प्रधानमंत्री ह कहिन कि इस्पात के निर्माण म भारत आत्मनिर्भर होवय एखर बर पाछू नौ बछर म कतकोन कदम उठाय गेहे। श्री मोदी ह कहिन कि बस्तर के नगरनार के एनएमडीसी संयंत्र म बनइया इस्पात ह ऑटोमोबाइल के संग डिफेंस क्षेत्र ल घलो नवा उर्जा देही। ओमन कहिन कि बस्तर म जउन स्टील बनही ओखर ले न सिरिफ भारत के सेना मजबूत होही, फेर रक्षा निर्यात म घलो भारत के डंका बाजही। एखर ले करीबन पचास हजार युवा मन ल रोजगार मिलही।
ए मउका म प्रधानमंत्री ह जनजातीय बहुल बस्तर संभाग के जगदलपुर म छब्बीस हजार करोड़ रूपिया ले जादा के विकास परियोजना के शिलान्यास करीन। प्रधानमंत्री ह बस्तर के नगरनार म एनएमडीसी इस्पात संयंत्र के लोकार्पण करीन। उंहे श्री मोदी ह जगदलपुर रेलवे स्टेशन के सुधार काम के घलो शिलान्यास करीन। ओमन ह अंतागढ़ अउ ताड़ोकी के बीच नवा रेल लाईन ल राष्ट्र ल समर्पित करीन। श्री मोदी ह जगदलपुर अउ दंतेवाड़ा के बीच दोहरा रेल लाईन परियोजना के घलो लोकार्पण करीन। श्री मोदी ह ताड़ोकी अउ रायपुर के बीच ट्रेन सेवा ल हरा झंडा दिखाके रवाना करीन। ए परियोजना ले जनजातीय क्षेत्र म रेलसपंर्क म सुधार होही अउ क्षेत्र के आर्थिक विकास ल बढ़ावा मिलही।
पीएम-जगदपुर आमसभा
प्रधानमंत्री नरेंद्र मोदी ह आज जगदलपुर म भारतीय जनता पार्टी डहार ले राखे गे एक ठन आमसभा म कहिन कि देश के संसाधन म पहिली अधिकार गरीब मनके हवय। ओमन कहिन कि केंद्र के भाजपा सरकार गरीब मनके चिंता करथे अउ उंखर कल्याण बर प्रतिबद्ध हे, फेर ओ गरीब ह चाहे कोनो भी जाति या वर्ग के रहय।
प्रधानमंत्री ह आरोप लगाइन कि कांग्रेस ह हमेशा देश ल जाति के आधार म बांटे के काम करे हे। श्री मोदी ह कहिन कि आदिवासी विकास बर केंद्र के भाजपा सरकार ह कांग्रेस के तुलना म पांच गुना जादा राशि दे हवय। ओमन आरोप लगाइन कि छत्तीसगढ़ म कांग्रेस के शासनकाल म भ्रष्टाचार के बोलबाला हे।
मुख्यमंत्री-प्रधानमंत्री पत्र
ट्रेन के अनियमित चालन अउ कभी भी निरस्त होय जइसन दिक्कत ले लोगन ल होवत परेसानी के बारे म छत्तीसगढ़ के मुख्यमंत्री भूपेश बघेल ह प्रधानमंत्री नरेंद्र मोदी ल चिट्ठी लिखिन हे जेमा ओमन कहिन कि रेलवे प्रशासन डहार ले छत्तीसगढ़ ले निकलने वाला कतकेन ट्रेन ल बिना पूर्व सूचना के निरस्त करे जावत हे। एखर ले यात्री मन ल अबड़ परेसानी के सामना करना पड़त हे। श्री बघेल ह प्रधानमंत्री ले अनुरोध करीन हे कि राज्य के लोगन के परसानी ल देखत बिना देरी करे सबो रेलगाड़ी के अवई जवई ल पहिली जइसन शुरू करे जाय।
मुख्यमंत्री विमानन मंत्री पत्र
छत्तीसगढ़ के मुख्यमंत्री भूपेश बघेल ह केंद्रीय नागर विमानन मंत्री ज्योतिरादित्य सिंधिया ल चिट्ठी लिखके रायपुर-जगदलपुर-हैदराबाद हवाई मार्ग म विमान सेवा बर अलायंस एयर ले अनुबंध के अवधि बढ़ाय के अउ बिलासपुर ले देश के बड़े शहर मन म विमान सेवा शुरू करे के मांग करीन हे। अपन चिट्ठी म श्री बघेल ह श्री सिंधिया ले अनुरोध करीन हे कि बंद करे गे बिलासपुर-इंदौर-बिलासपुर अउ बिलासपुर-भोपाल-बिलासपुर विमान सेवा ल फेर शुरू करे जाय।
नेहरू युवा केन्द्र युवा उत्सव
नेहरू युवा केंद्र संगठन डहार ले अवइया पांच अउ छै अक्टूबर के रायपुर म राज्य स्तरीय युवा उत्सव आयोजित करे जाही। ए कार्यक्रम म मुख्य अतिथि के रूप म केंद्रीय सूचना प्रसारण तथा युवा कार्यक्रम अउ खेल मंत्री अनुराग सिं ठाकुर शामिल होही। ए युवा उत्सव म छत्तीसगढ़ के अठाईस जिला मनले करीबन पांच सौ युवक युवती मन भाग लीही। ए उत्सव के आयोजन रायपुर के रावतपुरा सरकार विश्वविद्यालय परिसर म करे जाही। युवा उत्सव के बेरा चित्रकला, कविता, मोबाइल फोटोग्राफी, भाषण एवं सामूहिक नृत्य प्रतियोगिता के आयोजन करे जाही। राज्य स्त्रीय प्रतियोगिता के विजयी प्रतिभागी मन ल राष्ट्रीय युवा उत्सव म शामिल होय के मउका मिलही। ये कार्यक्रम प्रधानमंत्री नरेंद्र मोदी के अमृत काल के पंचप्रण-विकसित भारत, गुलामी की सोच से मुक्ति, विरासत पर गर्व, एकजुटता और नागरिक कर्त्तव्य उपर आधारित होही।
प्रदेश म इंजीनियरिंग अउ मेडिकल जइसन प्रतियोगी परीक्षा के तैयारी बर अब छात्र मन ल निशुल्क कोचिंग के सुविधा मिलही। मुख्यमंत्री भूपेश बघेल ह आज रायपुर के अपन निवास कार्यालय ले स्वामी आत्मानंद कोचिंग योजना के वर्चुअल शुरूआत करीन। ये योजना म प्रदेश के एक सौ छियांलिस विकासखंड मुख्यालय अउ चार शहर- रायपुर, दुर्ग, बिलासपुर अउ कोरबा संघरा एक सौ पचास कोचिंग सेंटर के माध्यम ले शासकीय स्कूल म कक्षा बारहवीं के विद्यार्थी मन ल निशुल्क कोचिंग दे जाही। एखर बर स्कूल शिक्षा विभाग के तहत समग्र शिक्षा, छत्तीसगढ़ पाठ्यपुस्तक निगम अउ एलन कैरियर कोचिंग इंस्टीट्यूट प्रायवेट लिमिटेड के बीच एमओयू म हस्ताक्षर करे गीस।
ए मउका म मुख्यमंत्री ह अवइया बेरा म सबो विकासखंड म पीएससी अउ दूसर प्रतियोगी परीक्षा के ऑनलाईन कोचिंग सुविधा दे जाय के घोषणा करीन। ओमन कीहिन कि स्वामी आत्मानंद कोचिंग योजना लईका मनके सुनहरा भविष्य ल गढ़े म महत्वपूर्ण साबित होही । ए योजना के फायदा माओवाद प्रभावित इलाका के लइका मन ल घलो मिलही अउ ओमन ह प्रतियोगी परीक्षा के तैयारी बेहतर तरीका ले कर सकही।
उंहे स्कूल शिक्षा विभाग के अधिकारी मन ह बताइन कि आत्मानंद कोचिंग योजना म अभी तक नौ हजार ले जादा लइका मन ह अपन पंजीयन करइन हे।
मुख्यमंत्री सक्ती
मुख्यमंत्री भूपेश बघेल ह आज सक्ती जिला के डभरा म एक सौ पैंतालिस करोड़ रूपिया ले जादा के आने आने विकास काम के लोकार्पण अउ भूमिपूजन करीन। ए मउका म मुख्यमंत्री ह मालखरौदा ल नगर पंचायत बनाय के अउ चंद्रपुर म सामुदायिक स्वास्थ्य केंद्र खोले के घोषणा करीन।
कार्यक्रम म मुख्यमंत्री ह आने-आने योजना म पात्र हितग्राही मन ल राशि अउ सामग्री बांटीन। उंहे डभरा तहसील के ग्राम पंचायत नवापारा, बिनौधा, भजपुर, भेड़ीकोना, रामभाठा, साराडीह, फरसवानी अउ सकराली के पच्चीस झन ग्रामीण मन ल ग्रामीण आवास न्याय योजना म आवास निर्माण संबंधी मंजूरी दीन।
श्रमिक वेतन
प्रदेश के श्रम विभाग ह नियोजित श्रमिक मनके वेतन के नवा दर निर्धारित करे हे जउन ह पाछू एक अक्टूबर ले अवइया बछर इकतीस मार्च तक प्रभावित रीही। नवा दर के अनुसार अब उच्च कुशल श्रमिक मनके वेतन हर महीना बारा हजार आठ सौ तीस रूपिया, कुशल श्रमिक मनके बारा हजार पचास रूपिया, अर्धकुशल श्रमिक के ग्यारा हजार दू सौ सत्तर अउ अकुशल श्रमिक के न्यूनतम वेतनमान दस हजार छै सौ बीस रूपिया निर्धारित करे गेहे। उंहे कृषि श्रमिक के वेतनमान म हर महीना एक सौ चालीस रूपिया के बढ़ोत्तरी करे गेहे।
विधायक विक्रम मंडावी-घायल
बीजापुर विधायक विक्रम मंडावी ह काली एक ठन सड़क हादसा म गंभीर रूप ले घायल होगीन। बस्तर म कांग्रेस डहार ले आयोजित भरोसे की यात्रा ले लहुटत खानी ग्राम तुनकीगुट्टा तीर उंखर मोटर सायकिल अनियंत्रित होगे। ए हादसा म ओमन ल गंभीर रूप ले चोट आय हे। उंहे उंखर संग मोटर सायकिल म बइठे नगरपालिका उपाध्यक्ष पुरूषोत्तम सल्लूर घलो घायल होगीन। श्री सल्लूर के इलाज बीजापुर म चलत हे। उंहे विधायक मंडावी ल इलाज बर रायपुर रिफर करे गेहे।
इही बीच मुख्यमंत्री भूपेश बघेल ह रायपुर के एक ठन निजी अस्पताल म भर्ती विधायक विक्रम मंडावी ले भेंट करके उंखर हालचाल पूछीन अउ स्वास्थ्य लाभ के कामना करीन।