राष्ट्रपति द्रौपदी मुर्मू ह महिला आरक्षण संबंधी संशोधन विधेयक-नारी शक्ति वंदन विधेयक दू हजार तेईस म हस्ताक्षर कर दीन हे। एखर संग अब ए विधेयक कानून बन गेहे। केंद्र सरकार ह ए संबंध म राजपत्र म अधिसूचना जारी कर देहे। ए विधेयक म लोकसभा अउ राज्य विधानसभा म महिला मन बर तैंतीस प्रतिसत आरक्षण के प्रावधान करे गेहे।
पीएम-छत्तीसगढ़
प्रधानमंत्री नरेंद्र मोदी काली तीस सितंबर के छत्तीसगढ़ के एक दिन के प्रवास म आही। ए दउरान ओमन बिलासपुर म भाजपा डहार ले निकाले गे परिवर्तन यात्रा के समापन समारोह म शामिल होही। श्री मोदी बिलासपुर के सीपत रोड स्थित साईंस कॉलेज मैदान म परिवर्तन महासंकल्प रैली के तहत राखे गे एक आमसभा ल संबोधित करही। बतादन कि भाजपा कोति ले बारा सितंबर के दंतेवाड़ा ले निकाले गे पहिली परिवर्तन यात्रा अउ पंद्रह सितंबर के जशपुर ले निकाले गे दूसरा परिवर्तन यात्रा काली बिलासपुर पहुंचही, जिहंा समापन होही।
पीएम-स्वच्छता अभियान
प्रधानमंत्री नरेंद्र मोदी ह कहिन हे कि राष्ट्र एक अक्टूबर के बीहनिया दस बजे स्वच्छता पहल शुरू करही। श्री मोदी ह सोशल मीडिया पोस्ट म कहिन कि स्वच्छ भारत एक साझा जिम्मेदारी हरय अउ एखर बर हरएक मनखे ल प्रयास करना चाही। ओमन जम्मों झनले स्वच्छ भविष्य बर ए प्रयास म शामिल होय के आह्वान करत कीहिन कि ए दिन सबो मन बीहनिया दस बजे एक घंटा स्वच्छता बर श्रमदान जरूर करंय।
ए मउका म छत्तीसगढ़ के आने-आने जिला मन म घलो लोगन मन डहार ले श्रमदान करके स्वच्छता अभियान चलाय जाही। इही, कड़ी म राजनांदगांव जिला मुख्यालय के जम्मों इंक्यावन वार्ड मन म बिहनिया दस बजे ले स्वच्छता अभियान चलाय जाही। उहें, दूसरा दिन राष्ट्रपिता महात्मा गांधी के जयंती के मउका म नगर-निगम सभा गृह म स्वच्छता के क्षेत्र म अच्छा काम करईया वाला मन के सम्मान करे जाही।
पीएम संकल्प सप्ताह
प्रधानमंत्री नरेंद्र मोदी काली नई दिल्ली म देश के आंकाक्षी ब्लॉक मन बर हप्ता भर चलइया विशेष कार्यक्रम के शुरूआत करही। ए कार्यक्रम ल संकल्प सप्ताह के नाम दे गेहे। ए आंकाक्षी ब्लॉक कार्यक्रम के प्रभावशाली क्रियान्वयन ले जुड़े हे जेखर उद्देश्य नागरिक मनके जीवन के गुणवत्ता बढ़ाय बर ब्लॉक स्तर म शासन म सुधार करना हे। राजधानी के भारत मंडपम म देशभर के पंचायत अउ ब्लॉक स्तर के करीबन तीन हजार प्रतिनिधि ए कार्यक्रम म हिस्सा लीही। एखर अलावा ब्लॉक अउ पंचायत स्तर के कार्यकर्ता किसान अउ दूसर वर्ग समेत लगभग दू लाख लोगन मन कार्यक्रम म वर्चुअल माध्यम ले शामिल होही।
बतादन कि संकल्प सप्ताह तीन ले नौ अक्टूबर तक देश के तीन सौ उनतीस जिला के पांच सौ आकांक्षी ब्लॉक मन म मनाये जाही। ये सप्ताह के हरएक दिन ह अलग-अलग विषय मन बर समर्पित होही, जेखर उपर जम्मों आकांक्षी ब्लॉक काम करही। पहिली छै दिन के थीम म संपूर्ण स्वास्थ्य, सुपोषित परिवार, स्वच्छता, कृषि, शिक्षा अउ समृद्धि दिवस शामिल हरय। सप्ताह के अंतिम दिन नौ अक्टूबर ल पूरा हप्ता के काम मन ल संकल्प सप्ताह समावेश समारोह के रूप म मनाये जाही।
अमित शाह-बैठक
केन्द्रीय गृह मंत्री अमित शाह ह काली रइपुर स्थित भाजपा के प्रदेस कार्यालय कुशाभाऊ ठाकरे परिसर म पार्टी के वरिष्ठ पदाधिकारी मन के बइठका लीन। पार्टी के राष्ट्रीय अध्यक्ष जेपी नड्डा अउ राष्ट्रीय संगठन महासचिव बी.एल. संतोष के उपस्थिति म आयोजित बइठका म अवइया विधानसभा चुनाव ल लेके चर्चा करे गीस। उहें, पार्टी के शेष उनहत्तर विधानसभा सीट म उम्मीदवार मनके चयन ल लेके घलो मंथन करे गीस।
बतादन कि भाजपा प्रदेस के इक्कीस विधानसभा सीट बर अपन उम्मीदवार मनके घोषणा पहिली कर चुके हे।
महिला समूह-ऋण
प्रदेस के महिला मन ल आर्थिक रूप ले सशक्त बनाय बर छत्तीसगढ़ महिला कोष के योजना मन म संसोधन करे गेहे। एखर अनुसार महिला समूह मन ल ऋण योजना के तहत अब अधिकतम छै लाख रूपिया तक के ऋण दे जाही। उहें, सक्षम योजना म ऋण लेके पात्रता के शर्त मन ल शिथिल करे गेहे। एखर तहत परिवार के जघा अब महिला के वार्षिक आय ले पात्रता के निर्धारण करे जाही। ए संबंध म राज्य सरकार ह आदेस जारी कर दे हे।
बतादन कि मुख्यमंत्री भूपेश बघेल ह पाछू दू मई के रइपुर म राखे गे आंगन बाड़ी कार्यकर्ता, सहायिका अउ मितानिन मन के आभार सम्मेलन म महिला समूह मन ल छै लाख रूपिया तक के ऋण दे बर अउ एखर बर पात्रता शर्त मन ल सरल करे के घोषणा करे रिहीन।
ट्रेन-रद्द
दक्षिण पूर्व रेलवे के चक्रधरपुर रेल मंडल के अंतर्गत राउरकेला स्टेसन यार्ड के आधुनिकीकरण अउ तीसरा रेल लाइन ल जोड़े के काम करे जाही। एखर सेति कुछेक ट्रेन मन के परिचालन आज ले सत्रह अक्टूबर तक प्रभावित रिही। रेल प्रसासन ले मिले जानकारी के अनुसार बारह ले सोलह अक्टूबर के बीच, अठ्ठारा यात्री गाड़ी मनके परिचालन एक-एक दिन बर रद्द करे गे हे। उहें, आज ले सत्रह अक्टूबर तक बारह ठिन ट्रेन के परिचालन दू-दू दिन बर रद्द करे गेहे। अइसने तीन गाड़ी मनके परिचालन तीन दिन बर अउ चार ट्रेन के परिचालन चार दिन बर रद्द करे गेहे। एखर अलावा उन्तीस सितंबर ले पन्द्रह अक्टूबर तक पुरी ले चलने वाला पुरी-योगनगरी ऋषिकेश उत्कल एक्सप्रेस ईब-झारसुगुड़ा-सम्बलपुर-वेरसा ले होके चलही।
अंतर्राष्ट्रीय वृध्दजन दिवस
अंतर्राष्ट्रीय वृध्दजन दिवस के मउका म एक अक्टूबर के प्रदेस के सबो जिला समेत राजधानी रइपुर म सियान मन के सुरक्षा, संरक्षण अउ सम्मान के प्रति जागरूकता लाए बर कई ठिन कारीकरम आयोजित करे जाही। ए संबंध म समाज कल्याण विभाग डहार ले जम्मों कलेक्टर मन ल निरदेस जारी करे गेहे।
बातों-बातों-में
अउ अब पेस हे मौसम के हाल…
दक्षिण-पश्चिम मानसून के अवईया तीन दिन म उत्तर-पश्चिम भारत अउ ओखर ले लगे पश्चिम-मध्य भारत के कुछेक जघा मन म मानसून के विदाई बर अनुकूल परिस्थिति बने हुए हे।
मौसम विभाग ले मिले जानकारी के अनुसार एक निम्नदाब के क्षेत्र बंगाल के खाड़ी उपर स्थित हे। उहें, उपरी हवा के एक चक्रीय चक्रवाती घेरा बने हुए हे। एखर असर ले प्रदेस म काली अधिकांश जघा मन म हल्का ले मध्यम बरसा होय या गरज-चमक के संग छींटा पड़े के संभावना हे। उहें, एक दू जघा मन म गरज-चमक के संग गाज गिरे के घलो आशंका बताय गेहे।
अउ अब थोरकुन समाचार सार म-
– राज्यपाल विश्वभूषण हरिचंदन ह ए.ए.एफ.टी.यूनिवर्सिटी ऑफ मीडिया एंड आर्ट्स, माठ, रइपुर म कुलपति नियुक्ति बर पेनल अनुशंसित करे बर खोजबीन समिति के गठन करीन हे।
– दिल्ली स्थित एक ज्वेलर्स दुकान म चोरी के मामला म पुलिस ह भिलाई अउ कवर्धा ले दू झिन आरोपी ल गिरफ्तार करे हे। एमन करा ले चोरी करे के पच्चीस करोड़ रूपिया ले जादा के सोना अउ हीरा के गहना के संगेसंग पांच लाख रूपिया नगद बरामद करे गेहे।
अउ
– छत्तीसगढ़ कांग्रेस कमेटी डहार ले राष्ट्रपिता महात्मा गंाधी के जयंती के मउका म दू अक्टूबर के भरोसा यात्रा निकाले जाही। ए यात्रा के माध्यम ले पार्टी कार्यकर्ता प्रदेस के जम्मों नब्बे विधानसभा क्षेत्र के गांव मन म जाके लोगन मन ल राज्य सरकार डहार ले चलाय जावत योजना के जानकारी दीही।