केन्द्रीय सूचना, प्रसारण अउ युवा कार्यक्रम अउ खेल मंत्री अनुराग सिंह ठाकुर ह आज रईपुर म नेहरू युवा केन्द्र संगठन डहार ले राखे गे राज्य स्तरीय युवा उत्सव के सुरूवात करीन। ए मउका म केन्द्रीय मंत्री ह कहिन कि विश्व म भारत के सॉफ्ट पावर ल अउ मजबूत बनाना हे। ए काम खेल, संस्कृति अउ सिनेमा के माध्यम ले हो सकत हे।
श्री ठाकुर ह किहीन कि चीन म होवत एशियाई खेल म भारत के खिलाड़ी मन ह अपन प्रदर्शन ले देश के सिर गर्व ले ऊंचा कर देहे। श्री ठाकुर ह युवा मन ले आह्वान करीन कि ओमन ह पर्यावरण, शिक्षा, स्वास्थ्य, नशामुक्ति, स्वच्छता जइसन कोनों एक ठन क्षेत्र ल चुन के संकल्प लेवय कि अइवया पच्चीस बछर तक ओ क्षेत्र म सकारात्मक बदलाव लाय बर अपन हरसंभव योगदान दीहीं। ओमन किहीन कि युवा मनके योगदान ले ही बछर दू हजार सैंतालीस तक भारत ह विकसित राष्ट्र बन सकत हे।
राजधानी रईपुर म ए दू दिन के युवा उत्सव अमृतकाल के पांच प्रण के उद्देश्य म आयोजित करे जात हे। ए मउका म केन्द्रीय मंत्री ह रावतपुरा सरकार विश्वविद्यालय म खेलो इंडिया अभियान म दू ठन केन्द्र स्थापित करे जाय के घोसना घलो करीन। ए केन्द्र म कमती ले कमती दू ठन खेल के प्रसिक्षण के सब्बो सुविधा देवाय जाही। केन्द्रीय मंत्री ह किहीन कि नई शिक्षा नीति म कौशल विकास ल जरूरी रूप म लागू करे बर कक्षा छठवीं ले दसवीं के पढ़ई म एला सामिल करे जावत हे। श्री ठाकुर ह मौजूद युवा मन ल अमृतकाल के पांच प्रण के सपथ घलो देवईन। कार्यक्रम ल रईपुर लोकसभा क्षेत्र के सांसद सुनील सोनी ह घलो संबोधित करीन। ए मउका म राज्य के पूर्व मंत्री महेश गागड़ा घलो मौजूद रिहीन। कार्यक्रम के सुरूवात म नेहरू युवा केन्द्र संगठन के राज्य निदेशक श्रीकांत पांडेय ह स्वागत भासन दीन।
केन्द्रीय मंत्री-मीडिया ऐप लोकार्पण
अपन रईपुर प्रवास के दउरान केन्द्रीय मंत्री अनुराग सिंह ठाकुर ह भारतीय जनता पार्टी डहार ले राखे गे एक ठिन कारीकरम म भाजपा डहार ले तैयार एक ठन मोबाइल ऐप के सुरूवात करीन। ए मोबाइल ऐप म छत्तीसगढ़ के कांग्रेस सरकार के छब्बीस हजार करोड़ रूपिया ले जादा के कथित घोटाला के ब्यौरा दीन। एमा कथित सराब घोटाला, पीडीएस घोटाला, पीएससी घोटाला, गौठान घोटाला संघरा दूसर कथित आर्थिक अनियमितता ल वीडियो फिलिम अउ कार्टून के माध्यम ले बताय गे हवय।
कार्यक्रम म श्री ठाकुर ह आरोप लगईन कि छत्तीसगढ़ के कांग्रेस सरकार ह जनता ले करे वादा ल पूरा नइ करीन हे। ओमन कहिन कि पाछु पांच बछर के दउरान देस म छत्तीसगढ़ के पहिचान भ्रष्टाचार अउ घोटाला वाले राज्य के रूप म बने हे।
ए मउका म पार्टी के राष्ट्रीय उपाध्यक्ष डॉक्टर रमन सिंह, विधायक बृजमोहन अग्रवाल अउ पूर्व मंत्री राजेश मूणत संघरा भाजपा के कतकोन नेता मौजूद रिहीन।
मुख्यमंत्री-प्रतिमा अनावरण
मुख्यमंत्री भूपेश बघेल ह आज राजधानी रईपुर के शासकीय आयुर्वेदिक महाविद्यालय परिसर म स्वाधीनता सेनानी डॉक्टर महादेव प्रसाद पांडेय अउ समाजसेवी नारायण प्रसाद अवस्थी के प्रतिमा के अनावरण करीन। ए मउका म मुख्यमंत्री ह किहीन कि छत्तीसगढ़ के स्वाधीनता सेनानी मन राज्य के गौरव हे। एमन ल दधीचि जइसन आत्मदान करके देस ल गुलामी ले मुक्ति देवईन। श्री बघेल ह किहीन कि पद्मश्री स्वर्गीय डॉक्टर महादेव प्रसाद पांडेय तेरह बछर के उमर म ही आजादी के आंदोलन म सामिल होगे रिहीन। अइसने, समाजसेवी स्वर्गीय नारायण प्रसाद अवस्थी ह आयुर्वेद के सिक्षा के विकास बर अपन मालगुजारी के पांच गांव दान म दे रिहीन। ए मउका म मुख्यमंत्री ह दूनों दिवंगत महापुरूष के परिवार वाला मन ले भेंट करीन। ओमन ह राजीव गांधी आश्रम योजना के हितग्राही मन ल पट्टा घलो दीन।
कार्यशाला
राज्य म छत्तीसगढ़ी भाखा के संगेच आदिवासी बोली मन ल घलो पहिली ले पांचवीं कक्षा के पाठ्यक्रम म एक बिसय के रूप म सामिल करे के प्रयास करे जावत हे। ए बात राज्य शैक्षिक अनुसंधान अउ प्रसिक्षण परिषद एस.सी.ई.आर.टी. के संचालक राजेश सिंह राणा ह रईपुर म होय कार्यसाला म कहिन। ओमन बतईन कि एस.सी.ई.आर.टी. ह छत्तीसगढ़ी भाखा अउ गोंडी बोली म प्राथमिक कक्षा के पाठ्य पुस्तक तैयार करे बर प्रारंभिक तैयारी सुरू कर देहे। कार्यशाला के अध्यक्षता करत अतिरिक्त संचालक जयप्रकाश रथ ह कहिन कि मातृ भाखा या स्थानीय बोली म प्राथमिक सिक्षा होय ले लइका मन ल पढ़ाना आसान हो जथे।
वाहन कबाड़ केन्द्र
राज्य म पन्द्रह बछर ले जादा पुराना पंजीकृत गाड़ी मनके पहला कबाड़ केन्द्र रईपुर जिला के धनेली गांव म सुरू होगे हवय। परिवहन मंत्री मोहम्मद अकबर ह आज एखर उद्घाटन करीन। खबर के मुताबिक राज्य सरकार डहार ले सबो सरकारी विभाग म पन्द्रह बछर ले जादा पुराना सबो गाड़ी मन ल कबाड़ म बदले के फइसला पहिलीच ले होगे हवय। एमा अब सरकारी विभाग म पन्द्रह बछर ले जाद जुन्ना गाड़ी मन ल धनेली केन्द्र म कबाड़ के रूप म जमा कराय जाही।
ए मउका म परिवहन मंत्री श्री अकबर ह किहीन कि पंजीकृत कबाड़ केन्द्र म अपन जुन्ना गाड़ी ल जमा कराय के बाद नवा गाड़ी खरीदे म परिवहन सुल्क म पच्चीस प्रतिसत के छूट दे जाही। एखर बर कबाड़ केन्द्र ले ऑनलाइन प्रमाण पत्र दे जाही, जउन ह छत्तीसगढ़ के सबो ऑटोमोबाइल बिक्री केन्द्र म मान्य होही। एखर संचालन मेटल कॉरपोरेशन ऑफ इंडिया डहार ले करे जाही।
नेतानार-लोकगीत प्रतियोगिता
वन्यजीव सप्ताह के उपलक्ष्य म काली कांगेर घाटी राष्ट्रीय उद्यान क्षेत्र के नेतानार गांव म लोकगीत प्रतियोगिता के आयोजन करे गीस। सहीद गुंडाधूर स्मारक स्थल म चलत ए कारीकरम म एकल अउ समूह वर्ग म सत्ताईस ठन प्रदर्सन करे गीस, जेमा एकल गायन म सोनूराम नाग अउ महादेव नाग ल विजेता घोसित करे गीस। समूह गायन म जगरनाथ अउ उंखर साथी मन ह पहला स्थान पईन। ए दूनों वर्ग म दूसरा अउ तीसरा नंबर म अवइया प्रतिभागी मन ल घलो सम्मानित करे गीस। उहें, वाद्य संगीत म बैशाखू ह पहला स्थान पईस।
ए मउका म कांगेर घाटी राष्ट्रीय उद्यान के निदेशक धम्मशील गणवीर ह किहीन कि वन्यजीव के संरक्षण सिरिफ वन विभाग के जिम्मेदारी नइ हे। एमा स्थानीय लोगन के साथ देना घलो जरूरी हे।
गिरधारी नायक-मानवाधिकार आयोग
प्रदेस के सेवानिवृत्त आईपीएस अधिकारी गिरधारी नायक ल छत्तीसगढ़ मानवाधिकार आयोग म सदस्य के रूप म दोबारा नियुक्ति दे गे हवय। उंखर पहला नियुक्ति के कार्यकाल पाछु बछर सोलह नवंबर के समाप्त होगे रिहीस। राज्यपाल विश्वभूषण हरिचंदन ह आज ओमन ल सदस्य के रूप म दूसर कार्यकाल बर नियुक्ति दीन हे।
इही बीच, आयोग के अध्यक्ष के रूप म सेवानिवृत्त न्यायाधीश न्यायमूर्ति राजीव गुप्त के कार्यकाल पूरा होय के बाद अध्यक्ष के पद म नियमित नियुक्ति नइ करे गेहे। ए आधार म सबले वरिष्ठ सदस्य होय के सेती जल्दीच गिरधारी नायक ल आयोग के प्रभारी अध्यक्ष के प्रभार घलो दे जा सकत हे।
संक्षिप्त समाचार
– मुख्यमंत्री भूपेश बघेल ह आज रईपुर के अपन निवास कार्यालय म वीरांगना रानी दुर्गावती के जयंती म ओमन ल अपन श्रद्धांजलि दीन। ए मउका म ओमन ह रानी दुर्गावती के बलिदान ल सुरता करत किहीन कि गोंडवाना साम्राज्य के रक्षा बर ओमन ह अपन सर्वस्व न्यौछावर कर दीन।
– राज्य सरकार ह डॉक्टर प्रवीण वर्मा ल छत्तीसगढ़ लोक सेवा आयोग के कार्यकारी अध्यक्ष बनाय हे। उहें, संत कुमार नेताम ल आयोग के सदस्य बनाय गे हवय। ए संबंध म अधिसूचना जारी होगे हवय।
– राज्य सरकार ह इक्कीस झन उप पुलिस अधीक्षक मनके तबादला करत उंखर नवा पदस्थापना के आदेस जारी कर देहे।
– छत्तीसगढ़ मदरसा बोर्ड रईपुर डहार ले आयोजित हाईस्कूल, हायर सेकेंडरी पत्राचार पाठ्यक्रम परीक्षा अउ उर्दू अदीब, उर्दू माहिर प्रमाण-पत्र परीक्षा के आवेदन पत्र अब इकतीस अक्टूबर तक जमा करे जा सकही।
अउ
– जिला रोजगार अउ स्व-रोजगार मार्गदर्शन केन्द्र, रईपुर म काली छह अक्टूबर के बिहनिया ग्यारह बजे ले मंझनिया तीन बजे तक जॉब फेयर के आयोजन करे जाही, जेखर माध्यम ले दू सौ पैंतीस ठिन पद म भर्ती करे जाही।