आज दिनभर के खबर ल अपन गुरतुर छत्तीसगढ़ी भाखा म पढ़व

भारत निर्वाचन आयोग ह पांच राज्य मन म अवइया विधानसभा चुनाव सुचारू रूप ले कराये बर रणनीति तय करे के संबंध म नई दिल्ली म आज अपन पर्यवेक्षक मनके संग बइठका करीन। मुख्य निर्वाचन आयुक्त राजीव कुमार अउ चुनाव आयुक्त अनूपचंद्र पांडेय अउ अरूण गोयल ह सामान्य, पुलिस अउ व्यय पर्यवेक्षक मन संग विचार विमर्श करीन। ए पर्यवेक्षक चुनाव के दौरान चुनावी प्रक्रिया के निगरानी बर महत्वपूर्ण भूमिका निभाथे। बतादन कि ए बछर छत्तीसगढ़ समेत राजस्थान, मध्यप्रदेश, तेलंगाना अउ मिजोरम म विधानसभा चुनाव होवइया हे।

संवाददाता कार्यशाला

आकाशवाणी के अंशकालिक संवाददाता मनके जोनल कार्यशाला आज हैदराबाद म आयोजित करे गीस। ए कार्यशाला म छत्तीसगढ़, मध्यप्रदेश अउ तेलंगाना के संवाददाता मन भाग लीन। कार्यशाला के शुभारंभ आकाशवाणी के प्रधान महानिदेशक डॅाक्टर वसुधा गुप्ता ह करीन। ओमन कीहिन कि अवइया विधानसभा चुनाव के दौरान आकाशवाणी के जम्मों संवाददाता आकाशवाणी के परंपरा अनुसार संतुलित, निष्पक्ष अउ प्रामाणिक कवरेज करंय।
ओमन कीहिन कि देशभर म आकाशवाणी ह खबर के विश्वसनीयता बर जाने जाथे। डॅाक्टर वसुधा गुप्ता ह कहिन कि आकाशवाणी मूलरूप ले रेडियो   माध्यम होय के संगेसंग आने आने सोशल मीडिया के प्लेटफार्म म घलो सक्रिय हे। ए मउका म आकाशवाणी के छत्तीसगढ़, आंध्रप्रदेश अउ तेलंगाना के कार्यक्रम प्रमुख, समाचार प्रमुख अउ कार्यक्रम अधिशासी समन्वय घलो मौजूद रीहिन।

पंचायती राज महासम्मेलन

कंाकेर म आज नगरीय निकाय अउ पंचायती राज महासम्मेलन के आयोजन करे गीस। ए मउका म कंाग्रेस के राष्ट्रीय महासचिव प्रियंका गांधी अउ मुख्यमंत्री भूपेश बघेल ह कंाकेर जिला बर आठ सौ छियांसठ करोड़ रूपिया के आने आने विकास कार्य के लोकार्पण अउ भूमिपूजन करीन। उंहे ओमन पांच युवक मन ल रोजगार प्रमाण पत्र दीन। एखरे संग पुरखती कागजात अउ तानाबाना पुस्तिका के विमोचन घलो करीन।
कार्यक्रम ल संबोधित करत प्रियंका गांधी ह कहिन कि एक समय म छोटे-छोटे काम बर दिल्ली या रायपुर जाय बर पड़य । लेकिन पंचायती राज लागू होय के बाद लोकतंत्र गांव तक पहुंचे हे। ओमन कहिन कि एखर ले ए फायदा होइस कि गांव के विकास बर गांव के प्रतिनिधि ही निर्णय कर पावत हे ।श्रीमती गांधी ह प्रदेश सरकार डहार ले चलाये जावत आने आने योजना के उल्लेख करत कहिन कि ए योजना मनके सेती आज पूरा देश म छत्तीसगढ़ के विशेष पहिचान बन गेहे।
कार्यक्रम ल संबोधित करत मुख्यमंत्री ह राज्य पावर कंपनी म एक अप्रैल दू हजार चार अउ ओखर बाद नियुक्त लगभग दस हजार कर्मी मन बर नवीन अंशदायी पेंशन योजना के जगा पुराना पेंशन लागू करे के घोषणा करीन। उंहे मुख्यमंत्री ह पुलिस उप निरीक्षक के पद म पदोन्नति अब तैंतीस प्रतिशत ले बढ़ाके चालीस प्रतिशत करे के एलान करीन। संघरा मुख्यमंत्री ह कृषि महाविद्यालय पख्ंााजूर के नाव पूर्व प्रधानमंत्री स्वर्गीय इंदिरा गांधी के नाव उपर करे के घोषणा करीन। उंहे ओमन कहिन कि हल्बी, गोंड़ी, सरगुजिहा, भतरा जइसे स्थानीय बोली म पढ़ाई कराय जाही, जेखर बर ए भाखा मनके शिक्षक के नियुक्ति घलो करे जाही।

बस्तर-देवगुड़ी-मातागुड़ी-लिपिबद्ध

बस्तर क्षेत्र आदिवासी विकास प्राधिकरण डहार ले देवगुड़ी अउ मातागुड़ी मन ल संरक्षित अउ संवर्धित करे के दिशा म विशेष पहल करत एमन के जीर्णोद्धार करे के संगेसंग ओमन ल संवारे के प्रयास करे जात हे । एखर तहत देवगुड़ी अउ मातागुड़ी मन ल लिपिबद्ध करे जात हे। उंहे तीन हजार चार सौ ले जादा के देवगुड़ी अउ मातागुड़ी मन ल सामुदायिक वनाधिकार प्रदान करे गेहे। एखर अलावा छै हजार चार सौ ले जादा एकड़ के भूमि देवगुड़ी अउ मातागुड़ी के नाव ले संरक्षित करे गेहे। ए धरोहर के संरक्षण अउ संवर्धन बर स्थानीय जनजातीय समुदाय के सहभागिता सुनिश्चित घलो करे जात हे।
उंहे बस्तर विभाग के गोंड, हल्बा, भतरा, धुरवा, मुंडा, मुरिया अउ कोया जइसे प्रमुख आदिवासी समुदाय के लोगन मनके जीवन म प्रचलित संास्कृतिक रीति-रिवाज, संस्कार, परंपरा अउ मान्यता म आधारित सामाजिक तानाबाना नामके पुस्तिका घलो प्रकाशित करे जात हे। एखरे संग बस्तर के वीर सपूत अउ वीरांगना मनके प्रतिमा के स्थापना घलो करे जात हे।