प्रधानमंत्री-छत्तीसगढ़-01
प्रधानमंत्री नरेंद्र मोदी ह किहीन कि छत्तीसगढ़ ह आज कांग्रेस सरकार के शासन काल म आतंक, भ्रष्टाचार अउ कुशासन ले त्रस्त हवय। आज बिलासपुर म भारतीय जनता पार्टी के महसंकल्प रैली ल संबोधित करत हुए, श्री मोदी ह किहीन कि छत्तीसगढ़ म रोजगार के नाम म घोटालेच घोटाला होवत हे, अउ पीएससी घोटाला तो युवा मन के संग बड़का छल हवय।
श्री मोदी ह किहीन कि भाजपा के सरकार चाहे केंद्र म रहय या राज्य म ओहा छत्तीसगढ़ के विकास बर समर्पित रहे हे। पाछू पंाच बछर म केंद्र के भाजपा सरकार ह छत्तीसगढ़ ल बिजली, सड़क अउ आने-आने विकास काम बर हजारों करोड़ रूपिया दीन हे, फेर राज्य के कांग्रेस सरकार के कारण केंद्रीय योजना के लाभ लोगन मन तक नइ पहुंच पाए हे।
धान खरीदी के मुद्दा उपर श्री मोदी ह किहीन कि छत्तीसगढ़ के किसान ले धान के एक-एक दाना केंद्र सरकार ह खरीदथे, जेखर पैसा केंद्र सरकार ही देथें। भाजपा ह धान उपजइया किसनहा मन बर सदैव समर्पित रहे हे।
ओमन किहीन कि सामाजिक न्याय के संगेसंग विकसित भारत के निर्माण ही भाजपा के लक्ष्य अउ मॉडल हवय।
प्रधानमंत्री-छत्तीसगढ़-02
एखर पहिली सभा ल संबोधित करत हुए भाजपा प्रदेस अध्यक्ष अरूण साव ह आरोप लगाइन कि छत्तीसगढ़ के कांग्रेस सरकार के भ्रष्टाचार के सेति केंद्र कोति ले राज्य ल दे जाने वाले कई हजार करोड़ रूपिया के फायदा लोगन मन तक नइ पहुंच पावत हे। ए मउका म पार्टी के राष्ट्रीय उपाध्यक्ष डॉक्टर रमन सिंह, नेता प्रतिपक्ष नारायण चंदेल समेत पार्टी के कोर ग्रुप के सब्बों सदस्य मौजूद रिहीन।
भाजपा डहार ले बिलासपुर म ए महासंकल्प रैली के आयोजन प्रदेस म निकाले गे दू परिवर्तन यात्रा के संपन्न होय के मउका म गिस।
प्रधानमंत्री-संकल्प सप्ताह
प्रधानमंत्री नरेंद्र मोदी ह किहीन कि आकांक्षी प्रखण्ड करीकरम के लक्ष्य बलॉक स्तर म लोगन मन के जीवन के गुणवत्ता ल सुधारना हे। आज नई दिल्ली म भारत मंडपम म संकल्प सप्ताह ल सुरू करत हुए श्री मोदी ह किहीन कि आकांक्षी प्रखण्ड कारीकरम प्रशासन के गुणवत्ता ल सुधार के देस के 329 जिला के 500 आकांक्षी प्रखण्ड म मनखे मन के जीवन ल बेहतर बनाही। आकांक्षी जिला कारीकरम ले 112 जिला म 25 करोड़ नागरिक के जीवन म बदलाव आइस हे।
भारत मंडपम म राखे गे कारीकरम म लगभग 3000 पंचायत अउ प्रखण्ड स्तर के जनप्रतिनिधि अउ कार्यकर्ता सामिल होइस।
सुनइया मन ल बतादन कि संकल्प सप्ताह ह आकांक्षी प्रखण्ड कारीकरम के बढ़िया कार्यान्वयन ले जुड़े हे। ए राष्ट्रव्यापी कारीकरम ल प्रधानमंत्री ह इही बछर के 7 जनवरी के सुरू करे रिहीस।
प्रधानमंत्री-स्वच्छता अभियान
प्रधानमंत्री नरेंद्र मोदी ह किहीन कि काली बिहनिया दस बजे देसभर म बिसेस स्वच्छता अभियान चलाय जाही। ओमन किहीन कि देस म स्वच्छता बनाय राखे बर सबो झनके संघरा जवाबदारी हे, अउ स्वच्छ भारत के दिसा म हरेक प्रयास जरूरी हवय। श्री मोदी ह स्वच्छ भविष्य बर हर देसवासी ले हाथ बटाय के अपील करीन हे।
केंद्रीय आवासन और शहरी कार्य मंत्री हरदीप सिंह पुरी ह किहीन कि स्वच्छता महाअभियान बर शहरी अउ गांव-गवंई क्षेत्र ले छै लाख चालीस हजार ले जादा जघा ल श्रमदान बर चुने गेहे। ए कारीकरम आंगनबाडी़ केंद्र, वन स्टॉप सेंटर, राष्ट्रीय जन सहयोग संस्थान अउ बाल विकास कार्यालय के माध्यम ले आयोजित करे जावत हे।
ऐति, छत्तीसगढ़ के आने-आने जिला म घलो स्वच्छता ही सेवा अभियान म लोगन मन कोति ले श्रमदान करके स्वच्छता अभियान चलाय जाही। एमा रइपुर नगर-पालिका निगम, स्वास्थ्य विभाग अउ स्वच्छ भारत मिशन कोति ले काली बिहनिया दस बजे ले सहर के सब्बो 70 वार्ड म जन-भागीदारी के माध्यम ले साफ-सफाई अउ श्रमदान करे जाही, अउ स्वच्छता संकल्प घलो देवाय जाहीं
सुनइया मन ल बतादन कि स्वच्छ भारत मिशन ह स्वच्छता ही सेवा कारीकरम के सुरूआत करीस हे। जेन ह 15 सितंबर ले दू अक्टूबर तक चलाय जावत हे।
मुख्यमंत्री-पीएससी
मुख्यमंत्री भूपेश बघेल ह किहीन हे कि छत्तीसगढ़ लोक सेवा आयोग सीजीपीएससी ल लेके प्राप्त हर सिकायत के गंभीरता ले जांच करे जाही, अउ अगर कोनो गड़बड़ी मिलही त, ओखर जांच कर दोषी मन उपर कार्रवाई घलो करे जाही। ओमन युवा मनसो अपील करे हे कि कोनो तरह के बहकावा म झन आवव अउ अपन तियारी ल मेहनत अउ लगन ले करत रहो। श्री बघेल ह किहीन कि पीएससी परीक्षा के रिजल्ट आए बने दीन होगे हे, फेर अब तक कोनो अभ्यर्थी कोति ले कुछू प्रकार के सिकायत नइ मिले हे। कोनो अधिकारी के बेटा-बेटी होय म कुछू दोष नइ हे। परीक्षा म सब्बो अभ्यर्थी समान रूप ले भाग लेथें, अउ उही अनुसार सफलता घलो पाथे। लेकिन अगर कोनो एखर गलत फायदा उठाथे तो ए ह गलत हे।
सुनइया मन ल बतादन कि सीजीपीएससी ल पाछू एक बछर म अभ्यर्थी मन ले कुल 95 सिकायत मिले हे। जेखर म 76 के निराकरण कर दे गेहे। बांचे 19 प्रकरण म प्रक्रिया चलत हे।
मुख्यमंत्री-बेरोजगारी भत्ता
मुख्यमंत्री भूपेश बघेल ह आज अपन निवास कार्यालय ले प्रदेस के एक लाख 35 हजार ले जादा शिक्षित बेरोजगार हितग्राही मन ल 35 करोड़ 48 लाख रूपिया ले जादा के बेरोजगारी भत्ता, उंखर मन के बैंक खाता म भेजिन।
इही, बीच मुख्यमंत्री ह वर्चुअल रूप ले बस्तर अउ सरगुजा संभाग म शिक्षक अउ व्याख्याता के पद म चयनित दू हजार 161 अभ्यर्थी, आईटीआई के 109 प्रशिक्षण अधिकारी अउ छै झन छात्रावास अधीक्षक अभ्यर्थी मन ल नियुक्ति पत्र घलो सौंपिन।
मुख्यमंत्री-पुलिस प्रोत्साहन
मुख्यमंत्री भूपेश बघेल ह किहीन कि रायगढ़ के एक निजी बैंक म होय डकैती के मामला ल चौबीस घंटा के अंदर सुलझाने वाला रायगढ़ अउ बलरामपुर जिला के पुलिस बल ल बिसेस प्रोत्साहन अउ सम्मान दे जाही। ओमन किहीन कि छत्तीसगढ़ पुलिस कर्तव्यनिष्ठा के संग अपन काम करत हे। पुलिस के मनोबल ल बढ़ाय अउ सुघ्घर काम बर, ओमन ल सम्मान मिलना चाही।
एखर ले पहिली पुलिस महानिदेसक अशोक जुनेजा ह ए मामला म बढ़िया काम करने वाला पुलिस कर्मी मन ल आउट आफ टर्न प्रमोसन, इंक्रीमेंट, नगदी पुरस्कार अउ प्रसस्ति पत्र ले सम्मानित करे के अनुसंसा करीन हे।
जांजगीर-डायरिया
डायरिया ले प्रभावित जांजगीर-चांपा जिला के किरारी गांव म स्वास्थ्य विभाग के टीम ह जांच सिविर लगाय हे। जेमा तीन झिन डॉक्टर समेत 13 कर्मचारी के ड्यूटी लगाय गेहे। अभी ए गांव म डायरिया ले दस झन मनखे बीमार हे। जेन म दू झन के ईलाज बिलासपुर म अउ एक झन के ईलाज ह जांजगीर म चलत हे। फेर, बाकी मरीज मन ल अकलतरा के आने-आने वार्ड म भर्ती कराय गेहे। इही, बीच दूषित पानी के सिकायत म गांव के छै टेड़ा नल ल बंद करदे गेहे।
सुनईया मन ल बतादन कि किरारी गांव म डायरिया ले 22 झन मनखे बीमार रिहीन, जेमा ले एक झन माईलोगिन के मौत घलो होगे हे।
जिले की चिट्ठी
आकाशवाणी रइपुर के प्रादेशिक समाचार एकांश, कोति ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बज के पांच मिनट ले छै बज के दस मिनट तक करे जाही। ए कारीकरम ल छत्तीसगढ़ के सब्बो आकाशवाणी केंद्र एके संघरा रिले करहीं। ए दारी के अंक म बिलासपुर जिला के गतिविधि मन के बारे म जानकारी दे जाही।
मौसम
मौसम विभाग ह अवइया चौबीस घंटा म प्रदेस के रायगढ़, जशपुर, कोरबा, सरगुजा, बलरामपुर अउ एखर ले लगे जिला म भारी बरसा होय के चेतावनी दे हे। संगेसंग एक-दू जघा म गरज-चमक के संग आकाशीय बिजली गिरे के घलो आशंका हे।