नामांकन दाखिला
छत्तीसगढ़ म विधानसभा चुनाव के पहिली चरण बर नामंाकन पत्र भरे जात हे। आज सोला नामंाकन पत्र भरे गीस। अब तक कुल तेईस नामंाकन पत्र दाखिल करे जा चुके हे। नामंाकन भरे के आखरी तारीख बीस अक्टूबर हे। पहिली चरण म बीस सीट म सात नवंबर के मतदान होही।
पहिली चरण के चुनाव म अस्सी बछर या ओखर ले जादा उमर के मतदाता अउ दिव्यांग मतदाता जउन डाकपत्र के माध्यम ले घर ले ही मतदान करना चाहथे, उंखर बर निर्धारित प्रारूप बारा-घ के तहत आवेदन करे के काली आखरी तारीख हवय। एखर बर सबो विधानसभा क्षेत्र मन म बीएलओ डहार ले घर-घर जाके सर्वे के काम पूरा कर ले गेहे।
विस चुनाव-हमर राज पार्टी
प्रदेश म म होवइया विधानसभा चुनाव म ए बखत आदिवासी बहुल क्षेत्र के लोगन घलो अलगे पार्टी बनाके चुनाव लड़ही। एखर ओमन ह ‘हमर राज पार्टी‘ के नाव एक ठिन नवा राजनीतिक दल के गठन करे हे। पार्टी ह करीबन पचास सीट बर अपन उम्मीदवार उतारे के निर्णय लेहे। एखर तहत पार्टी ह आज उम्मीदवार मनके पहिली सूची जारी करे हे, जेमा उन्नीस सीट बर प्रत्याशी के नाम सामिल हे। सूची के अनुसार बस्तर संभाग ले पांच, सरगुजा ले तीन अउ सामान्य सीट म सात प्रत्याशी मनके नाव के घोसना करे गेहे।
प्रतापपुर ले गीता सिन्हा, सामरी ले परशुराम भगत, लुण्ड्रा ले अनुक प्रताप टेकाम, खरसिया ले भवानी सिंह सिदार, रामपुर ले कन्हैया सिदार, बिल्हा ले शिवनारायण धु्रव, मस्तुरी ले सुखराम खुंटे, सरायपाली ले बिरीतिया चौहान, बसना ले जगदीश सिदार, कसडोल ले परमेश्वरी पैकरा अउ संजारी बालोद ले विनोद नागवंशी उम्मीदवार होही। उहें, पार्टी ह डोंगरगढ़ ले छतरराम चन्द्रवंशी, खुज्जी ले ललिता पैंकरा, मोहला-मानपुर ले युवराज नेताम, भानुप्रतापपुर ले अकबर राम कोर्राम, कोंडागांव ले पनकूराम नेताम, नारायणपुर ले रामलाल उसेंडी, बस्तर ले लखेश्वर कश्यप अउ बीजापुर ले अशोक तलांडी ल उम्मीदवार बनाय गेहे।
संपत्ति विरूपण-कार्यवाही
राज्य म विधानसभा चुनाव बर आदर्श आचार संहिता प्रभावी होय के बाद संपत्ति विरूपण अधिनियम के तहत सार्वजनिक अउ निजी संपत्ति मन ले पन्द्रह अक्टूबर तक पांच लाख ले जादा वॉल राइटिंग, पोस्टर अउ बैनर हटाय के कार्रवाई करे गेहे। एमा सार्वजनिक संपत्ति ले तीन लाख सैंतीस हजार अउ निजी सपंत्ति ले एक लाख तिरसठ हजार ले जादा प्रचार सामान सामिल हे। राज्य के मुख्य निर्वाचन पदाधिकारी रीना बाबा साहेब कंगाले ह बतईन कि सबो जिला निर्वाचन अधिकारी मन डहार ले संपत्ति विरूपण अधिनियम के तहत पांच लाख इंक्यावन हजार ले जादा प्रकरण के चिन्हारी करे गेहे।
मतदाता जागरूकता
प्रदेश म शत प्रतिशत मतदान सुनिश्चित करे बर स्वीप कार्यक्रम के तहत आने आने जागरूकता कार्यक्रम के आयोजन करे जात हे। इही कड़ी म जगदलपुर म आज स्वीप कार्यक्रम के नोडल अधिकारी प्रकाश सर्वे ह मतदाता जागरूकता कार्यक्रम के गतिविधि मनके जानकारी लीन। ए दउरान ओमन ह कहिन कि उच्च शिक्षण संस्थान मन म वोट संवाद कार्यक्रम अउ विकासखंड स्तर म जागरूकता रैली के आयोजन करे जाही।
उंहे शहरी अउ ग्रामीण स्तर म हल्बी गोंडी अउ हिंदी म मतदाता जागरूकता गीत के माध्यम ले मतदाता मन ल प्रेरित करे जाही। संगेसंग भीड़भाड़ वाले सार्वजनिक इलाका मन म ईवीएम मशीन के डेमोंस्टेªशन करे जाही। एखर संग नुक्कड़ नाटक ले मतदाता मन ल मतदान बर प्रेरित करे जाही।
उंहे सारंगढ़ बिलाईगढ़ जिला म घलो मतदाता जागरूकता कार्यक्रम म सारंगढ़ के खेलभाठा मैदान म अधिकारी कर्मचारी संग एक हजार ले जादा माइलोगिन मतदाता मन ह दीप उत्सव मनाइन।
सर्वोच्च न्यायालय विवाह
सर्वोच्च न्यायालय ह समलैंगिक विवाह ल कानूनी मान्यता देबर विशेष शादी अधिनियम म संशोधन करे ले मना कर देहे। न्यायालय ह कानून के अंतर्गत समलैंगिक जोड़ा ल शादी करे के अनुमति देबर कानून के धारा-चार ल हटाय ले घलो मना कर देहे। मुख्य न्यायाधीश डी.वाय. चंद्रचूड़ के अध्यक्षता म पांच न्यायाधीश के पीठ ह केंद्र सरकार के ए दलील म सहमति जताय हे कि कानून म संशोधन ले दूसर कानून उपर असर पड़ सकत हे। पीठ सर्व-सम्मति ले देश म समलैंगिक विवाह के अनुमति देबर अधिनियम म संशोधन नही करे के फैसला दीन।
न्यायालय ह केंद्र सरकार ल राशन कार्ड, पेंशन, ग्रेच्यूटी अउ उत्तराधिकारी संग समलैंगिक जोड़ा मनके चिंता बर मंत्रिमंडल सचिव के अध्यक्षता म एक ठिन उच्च स्तरीय समिति गठित करे के सलाह देहे।
माओवादी-मुठभेड़
बीजापुर जिला म आज सुरक्षा बल के संग मुठभेड़ म आठ लाख रूपिया के इनामी माओवादी मारे गीस। घटनास्थल ले एके-फोर्टी सेवन रायफल अउ माओवादी सामान बरामद करे गेहे।
खबर के मुताबिक माओवादी मनके होय के सूचना म जिला के मद्देड़ थाना ले डीआरजी, बस्तर फाइटर, एसटीएफ अउ सीआरपीएफ के जवान सर्चिंग म निकले रिहीन। इही बेरा कोरंजेड अउ बंदेपरा के जंगल मन म माओवादी मन ह फायरिंग सुरू कर दीस। सुरक्षा बल डहार ले करे गे जवाबी कार्रवाई म एक झिन माओवादी मारे गीस, जेखर सव ल बरामद कर ले गेहे। पुलिस के मुताबिक ए माओवादी मद्देड़ एरिया कमेटी के सेकेट्री रिहीस अउ एखर उपर आठ लाख रूपिया के इनाम घोसित रिहीस।
गांजा बरामद
रायपुर पुलिस ह गांजा तस्करी के मामला म बड़का कार्रवाई करत इंक्यानबे किलो गांजा संग तीन आरोपी मन ल गिरप्तार करे हे। जब्त गांजा के कीमत करीबन चौदा लाख रूपिया बताय गेहे। ए कार्रवाई नारकोटिक्स सेल के टीम डहार ले करे गीस।
खबर के मुताबिक नारकोटिक्स सेल के टीम ल सूचना मिले रीहिस कि कुछएक लोगन मन चारपहिया वाहन ले गांजा लेके महासमुंद ले रायपुर कोति आवत रीहिस। जिला के वरिष्ठ पुलिस अधीक्षक प्रशांत अग्रवाल के निर्देश म रायपुर म नाकाबंदी करके वाहन के जांच करे गीस। ए दौरान मंदिरहसौद थानाक्षेत्र के राष्ट्रीय राजमार्ग क्रमंाक तिरपन म सेरीखेड़ी के तीर पुलिस ह एक ठिन वाहन ले इंक्यानबे किलो गांजा बरामद करीन। पुलिस वाहन ल जब्त करके गिरप्तार आरोपी मनले पूछताछ करत हे।
मिशन इंद्रधनुष-5.0
मिशन इन्द्रधनुष अभियान फाइव प्वॉइंट जीरो के तीसरा चरण धमतरी जिला म पच्चीस अक्टूबर ले सुरू होही। इकतीस अक्टूबर तक चलइया ए अभियान म पांच बछर के लइका अउ गर्भवती माईलोगिन मनके टीकाकरण करे जाही। जिला के मुख्य चिकित्सा अउ स्वास्थ्य अधिकारी डॉक्टर एस.के. मंडल ह बतईन कि अभियान के दउरान इतवार ल छोड़के स्थानीय उप स्वास्थ्य केन्द्र, आंगनबाड़ी केन्द्र अउ पंचायत भवन म टीकाकरण सत्र आयोजित करे जाही। एखर बर ग्रामीण अउ सहरी स्वास्थ्य कार्यकर्ता मन ल प्रसिक्षण दे गेहे।
ऑल इंडिया पुलिस ड्यूटी मीट
हरियाणा के करनाल म आयोजित बहत्त्रवंा ऑल इंडिया पुलिस ड्यूटी मीट म छत्तीसगढ़ पुलिस ल चार पदक मिले हे। एमा ले दू पदक दुर्ग पुलिस के खिलाड़ी मन ल मिलिस। ए स्पर्धा म दुर्ग पुलिस लाईन म पदस्थ महिला आरक्षक कविता ठाकुर ह वेट लिफ्टिंग म रजत पदक अउ छावनी थाना म पदस्थ आरक्षक विवेक कुमार पोद्दार ह आर्म रेसलिंग म कांस्य पदक जीते हे। ए स्पर्धा म देशभर के पुलिस अधिकारी अउ कर्मचारी मन ह भाग लीन।
कैरम-प्रतियोगिता
भारतीय लेखा अउ लेखा परीक्षा विभाग-सीएजी के पश्चिम जोन म कार्यालय के पश्चिम क्षेत्रीय कैरम प्रतियोगिता इकतीस अक्टूबर ले रायपुर म आयोजित करे जाही। दू नवंबर तक चलइया ए प्रतियोगिता म सीएजी के पश्चिम जोन म स्थित दस कार्यालय के टीम हिस्सा लीहीं। एमा मुंबई, नागपुर, अहमदाबाद, राजकोट, भोपाल, ग्वालियर, जयपुर, गोवा अउ रायपुर सामिल हे।