मुख्यमंत्री ह आज प्रदेस म सोलह ठिन विभाग मन के चार हजार चार सौ इकहत्तर करोड़ रूपिया के लागत ले बनइया सत्ताईस सौ ले जादा विकास काम के वर्चुअल रूप ले लोकार्पण अउ भूमिपूजन करीन। ए मउका म मुख्यमंत्री ह नई दिल्ली के द्वारका म साठ करोड़ चालीस लाख के लागत ले बने छत्तीसगढ़ निवास के सुभारंभ करीन। ए मउका म उप मुख्यमंत्री टी.एस. सिंहदेव ह घलो वर्चुअल रूप ले जुड़िन।
मुख्यमंत्री भूपेश बघेल ह आज रइपुर म एक हजार इक्कीस करोड़ रूपिया ले जादा के लागत ले बनइया बिकास काम के भूमिपूजन करीन। ए काम म सहर के शारदा चौक ले तात्यापारा चौक तक सड़क चौड़ीकरण, रिंगरोड क्रमांक-1 अउ तेलीबांधा चौक ले अग्रसेन धाम चौक लाभांडी तक सिक्स-लेन फ्लाई ओवर ब्रिज, महादेव घाट अउ चंदनडीह म खारून रिवर फ्रंट के संग एक्सप्रेस-वे, टेमरी ले माना वीआईपी रद्दा उपर ऐलिवेटेड कॉरिडोर अउ एयरपोर्ट ल जोड़इया रद्दा ल सिक्सलेन बनाय के काम सामिल हे।
छत्तीसगढ़िया ओलंपिक-समापन
छत्तीसगढ़िया ओलंपिक के आज समापन होगे। रइपुर के इंडोर स्टेडियम म होय समापन कारीकरम म मुख्यमंत्री ह विजेता खिलाड़ी अउ टीम ल ईनाम दीन। पच्चीस सितंबर ले सुरू होय राज्य स्तरीय छत्तीसगढ़िया ओलंपिक म प्रदेस के पांच संभाग ले उन्नीस सौ ले जादा खिलाड़ी मन ह भाग लीन। ए प्रतियोगिता म फुगड़ी, बिल्लस, रस्सी कूद अउ कब्बड्डी जइसन सोलह ठिन पारंपरिक खेल ल घलो सामिल करे गे रिहीस।
ए मउका म मुख्यमंत्री ह रइपुर के लाभांडी म बनाय गे, टेनिस अकादमी के लोकार्पण घलो करीन। एला करीबन अठ्ठारा करोड़ रूपिया के लागत ले बनाय गेहे। इंहा, प्रसासनिक भवन अउ खिलाड़ी मन बर छात्रावास के सुविधा घलो हवय।
मुख्यमंत्री-एथेनॉल संयंत्र
कबीरधाम जिला म प्रदेस के गन्ना आधारित सबले बड़े अउ पहिली एथेनॉल संयंत्र के स्थापना करे गेहे। मुख्यमंत्री ह काली रइपुर के अपन निवास कार्यालय ले वीडियो कॉन्फ्रेंसिंग के माध्यम ले एक सौ इकचालीस करोड़ रूपिया के लागत ले बनाय गे ए संयंत्र के लोकार्पण करीन ए संयंत्र ह भोरमदेव सहकारी शक्कर कारखाना के पैंतीस एकड़ भुईयां म पी.पी.पी. मॉडल ले बनाय गेहे। ओमन किहीन कि किसान मन ल गन्ना बेचे के पैसा बेरा म दे जाही। कारीकरम म वन अउ जलवायु परिवर्तन मंत्री मोहम्मद अकबर ह घलो आए रिहीन।
भोरमदेव सहकारी शक्कर कारखाना के एमडी भूपेन्द्र ठाकुर ह बतइन कि एथेनॉल प्लांट हाईब्रीड टेक्नोलॉजी ले बनाय गेहे। जेमा गन्ना पेराय सीजन के दौरान सोझे गन्ना के रस ल मोलसीस ले एथेनॉल बनाय जाही।
निर्भया कमांड सेंटर
छत्तीसगढ़ म यात्री बस मन म माईलोगिन अउ स्कूल बस म छात्र मनके सुरक्षा बर मुख्यमंत्री ह आज निर्भया कमंाड अउ कंट्रोल सेंटर के रायपुर ले वर्चुअल शुभारंभ करीन। एमा निर्भया फ्रेमवर्क के तहत जम्मों स्कूल बस मन म पैनिक बटन लगाय जाही। बस म कोनो प्रकार के दुर्घटना या फेर छेड़छाड़ होय उपर पैनिक बटन ल दबातेच तुरते निर्भया कमंाड सेंटर अउ पुलिस विभाग ल सूचना मिल जाही।
चिटफंड कंपनी-रकम वापसी
मुख्यमंत्री ह चिटफंड कंपनी म निवेस करइया कोरिया अउ बेमेतरा जिला के एक सौ बाइस झिन निवेसक मन के अड़तीस लाख चालीस हजार रूपिया ले जादा के पैसा लहूटाय हे। मुख्यमंत्री ह काली रइपुर स्थित अपन निवास कार्यालय ले ए कारीकरम म वर्चुअल रूप ले सामिल होइन। ओमन किहीन कि चिटफंड कंपनी के निवेसक मन के पैसा ल लहूटाय के काम आगू घलो करे जाही।
भाजपा-परिवर्तन यात्रा
भाजपा डहार ले जशपुर ले सुरू होय दूसर परिवर्तन यात्रा आज तखतपुर पहुंचीस। ए यात्रा के जघा-जघा स्वागत के संगेसंग तखतपुर म राखे गे आमसभा ल दिल्ली के सांसद मनोज तिवारी, भाजपा के प्रदेस अध्यक्ष अरूण साव अउ नेता प्रतिपक्ष नारायण चंदेल के संग आने बड़का नेता मन संबोधित करीन।
त उहें, दंतेवाड़ा ले सुरू होय पहिली परिवर्तन यात्रा पचास ठिन विधानसभा क्षेत्र के दउरा करे के बाद काली रइपुर पहुंचीस। सहर म अस्सी ले जादा जघा म ए यात्रा के स्वागत करे गीस। ए मउका म पार्टी के प्रदेस अध्यक्ष अरूण साव, पूर्व मंत्री बृजमोहन अग्रवाल अउ सांसद सुनील सोनी के संगेसंग आने बड़का नेता मन सामिल होइन।
रइपुर आय के पहिली परिवर्तन यात्रा धरसींवा विधानसभा क्षेत्र म घलो पहुंचिन जिहां आमसभा म केंद्रीय वित्त राज्य मंत्री डॉक्टर भगवत किशनराव कराड़ सामिल होइन। ओमन राज्य सरकार उपर सराब बंदी के संगेसंग वादा खिलाफी के आरोप लगइन। ओमन किहीन कि प्रदेस के सोलह लाख लोगन मन ल राज्य सरकार ह प्रधानमंत्री आवास योजना के लाभ ले रोक दे हे।
अंशकालिक संवाददाता-आवेदन
आकाशवाणी समाचार रइपुर डहार ले छत्तीसगढ़ के सात जिला रइपुर, सक्ति, सारंगढ-बिलाईगढ़, मोहला-मानपुर-अंबागढ़ चौकी, मनेन्द्रगढ़-चिरमिरी-भरतपुर, खैरागढ़-छुईखदान-गंडई अउ गौरेला-पेण्ड्रा-मरवाही म अनुबंध के आधार ले अंशकालिक संवाददाता बर अर्जी मंगाय गेहे। अर्जी करइया मन प्रपत्र समाचार सेवा प्रभाग के वेबसाइट- डब्ल्यू डब्ल्यू डब्ल्यू डॉट न्यूज ऑन एआईआर डॉट जीओवी डॉट इन के वैकेेंसी सेक्शन अउ आकाशवाणी समाचार रइपुर के ट्विटर हैंडल-सीजी एआईआर न्यूज ले घलो डाउनलोड कर सकथे। अर्जी ल पूरा भर के बारह अक्टूबर तक रजिस्टर्ड पोस्ट या फेर स्पीड पोस्ट के माध्यम ले रइपुर के सिविल लाइन स्थित आकाशवाणी केंद्र उप महानिदेशक सह केन्द्राध्यक्ष के नांव ले भेज सकथे।
अर्जी करइया मन के उमर चौबीस ले पैंतालीस साल के बीच होना चाही अउ पत्रकारिता या जनसंचार म स्नात्तकोत्तर डिग्री या फेर डिप्लोमा के संगेसंग कोनो भी बिषय म स्नातक के संगेसंग पत्रकारिता के क्षेत्र म दू साल के अनुभव होना चाही। एखर अलावा अर्जी करइया मन ल जिला के मुख्यालय या नगर -निगम के सीमा ले दस किलोमीटर के दायरा म होना चाही। राज्य, केंद्र सरकार या सार्वजनिक क्षेत्र के कर्मचारी अउ राजनीतिक दल के सदस्य मन ह एमा अर्जी नइ कर सकय।
फोर्टिफाइड चावल-वेबीनार
इंदिरा गांधी कृषि विश्वविद्यालय के कुलपति डॉक्टर गिरीश चंदेल ह किहीन हे कि प्रदेस म सार्वजनिक वितरण प्रणाली के तहत आयरन, फोलिक एसिड अउ विटामिन बी-12 फोर्टिफाइड चउंर बांटे ले पोषण के गुणवत्ता म अब्बड़ सुधार आय हे। रइपुर म विश्व खाद्य कारीकरम के मदद ले ‘‘चावल के फोर्टिफिकेशन के महत्व‘‘ बिषय उपर राखे गे एक दिन के वेबीनार ल संबोधित करत डॉक्टर चंदेल ह पोषण वाले चउंर के परयोग बर आम लोगन मन ल जागरूक करे के जरूरत बतइन।
जानबा के मुताबिक केंद्र सरकार डहार ले पुष्टई वाले खाद्यान्न बांटे के योजना के तहत प्रदेस म तेरह हजार रासन दुकान के माध्यम ले छै लाख टन फोर्टिफाइड चउंर दे जात हे।
स्वच्छता पखवाड़ा
सूचना अउ प्रसारण मंत्रालय के केंद्रीय संचार ब्यूरो क्षेत्रीय कार्यालय जगदलपुर डहार ले आज बस्तर जिला के आसना अउ बोरपदर गांव म स्वच्छता ही सेवा उपर जागरूकता कारीकरम राखे गीस। ए मउका म केंद्रीय संचार ब्यूरो के अधिकारी बी.एस. ध्रुव ह लोगन मन ल स्वच्छ भारत अभियान ल सफल बनाय के सपथ देवइन। ए मउका म एनसीसी कैडेट्स, एनएसएस अउ स्कूली लइका मन ह साफ-सफाई करके अभियान ल सफल बनइन।
अउ अब थोरकुन समाचार सार म-
– आज विश्व पर्यटन दिवस हे। पर्यटन ल बढ़ावा देबर हर साल सत्ताईस सितंबर के ए दिन ल मनाये जाथे। एसो के विषय हे-पर्यटन और हरित निवेश।
– राजनंादगंाव जिला म नौकरी देवाय के नाव म करीबन पंद्रह लाख रूपिया के ठगी करे के मामला आगू आय हे।
अउ
– कोरबा जिला के सोनपुरी गांव म आज बीहनिया गाज के चपेट म आय ले छै ठिन जानवर के मउत होगे।