प्रदेस के विधानसभा चुनाव के पहिली चरण म सात नवंबर के होवइया मतदान बर काली अधिसूचना जारी करे जाही। एखरे संग काली ले ही नामांकन पत्र भरे के काम सुरू हो जही, जउन बीस अक्टूबर तक चलही। इक्कीस अक्टूबर के नामांकन पत्र मनके जांच करे जाही अउ तेईस अक्टूबर तक उम्मीदवार अपन नाव वापिस ले सकही।
खबर के मुताबिक पहिली चरण म प्रदेस के बीस विधानसभा सीट म मतदान होही। एमा बस्तर संभाग के सबो बारह सीट – अंतागढ़, भानुप्रतापपुर, कांकेर, केशकाल, कोंडागांव, नारायणपुर, बस्तर, जगदलपुर, चित्रकोट, दंतेवाड़ा, बीजापुर अउ कोंटा सामिल हे। एखर संगेसंग पंडरिया, कवर्धा, खैरागढ़, डोंगरगढ़, राजनांदगांव, डोंगरगांव, खुज्जी अउ मोहला-मानपुर म घलो पहिली चरण म वोट डारे जाही।
तबादला
प्रदेस म विधानसभा चुनाव के घोषणा होय के बाद निर्वाचन आयोग ह दू झिन कलेक्टर अउ तीन पुलिस अधीक्षक ल हटा देहे। एमा बिलासपुर कलेक्टर संजीव झा, रायगढ़ कलेक्टर तारण प्रकाश सिन्हा अउ दुरूग के पुलिस अधीक्षक शलभ सिन्हा, कोरबा के एसपी उदय किरण के संग राजनांदगांव के एसपी अभिषेक मीणा सामिल हे। चुनाव आयोग ह कले खाद्य विभाग के बिसेस सचिव अउ मार्कफेड के प्रबंध संचालक मनोज सोनी ल घलो हटाय हे। हटाय गे सबो अधिकारी मन ल तुरते अपन प्रभार सौंपे के निरदेस घलो जारी करे गे रिहीस। चुनाव आयोग कोति ले प्रदेस के आने-आने जिला ले कलेक्टर अउ पुलिस अधीक्षक मन ल हटाय जाय के बाद ए पद म पदस्थापना बर मुख्य निर्वाचन पदाधिकारी कार्यालय कोति ले चुनाव आयोग ल छह आईएएस अउ नौ झिन आईपीएस अधिकारी मनके सूची भेजे गेहे।
विस चुनाव-स्वीप कोर कमेटी
प्रदेस म अवइया विधानसभा चुनाव के बेरा मतदान के प्रतिसत बढ़ाय अउ मतदाता मन ल स्वीप कार्यक्रम ले जागरूक करे के संबंध म मुख्य निर्वाचन पदाधिकारी रीना बाबा साहेब कंगाले ह सबो जिला निर्वाचन अधिकारी मन ल दिसा-निरदेस जारी करे हे। ओमन जिला स्तरीय स्वीप कोर कमेटी के बइठका म किहीन कि मतदाता मन ल जागरूक करे बर आने-आने स्तर म कार्यक्रम करे जाय अउ एखर बर हरेक विधानसभा क्षेत्र म एक स्वीप नोडल अधिकारी रखे जाय। संगेसंग जम्मों उच्च सिक्षण संस्थान मन म नौ प्रवेशी विद्यार्थी मन ल मतदान ले जोड़े बर प्रेरक कार्यक्रम चलाय जाय। हरेक कॉलेज म स्वीप कार्यक्रम ल चलाय बर कोनों प्राध्यापक ल उही संस्था के नोडल अधिकारी बनाके विद्यार्थी मन ल कैंपस एम्बेसडर बनाय जाय।
मुख्य निर्वाचन पदाधिकारी ह किहीन कि मतदाता जागरूकता बर संदेस के प्रचार-प्रसार खातिर जिला स्तर म चलाय जात अधिकारिक सोशल मीडिया मंच के उपयोग करे के संग सरकारी दफ्तर अउ भवन के खाली दीवाल म सुघ्घर लिखावट ले नारा लेखन करे जाय। उहें, ऑडियो-वीडियो संदेस ल सिनेमा घर, केबल टीवी अउ आने माध्यम ले प्रसारित करे जाय। गांव-गंवई के क्षेत्र म हॉट-बाजार म घलो ए संदेस के प्रचार-प्रसार होना जरूरी हे। ओमन यहू किहीन कि गांव-गंवई के क्षेत्र म मतदान के तारीख अउ वोट डरइया मन बर मिलइया सुभीता के जानकारी मुनादी करा के बताय जाय। उहें, चुनाव आयोग के निरदेस के मुताबिक मतदान के दिन दिव्यांग मतदाता मनके आग्रह म मतदान केन्द्र तक लाय अउ घर अमराय के निःशुल्क परिवहन सेवा देवाय जाय।
मतदाता जागरूकता
प्रदेश म शत प्रतिशत मतदान कराय बर स्वीप कार्यक्रम म कतकोन जागरूकता कार्यक्रम कराये जात हे। इही कड़ी म दुरूग जिला के रूवाबांधा सेंट थॉमस महाविद्यालय म मतदाता जागरूकता कारीकरम राखे गीस। एमा नवा मतदाता विद्यार्थी मन ल वोट डारे के महत्व बताय गीस। ए बेरा म विद्यार्थी मन ह आने-आने वरग के मतदाता के प्रतीक के रूप म रैम्पवॉक करीन अउ सबो झन मतदान करय। एखर सपथ देवईन।
ओति, कोंडागांव के साप्ताहिक बाजार म मतदाता जागरूकता अभियान म बुधवारी बाजार म जिला के आने-आने गांव ले आय गांव के लोगन ल वोट डारे के महत्व अउ ओखर ले जुड़े जानकारी दे गीस। संगेसंग साग-भाजी बेचइया अउ आने कतकोन मन ल वोट डारे के अपील करे गीस।
उहें, बस्तर जिला के उपनपाल, धनियालूर अउ धनपुंजी ग्राम पंचायत म मतदाता जागरूकता अभियान म मसाल रैली निकाले गीस। ए दउरान अभियान म सामिल सिक्षक अउ युवा मन ह लोगन ले वोट डारे के अपील करीन। कार्यक्रम के बेरा रंगोली बनाके लोगन ल मतदान करे के संदेस दे गीस।
स्कूल अवकाश
राज्य सरकार ह शासकीय, अनुदान प्राप्त, गैर अनुदान प्राप्त स्कूल के संगेसंग डीएड अउ बीएड कॉलेज म दसहरा अउ देवारी तिहार के छुट्टी के तारीख घोसित कर देहे। दसहरा छुट्टी तेईस ले अट्ठाईस अक्टूबर तक रइही। उहें, देवारी के छुट्टी ग्यारह ले सोलह नवंबर तक दे जाही। अइसने, सीतकालीन छुट्टी पच्चीस ले तीस दिसंबर तक रइही। एखरे संगेसंग ग्रीष्मकालीन छुट्टी अवइया एक मई ले पन्द्रह जून तक दे जाही।
नवरात्र तैयारी
देवी आराधना के नवरात्रि परब पन्द्रह अक्टूबर ले सुरू होवत हे। एखर बर राजधानी रईपुर समेत प्रदेस के आने-आने देवी मंदिर अउ सक्तिपीठ मन म तैयारी जोरदरहा चलत हे। उहें, प्रशासन ह नवरात्रि परब के बेरा सुरक्षा व्यवस्था के तैयारी सुरू कर देहे। एमा राजनांदगांव जिला के डोंगरगढ़ म नवरात्रि के बेरा लगइया मेला बर प्रसासन ह जरूरी व्यवस्था के जांच करीन। डोंगरगढ़ के मां बम्लेश्वरी मंदिर म दर्सन खातिर बड़ संख्या म दूरिहा-दूरिहा ले पदयात्री आथे। एला देखत अंजोरा बायपास रद्दा ले डोंगरगढ़ के मंदिर तक जवइया रद्दा म बिजली व्यवस्था सुधारे जात हे। पदयात्री मनके सुरक्षा खातिर राष्ट्रीय राजमार्ग के सबो क्रॉसिंग म बांस के बल्ली लगाय जात हे। ए दउरान राष्ट्रीय राजमार्ग के एक कोति गाड़ी के अवई-जवई म रोक रइही।
खेल-समाचार
उन्नीस बछर ले कमती आयु वर्ग खिलाड़ी मन बर होवइया वीनू मांकड़ क्रिकेट प्रतियोगिता बर नारायणपुर जिला के अबूझमाड़ निवासी यश कुमार वरदा ल चुने गेहे। खबर के मुताबिक वीनू मांकड़ प्रतियोगिता के प्रदर्सन के आधार म अवइया बछर के उन्नीस बछर ले कमती आयु वरग के विश्व कप प्रतियोगिता बर भारतीय टीम के चयन करे जाथे। सोलह बछर के यश कुमार सलामी बल्लेबाज के रूप म खेलथे। ओमन छत्तीसगढ़ के टीम ले ओड़िशा के खिलाफ पांडिचेरी म अपन पहिली मैच खेलही।
इही बीच, राजनांदगांव के अंतर्राष्ट्रीय हॉकी स्टेडियम म अभी पश्चिम क्षेत्र सब जूनियर हॉकी प्रतियोगिता होवत हे। बालिका वरग म छत्तीसगढ़ के टीम ह जोरदरहा खेल देखावत गोवा ल ग्यारह गोल ले हराके दूसर जीत दरज करे हे। पहिली मैच के सर्वश्रेष्ठ खिलाड़ी रेहे आराधान राजभर ह ए मैच म घलो बहुते बढ़िया खेल दिखईन।
सिलेंडर-विस्फोट
अंबिकापुर के स्वामी विवेकानंद स्कूल म गुब्बारा फुलइया सिलेंडर म विस्फोट होय ले दू झिन लोगन घायल होगे। ए दूनों सिलेंडर ले गुब्बारा फुलावत रिहीन, तभे ए घटना होइस। ए घटना के बेरा तीर-तखार म कुछेक लइका मन घलो बइठे रिहीन। फेर ओमन ल कोनों किसम के चोट नइ आय हे। घटना के सूचना मिलतेच सरगुजा कलेक्टर कुंदन कुमार अउ पुलिस अधीक्षक सुनील शर्मा ह घायल मन ल अस्पताल अमराय के व्यवस्था करे हे। ए दउरान ऐहतियाती तौर म लइका मनके घलो जांच करे गीस।
राज्य सूचना आयोग अर्थदंड
राज्य सूचना आयोग ह आवेदक मन ल बेरा म सूचना दे म कोताही बरते अउ सूचना के अधिकार कानून ल बने ढंग ले लागू नइ करे जाय के आने-आने मामला म संबंधित जनसूचना अधिकारी ल पाछु ढाई बछर के दउरान पच्यासी लाख रूपिया के जुर्माना लगाय हे। आयोग ह करीब चार हजार मामला के सुनवाई के बेरा ए जुर्माना लगाय हे।
विश्व गठिया दिवस
आज विश्व गठिया दिवस हरय। ए दिन के उद्देश्य गठिया बीमारी के तुरते निदान अउ इलाज बर लोगन म जागरूकता लाना। गठिया के कुछेक लक्षण म जोड़ के तीर-तखार, लालिमा, दर्द अउ सूजन जइसन लक्षण दिखाई देथे अउ मरीज ल चले-फिरे म परेसानी होथे।
आकाशवाणी ले बिसेस बातचीत म अखिल भारतीय आयुर्विज्ञान संस्थान-एम्स नई दिल्ली के डॉक्टर उमा कुमार ह बतईन कि गठिया के लक्षण वाले मरीज मन ल बेरा राहत सही इलाज बर डॉक्टर के सलाह जरूर लेना चाही अउ ए बीमारी ल रोके खातिर सरीर के वजन म घलो धियान देना जरूरी हवय।
मौसम
प्रदेस म मानसून के बिदाई के बाद आज अचानक मौसम बदल गे। एक घांव फेर आकाश म बादर छाय लगीस। मंझनिया बाद राजधानी रईपुर समेत तीर-तखार के कुछेक जघा म छींटा बौछार होय के समाचार मिले हे। मौसम विभाग के मुताबिक स्थानीय प्रभाव के सेती ए बरसा होइस हे। अवइया चौबीस घंटा म घलो प्रदेस के कुछेक जघा म छींटा बौछार हो सकत हे।