प्रधानमंत्री नरेंद्र मोदी ह आज वीडियो कॉन्फ्रेंस के माध्यम ले रोजगार मेला के तहत करीबन 51 हजार चयनित युवा मन ल नियुक्ति पत्र सौंपे हे। ए मउका म श्री मोदी ह कहिन कि रोजगार मेला युवा मन ल सशक्त बनाये अउ देश के विकास म उंखर सक्रिय भागीदारी बर सरकार के समर्पित कोसिस के एक रूप आय।
प्रधानमंत्री ह कहिन हे कि आज कई झिन माइलोगिन मन ल घलो नियुक्ति पत्र मिलिस जउन जम्मों बर प्रेरणा के विषय हे। ओमन कहिन कि रोजगार मेला रोजगार सृजन ल प्राथमिकता देके प्रधानमंत्री के वादा ल पूरा करे के दिशा म एक कदम हे।
इही कार्यक्रम के तहत आज रायपुर म एम्स के सभागार म नौवंा रोजगार मेला के आयोजन करे गीस। ए मउका म केंद्रीय जनजातीय कार्य राज्यमंत्री रेणुका सिंह ह 228 चुने गे अभ्यर्थी मन ल नियुक्ति पत्र दीन। ये अभ्यर्थी मनके चुनई डाक विभाग, भारतीय खाद्य निगम, केंद्रीय विद्यालय, भू-गर्भ सर्वेक्षण संस्थान समेत आने आने विभाग म होय हे। कार्यक्रम ल संबोधित करत केंद्रीय राज्य मंत्री ह कहिन हे कि अमृतकाल म देश ल विकसित राष्ट्र बनाय म ए युवा मनके भूमिका महत्वपूर्ण होही। ओमन चुने गे अभ्यर्थी मन ल आह्वान करीन हे कि ओमन सरकारी नौकरी ल सिरिफ जीवनयापन के साधन मात्र मत समझे, बल्कि एला समाज सेवा अउ देश सेवा के एक माध्यम मानय। केंद्रीय राज्यमंत्री ह कहिन हे कि एनडीए सरकार के पाछू करीबन नौ बछर के कार्यकाल म जम्मों विभाग मन म नियुक्ति पारदर्शी तरीका ले होवत हे। ओमन कहिन कि केंद्र सरकार ह जम्मों मंत्रालय अउ विभाग म खाली पद मन ल भरे के लक्ष्य राखे हे। कार्यक्रम म छत्तीसगढ़ परिक्षेत्र के मुख्य पोस्ट मास्टर जनरल वीणा श्रीनिवास समेत डाक विभाग के आने आने बड़का अधिकारी मौजूद रीहिन।
कैबिनेट-फैसला-01
प्रदेस म ए बछर समर्थन मूल्य म हरेक एकड़ पाछू बीस क्विंटल धान के खरीदी करे जाही। उहें, मक्का के खरीदी बर एक एकड़ म दस क्विंटल के सीमा तय करे गेहे। ए फैसला मुख्यमंत्री भूपेश बघेल के पगरइती म आज उंखर निवास कार्यालय म होय राज्य मंत्रिपरिषद के बइठका म ले गीस। बइठका म चालू खरीफ मौसम बर समर्थन मूल्य म धान अउ मक्का के खरीदी के संग कस्टम मिलिंग के नीति के निर्धारण घलो करे गीस। एखर तहत केन्द्र सरकार डहार ले घोषित समर्थन मूल्य के मुताबिक धान अउ मक्का के खरीदी अवइया एक नवम्बर ले 31 जनवरी 2024 तक करे जाही। उहें, मक्का खरीदी एक नवम्बर ले 28 फरवरी 2024 तक करे जाही। चालू खरीफ मौसम म राज्य सहकारी विपणन संघ- मार्कफेड ल धान खरीदी बर चौदह हजार सात सौ करोड़ रूपिया के सरकारी गारंटी के वैद्यता 31 अक्टूबर 2024 तक बढ़ाय के फैसला घलो ले गेहे।
केैबिनेट डहार ले गे एक आने फैसला के तहत पत्रकार मन ल नगर विकास योजना के तहत कौशल्या माता विहार म घर खरीदे बर राज्य शासन कोति ले पन्द्रह प्रतिसत छूट दे के फैसला के अनुमोदन करे गेहे। ए योजना म 309 पत्रकार मन ल दे जाने वाले छूट के एवज म रइपुर विकास प्राधिकरण ल करीबन साढ़े छै करोड़ के मंजूरी दे गेहे।
राज्य मंत्रिपरिषद ह डूण्डा, सेजबहार अउ बोरियाकला म न्यू स्वागत विहार योजना के मंजूरी के ले ऑउट ल निरस्त करत जम्मों प्रभावित मनखे मन ल प्लाट देवाय के फैसला ले हे। मंत्रिपरिषद के एक ठिन आने फैसला के मुताबिक नवा रइपुर अटल नगर म प्रस्तावित थोक व्यवसायिक बाजार म व्यापारी मन ल 945 रूपिया के बदला अब 540 रूपिया हरेक वर्गफीट के कीमत ले जमीन दे जाही।
कैबिनेट-फैसला-02
कैबिनेट ह जनसंपर्क विभाग म अपर संचालक के 3 ठन नवा पद ल अपन मंजूरी दे हे। इही कड़ी म छत्तीसगढ़ राज्य हिन्दी गं्रथ अकादमी म बड़का पत्रकार सुदीप ठाकुर ल संचालक के पद म संविदा नियुक्ति दे के घलो फैसला ले गेहे।
उहें, बलरामपुर-रामानुजगंध जिला के श्रीकोट म चलत श्री रामेश्वर गहरा गुरू प्राच्य संस्कृत महाविद्यालय ल सौ प्रतिसत अनुदान दे के फैसला घलो बइठका म ले गीस।
परिवर्तन यात्रा
भारतीय जनता पार्टी डहार ले जशपुर ले शुरू होय दूसर परिवर्तन यात्रा आज सीपत अउ बेलतरा पहुंचीस, जिहां पार्टी के पदाधिकारी अउ कार्यकर्ता मन ए यात्रा के स्वागत करीन। उंहा केंद्रीय विदेश संस्कृति राज्यमंत्री मीनाक्षी लेखी ह आमसभा ल संबोधित करीन। ए आमसभा म नेता प्रतिपक्ष नारायण चंदेल, रजनीश सिंह, धरमजीत सिंह, अमर अग्रवाल अउ कृष्णमूर्ति बांधी सहित पार्टी के बड़का नेता मन मौजूद रीहिन।
उंहे दंतेवाड़ा ले शुरू होय परिवर्तन यात्रा आज भाटापारा पहुंचीस। इंहा पार्टी के प्रदेश अध्यक्ष अरूण साव ह प्रेस वार्ता ल संबोधित करीन। श्री साव ह कहिन कि ए यात्रा म पार्टी ल जनता के बने समर्थन मिलत हे। ओमन कहिन कि भाजपा ह यात्रा के दउरान लोगन मन ल छत्तीसगढ़ म भ्रष्टाचार-मुक्त शासन देके वादा करे के संगेसंग किसान मन ल समृद्धि अउ माइलोगिन मनल सुरक्षा के वचन घलो पार्टी ह लोगन मन ल देहे। प्रेसवार्ता के बाद श्री साव ह भाटापारा म माइलोगिन, युवा अउ सियान समेत आने आने समुदाय ले मिलके उंखर परेसानी अउ मंाग उपर गोठबात करीन।
उंहे दंतेवाड़ा ले शुरू करे गे पहिली परिवर्तन यात्रा अबले कुछ देर पहिली रायपुर पहुंच ेगेहे। राजधानी रायपुर म परिवर्तन यात्रा के जगा-जगा स्वागत करे जावत हे।
ट्रैवल फॅार लाइफ-योजना शुभारंभ
केंद्रीय पर्यटन मंत्रालय डहार ले पर्यटन क्षेत्र बर बनाये गे योजना ट्रैवल फॅार लाइफ के काली सत्ताईस सितंबर के शुभारंभ होही। ये योजना प्रधानमंत्री डहार ले शुरू करे गे मिशन लाइफ योजना के आधार उपर बनाय गेहे। एखर तहत देशभर के एक सौ आठ जगा के चिन्हारी करे गेहे, जेमा महासमुंद जिला म स्थित सिरपुर स्मारक समूह घलो शामिल हे।
मुख्यमंत्री लोकार्पण
मुख्यमंत्री भूपेश बघेल ह आज अपन निवास कार्यालय म राखे गे कार्यक्रम म वीडियो कॉन्फ्रेंस ले छब्बीस जिला मन म करीबन छै हजार अस्सी करोड़ रूपिया के सात हजार तीन सौ विकास काम के लोकार्पण अउ शिलान्यास करीन। ए दउरान मुख्यमंत्री ह चिटफंड कंपनी म निवेश करइया बेमेतरा अउ कोरिया जिला के 122 निवेशक के खाता म करीबन अड़तीस लाख इकचालीस हजार रूपिया ऑनलाइन तरीका ले जमा कराइन।
स्वास्थ्य पुरस्कार
आयुष्मान भारत योजना ल सुघ्धर ढंग ले लागू करे बर छत्तीसगढ़ ल तीन राष्ट्रीय पुरस्कार मिले हे। ये तीनो पुरस्कार बड़े राज्य मनके श्रेणी म लैंगिक समानता के संग राज्य के 90 प्रतिशत ले जादा परिवार मन म कम ले कम एक आयुष्मान कार्ड होना सुनिश्चित करे हे। नई दिल्ली म राखे गे आरोग्य मंथन कार्यक्रम म केंद्रीय स्वास्थ्य राज्यमंत्री एस. पी. सिंह बघेल के हाथ ले छत्तीसगढ़ म आयुष्मान भारत योजना के राज्य नोडल एजेंसी के सीईओ जयप्रकाश मौर्य ह ये तीनो पुरस्कार ल लीन।
मुख्यमंत्री भूपेश बघेल, उप मुख्यमंत्री अउ स्वास्थ्य मंत्री टी.एस. सिंहदेव ह ए उपलब्धि बर संबंधित अधिकारी कर्मचारी मन ल शुभकामना दीन हे।
इही कार्यक्रम म आयुष्मान भारत डिजिटल मिशन के अंतर्गत मरीज मन ल डिजिटल कार्ड के माध्यम ले इलाज समेत आने आने सुविधा उपलब्ध कराय बर रायपुर के एम्स अस्पताल ल घलो सम्मानित करे गीस।
पत्रकार अनुदान
प्रदेश के पत्रकार मन अब तीस लाख रूपिया तक के आवास ऋण म हर महीना पांच प्रतिशत तक ब्याज अनुदान दे जाही। ये अनुदान पांच बछर तक दे जाही। ए संबंध म ललित सुरजन संचार प्रतिनिधि आवास ऋण ब्याज अनुदान योजना राजपत्र म प्रकाशित कर दे गेहे। ये योजना एक अप्रैल 2023 के बाद छत्तीसगढ़ म खरेदीे गे मकान उपर लागू होही।
ट्रेन रद्द
दक्षिण पूर्व मध्य रेलवे के आने आने खंड म मरम्मत अउ रखरखाव संबंधी काम के सेती कुछएक गाड़ी के अवई जवई आजले 06 अक्टूबर तक प्रभावित रीही। एखर सेती रायपुर-गेवरा रोड स्पेशल पैसेंजर, बिलासपुर-शहडोल स्पेशल पैसेंजर, रायपुर-डोंगरगढ़ स्पेशल पैंसेजर रद्द रीही।
उंहे रायपुर-दुर्ग स्पेशल पैसेंजर, इतवारी-बालाघाट स्पेशल पैसेंजर गोंदिया-कटंगी स्पेशल पैसेंजर, गोंदिया-वड़सा स्पेशल पैसेंजर, गोंदिया-रायपुर स्पेशल पैंसेंजर अउ वड़सा-चान्दा फोर्ट स्पेशल पैसेंजर गाड़ी मन घलो रद्द रीही। दक्षिण पूर्व मध्य रेलवे के अनुसार मरम्मत काम के दउरान ये जम्मों गाड़ी दूनों दिशा ले नइ चलय।