मुख्यमंत्री भूपेश बघेल ह आज रइपुर म राखे गे कारीकरम म छत्तीसगढ़ युवा मितान परिवहन योजना के सुरूआत करीन। ए योजना म कॉलेज म पढ़इया लइका मन ल घर ले कॉलेज आय-जाय बर निःसुल्क परिवहन सुविधा मिलही। ए योजना ले कॉलेज अउ विश्वविद्यालय म पढ़इया एक लाख ले जादा विद्यार्थी मन ल फायदा होही। ए योजना म करीबन एक सौ दस करोड़ रूपिया के आर्थिक खर्चा के भार आही, एमा ले आधा भार राज्य सासन डहार अउ आधा खर्चा बस संचालक मन डहार ले छूट के तौर म वहन करे जाही।
कारीकरम म मुख्यमंत्री ह किहीन कि दूर-दराज ले अवइया गरीब अउ मध्यवर्गीय परिवार के विद्यार्थी मन ल जादा परेसानी के सामना करना पड़थे। ए योजना के लाभ उठाय बर विद्यार्थी मन ह वेबसाईट म कॉलेज अउ रूट के संग बस पास बर आवेदन कर सकत हे। स्वीकृत छात्र मन ह लॉग इन करके क्यूआर कोड वाले अपन बस पास ल डाउनलोड करके ओखर प्रिंटआउट अपन पास सुरक्षित रख सकत हे। बस कंडेक्टर डहार ले पास के जांच करके विद्यार्थी मन ल घर ले कॉलेज अउ कॉलेज ले घर ले जाय जाही।
कोदो-कुटकी-समर्थन मूल्य
प्रदेस म कोदो अउ कुटकी के समर्थन मूल्य म बढ़ोत्तरी करे गेहे। चालू खरीफ सीजन बर कोदो के समर्थन मूल्य तीन हजार रूपिया ले बढ़ा के बत्तीस सौ रूपिया अउ कुटकी के समर्थन मूल्य इकतीस सौ रूपिया ले बढ़ाके तीन हजार तीन सौ पचास रूपिया प्रति क्विंटल करे गेहे। ए घोषणा मुख्यमंत्री भूपेश बघेल ह काली रईपुर म राखे गे गोधन न्याय योजना के रासि वितरण कारीकरम म करीन।
एखरे संग कृषि अउ किसान कल्याण अउ जैव प्रौद्योगिकी विभाग डहार ले चालू खरीफ सीजन म उपजे कोदो अउ कुटकी के न्यूनतम समर्थन मूल्य म बढ़ोत्तरी के संबंध म अधिसूचना घलो जारी कर दे गेहे। उहें, केंद्र सरकार डहार ले घोषित न्यूनतम समर्थन मूल्य तीन हजार आठ सौ छियालीस रूपिया प्रति कुंटल के अनुसार रागी फसल के उर्पाजन करे जाही। कोदो कुटकी अउ रागी के उपार्जन छत्तीसगढ़ राज्य लघुवनोपज संघ डहार ले करे जाही।
मंत्रिमंडल-निर्णय
प्रदेस म महुआ के संग्रहण, मूल्य संवर्धन, प्रसंस्करण अउ उपयोग ल बढ़ावा दे बर राज्य महुआ बोर्ड के गठन करे जाही। मुख्यमंत्री भूपेश बघेल के अगुवई म राखे गे मंत्रिपरिषद के बइठका म ए फैसला ले गीस।
मंत्रिपरिषद ह छत्तीसगढ़ स्टेट पॉवर कंपनी म एक जनवरी दू हजार चार या ओखर बाद नियुक्त अधिकारी कर्मचारी मन बर नवा अंसदान पेंसन योजना के जघा म पुराना पेंसन योजना ल बहाल करे के प्रस्ताव ल घलो मंजूरी दीस। एखर ले स्टेट पॉवर कंपनी के करीबन दस हजार अधिकारी-कर्मचारी मन ल फायदा मिलही। बइठका म छत्तीसगढ़ माल अउ सेवाकर संशोधन अध्यादेश के प्रारूप के अनुमोदन करे गीस। एखर अलावा महासमुंद जिला के ग्राम पंचायत भोरिंग ल नगर पंचायत, अंबागढ़ चौकी ल नगर पालिका अउ नवागढ़ ल नगर पालिका परिषद बनाय जाय बर निर्धारित मापदंड म छूट दे जाय के घलो फैसला ले गीस। उहे, स्वास्थ्य विभाग के हड़ताली अधिकारी-कर्मचारी मन उपर एस्मा कानून के तहत बर्खास्तगी संबंधी कार्रवाही ल शुन्य घोषित करे के प्रस्ताव ल घलो मंजूरी दे गीस।
रमन सिंह-प्रधानमंत्री पत्र
प्रदेस के पूर्व मुख्यमंत्री अउ भाजपा के राष्ट्रीय उपाध्यक्ष डॉक्टर रमन सिंह ह प्रधानमंत्री नरेंद्र मोदी ल चिट्ठी लिखके छत्तीसगढ़ लोकसेवा आयोग- पीएससी के भर्ती परीक्षा म होय अनियमितता के जांच सीबीआई ले करवाय के आग्रह करीन हे। डाक्टर सिंह ह प्रधानमंत्री ल भेजे गे चिट्ठी म पीएससी परीक्षा ले जुड़े दस्तावेज घलो भेजीन हे। ओमन चिट्ठी म केहे हे कि पीएससी के परीक्षा म हर बछर बड़ संख्या म प्रतिभागी मन सामिल होथे। फेर, ए परीक्षा म अनियमितता बरते ले प्रदेस के युवा मन म बहुत निरासा अउ आक्रोस हे।
डाक्टर सिंह ह बतईन कि भाजपा विधायक ननकीराम कंवर ह ए मामला म छत्तीसगढ़ उच्च न्यायालय म याचिका दायर करीन हे, जेला मंजूर करत न्यायालय ह राज्य सेवा परीक्षा-दू हजार बाईस म चुने गे अट्ठारह झन अभ्यर्थी मनके नियुक्ति म रोक लगाए बर किहीन हे, जेमा ले पांच अभ्यर्थी मनके के नियुक्ति होगे हावय अउ तेरह झिन के नियुक्ति म रोक लगे हे।
छत्तीसगढ़ उच्च न्यायालय ह कथित शराब घोटाला मामला म कारोबारी अनवर ढेबर, त्रिलोक सिंह ढिल्लन, नीतेश पुरोहित अउ आबकारी विभाग के बिसेस सचिव ए.पी.त्रिपाठी के जमानत याचिका ल खारिज कर दे हे। कोर्ट ह काली दूनो पक्ष के दलील सुने के बाद जमानत याचिका ल खारिज कर दीस। कुछ महिना पहिली ए सब्बांे आरोपी मन ल प्रवर्तन निदेशालय ईडी ह गिरफ्तार करे रिहीस। ईडी के आधिकारिक जानकारी के अनुसार अनवर ढेबर, ए.पी. त्रिपाठी अउ अनिल टुटेजा ले करीबन एक सौ इक्कीस करोड़ सत्यासी लाख रूपिया के अचल संपत्ति अटैच करे गेहे।
केंद्रीय राज्यमंत्री-कांकेर
केंद्रीय शिक्षा राज्यमंत्री अन्नपूर्णा देवी यादव ह किहीन कि छत्तीसगढ़ म भारतीय जनता पार्टी के शासन काल म होय विकास काम अउ केंद्र के एनडीए सरकार के गरीब अउ किसान हितैषी फैसला ल जन-जन तक पहुंचाय के जरूरत हे। आज कांकेर म राखे गे कारीकरम म सुश्री यादव ह आरोप लगइन कि राज्य के कांग्रेस सरकार के वादाखिलाफी ले आम जनता त्रस्त होगे हे। कांग्रेस ह राज्य म विकास के कोनो काम घलो नइ करे हे।
मुख्यमंत्री-अंबेडकर प्रतिमा
मुख्यमंत्री भूपेश बघेल ह आज रईपुर के अंबेडकर चौक म डॉक्टर भीमराव अंबेडकर के नवा प्रतिमा लगाय बर भूमिपूजन करीन। ए मउका म ओमन किहीन कि अंबेडकर जी के ए मूर्ति ह बहुत पुराना अउ खंडित होगे हे, तेखर बर एखर जघा म नवा मूर्ति लगाय जाही। मुख्यमंत्री ह किहीन कि बाबासाहेब जउन रास्ता दिखाइन हे, उहीं रद्दा म चल के हमन देश ल आगू ले जा सकत हन।
मुख्यमंत्री-पाटन
मुख्यमंत्री भूपेश बघेल ह दुरूग जिला के पाटन म राखे गे कारीकरम म करीबन साढ़े पचपन करोड़ रूपिया के लागत के आने -आने बिकास काम के लोकार्पण अउ भूमिपूजन करीन। कारीकरम म ओमन ह चार झन निवेशक मन ल चेक घलो दीन।
एखर पहिली मुख्यमंत्री ह पाटन के आत्मानंद चौक म ब्रम्हलीन स्वामी आत्मानंद के मूर्ति म श्रध्दांजलि अर्पित करीन।
मुख्य न्यायाधीश-कबीरधाम
छत्तीसगढ़ उच्च न्यायालय के मुख्य न्यायाधीश रमेश सिन्हा ह काली जिला अउ सत्र न्यायालय कबीरधाम के निरीक्षण करीन। निरीक्षण के दौरान मुख्य न्यायाधीश ह अधिवक्ता मन ले भेंट करके ओखर समस्या सुनीन। अधिवक्ता मन ह पार्किंग के समस्या बतईन, जेमा कलेक्टर ह भरोसा देवईन कि जल्दीच पार्किंग बर जमीन के डीमार्केशन कराय जाही। मुख्य न्यायाधीश ह न्यायिक अधिकारी मनके प्रकरण के जानकारी लीन अउ ओमन ल जरूरी निरदेस दीन।
जवान-रिहा
बीजापुर जिला म बीते उनतीस सितंबर के अगवा करे गे बस्तर फाइटर के जवान शंकर कुड़ियां ल माओवादी मन ह छोड़ देहे। ए जवान ल आदिवासी समाज के प्रतिनिधि मन के आगू सशर्त रिहा करे गेहे। आदिवासी समाज, परिजन अउ बीजापुर पुलिस अधीक्षक ह वीडियो जारी करके जवान के रिहाई बर अपील करे रिहीन।
हल्बी/गोण्डी-समाचार बुलेटिन
सुनईया मन ल बतादन काली ईतवार के ‘‘हल्बी‘‘ अउ ‘‘गोण्डी‘‘ म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र जगदलपुर ले प्रसारित करे जाही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढे़ छै बजे ले प्रसारित करे जाही।
जिले की चिट्ठी
प्रादेशिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बज के पांच मिनट ले छै बज के दस मिनट तक करे जाही। ए बखत के अंक म ‘‘बलरामपुर‘‘ जिला के गतिविधि के बारे म जानकारी दे जाही।