छत्तीसगढ़ म होवइया विधानसभा चुनाव ल देखत भाजपा कोति ले पच्यासी सीट बर उम्मीदवार के घोसना करे के संग कांग्रेस ह घलो उम्मीदवार के नाव तय करे खातिर विचार-विमर्स करत हे। एमा आज रईपुर म कांग्रेस के प्रदेस चुनाव समिति के बइठका होवत हे। जेमा आने-आने सीट बर पार्टी के उम्मीदवार मनके नाव म गोठबात करे जात हे।
ए बइठका म पार्टी के प्रदेश प्रभारी कुमारी सैलजा, मुख्यमंत्री भूपेश बघेल, उप मुख्यमंत्री टी.एस. सिंहदेव, विधानसभा अध्यक्ष डॉक्टर चरणदास महंत अउ प्रदेस कांग्रेस कमेटी के अध्यक्ष दीपक बैज समेत आने बड़का नेता सामिल होवत हे। कांग्रेस के केन्द्रीय चुनाव समिति के बइठका तेरह अक्टूबर के होही, जेखर बादे पार्टी उम्मीदवार मनके नाव के घोसना हो सकत हे।
रायपुर जिला प्रेसवार्ता-01
रईपुर जिला कलेक्टर अउ निर्वाचन अधिकारी डॉक्टर सर्वेश्वर नरेन्द्र भूरे ह आज रईपुर म एक ठिन प्रेसवार्ता म ए तैयारी के संबंध म विस्तार ले जानकारी देवत बतईन कि जिला म कुल अट्ठारह लाख उनहत्तर हजार सात सौ बैसठ मतदाता हवय। एमा पुरूष मतदाता के संख्या नौ लाख चवालीस हजार पांच सौ पैंतालीस अउ महिला मतदाता के संख्या नौ लाख पैंतीस हजार दू सौ सत्रह हे। उहें, दू सौ इंक्यानवे तृतीय लिंग के मतदाता घलो सामिल हवय। जिला म विधानसभा चुनई बर करीबन एक हजार आठ सौ उनहत्तर मतदान केन्द्र बनाय जाही। एमा ग्यारह सौ आठ सहरी क्षेत्र म अउ सात सौ इकसठ ग्रामीण क्षेत्र म होही। जिला म हरेक मतदान केन्द्र के मुताबिक औसत मतदाता के संख्या एक हजार छह हवय। जिला के नौ सौ चौंतीस मतदान केन्द्र म चुनई के बेरा वेबकास्टिंग के व्यवस्था करे जाही। उहें, बहत्तर ठन संगवारी मतदान केन्द्र बनाय जाही। जिला के सबो सात विधानसभा क्षेत्र म एक-एक मतदान केन्द्र अइसन होही, जउन ल चलाय के पूरा जिम्मेवारी युवा मन उपर होही। एखर संगेसंग सबो विधानसभा क्षेत्र म एक-एक मतदान केन्द्र म दिव्यांग कर्मचारी घलो चुनाव प्रबंधन के काम करही। उहें, एक-एक आदर्श मतदान केन्द्र घलो बनाय जाही।
रायपुर जिला प्रेसवार्ता-02
जिला निर्वाचन अधिकारी ह बतईन कि जिला के सबो मतदान केन्द्र म मूलभूत सुविधा के व्यवस्था करे जात हे। एमा मुख्य रूप ले सौचालय, पीये के पानी, व्हील चेयर, बिजली अउ सहायता केन्द्र के सुभीता सामिल हवय। डॉक्टर भूरे ह बतईन कि जिला म करीबन पांच हजार इक्यासी बैलेट यूनिट, दू हजार छह सौ छियासठ कंट्रोल यूनिट अउ दू हजार नौ सौ सत्रह वीवीपैट यूनिट हवय। उहें, जिला के सीमावर्ती क्षेत्र म चुनाव के बेरा निगरानी व्यवस्था राखे जाही। एखर बर चौबीस ठिन चेकपोस्ट बनाय जाही, जिहां बहत्तर टीम निगरानी करही। सिकईत अउ सी-विजिल बर चौबीसों घंटा चलइया नियंत्रण कक्ष लगाय जाही। चुनाव बर उनहत्तर फ्लाईंड स्क्वॉड टीम-एफ.एस.टी. तैनात होही। हर एक पाली म तेईस टीम काम करही।
राष्ट्रीय डाक सप्ताह
भारतीय डाक विभाग काली ले राष्ट्रीय डाक सप्ताह मनावत हे। ए मउका म छत्तीसगढ़ डाक परिमंडल के सबो संभागीय कार्यालय म कतकोन कारीकरम राखे जात हे। ए दउरान तेरह अक्टूबर तक राखे गे कारीकरम म ग्राहक मन ल डाक विभाग के सबो सेवा के संग नवा सेवा के जानकारी दे जाही। आज के दिन वित्तीय सशक्तिकरण दिवस के रूप म मनाय गीस। काली प्रश्नोत्तरी सेमिनार अउ कार्यशाला के आयोजन करे जाही।
माओवादी कैम्प धवस्त
सुकमा जिला म सुरक्षा बल ह माओवादी मनके कैम्प ल ध्वस्त करे के संग बड़ मात्रा म माओवादी जिनीस बरामद करे हे। खबर के मुताबिक माओवादी मनके इकट्ठा होय के सूचना मिले म डीआरजी, बस्तर फाइटर्स, जिला पुलिस बल अउ कोबरा बटालियन के टीम गश्त म निकले रिहीस। इही बेरा सुरक्षा बल ह किंदरेलपाड़ अउ नागाराम के जंगल म माओवादी मन कोति ले बनाय गे सिविर ल ध्वस्त कर दीन।
विश्व-मानसिक स्वास्थ्य दिवस
आज विश्व मानसिक स्वास्थ्य दिवस हरय। मानसिक स्वास्थ्य के संबंध म जागरूकता बढ़ाय अउ सोच म बदलाव ल बढ़ावा दे खातिर हर बछर दस अक्टूबर के मनाय जाथे। एसो के बिसय हरय – ‘‘मानसिक स्वास्थ्य एक सार्वभौमिक मानव अधिकार है‘‘। ए मउका म केन्द्रीय स्वास्थ्य मंत्री मनसुख मांडविया ह किहीन कि मानसिक स्वास्थ्य देखभाल के कवरेज अउ पहुंच म सुधार बर राज्य अउ केन्द्रसासित प्रदेस म राष्ट्रीय मानिसिक स्वास्थ्य कार्यक्रम चलाय जात हे।
अंशकालिक संवाददाता-आवेदन
आकाशवाणी समाचार रईपुर कोति ले छत्तीसगढ़ के सात ठिन जिला रइपुर, सक्ति, सारंगढ-बिलाईगढ़, मोहला-मानपुर-अंबागढ़ चौकी, मनेन्द्रगढ़-चिरमिरी-भरतपुर, खैरागढ़-छुईखदान-गंडई अउ गौरेला-पेण्ड्रा-मरवाही म अनुबंध के आधार ले अंशकालिक संवाददाता बर अर्जी मंगाय जात हे। आवेदन प्रपत्र समाचार सेवा प्रभाग के वेबसाइट- डब्ल्यू डब्ल्यू डब्ल्यू डॉट न्यूज ऑन एआईआर डॉट जीओवी डॉट इन के वैकेंसी सेक्शन अउ आकाशवाणी समाचार रइपुर के ट्विटर हैंडल-सीजी एआईआर न्यूज ले घलो डाउनलोड करे जा सकत हे। अर्जी ल पूरा भर के बारह अक्टूबर तक रजिस्टर्ड पोस्ट या फेर स्पीड पोस्ट ले रइपुर के सिविल लाइन स्थित आकाशवाणी केंद्र उप महानिदेशक सह केन्द्राध्यक्ष के नांव ले भेजे जा सकत हे।
अर्जी देवइया के उम्र चौबीस ले पैंतालीस साल के बीच होना चाही अउ पत्रकारिता या जनसंचार म स्नात्तकोत्तर डिग्री या फेर डिप्लोमा के संगेसंग कोनो भी बिषय म स्नातक के संग पत्रकारिता के क्षेत्र म दू साल के अनुभव होना जरूरी हे। एखर अलावा अर्जी करइया मन ल जिला के मुख्यालय या नगर -निगम के सीमा के दस किलोमीटर के भीतरी के निवासी होना चाही। कम्प्यूटर अउ इंटरनेट के जानकारी होना चाही। केंद्र सरकार, राज्य सरकार या सार्वजनिक क्षेत्र के कर्मचारी अउ राजनीतिक दल के सदस्य मन ह एमा अर्जी नइ कर सकय।
सीआईएसएफ-शपथ ग्रहण
केन्द्रीय औद्योगिक सुरक्षा बल-सी.आई.एस.एफ. के एक हजार बयासी नवा आरक्षक मन ल काली भिलाई के उतई क्षेत्रीय प्रशिक्षण केन्द्र सपथ देवाय गीस। ए बेरा म नवा आरक्षक मन ह परेड निकालीन। सपथ ग्रहण समारोह के मुख्य अतिथि सी.आई.एस.एफ. मध्य खंड के महानिरीक्षक संजय प्रकाश ह परेड के सलामी लीन। ओमन प्रसिक्षण लेवइया मन ले राष्ट्र के बदलत परिस्थिति अउ जरूरत के मुताबिक खुद ल तियार करे के आह्वान करीन। ओमन किहीन कि नवआरक्षक अपन कर्तव्य ल ईमानदारी, साफगोई अउ लगन के संग पूरा करय। ए मउका म मुख्य अतिथि ह प्रसिक्षण के बेरा आने-आने क्षेत्र म बने प्रदर्सन करइया प्रशिक्षाणार्थी मन ल सम्मातिन करीन। समारोह म उप महानिरीक्षक डॉक्टर अनिल पांडेय ह नवआरक्षक मन ल दे गे प्रसिक्षण के संबंध म जानकारी दीन।
जांजगीर-डकैती-आरोपी गिरफ्तार
जांजगीर-चांपा जिला के बिरगहनी के मध्य भारत पेपर मिल म पाछु दिन डकैती करइया सात झिन आरोपी मन ल पुलिस ह गिरफ्तार कर लेहे। डकैती के ए घटना म बउरे गे गाड़ी, मोबाइल अउ गैस कटर बरामद कर ले गेहे। गिरफ्तार आरोपी मन ल न्यायिक रिमांड म जेल भेजे गेहे। उहें, ए मामला म फरार आने आरोपी मनके खोज जारी हवय। एखर पहिली, पुलिस ह आरोपी मन तीर ले चोरी के जिनीस बिसइया एक कबाड़ी ल घलो गिरफ्तार करे हे।