बलौदाबाजार-भाटापारा जिला के सुआभाठा गांव म आज कृषक सह-श्रमिक सम्मेलन के आयोजन करे गीस। सम्मेलन म राज्यसभा म नेता प्रतिपक्ष मल्लिकार्जुन खड़गे अउ मुख्यमंत्री भूपेश बघेल ह जिला म दू सौ छियासठ करोड़ रूपिया के कई ठिन विकास काम के लोकार्पण अउ भूमिपूजन करीन। ए दउरान राजीव गांधी किसान न्याय योजना के चलत प्रदेस के साढ़े चौबीस लाख ले जादा किसान मनके बैंक खाता म एक हजार आठ सौ पंचानवे करोड़ रूपिया के रासि जारी करे गीस। उहें, श्री खड़गे अउ श्री बघेल ह मुख्यमंत्री निर्माण श्रमिक पेंशन सहायता योजना के सुभारंभ घलो करीन। ए योजना के चलत दस साल तक रजिस्टर्ड रेहे अउ साठ बछर के उमर पूरा करइया श्रमिक यानि कमिया मन ल जीवनभर पन्द्रह सौ रूपिया मासिक पेंसन सहायता दे जाही। सम्मेलन म एक लाख ले जादा हितग्राही मन ल आने-आने योजना के तहत पचपन करोड़ छिहत्तर लाख रूपिया ले जादा के रासि के वितरण करे गीस।
सम्मेलन ल संबोधित करत श्री खड़गे ह किहीन कि आने-आने योजना अउ कारीकरम ल जनता तक पहुंचार बर छत्तीसगढ़ सरकार ह बहुत बढ़िया काम करत हे। ओमन हरित क्रांति के जनक डॉक्टर स्वामीनाथन के योगदान ल सुरता करत ओमन ल श्रद्धांजलि दीन।
उहें, मुख्यमंत्री ह आने-आने योजना के जिकर करत किहीन कि राज्य सरकार ह संस्कृति अउ सभ्यता ल सहेजे के संगेसंग हर वर्ग के हित म फइसला लेहे अउ योजना लागू करे हे।
डॉक्टर स्वामीनाथन-निधन
नामी कृषि वैज्ञानिक अउ हरित क्रांति के जनक डॉक्टर एम.एस. स्वामीनाथन के आज चेन्नई म निधन होगे। ओमन अंठानवे बछर के रिहीन। डॉक्टर स्वामीनाथन ह अपन नीति मनके माध्यम ले सामाजिक क्रांति लाके उन्नीस सौ साठ के दसक म भारत ल दुकाल असन स्थिति ले बचाय रिहीन। उंखर परयास ले भारत म हरित क्रांति अइस। उनला पद्मश्री, पद्मभूषण अउ पद्मविभूषण ले घलो सम्मानित करे गे रिहीस।
प्रधानमंत्री नरेन्द्र मोदी अउ छत्तीसगढ़ के मुख्यमंत्री भूपेश बघेल ह डॉक्टर स्वामीनाथन के निधन म दुख व्यक्त करीन हे।
कांग्रेस-भरोसा यात्रा
प्रदेस कांग्रेस कमेटी ह राष्ट्रपिता महात्मा गांधी के जयंती के मउका म दू अक्टूबर के भरोसा यात्रा निकालही। विधानसभा स्तर वाले ए यात्रा के माध्यम ले कांग्रेस कार्यकर्ता मन सबो नब्बे ठिन विधानसभा क्षेत्र म पहुंच के सरकार के कई ठिन योजना मनके जानकारी लोगन मन दीहीं। यात्रा दउरान नुक्कड़ सभा अउ जनसभा घलो राखे जाही।
मुख्यमंत्री भूपेश बघेल राजनांदगांव म ए यात्रा के अगुवई करही। उहें, उप मुख्यमंत्री टी.एस. सिंहदेव सरगुजा अउ रायगढ़ म, प्रदेस कांग्रेस अध्यक्ष दीपक बैज बस्तर अउ कांकेर म, गृहमंत्री ताम्रध्वज साहू दुरूग अउ बिलासपुर म, विधानसभा अध्यक्ष डॉक्टर चरणदास महंत ह कोरबा अउ जांजगीर म अउ नगरीय प्रशासन मंत्री डॉक्टर शिवकुमार डहरिया ह रईपुर अउ महासमुंद लोकसभा क्षेत्र म ए यात्रा के अगुवई करही।
स्वच्छता ही सेवा
महात्मा गांधी के जयंती के मउका म प्रदेस के सबों जिला मन म स्वच्छता ही सेवा कारीकरम के तहत श्रमदान करे जावत हे। इही कड़ी म बलरामपुर जिला के सबो ग्राम पंचायत मन म एक अक्टूबर के श्रमदान करे जाही। ए बारे म जिला कलेक्टर के पगरइति म राखे गे बइठका म अवइया विधानसभा चुनाव के तहत जिला म चलत तैयारी के समीक्षा घलो करे गीस।
मीडिया प्रमाणन-समिति
छत्तीसगढ़ म अवइया विधानसभा चुनाव बर राज्य स्तरीय मीडिया प्रमाणन अउ अनवीक्षण समिति के गठन करे गेहे। मुख्य निर्वाचन पदाधिकारी रीना बाबा साहेब कंगाले के पगरइति म सात सदस्यीय वाले ए समिति म संयुक्त मुख्य निर्वाचन पदाधिकारी नीलेशकुमार महादेव क्षीरसागर ल समिति के सदस्य-सचिव बनाय गेहे। संगे पत्र सूचना कार्यालय-पीआईबी रायपुर के उप निदेशक रमेश जयभाये ल सदस्य रूप म सामिल करे गेहे। ए समिति ह विज्ञापन मनके प्रमाणन बारे म जिला अउ अपर-संयुक्त मुख्य निर्वाचन पदाधिकारी ले मिले अपील उपर निर्णय लीही।
डिप्लोमा कोर्स-स्थगित
इंदिरा कला अउ संगीत विश्वविद्यालय के रईपुर स्थित ऑफ कैंपस स्टडी सेंटर म प्रस्तावित पांच ठिन डिप्लोमा कोर्स ल स्थगित कर दे गेहे। खैरागढ़ विधायक यशोदा वर्मा ह मुख्यमंत्री भूपेश बघेल ले भेंट करके जानकारी दे रिहीन कि खैरागढ़ के रहवइया मन रईपुर म डिप्लोमा कोर्स सुरू करे जाय के निर्णय ले संतुष्ट नइ हे। एखर बाद मुख्यमंत्री ह ए कोर्स ल स्थगित करे के निर्णय लीन।
आश्वासन मानक प्रमाण पत्र
केन्द्रीय स्वास्थ्य मंत्रालय ह गुणवत्तापूर्ण स्वास्थ्य सेवा बर छत्तीसगढ़ के तीन ठिन स्वास्थ्य केन्द्र ल राष्ट्रीय गुणवत्ता आश्वासन मानक प्रमाण पत्र देहे। एमा कांकेर जिला के कोटरा अउ बलौदाबाजार-भाटापारा जिला के हथबंद प्राथमिक स्वास्थ्य केन्द्र अउ महासमुंद जिला के कौंसरा हेल्थ एंड वेलनेस सेंटर सामिल हे। केन्द्रीय स्वास्थ्य मंत्रालय के टीम ह हाले म ए अस्पताल के सेवा के मूल्यांकन करे रिहीन। ओमन ए संबंध म मरीज मन ले फीडबैक घलो ले रिहीन।
आयुष्मान भव अभियान
केन्द्र सरकार के आयुष्मान भव अभियान के तहत छत्तीसगढ़ के सामुदायिक स्वास्थ्य केन्द्र अउ हेल्थ एंड वेलनेस सेंटर म हर हफ्ता स्वास्थ्य मेला के आयोजन करे जावत हे। एमा बड़ संख्या म लोगन मन पहुंच के स्वास्थ्य ले जुड़े सलाह लेके संगे इलाज पानी घलो करवायत हे। स्वास्थ्य मेला मन म आयुष्मान कार्ड बनाय के संगे लोगन मन ल अंगदान अउ रक्तदान करे बर प्रेरित करे जात हे।
राष्ट्रीय स्वास्थ्य मिशन के संचालक भोसकर विलास संदीपान ह बतईन कि तेरह सितंबर ले सुरू होय आयुष्मान भव के चलत राज्य म अब तक ले छह हजार सात सौ ले जादा स्वास्थ्य मेला राखे जा चुके हे, जेखर फायदा चार लाख सत्यासी हजार ले जादा लोगन मन उठाय हे। उहें, ए दउरान करीबन तेईस सौ आयुष्मान कार्ड बनाय गेहे। ए अभियान के चलत अब तक ले तीन सौ इक्कीस लोगन मन अपन इच्छा ले अंगदान करे बर रजिस्ट्रेसन कराय हे। ए अभियान इकतीस दिसंबर तक चलही।
अनन्त चतुर्दशी
अनन्त चतुर्दशी के संगे आज ले नान्हें गणेश मूर्ति ल ठंडा करना सुरू होगे हे। श्रद्धालु मन पूजापाठ के संगे गणेश भगवान ल बिदा करत हे। प्रदेस के कई ठिन जघा म आज हुमन के संगे भंडारा घलो होवत हे। मूर्ति मनके विसर्जन ल लेके रईपुर नगर-निगम ह खारून नदी म विसर्जन कुंड के व्यवस्था राखे हे। संगे एखर निगरानी बर एक ठिन टीम घलो बनाय गेहे।
राजधानी रईपुर म बड़े मूर्ति के विसर्जन झांकी मनके संगे तीस सितंबर के होही। ए बखत सहर म पचास ठिन ले जादा झांकी निकाले जाही। झांकी ल लेके जिला अउ पुलिस प्रसासन ह जरूरी व्यवस्था के तैयारी सुरू कर देहे। उहें, छह सौ ले जादा पुलिसकर्मी मनके टीम एमा तैनात रइही। जउन रद्दा ले झांकी ह नहाकही उंखर तीर-तखार के रद्दा मन म बैरीकेटिंग करे जाही।
ईद-मिलाद-उन-नबी
इस्लाम धर्म के संस्थापक पैगम्बर हजरत मोहम्मद के जन्मदिवस ईद-मिलाद-उन-नबी आज छत्तीसगढ़ समेत देसभर म पारंपरिक हर्षोल्लास ले मनाय जावत हे। राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेन्द्र मोदी अउ छत्तीसगढ़ के मुख्यमंत्री भूपेश बघेल ह ईद-मिलाद-उन-नबी के मउका म देसवासी मन ल सुभकामना दीन।
ए मउका म रईपुर म मुस्लिम समाज ह जुलूसे मोहम्मदी निकालीस। सर्व आस्था मंच ह जयस्तंभ चउक म मंच बनाके जुलूस के अगवानी करीस।
ओति, जगलदपुर म घलो जुलूस निकाले गीस, जउन ह कई ठिन रद्दा ले होवत जामा मस्जिद पहुंचीस, जिहां परचम कुशाई के रस्म होइस।
सरोधा-दादर/पुरस्कार
कबीरधाम जिला के सरोधा-दादर गांव ल राष्ट्रीय स्तर म रजत श्रेणी म सर्वश्रेष्ठ पर्यटन गांव के पुरस्कार दे गेहे। सरोधा-दादर ल देसभर के सात सौ पंचानवे पर्यटन गांव के प्रतियोगिता म कई ठिन मापदंड के आधार ले सर्वश्रेष्ठ ग्राम के रूप म चुने गीस। परयटन दिवस के मउका म नई दिल्ली म होय समारोह म सरोधा-दादर गांव के मंगल सिंह धु्रर्वे ह ए पुरस्कार झोंकीन। ए उपलब्धि बर मुख्यमंत्री भूपेश बघेल अउ परयटन मंत्री ताम्रध्वज साहू ह बधाई दीन हे।
अउ अब पेस हे मौसम के हाल…
प्रदेस म काली ले मानसून के सक्रियता एक घांव फेर बाढ़ सकत हे। मौसम विज्ञानी एच.पी. चन्द्रा ह बतईन कि काली प्रदेस म कई ठिन जघा म थोरकुन ले जादा पानी गिर सकत हे या फेर गाज गिरे के संगे सीटिर-साटर पानी गिर सकत हे। श्री चन्द्रा ह बतईन कि प्रदेस म मानसून के बिदाई बारह अक्टूबर के आसपास हो सकत हे।