प्रधानमंत्री नरेंद्र मोदी ह आज देसभर म चलाए गे स्वच्छता ही सेवा महाअभियान के नेतृत्व करीन। ओमन फिटनेस प्रशिक्षक अंकित बइयानपुरिया के संग सफाई अभियान म सामिल होइन। श्री मोदी ह उंखर ले गोठबात करीन अउ सारिरीक सौष्ठव याने बॉडी बनाय राखे के जरूरत उपर जोर दीन। प्रधानमंत्री ह सफाई अभियान दउरान श्री बइयानपुरिया के संग होय गोठबात वाले वीडियो सोसल मीडिया सेयर करीन।
स्वच्छता बर प्रधानमंत्री के ‘एक तारीख, एक घंटा, एक साथ‘ ए आरो उपर आज देसभर म लोगन मन भागीदारी दीन। श्री मोदी ह महात्मा गांधी के जयंती के पूर्व संध्या म ओमन ल श्रध्दांजलि दे बर आज बिहनिया दस बजे स्वच्छता अभियान म नागरिक मन ले एक घंटा के श्रमदान खातिर अपील करे रिहीन। ए मउका म सबो वर्ग के लोगन मन मार्केट एरिया रेल पटरी, डेम, पर्यटन अउ पूजा स्थल समेत सार्वजनिक जघा मन म साफ-सफाई के काम म भाग लीन। भारतीय जनता पार्टी के अध्यक्ष जे.पी. नड्डा के संगे कई झिन केंद्रीय मंत्री अउ आने नेता मन घलो एमा भाग लीन।
ए अभियान म देस के सहरी अउ गवई जघा के करीबन सात लाख जघा मन म श्रमदान कारीकरम राखे गीस। करीबन एक लाख आवासीय इलाका म आवासीय कल्याण समिति मन श्रमदान करीन। एमा थल सेना, नौसेना, वायुसेना, राष्ट्रीय आपदा मोचन बल, केंद्रीय जांच ब्यूरो अउ आने विभाग के कर्मचारी मन घलो आम लोगन मन संग स्वच्छता अभियान म भाग लीन।
स्वच्छता पखवाड़ा-छत्तीसगढ़-01
उहें, छत्तीसगढ़ म घलो महात्मा गांधी के जयंती के एक दिन आगू आज स्वच्छता ही सेवा पखवाड़ा के चलत सफाई अभियान चलाय गीस। राज्यपाल विश्व भूषण हरिचंदन ह रइपुर म स्वच्छता पखवाड़ा कारीकरम म भाग लीन। ए अभियान म रइपुर इंस्टिट्यूट ऑफ मेडिकल साइंसेस के पढ़ईया लइका मन घलो मौजूद रिहीन। कारीकरम म राज्यपाल ह पढ़ईया लइका मन ले न केवल पूरा पखवाड़ा म भलूक हर हमेसा अपन तीर-तखार जघा ल साफ-सूफा राखे के अपील करीन।
एक तारीख, एक घंटा, एक साथ श्रमदान अभियान के चलत सूचना अउ प्रसारण मंत्रालय के केंद्रीय संचार ब्यूरो, प्रादेसिक कार्यालय अउ पत्र सूचना कार्यालय रइपुर डहार ले राष्ट्रीय सेवा योजना अउ नेहरू युवा केंद्र संगठन के सहयोग ले न्यू दूरदर्सन कॉलोनी जघा म बिसेस स्वच्छता अभियान चलाय गीस। पीआईबी के उप निदेसक रमेश जायभाये ह बतइन कि स्वच्छता अभियान म भाग लेके राष्ट्रपिता महात्मा गांधी ल श्रध्दांजलि दे गीस। उहें, पर्यटन मंत्रालय के छत्तीसगढ़ नोडल कार्यालय अउ छत्तीसगढ़ टूरिजम बोर्ड के संघरा आयोजन ले आज रइपुर जिला के चंदखुरी स्थित माता कौशल्या मंदिर परिसर अउ स्कूल म उही जघा रहवइया ग्रामीण मन के सहयोग ले सफाई अभियान चलाय गीस। कारीकरम म सबो झिन मन अपन तीर-तखार के जघा ल साफ-सफाई अउ सुंदर बनाय राखे के संगे स्वच्छ भारत मिशन के प्रचार बर सपथ लीन।
स्वच्छता पखवाड़ा-छत्तीसगढ़-02
स्वच्छता ही सेवा पखवाड़ा के चलत राजधानी रइपुर के सबो सत्तर ठन वार्ड मन म श्रमदान करके साफ-सफाई करे गीस। ए अभियान म महापौर, नगर निगम आयुक्त, पार्षद मन के संगे ग्रीन आर्मी, स्वयंसेवक अउ स्वच्छता दीदी मन भाग लीन। उहें, बेमेतरा के नवोदय विद्यालय अउ ग्राम पंचायत कुसमी म स्वच्छता ही सेवा अभियान के चलत साफ-सफाई करके लोगन मन ल स्वच्छता खातिर आरो दे गीस। कारीकरम म पंचायत प्रतिनिधि, स्कूली लइका अउ गांव के मनखे मन सामिल होइन।
ओति, बीजापुर के व्यवहार न्यायालय म आज स्वच्छता अभियान के चलत तालूका विधिक सेवा समिति के सदस्य न्यायधीश अउ कर्मचारी मन के मौजूदगी म न्यायालय परिसर के साफ-सफाई करे गीस। प्रदेस के आने जिला मन म घलो आज सार्वजनिक जघा, स्कूल अउ कालेज मन म स्वच्छता अभियान चलाय गीस।
इही, तरह दक्षिण पूर्व मध्य रेलवे के करीबन एक सौ सात ठिन जघा म आज स्वच्छता अभियान चलाय गीस। बिलासपुर रेल मंडल के महाप्रबंधक अउ अपर महाप्रबंधक के पगरइती म बिलासपुर के इलेक्ट्रिक लोको सेट, कंट्रोल ऑफिस के संगे रइपुर टेसन दुर्ग केाचिंग डिपो समेत आने यूनिट टेसन अउ ओखर तीर-तखार जघा म साफ-सफाई करे गीस।
राष्ट्रीय प्रौद्योगिकीय संस्थान रइपुर म स्वच्छता ही सेवा पखवाड़ा के चलत काली शिक्षक पढ़ईया लइका अउ कर्मचारी मन ल जुन्ना किताब अउ आने स्टेसनरी सामग्री ल दान म दे बर प्रेरित करे गीस।
कांग्रेस-भरोसा यात्रा
प्रदेस कांग्रेस कमेटी ह राष्ट्रपिता महात्मा गांधी के मउका म काली दू अक्टूबर के एक दिवसीय भरोसा यात्रा निकालही। ए यात्रा के माध्यम ले पार्टी कार्यकर्ता मन सबो नब्बे ठिन विधानसभा क्षेत्र म पहुंचके, सरकार के कई ठिन योजना मन के जानकारी लोगन मन ल दीहि। ए दउरान नुक्कड़ सभा अउ जनसभा घलो होही।
मुख्यमंत्री भूपेश बघेल राजनांदगांव म ए यात्रा के अगुवई करही। उहें, उप मुख्यमंत्री टी.एस.सिंहदेव सरगुजा अउ रायगढ़ म प्रदेस कांग्रेस अध्यक्ष दीपक बैज , बस्तर अउ कांकेर म, गृहमंत्री ताम्रध्वज साहू, दुरूग अउ बिलासपुर म, विधानसभा अध्यक्ष डॉक्टर चरणदास महंत, कोरबा अउ जांजगीर म अउ नगरीय प्रसासन मंत्री डॉक्टर शिवकुमार डहरिया ह रइपुर अउ महासमुंद लोकसभा क्षेत्र म ए यात्रा के अगुवई करही।
मुख्यमंत्री-झांकी समारोह
राजधानी रइपुर म काली रतिहा आकर्षक सुघ्घर झांकी अउ बाजा-गाजा के संगे भगवान गणेश के बड़का मूर्ति मन ल विर्सजन करे गीस। सहर के कई ठिन रद्दा ले होवत ए झांकी मन खारून नदी के महादेव घाट पहुंचिस, जिहां मूर्ति मनके विर्सजन बर बिसेस व्यवस्था राखे गीस। मुख्यमंत्री भ्ूापेश बघेल ह जयस्तंभ चौक म झांकी समारोह म सामिल होइन अउ भगवान गणेश के पूजा-पाठ करकेे प्रदेस रहवइया मनके सुख-समृध्दि के कामना घलो करीन।
अंतर्राष्ट्रीय वृध्दजन दिवस
मुख्यमंत्री भूपेश बघेल ह अंतर्राष्ट्रीय वृध्दजन दिवस के मउका म रइपुर के इंडोर स्टेडियम म होय एक ठिन कारीकरम म सियनहा नागरिक मन ल साल अउ नरियर देके सम्मानित करीन। ए मउका म ओमन सियान मन ल इलेक्ट्रानिक व्हील चेयर, चस्मा अउ आने सहायक उपकरण घलो दीन। कारीकरम म रइपु र के दिव्यांग महाविद्यालय के लइका मन सांस्कृतिक कारीकरम घलोक प्रस्तुत करीन।
राष्ट्रीय पोषण माह
महिला अउ बाल विकास विभाग डहार ले चलाय गे छटवां राष्ट्रीय पोषण माह के रइपुर के गुढ़ियारी स्थित आंगनबाड़ी केंद्र म समापन होईस। ए मउका म पोषण प्रदर्सनीय लगाय गीस। जेमा पोषण आहार बारे म जानकारी दे गीस। एक ले तीस सितंबर तक होय ए पोषण माह के थीम पोषण भी पढ़ाई भी रिहीस।
मुख्य न्यायाधीश-न्यायालय निरीक्षण
छत्तीसगढ़ उच्च न्यायालय के मुख्य न्यायाधीश रमेश सिन्हा ह काली दुर्ग-राजनांदगांव के जिला अउ सत्र न्यायालय के संगे भिलाई के नवा न्यायालय भवन के निरीक्षण करीन। दुर्ग न्यायालय भवन ल न्यायालय के गरिमा मुताबिक नई होय के सेति ओमन नया भवन बर दुर्ग कलेक्टर पुष्पेन्द्र कुमार मीणा ल करीबन बारह एकड़ भूईया के व्यवस्था तय करे के निरदेस दे गेहे।
मौसम
मौसम बिभाग ह अवईया चौबीस घंटा के दउरान जसपुर अउ रायगढ़ जिला म कोनांे-कोनों जघा म जोरदरहा बरसा होय के चेतावनी दे हे। उहें, बलरामपुर, जांजगीर-चांपा, कोरबा अउ सरगुजा जिला म घलो कहू-कहू पानी गिर सकत हे।
शिक्षक-प्रशिक्षण
प्रदेस के स्कूल मन म नवनियुक्त छै हजार ले जादा शिक्षक मन ल नौ ले तेरह अक्टूबर तक प्रसिक्षण दे जाही। एमा सहायक शिक्षक, शिक्षक अउ व्याख्याता सामिल रइही। ए शिक्षक मन के ट्रेनिंग पन्द्रह चरण म पूरा होही। पहलईया चरण म मीडिल स्कूल म नियुक्त शिक्षक मन ल टेªनिंग दे जाही।