दूसर चरण अधिसूचना
छत्तीसगढ़ म विधानसभा चुनाव के दूसर चरण बर आज अधिसूचना जारी कर देहे। एखरे संग राज्य के बांचे सत्तर सीट बर नामांकन भरे के काम घलो सुरू होगे हे। दूसर चरण म नामांकन पत्र जमा करे के आखिरी तारीख तीस अक्टूबर हे। उहें, इकतीस अक्टूबर के नामांकन पत्र के जांच करे जाही। अभ्यर्थी दू नवंबर तक नांव वापस ले सकही। दूसर चरण म-रईपुर, बिलासपुर, दुर्ग अउ सरगुजा संभाग के कुल सत्तर विधानसभा क्षेत्र म सामिल हे। ए सीट बर सत्रह नवंबर के वोट डाले जाही। उहें, तीन दिसंबर के मतगणना होही। एखर बाद चुनाव परिणाम के घोषणा करे जाही।
पहला चरण नामंाकन
छत्तीसगढ़ म विधानसभा चुनाव के पहिली चरण म बीस सीट उपर होवइया मतदान बर आज नामांकन पत्र के जांच करे गीस। काली बीस अक्टूबर के नामांकन पत्र भरे के आखिरी दिन रहिस। पहिली चरण के बीस सीट बर दू सौ चौरानवे अभ्यर्थी मन ह चार सौ पचपन नामांकन पत्र दाखिल करे हे। अभ्यर्थी तेईस अक्टूबर तक अपन नांव वापस ले सकही। पहिली चरण बर सात नवंबर के वोट डाले जाही।
पहिली चरण के बीस विधानसभा क्षेत्र मन म कुल मतदाता के संख्या चालीस लाख अठहत्तर हजार ले जादा हे। ए विधानसभा क्षेत्र मन बर पांच हजार तीन सौ चार मतदान केंद्र बनाय गेहे। खबर के मुताबिक पहिली चरण म बस्तर संभाग के सबो बारह सीट- अंतागढ़, भानुप्रतापपुर, कांकेर, केशकाल,कोंडागांव, नारायणपुर, बस्तर, जगदलपुर, चित्रकोट, दंतेवाड़ा, बीजापुर अउ कोंटा म सात नवंबर के ए मतदान होही। एखर संगेसंग पंडरिया, कवर्धा,खैरागढ़, डोगरगढ़, राजनांदगांव, डोंगरगांव, खुज्जी अउ मोहला-मानपुर म घलो पहिली चरण म वोट डाले जाही।
गगनयान-परीक्षण
भारतीय अंतरिक्ष अनुसंधान संगठन इसरो ह आज अपन रॉकेट गगनयान के आपदा के स्थिति म अंतरिक्ष यात्री मन ल सुरक्षित निकाले के प्रणाली के सफल परीक्षण करीन। श्री हरि कोटा ले गगनयान मिसन के क्रू-मॉड्यूल के सफल परीक्षण करे गीस। दू हजार पचीस म मानवयुक्त अंतरिक्ष मिसन भेजे के तइयारी म इसरो ह टीवी डी-वन मिसन के सफल परीक्षण करीन। अवईया बछर इसरो ल मानव रहित मिसन पूरा करना हे। एखर मुख्य उद्देस्य सुरक्षित लैंडिंग, अंतरिक्ष यात्री मन ल सुरक्षित बचाव अउ क्रू-मॉड्यूलर के परीक्षण करना रहिस। गगनयान ल तीन बार रोके के बाद बिहनिया दस बजे सफलता पूर्वक प्रक्षेपित करे गीस। ऐला श्री हरि कोटा म सतीश धवन अंतरिक्ष केंद्र के पहिली लॉंच पैड ले बिहनिया ठीक दस बजे छोड़े गीस। नौ मिनट के बाद क्रू-मॉड्यूलर श्री हरि कोटा ले दस किलोमीटर दूरिहा बंगाल के खाड़ी म गिरीस। नौसेना के गोताखोर मॉड्यूलर ल निकाल के नौसेना के पोत म लाइस। आज ऐला मद्रास बंदरगाह म लाय जाही।
भाजपा कार्यकर्ता-हत्या
मोहला-मानपुर-अंबागढ़ चौकी जिला के गांव सरखेड़ा म काली रतिहा भाजपा कार्यकर्ता बिरझू तारम के गोली मारके हत्या कर दीस। हथियारबंद कुछेक अज्ञात लोगन ह घर म घुस के ए घटना ल अंजाम दीन। घटना म माओवादी मन के सामिल होय के आसंका जताय जात हे। पुलिस मामला के जांच म जुट गेहे।
इही, बीच स्वास्थ्य मंत्री मनसुख मांडविया, पूर्व मुख्यमंत्री डॉक्टर रमन ंिसंह अउ सांसद संतोष पांडेय आज सरखेड़ा गांव पहुंचीन। ए दौरान ओमन ह मृतक के परिवार ले भेंट करीन अउ ओमन ल न्याय दिलाय के भरोसा दिलाइन।
उहे, भाजपा के प्रदेस अध्यक्ष अरूण साव ह आरोप लगाय हे कि कांग्रेस सरकार के कार्यकाल म प्रदेस म भाजपा कार्यकर्ता मनके सरलग हत्या होवत हे। प्रदेस म कानून बेवस्था के स्थिति पूरा तरह ले चरमरा गेहे।
उहें, पूर्व मुख्यमंत्री अउ भाजपा के राष्ट्रीय उपाध्यक्ष डॉक्टर रमन सिंह ह भाजपा कार्यकर्ता के हत्या उपर दुख जताय हे। ओमन ह राज्य के कांग्रेस सरकार उपर आरोप लगात किहीन कि हत्या के घटना ल अंजाम देके, भाजपा कार्यकर्ता मन ल डराय के कोसिस करे जात हे।
माओवादी-मुठभेड़
कांकेर जिला म सुरक्षाबल अउ माओवादी मनके बीच आज होय मुठभेड़ म दू झिन माओवादी मारे गीस। खबर के मुताबिक जिला के कोयलीबेड़ा थाना क्षेत्र ले डिस्ट्रिक्ट रिजर्व-गार्ड-डीआरजी, बस्तर फाइटर्स अउ बीएसएफ के संयुक्त टीम सर्चिंग अभियान बर निकले रिहीन, इही दौरान इंरम गांव गोमे के सरहदी जंगल मन म माओवादी मन ह सुरक्षा बल उपर गोलबारी सुरू कर देहे। सुरक्षाबल ह जवाबी कार्रवाई करीन। ए मुठभेड़ म दू झिन माओवादी मारे गीस। बाद म सुरक्षाबल मन ह घटना स्थल के सर्चिंग के दौरान दू माओवादी मनके शव, एक इंसास राइफल, एक भरमार बंदूक, विस्फोटक सामग्री अउ आने दैनिक उपयोग के सामान बरामद करे हे।
पुलिस स्मृति दिवस-01
आज पुलिस स्मृति दिवस हरय। पुलिस कर्मी मन के देस के प्रति निष्ठा, ईमानदारी अउ सर्वोच्च बलिदान के सम्मान म हर बछर इक्कीस अक्टूबर के पुलिस स्मृति दिवस मनाय जाथे।
राज्यपाल विश्वभूषण हरिचंदन ह रईपुर के माना स्थित छत्तीसगढ़ सशस्त्र बल के चौथा वाहिनी म पुलिस स्मृति दिवस उपर आयोजित कारीकरम म सामिल होइन। राज्यपाल ह किहीन कि पुलिस के जवान मन ह विपरीत परिस्थिति म घलो हर चुनौती के सामना करे हे। ओमन किहीन हे कि समाज म कानून बेवस्था अउ सांति बनाय राखे बर पुलिस कर्मी सदैव अपन जिम्मेदारी ल निभाथे। राज्यपाल ह किहीन कि पुलिस स्मृति दिवस हमन ल वीर जवान मनके वीरता के सुरता दिलाथे। ए मउका म राज्यपाल ह पुलिस के सहीद वीर जवान मन ल नमन करत सहीद स्मारक म फूल माला चढ़ाके के श्रध्दांजलि दीन।
ओति दुरूग जिला के भिलाई स्थित केंद्रीय औद्योगिक सुरक्षा बल के तीसरा आरक्षित वाहिनी परिसर म पुलिस स्मृति दिवस मनाय गीस।
अइसने कोरिया जिला के बैकुंठपुर म कलेक्टर विनय कुमार लंगेह, पुलिस अधीक्षक त्रिलोक बंसल ह सहीद जवान मन ल श्रध्दांजलि दीन। संगेसंग, बीजापुर जिला मुख्यालय म घलो सहीद मन ल श्रध्दांजलि दे गीस।
निर्वाचन कर्मचारी-निःशुल्क चिकित्सा
छत्तीसगढ़ म होवइया विधानसभा चुनाव के दौरान ड्यूटी म तैनात शासकीय अधिकारी अउ करमचारी मन ल सबो शासकीय अस्पताल मन म निःशुल्क ईलाज के सुविधा दे जाही। स्वास्थ्य विभाग के आदेस के अनुसार राज्य के शासकीय अस्पताल मन म आवश्यक स्वास्थ्य सुविधा उपलब्ध नइ होय म अउ आपात कालीन स्थिति म अधिकारी करमचारी रईपुर के चार अउ राज्य ले बाहिर दू निजी अस्पताल मन म घलो अपन ईलाज करा सकही।
खबर के मुताबिक छत्तीसगढ़ विधानसभा चुनाव ल संपन्न कराय के उद्देस्य ले निर्वाचन आयोग के निरदेस म आने-आने विभाग मनके अधिकारी करमचारी मनके ड्यूटी लगाय गेहे।
दूरदर्शन/आकाशवाणी-राजनीतिक दल
भारत निर्वाचन आयोग ह राष्ट्रीय दल अउ राज्य के मान्यता प्राप्त राज्यीय राजनीतिक दल मन ल दूरदर्शन अउ आकाशवाणी म निःसुल्क प्रसारण बर समय उपलब्ध कराय के संबंध म दिसा निरदेस जारी करे हे।
मुख्य निर्वाचन पदाधिकारी छत्तीसगढ़ कार्यालय के अनुसार विधानसभा चुनाव बर सबों राष्ट्रीय दल अउ छत्तीसगढ़ म मान्यता प्राप्त राज्यीय दल मन ल दूरदर्शन अउ आकाशवाणी के क्षेत्रीय नेटवर्क म प्रचार बर प्रारंभिक रूप ले पैंतालीस मिनट के एक समान बेरा दे जाय के भारत निर्वाचन आयोग के निरदेस हे। प्रसारण बर एक बार म पंद्रह मिनट ले जादा के बेरा नइ दे जाय।
प्रदेस म राजनीतिक दल मन ल प्रसारण के ए सुविधा दुरदर्शन अउ आकाशवाणी के क्षेत्रीय प्रसारण केंद्र अउ राजधानी रईपुर स्थित प्रसारण केंद्र ले दे जाही। एला छत्तीसगढ़ म स्थित दूरदर्शन अउ आकाशवाणी के आने रिले केंद्र म घलो प्रसारित करही।
संक्षिप्त समाचार
– निर्वाचन आयोग ह प्रदेस म विधानसभा चुनाव के दउरान सिकायत मन के आधार म बीस ले जादा अधिकारी अउ करमचारी मन ल मूल पद ले हटात जिला मुख्यालय मन म अटैच कर देहे।
– सक्ती जिला के डभरा थाना क्षेत्र के ग्राम बरभाटा के तीर टेक्टर के टक्कर ले मोटर साइकिल सवार एक झिन युवक के मउत होगे।
अउ
– कोंडागांव जिला के नारंगी नदी पुल के तीर बस के पल्टे ले बारह यात्री घायल होगे। ओमन ल ईलाज बर अस्पताल म भर्ती कराय गेहे।