत मतदान के तिथि 7 अउ 17 नवंबर के मतदान सिराय के 48 घंटा के पहिली ले मतदान सिराय तक सबो आबकारी केंद्र मन ल पूरा तरीका ले बंद राखे के निरदेस दीन हे। उहें, मतगणना के दिन 3 दिसंबर ल घलो सुष्क दिवस घोषित करे गे हवय। संगेसंग भांग के दुकान मन ल घलो ए बेरा तक बंद राखे ल केहे गे हवय।
एनआईए-सोशल मीडिया प्लेटफॉर्म
राष्ट्रीय अन्वेषण अभिकरण-एनआईए ह लोगन मन ल सोशल मीडिया प्लेटफॉर्म म प्रसारित होवइया कुछू झूठा अउ भ्रामक संदेस के बारे म चेतावत किहीन हे कि अइसन संदेस पूरा तरीका ले फर्जी अउ गलत हवय, जउन ह जनता ल गुमराह करथे। एनआईए ह लोगन मन ल चेताय हे कि ओमन कोनो सूचना के बारे म कोनो संदेस जारी नइ करे हवय। एनआईए ल जांच के दौरान ए बात मालूम होइस के इस्लामिक राज्य अपन हिंसक अउ गैरकानूनी मंसूबा ल आगू बढ़ाय खातिर झूठा प्रचार के जरिया सिधवा लोगन अउ युवा मन ल निसाना बनाके ओमन ल कट्टरपंथी बनावत हवय।
जानबा के मुताबिक सितंबर दू हजार 21 म अपील करे गे रिहीस कि अइसन कोनो संदिग्ध गतिविधि के सूचना एनआईए ल ओखर फोन नंबर- सून्य एक एक-दू चार तीन छै आठ आठ सून्य सून्य म अधिकारी मन ल दे जा सकत हे।
दूरदर्शन/आकाशवाणी-राजनीतिक दल
भारत निर्वाचन आयोग ह राष्ट्रीय दल अउ राज्य के मान्यता प्राप्त राज्यस्तरीय राजनीतिक दल मन ल दूरदर्शन अउ आकाशवाणी म निःसुल्क प्रसारण खातिर समय उपलब्ध कराय के संबंध म दिसा-निरदेस जारी करीन हे। मुख्य निर्वाचन पदाधिकारी छत्तीसगढ़ कार्यालय के मुताबिक विधानसभा चुनई खातिर भारत निर्वाचन आयोग डहार ले जम्मों राष्ट्रीय दल अउ छत्तीसगढ़ म मान्यता प्राप्त राज्यस्तरीय दल मन ल दूरदर्शन अउ आकाशवाणी के क्षेत्रीय नेटवर्क म प्रचार खातिर सुरूवाती रूप म 45 मिनट के एकसमान बेरा उपलब्ध कराय जाय के निरदेस दे गे हवय। प्रसारण खातिर एक बेरा म 15 मिनट ले जादा समय नइ दे जाही। राजनीतिक दल मन ल दूरदर्शन अउ आकाशवाणी म प्रसारण खातिर प्रत्यासी मनके सूची के प्रकासन के दिन ले हरेक चरण के मतदान दिवस के दू दिन पहिली तक दे जाही।
प्रदेस म राजनीतिक दल मन ल प्रसारण के ए सुविधा दूरदर्शन अउ आकाशवाणी के क्षेत्रीय प्रसारण केंद्र अउ राजधानी रईपुर स्थित प्रसारण केंद्र ले दे जाही। एला छत्तीसगढ़ म स्थित दूरदर्शन अउ आकाशवाणी के आने-आने रिले केंद्र घलो प्रसारित करही।
संक्षिप्त समाचार
– जांजगीर-चांपा जिला के हथनेवरा गांव म जांच के दउरान एक गाड़ी ले पुलिस ह तकरीबन 140 साड़ियां जब्ती करीन हे।
अउ
– राजनांदगांव सहर के पेंड्री ट्रांसपोर्ट नगर चौक के तीर पुलिस ह 5 किलो गांजा के संग तीन ठिन आरोपी मन ल गिरफ्तार करीन हे। जेखर मन के तीर ले तकरीबन डेढ़ लाख रूपिया नगद बरामद करे गे हवय।