छत्तीसगढ़ म अवईया विधानसभा चुनई के पहिली चरण बर काली ले नामांकन पत्र भरे के सिलसिला सुरू होगे हे। काली पहिली दिन बीस विधानसभा सीट बर कोनो प्रत्यासी ह अपन नामांकन पत्र नइ जमा करे रिहीस।
पहिली चरण बर बस्तर संभाग के सब्बों बारह सीट-अंतागढ़, भानुप्रतापपुर, कांकेर, केशकाल, कोंडागांव, नारायणपुर, बस्तर, जगदलपुर, चित्रकोट, दंतेवाड़ा, बीजापुर अउ कोंटा सामिल हे। एखर संगेसंग पंडरिया, कवर्धा, खैरागढ़, डोंगरगढ़, राजनांदगांव, डोंगरगांव, खुज्जी अउ मोहला-मानपुर म घलो पहिली चरण म नामांकन पत्र डारे जाही।
सुनईया मन ल बतादन कि प्रदेस म दू चरण म होवत निर्वाचन के पहिली चरण के बीस सीट बर 20 अक्टूबर तक नामांकन पत्र भरे जा सकथे। 21 अक्टूबर के जमा नामांकन पत्र के जांच करे जाही अउ प्रत्यासी मन ह 23 अक्टूबर तक अपन नांव वापस ले सकही। पहिली चरण बर 7 नवम्बर के वोट डाले जाही। दूसरईया चरण बर निर्वाचन अधिसूचना 21 अक्टूबर के जारी होही अउ इही दिन नामांकन पत्र घलो भरे बर सुरू हो जही। फेर दूसरईया चरण बर मतदान 17 नवम्बर के होही। दूनों चरण बर वोट के गिनती 3 दिसंबर दिन ईतवार के होही।
विधानसभा चुनाव-ईवीएम वीवीपैट
छत्तीसगढ़ म अवइया विधानसभा चुनई के दौरान निर्वाचन प्रक्रिया म पारदिर्शता अउ बिश्वविसनीयता बढ़ाय बर सब्बों मतदान केंद्र म इलेक्ट्रानिक वोटिंग मशीन-माने ईवीएम के संग वीवीपैट के घलो परयोग करे जाही।
मुख्य निर्वाचन पदाधिकारी कार्यालय ह बताइन हे कि मतदान बर परयोग म लाय ले पहिली ईएमएस सॉफ्टवेयर के उपयोग करके ईवीएम अउ वीवीपैट ल दू बार रेंडमाइज करे जाही। पहिली पईत विधानसभा निर्वाचन क्षेत्र आबंटित होय के बाद अउ दूसरइया पईत मतदान केंद्र आबंटित करे जाय के बाद रेंडमाइज करे जाही। प्रत्यासी या उंखर प्रतिनिधि के आगू म ईवीएम अउ वीवीपैट के कमीसनिंग करे जाही। कमिसनिंग के बाद हरेक ईवीएम अउ वीवीपैट म नोटा समेत सब्बों उम्मीद्वार बर एक-एक वोट देके मॉक पोल करे जाथे। एखर अलावा सब्बों मसीन ले कोनो भी पांच प्रतिसत ईवीएम अउ वीवीपैट ल लेके ओमा एक हजार वोट डाल के मॉक पोल करे जात हे। जेखर इलेक्ट्रानिक परिणाम के मिलान वीवीपैट ले निकले कागज ले करे जात हे।
उहें, वोट वाले दिन असली मतदान सुरू होय के नब्बे मिनट के पहिली मतदान अभिकर्ता के आगू म घलो मॉक पोल करे जाही।
विधानसभा चुनाव-निरीक्षण
अवईया विधानसभा चुनई के तियारी म जांजगीर-चांपा के जिला निर्वाचन अधिकारी ऋचा प्रकाश चौधरी अउ पुलिस अधीक्षक विजय अग्रवाल ह सासकीय पॉलिटेक्निक कॉलेज म बनाय गे स्ट्रॉंग रूम के निरीक्षण करीन।
ए निरीक्षण करत हुए निर्वाचन प्रक्रिया के समान बांटे बर जरूरी मूवमेंट के बारे म जानकारी लीन। एखरे संगेसंग मतगणना कक्ष, शौचालय, बिजली, बैरिकेट, सीसीटीवी कैमरा, साइन बोर्ड, इंटरनेट अउ ग्राउण्ड के व्यवस्था सुनिश्चित करे के निरदेस दीन।
उहें, विधानसभा चुनई के मद्देनजर राजनांदगांव जिला के बार्डर क्षेत्र म निगरानी बढा दे गेहे। कल्लूबंजारी के वन नाका म बड़ संख्या म साड़ी जब्त होय के बाद प्रशासन कोति ले पड़ोसी राज्य ले अवई-जवई वाले गाड़ी मन के कड़ाई ले जांच करे जावत हे। जिला निर्वाचन अधिकारी डोमन सिंह ह जिला के अंतर्राज्यीय बार्डर के तीर बागनदी अउ पाटेकोहरा चेक पोस्ट के निरीक्षण करके आबकारी अउ पुलिस टीम ल जरूरी निरदेस दीन
शराब जब्त
कोंडागांव जिला म ओड़िसा बार्डर म अवैध सराब परिवहन के मामला म एक यात्री बस ले करीब 30 बल्क लीटर सराब पकड़ाए हे। विधानसभा चुनई ल देखत हुए जिला प्रशासन कोति ले सब्बों अंतर्राज्यीय अउ अंतरजिला बार्डर म सरलग निगरानी राखे जावत हे।
निर्वाचन-नोटिस
कवर्धा विधानसभा क्षेत्र के भाजपा उम्मीद्वार विजय शर्मा के खिलाफ बगैर अनुमति के आमसभा करे अउ सामाजिक सांति बिगाड़े के बारे म रिटर्निंग ऑफिसर ह नोटिस जारी करे हे। जेमा उम्मीद्वार ल सिकायत पत्र म देगे कंडिका के बिन्दुवार जवाब दे बर कहे गेहेे। समय सीमा म जवाब प्रस्तुत नइ करे म उंखर खिलाफ एकतरफा कार्यवाही करे जाही।
डाक विभाग-पहल
भारतीय डाक विभाग के दुरूग संभाग ह स्वच्छता अभियान म कपड़ा ले बने झोला ल बढ़ावा दे बर एक ठिन पहल सुरू करे हे। जेमा कोनो भी मनखे ह अपन घर ले पुराना कपड़ा लाके फोकट म ओखर झोला बनवाके ले जा सकथे।
डाकघर के प्रवर अधीक्षक हरीश कुमार महावर ह बतइन कि कार्यालय समय म झोला बनाय के काम करे जात हे। ए योजना के उद्देस्य प्लास्टिक ले होवत कचरा ल रोकना अउ प्लास्टिक पन्नी के जघा म कपड़ा के झोला के प्रति लोगन मन ल जागरूक करना हे।
कबड्डी-गोल्ड मेडल
संयुक्त भारतीय कबड्डी खेल फाउंडेसन इंडिया कोति ले नेपाल के पोखरा म आयोजित आठवां अंतर्राष्ट्रीय चैंपियनसिप कबड्डी प्रतियोगिता म राजनांदगांव जिला के गांव मचानपार-तुमड़ीबोड़ के रहईया दिलेश कुमार यादव ह भारतीय दल ल स्वर्ण पदक जिताय म बड़का भूमिका निभाय हे। नेपाल ले वापसी म रेलवे स्टेशन ले गृह ग्राम तक सोभायात्रा निकाल के ओखर सुवागत करे गीस।
हल्बी/गोण्डी-समाचार बुलेटिन
सुनईया मन ल बतादन काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र जगदलपुर ले प्रसारित करे जाही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढे़ छै बजे ले प्रसारित करे जाही।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए दारी के अंक म ‘‘मुंगेली‘‘ जिला के गतिविधि के बारे म जानकारी दे जाही।
शारदेय नवरात्र
आदिशक्ति मईया के अराधना पर्व शारदेय नवरात्र काली ले सुरू होही। ए मउका म प्रदेस के आने-आने देवी मंदिर म नौ दिन बिसेस पूजा अर्चना के संगेसंग मनोकामना ज्योति कलस के स्थापना घलो करे जाही। राजधानी रईपुर समेत प्रदेस के देवी मंदिर मन म सुघ्घर सजावट करे गेहे। सार्वजनिक दुर्गा समिति मन ह पंडाल म देवी मईया के प्रतिमा घलो स्थापित करही।
डोंगरगढ़ स्थित मां बम्लेश्वरी, दंतेवाड़ा म मां दंतेश्वरी, रतनपुर म मां महामाया, चंदरपुर के मां चन्द्रहासिनी अउ धमतरी के मां विंध्यवासिनी मंदिर म नवरात्र के सबो तियारी पूरा कर ले गेहे।
नवरात्र के चलते रेलवे कोति ले डोंगरगढ़ मेला म मां बम्लेश्वरी के दर्सन बर पहुंचने वाला भक्तजन बर 15 ले 23 अक्टूबर तक कुछेक रेलगाड़ी के अस्थाई ठहराव के संगेसंग कोनो-कोनो ट्रेन के परिचालन ल विस्तारित घलो करे जाही। एखर अंतर्गत गोंदिया-दुर्ग-गोंदिया मेमू पैसेंजर टेªन ल रईपुर तक चलाय जाही।