भारत निर्वाचन आयोग ह छत्तीसगढ़ के संगेसंग पांच राज्य- राजस्थान, मध्यप्रदेश, तेलंगाना अउ मिजोरम म विधानसभा चुनई के तारीख घोषित कर दे गेहे। एखरे संग ए राज्य मन म आजले आदर्श आचार संहिता लागू होगे हे। प्रदेश म पहिली चरण के मतदान सात नवंबर के अउ दूसर चरण के मतदान सतरा नवंबर के होही। नतीजा तीन दिसंबर के घोषित करे जाही।
चुनाव आयोग के मुताबिक प्रदेश म सात नवंबर के होवइया पहिली चरण के चुनई बर तेरा अक्टूबर के अधिसूचना जारी करे जाही। इही दिन ले नामंाकन पत्र भरे के काम शुरू हो जाही, जउन ह बीस अक्टूबर तक चलही। इक्कीस अक्टूबर के नामंाकन पत्र मनके जाचं करे जाही अउ तेईस अक्टूबर तक प्रत्याशी मन ह अपन नाम वापिस ले सकही। त उंहे सतरा नवंबर के होवइया दूसर चरण के वोटिंग बर इक्कीस अक्टूबर के अधिसूचना जारी होही। तीस अक्टूबर तक नामंाकन पत्र दाखिल करे के आखरी तारीख हवय। इकतीस अक्टूबर के नामंाकन पत्र के जांच करे के बाद प्रत्याशी मन ह दू नवंबर तक अपन नाव वापिस ले सकही।
जानबा के मुताबिक छत्तीसगढ़ म नब्बे विधानसभा सीट हवय। जेमा पहिली चरण म बीस विधानसभा सीट म मतदान होही। एमा बस्तर संभाग के जम्मों बारा सीट अंतागढ़, भानुप्रतापपुर, कंाकेर, केशकाल, कोंडागांव, नारायणपुर, बस्तर, जगदलपुर, चित्रकोट, दंतेवाड़ा, बीजापुर, अउ कोंटा शामिल हे। एखर अलावा पंडरिया, कवर्धा, खैरागढ़, डोंगरगढ़, राजनांदगांव, डोंगरगांव, खुज्जी, अउ मोहला मानपुर म घलो पहिली चरण म वोट डारे जाही। त उंहे दूसर चरण म बांचे सत्तर सीट मन म मतदान होही।
विस चुनाव घोषणा-02
मुख्य निर्वाचन आयुक्त राजीव कुमार ह नई दिल्ली म होय एक ठिन पत्रकार वार्ता म कहिन कि ए पांच राज्य मन म विधानसभा चुनई के विशेष महत्व एखर बर हे, कि अवइया दू हजार चौबीस के आमचुनाव के पहिली होवइया ये आखरी विधानसभा चुनई हरय। ओमन कहिन कि निर्वाचन आयोग ह ए जम्मों पांच राज्य मन म बिना गड़बड़ी के चुनाव करवाही। पांच राज्य मन म कुल छै सौ उन्यासी विधानसभा सीट हवय अउ सोला करोड़ मतदाता हे।
मुख्य निर्वाचन आयुक्त ह बताइन कि सी-विजिल ऐप के माध्यम ले कोनो भी मनखे मन चुनाव ले जुड़े कोनो भी प्रकार के गड़बड़ी के सूचना निर्वाचन आयोग ल दे सकथे। हरएक सिकायत उपर सौ मिनट के भीतर कार्रवाई करे जाही।
मुख्य निर्वाचन पदाधिकारी-पत्रकार वार्ता
इही बीच राज्य के मुख्य निर्वाचन पदाधिकारी रीना बाबा साहेब कंगाले ह रायपुर म होय एक ठिन पत्रकार वार्ता म बताइन कि राज्य म मतदाता मनके संख्या दू करोड़ तीन लाख अस्सी हजार उनयासी हवय। जेमा ले एक करोड़ एक लाख बीस हजार आठ सौ तीस पुरूष अउ एक करोड़ दो लाख उनचालीस हजार चार सौ दस माइलोगिन मतदाता शामिल हे। एखर अलावा तृतीय लिंग समुदाय के सात सौ नब्बे मतदाता हे। उंहे सेवा मतदाता मनके संख्या उन्नीस हजार आठ सौ उनचालीस हवय। प्रदेश म सतरा झिन प्रवासी भारतीय मतदाता घलो पंजीकृत हे। राज्य के मुख्य निर्वाचन पदाधिकारी ह बताइन कि राज्य म सौ साल के उमर पूरा करइया मतदाता मनके संख्या दो हजार चार सौ बैंसठ हे।
श्रीमती कंगाले ह बताइन कि राज्य के नब्बे विधानसभा क्षेत्र मन म चौबीस हजार एक सौ नौ मतदान केंद्र हवय। जम्मों मतदान केंद्र मन म मतदाता सहायता केंद्र बनाय जाही अउ संगेसंग हरएक विधानसभा क्षेत्र म संगवारी मतदान केंद्र बनाय जाही। जेला महिला मतदान दल डहार ले चलाये जाही। एखर अलावा पांच ठिन आदर्श मतदान केंद्र अउ एक-एक ठिन दिव्यांग संचालित अउ युवा संचालित मतदान केंद्र बनाय जाही।
भाजपा उम्मीदवार-01
भारतीय जनता पार्टी ह छत्तीसगढ़ म होवइया विधानसभा चुनई बर प्रत्याशी मनके दूसर सूची जारी कर देहे। चौसठ उम्मीदवार मनके ए सूची म तीन सांसद मनके नाव घलो शामिल हे। जेमा भरतपुर-सोनहत विधानसभा सीट ले केंद्रीय राज्यमंत्री रेणुका सिंह, लोरमी ले सांसद अउ प्रदेश भाजपा अध्यक्ष अरूण साव अउ पत्थलगांव ले सांसद गोमती साय ल प्रत्याशी घोषित करे गेहे। त उंहे पूर्व मुख्यमंत्री डॅाक्टर रमनसिंह ल राजनांदगांव, नेता प्रतिपक्ष नारायण चंदेल ल जांजगीर-चंापा, पद्मश्री अनुज शर्मा ल धरसींवा त उंहे रायपुर दक्षिण ले बृजमोहन अग्रवाल, रायपुर पश्चिम ले राजेश मूणत, रायपुर ग्रामीण ले मोतीलाल साहू अउ रायपुर उत्तर ले पुरंदर मिश्रा ल उम्मीदवार बनाय गेहे।
अइसने मनेन्द्रगढ़ ले श्याम बिहारी जायसवाल, बैकुण्ठपुर ले भैयालाल राजवाड़े, सामरी ले उधेश्वरी पैकरा, सीतापुर ले रामकुमार टोप्पो, जशपुर ले रायमुनी भगत अउ कुनकुरी ले पूर्व सांसद विष्णुदेव साय ह पार्टी के प्रत्याशी होही। उंहे लैलूंगा ले सुनीति राठिया, रायगढ़ ले ओ.पी. चौधरी, सांरगढ़ ले शिवकुमारी चौहान, रामपुर ले ननकीराम कंवर, कटघोरा ले प्रेमचंद पटेल, पाली- तानाखार ले रामदयाल उइके, कोटा ले प्रबल प्रताप सिंह जूदेव, मुंगेली ले पुन्नूलाल मोहिले, तखतपुर ले धर्मजीत सिंह, बिल्हा ले धरमलाल कौशिक, बिलासपुर ले अमर अग्रवाल, मस्तूरी ले डॅाक्टर कृष्णमूर्ति बांधी अउ अकलतरा ले सौरभ सिंह ल प्रत्याशी घोषित करे गेहे।
भाजपा उम्मीदवार-02
त उंहे सक्ती ले खिलावन साहू, चंद्रपुर ले रानी संयोगिता सिंह जूदेव, जैजेपुर ले कृष्णकंात चन्द्र, पामगढ़ ले संतोष लहरे, बसना ले संपत अग्रवाल, महासमुंद ले योगेश्वर राजू सिन्हा, बिलाईगढ़ ले डॅाक्टर दिनेशलाल जांगड़े, बलौदाबजार ले टंकराम वर्मा, भाटापारा ले शिवरतन शर्मा, आरंग ले गुरू खुशवंत सिंह अउ बिंद्रानवागढ़ ले गोवर्धनराम मांझी ल प्रत्याशी घोषित करे गेहे। अइसने कुरूद ले अजय चंद्राकर, धमतरी ले रंजना साहू, संजारी बालोद ले राकेश यादव, गुण्डरदेही ले विरेन्द्र कुमार साहू, दुर्ग ग्रामीण ले ललित चंद्राकर, दुर्ग शहर ले गजेन्द्र यादव, भिलाईनगर ले प्रेमप्रकाश पांडेय, वैशालीनगर ले रिकेश सेन, अहिवारा ले डोमन लाल र्कोसेवाड़ा, साजा ले ईश्वर साहू अउ नवागढ़ ले दयालदास बघेल ल उम्मीदवार बनाय गेहे।
संगेसंग कवर्धा ले विजय शर्मा, डोंगरगढ़ ले विनोद खांडेकर, डोंगरगांव ले भरतलाल वर्मा, अंतागढ़ ले विक्रम उसेण्डी, भानुप्रतापुर ले गौतम उइके, केशकाल ले नीलकंठ टेकाम, कोंडागंाव ले लता उसेण्डी, नारायणपुर ले केदार कश्यप, जगदलपुर ले किरण सिंहदेव, चित्रकोट ले विनायक गोयल, दंतेवाड़ा ले चेतराम आरामी, बीजापुर ले महेश गागड़ा अउ कोंटा ले सोयम मुका ल प्रत्याशी घोषित करे गेहे।
जानबा के मुताबिक भाजपा ह इक्कीस झिन प्रत्याशी मनके सूची पहिलीच ले जारी कर देहे। जेला मिलाके अब पच्यासी झिन उम्मीदवार मनके सूची जारी हो चुके हे।
बैनर-पोस्टर कार्रवाई
प्रदेश म विधानसभा चुनई के घोषणा के बाद जम्मों नगरीय निकाय अउ गांव गंवतरी मन म लगाये गे राजनीतिक पदाधिकारी अउ कार्यकर्ता मनके पोस्टर अउ बैनर मन ल हटाये के काम करे जात हे। राजधानी रायपुर के संगेसंग कोंडागांव, मुंगेली अउ जांजगीर-चंापा म आज मंझनियंा के बाद ले बैनर पोस्टर हटाये के काम चलत हे।
त ओति कोंडागांव कलेक्टर दीपक सोनी ह जिला म धारा एक सौ चौवंालिस लागू कर देहे। कलेक्टर ह बताइन कि विधानसभा चुनई ल शांतिपूर्ण ढंग ले निपटाये बर जिला म शांति बनाये रखना जरूरी हे। ओमन बताइन कि कानून व्यवस्था के संगेसंग सुरक्षा ल देखत धारा एक सौ चौवंालिस के तहत प्रतिबंधात्मक आदेश पारित करे गेहे।
उंहे कोंडागांव जिला मुख्यालय म विधानसभा चुनई ल देखत मास्टर ट्रेनर मनके दूसर चरण के प्रशिक्षण दे गीस।
मौसम
प्रदेश म बस्तर संभाग ल छोड़के मानसून के विदाई होगे हे। मौसम विभाग ले मिले जानबा के मुताबिक दक्षिण-पश्चिम मानसून के छत्तीसगढ़ के संगेसंग पूर्वी उत्तर प्रदेश, पूर्वी मध्यप्रदेश, झारखंड, तेलंगाना, बिहार के कोनो कोनो जगा अउ उत्तर अंदरूनी कर्नाटक के संगेसंग महाराष्ट्र के कतकेान जगा ले मानसून के विदाई होगे हे। प्रदेश म ए बेरा अधिकतम अउ न्यूनतम तापमान म कोनो विशेष परिवर्तन होय के संभावना नइ हे।