प्रधानमंत्री नरेंद्र मोदी काली तीन अक्टूबर के छत्तीसगढ़ के एक दिवसीय दउरा म बस्तर आही। ए दउरान ओमन जगदलपुर म छब्बीस हजार करोड़ रूपिया ले जादा के कई ठिन बिकास काम मन के सिलान्यास अउ लोकार्पण करही। ए प्रोजेक्ट म नगरनार स्थित राष्ट्रीय खनिज विकास निगम एनएमडीसी लिमिटेड क इस्पात संयंत्र के लोकार्पण घलो सामिल हे। ए संयंत्र ह करीबन चौबीस हजार करोड़ रूपिया के लागत ले बनके तइयार होहे। जेमा एखर ले जुड़े सहयोगी उद्योग मन म हजारों मनखे ल रोजगार के मउका मिलही।
प्रधानमंत्री ह ए दउरान अंतागढ़ ले ताड़ोकी नवा रेललाइन अउ जगदलपुर ले दंतेवाड़ा के बीच डबल रेललाइन ल राष्ट्र ल समर्पित करहीं। उहें, प्रधानमंत्री बोरीडांड ले सूरजपुर रेललाइन के दोहरीकरण परियोजना अउ अमृत भारत स्टेसन योजना के तहत जगदलपुर स्टेसन के पुनर्विकास के आधारसिला रखही। ए दउरान प्रधानमंत्री ह ताड़ोकी ले रइपुर डेमू ट्रेन सेवा के सुभारंभ घलो करही। प्रधानमंत्री ह ए मउका म नेसनल हाईवे क्रमांक पैंतालीस म कुरकुरी ले छत्तीसगढ़, झारखंड सीमा बीच बने नवा सड़क के घलो लोकार्पण करहीं।
बस्तर-बंद
कांग्रेस ह नगरनार इस्पात संयंत्र के निजीकरण के विरोध म काली तीन अक्टूबर के बस्तर बंद करे के ऐलान करीन हे। पार्टी के अध्यक्ष दीपक बैज ह केहे हे कि नगरनार इस्पात संयंत्र ह बस्तर के लोगन मन के भावना अउ ओखर आर्थिक हित ले जुड़े हवय। कांग्रेस पार्टी ह एखर निजीकरण के विरोध करथे। प्रदेस कांग्रेस ह नगरनार इस्पात संयंत्र ल बेचे के प्रोसेस ल रोके बर अउ एनएमडीसी के मुख्यालय ल हैदराबाद ल बस्तर लाए बर अउ बस्तर म एम्स खोले के मांग करे हे।
स्वच्छता अभियान-तीसरा चरण
स्वच्छता ल केंद्र म राखके अउ पूर्ण स्वच्छता के सोच के संगे सरकारी ऑफिस मन म साफ-सफाई अउ पेंडिंग माढ़े मामला मन ल कम करे के संगे एक ठिन बिसेस अभियान के तीसर चरण आज ले सुरू होगे हे। राष्ट्रपिता महात्मा गांधी के जयंती के मउका म सुरू होय ए बिसेस अभियान ह एकतीस अक्टूबर तक ले चलही। ए अभियान ह पाछू दू बछर म चलाय गे, बिसेस अभियान मन के अगला कड़ी हरय।
गांधी/शास्त्री-जयंती
देस आज राष्ट्रपिता महात्मा गांधी अउ पूर्व प्रधानमंत्री लालबहादुर शास्त्री के जयंती बेरा म ओमन ल अपन भावभीनी श्रध्दांजलि देवत हे। राष्ट्रीय राजधानी दिल्ली म राजघाट स्थित गांधी जी के समाधि जघा म सर्व धर्म प्रार्थना सभा राखे गे रिहीस। राष्ट्रपति द्रौपदी मुर्मू , उप राष्ट्रपति जगदीप धनखड़ अउ प्रधानमंत्री नरेंद्र मोदी आज बिहनिया राजघाट म महात्मा गांधी ल पुष्पांजलि अर्पित करीन।
ऐति राजधानी रइपुर समेत प्रदेस भर म कई ठिन कारीकरम होवत हे। राज्यपाल विश्वभूषण हरिचंदन ह आज राजभवन म राष्ट्रपिता महात्मा गांधी अउ पूर्व प्रधानमंत्री लालबहादुर शास्त्री के छायाचित्र उपर फूल माला पहिनाके उंखर मन के देस खातिर योगदान के सुरता करीन।
ओति मुख्यमंत्री भूपेश बघेल ह घलो रइपुर स्थित अपन निवास कार्यालय म राष्ट्रपिता महात्मा गांधी अउ पूर्व प्रधानमंत्री लालबहादुर शास्त्री के छायाचित्र उपर फूल चढ़ाके माथ नवाइन। ए मउका म मुख्यमंत्री ह किहीन कि गांधी जी ह भारत म स्वाधीनता आंदोलन ल नवा दिसा दे रिहीन। ओमन सत्य प्रेम अउ अहिंसा के रद्दा रेंगके जम्मों विश्व के आगू म एक ठिन विसाल कायम करीन। श्री बघेल ह शास्त्री जी ल सुरता करत किहीन कि ओमन सादगी ले जीवन जिए संगे अपन पूरा जीवन ल गरीब मन के सेवा म लगाइन।
छायाचित्र प्रदर्शनी
संस्कृति विभाग डहार ले राष्ट्रपिता महात्मा गांधी के जयंती के मउका म रइपुर के महंत घासीदास स्मारक संग्रहालय के कला वीथिका म आज ले तीन दिवसीय फोटो-प्रदर्सनी लगाय गेहे। ए प्रदर्सनी म गांधी जी के जनम नान्हेपन परवार, लइकापन म पढ़ई समेत, उंखर जीवन के नामी घटना ले जुडे़ सौ ले जादा फोटू लगाय गेहे। ए प्रदर्सनी ल चार अक्टूबर ले बिहनिया साढ़े दस बजे ले संझा साढ़े पांच बजे तक ले देखे जा सकत हे।
देस के लोगन मनके जीवन स्तर ल सुघ्घर बनाय के उद्देस्य ले आकांक्षी प्रखण्ड कारीकरम के तहत काली ले ‘‘संकल्प सप्ताह‘‘ मनाय जाही। जउन ह नौ अक्टूबर तक ले चलही। बीते तीस सितंबर के नई दिल्ली म प्रधानमंत्री नरेंद्र मोदी ह ए सप्ताह के सुभारंभ करे हवय। ए कारीकरम म छत्तीसगढ़ ले कोंडागांव जिला के माकड़ी विकासखंड से जनपद पंचायत सीईओ अनुराग सिन्हा, जनपद पंचायत उपाध्यक्ष गौतम कुमार साहू, ग्राम पंचायत माकड़ी के सरपंच हेमलाल वट्टी समेत कई झिन ग्राम पंचायत के सरपंच सामिल हे।
ई-नीलामी-पीएम
प्रधानमंत्री नरेंद्र मोदी ल मिले स्मृति चिन्ह याने मोमेंटो मन के ई-नीलामी आज ले आम जनता बर सुरू होगे हे। ए बोली ह ए महिना के एकतीस तारीख तक जारी रइही। ए नीलामी म सकलाय पैसा ले पवित्र गंगानदी ल पुर्नजीवित करे खातिर नमामी गंगे परियोजना ल दान कर दे जाही। नीलामी के ए पांचवा संस्करण म सौ रूपिया ल लेके पैंसठ लाख रूपिया तक के चिन्हारी याने मोमेंटो ई-नीलामी ले मिल जही।
कांगेस-भरोसा यात्रा
प्रदेस कांग्रेस कमेटी ह आज राज्य के सबो नब्बे ठिन विधानसभा क्षेत्र म भरोसा यात्रा निकालीस। ए यात्रा के माध्यम ले पार्टी कार्यकर्ता मन अपन-अपन विधानसभा क्षेत्र म पहुंचके लोगन मन ल सरकार के कई ठिन जनकल्याणकारी योजना मन के जानकारी दीन। ए दउरान नुक्कड़ अउ जनसभा घलो होइस। मुख्यमंत्री भूपेश बघेल पाटन विधानसभा के सेलूद म होय भरोसा यात्रा म सामिल होइन।
उहें, उप मुख्यमंत्री टी.एस.सिंहदेव सरगुजा अउ रायगढ़ प्रदेस कांग्रेस अध्यक्ष दीपक बैज बस्तर अउ कांकेर, गृहमंत्री ताम्रध्वज साहू दुर्ग अउ बिलासपुर, विधानसभा अध्यक्ष डॉक्टर चरणदास महंत कोरबा अउ जांजगीर, नगरीय प्रसासन मंत्री डॉक्टर शिवकुमार डहरिया रइपुर अउ महासमुंद लोकसभा क्षेत्र म ए यात्रा के नेतृत्व करीन।
मुख्य न्यायाधीश-निरीक्षण
छत्तीसगढ़ उच्च न्यायालय के मुख्य न्यायाधीश रमेश सिन्हा ह काली राज्य विधिक सेवा प्राधिकरण बिलासपुर कार्यालय के निरीक्षण करीन। संगेसंग ओमन जिला अउ सत्र न्यायालय बिलासपुर म बिस्तार भवन के निर्माण काम के जायजा लीन ए मउका म ओमन लोकनिर्माण विभाग के अधिकारी मन ल बेरा भीतरी गुणवत्ता वाले निर्माण काम करे के निरदेस दीन।
उहें, मुख्य न्यायाधीश ह न्यायिक अधिकारी मनके बइठका लेके जुन्ना अउ माढ़े केस मन के निराकरण बर निरदेस दीन।
चिरई-संरक्षण मैराथन
वन्य प्राणी संरक्षण सप्ताह के मउका म कांगेर घाटी राष्ट्रीय उद्यान डहार ले काली तीरथ गढ़ म ‘‘चिरई-संरक्षण मैराथन‘‘ राखे गे रिहीस। ए दउरान चिरई मन के संरक्षण अउ संवर्धन याने चिरई मन ल बचाय अउ बढ़ाय खातिर स्थानीय जन-जीवन म जागरूकता लाय बर प्रचार-प्रसार करे गीस। चिरई संरक्षण मैराथन म प्रदेस भर के तीन सौ पचास ले जादा प्रतिभागी लोगन मन सामिल होइन।
भाषा उत्सव
नई दिल्ली के डॉक्टर भीमराव अंबेडकर इंटरनेशनल सेंटर जनपथ म दू दिवसीय भारतीय भाषा उत्सव अउ भारतीय भाषा प्रौद्योगिकी समागम के आयोजन करे गीस। केंद्रीय शिक्षा मंत्रालय डहार ले राखे गे, ए कारीकरम म छत्तीसगढ़ अउ असम राज्य के भाषा सिक्षण स्टाल ल घलो नेवते गे रिहीस। छत्तीसगढ़ के स्टाल म प्रायमरी कक्षा मन म स्थानीय भाषा म तकनीकी प्रौद्योगिकीय बर सिक्षक मन डहार ले करे जावत काम ल बताय गेहे।
केंद्रीय शिक्षा मंत्री धर्मेद्र प्रधान अउ केंद्रीय विज्ञान अउ प्रौद्योगिकीय राज्य मंत्री जितेंद्र सिंह ह छत्तीसगढ़ के स्टाल के निरीक्षण करीन।