आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री नरेंद्र मोदी ह किहीन हे कि जी-20 शिखर सम्मेलन के दौरान अफ्रीकी संघ ल समूह के पूर्ण सदस्य बनाय जाय म भारत ह अपन अगुवई क्षमता ल सिध्द करे हे। आकाशवाणी ले ‘‘मन की बात‘‘ कारीकरम म आज श्री मोदी ह किहीन कि जी-20 शिखर सम्मेलन के दौरान घोषित, भारत-मध्यपूर्व-यूरोप आर्थिक गलियारा अवइया सैकड़ों बछर बर विश्व व्यापार के आधार बनही। ओमन ए गलियारा के तुलना सिल्क रूप ले करीन,जउन भारत के समृध्द काल म बेवसाय अउ व्यापार के परमुख माध्यम रिहीस।
श्री मोदी ह जी-20 के संग भारत के युवा सक्ति के जुड़ाव उपर बिसेस गोठ किहीन। ओमन किहीन कि जी-20 यूनिवर्सिटी कनेक्ट प्रोग्राम दिल्ली म होवइया हे। ए कारीकरम के माध्यम ले देसभर के विश्वविद्यालय के लाखों विद्यार्थी एक-दूसर ले जुड़हीं। प्रधानमंत्री ह कॉलेज के छात्र मन ले किहीन कि 26 सितंबर के ए कारीकरम ल देखंय अउ एखर ले जुडं़य।
प्रधानमंत्री ह खुसी जतावत किहीन कि भारत म विश्व विरासत जघा मन के संख्या सरलग बाढ़त हे। चंद्रयान-3 के चंद्रमा म उतरई ह देस बर बड़का उपलब्धि हे। ओमन चंद्रयान-3 महाक्विज के घलो गोठ करीन। श्री मोदी ह गांधी जयंती के मउका म खादी ले बने जिनिस बिसाय के आग्रह करीन हें।
उहें, प्रधानमंत्री ह श्रोता मन ल तिहार मन के सुभकामना देवत स्थानीय जिनिस बिसाय के मंतर ल घलो सुरता देवाइन।

भारत म स्वतंत्रता के लड़ई म सहीद होय गुमनाम नायक अउ सहीद मन ल श्रध्दांजलि देय बर राज्य के सबो स्कूल म वीरगाथा अउ ‘‘मेरी माटी-मेरा देश‘‘ ले जुड़े आने-आने कारीकरम के आयोजन करे जाही। ए कारीकरम के उद्देस्य स्कूली लइका मन ल वीर सपूत मनके जिनगी ले परिचय कराना हे। ए कारीकरम के माध्यम ले गांव-गांव ले माटी सकेल के कलस यात्रा के माध्यम ले दिल्ली
भेजे जाही। ए माटी के उपयोग दिल्ली म अमृत वाटिका उद्यान बनाय बर करे जाही।
‘‘मेरी माटी-मेरा देश‘‘ कारीकरम के पहिली चरन के तहत सामिल         गतिविधि मन म अपन क्षेत्र के वीर सेनानी मनके स्मारक बनाके उंकर स्मरण करना, स्वतंत्रता संग्राम सेनानी अउ उंखर परिवार के सदस्य मन ल सम्मानित करना हे। समुदाय के संग आने कारीकरम के आयोजन होही। जिहां राष्ट्रगान अउ झंडा वंदन करे जाही। सबो सरकारी-निजी अउ अनुदान प्राप्त स्कूल मन म लइका मन के माध्यम ले प्रभात फेरी निकाले जाही। एखर अलावा खेलकूद, गेड़ी दौड़ अउ नाटक जइसन आयोजन होही। संगेसंग स्वतंत्रता आंदोलन ले जुड़े बिसय उपर निबंध लेखन, चित्रकला, पोस्टर अउ मूर्तिकला के संग रंगोली स्पर्धा कराय जाही। देसभक्ति गीत, कविता अउ गायन प्रतियोगिता घलो होही।
दूसरइया चरन के तहत कलेक्टर के अगुवई म 30 सितंबर के पहिली सबो गांव अउ वार्ड ले माटी सकेले जाही, अउ ओला 27 अक्टूबर के पहिली दिल्ली ले जाय बर विकासखंड, जिला अउ राज्य स्तर म इकठ्ठा करे जाही।
ए कारीकरम के तहत भारतीय नागरिक मेरी माटी-मेरा देश डॉट
जीओवी डॉट इन म जाके प्रतिज्ञा ले सकथें। संगे वेबसाइट म अपन फोटो, जेमा  पौधा लगावत रहंय या माटी के दीया धरे रहंय जइसन फोटो अपलोड कर सकथंे।  अइसे करे म ओमन ल ‘‘मेरी माटी-मेरा देश‘‘ के नांव ले प्रमाण पत्र घलो मिलही।

मुख्यमंत्री-लोकार्पण  

मुख्यमंत्री भूपेश बघेल ह आज छिंदगढ़ म आयोजित कारीकरम म सामिल होइन। जिहां, मुख्यमंत्री ह दू सौ तिहत्तर करोड़ रूपिया ले जादा के लागत के एक सौ सैंतीस विकास कारज के लोकार्पण अउ भूमिपूजन करीन। उ मउका म मुख्यमंत्री ह जिला के छै सौ इक्यासी प्राथमिक शाला मन म मुख्यमंत्री स्वल्पाहार योजना के सुभारंभ करीन। ए योजना के तहत कक्षा पहिली ले पांचवी तक के लइका मन ल सम्मार के पोहा, मंगल के दलिया, बुधवार के चना फ्राई, बिरसपत के मुंगदार अउ सुकरार के पुलाव बांटे जाही। एखर ले जिला के करीबन सत्रह हजार लइका मन लाभान्वित होहीं। योजना के तहत स्कूल के रसोइया मन ल आठ सौ रूपिया उपराहा प्रोत्साहन रासि दे जाही। ए मउका म मुख्यमंत्री ह स्कूली लइका मन ल टिफिन घलो बंाटिस।
कारीकरम म मुख्यमंत्री ह छिंदगढ़ म रेस्टहाउस निर्माण, तालनार म तीस बिस्तर अस्पताल अउ मनकापाल, किस्टाराम अउ जगरगुंडा के संग बस्तर जिला के पोटानार अउ धुरागंाव, गूमड़पाल म धान खरीदी केंद्र खोले के घोषणा करीन।

भारतीय जनता पार्टी के डहार ले जशपुर ले सुरू करे गेय दूसरइया परिवर्तन यात्रा जैजैपुर अमरिस, जिहां केन्द्रीय स्वास्थ्य मंत्री मनसुख मांडविया ह आमसभा ल संबोधित करीन। यात्रा म केंद्रीय रेल राज्य मंत्री राव साहेब पाटिल अउ विधायक बृजमोहन अग्रवाल घलो सामिल होइन।
एखर बाद ए परिवर्तन यात्रा सक्ति होवत सरसींवा पहुचिस। परिवर्तन यात्रा म केंद्रीय सहकारिता राज्य मंत्री बीएल वर्मा घलो सामिल होइन। ए मउका म श्री वर्मा ह सभा ल संबोधित करत किहीन कि यूपीए सरकार के अनुसरण करे के काम  राज्य सरकार ह करे हे। एखर सेति छत्तीसगढ़ के कांग्रेस सरकार घोटाला उपर घोटाला करत हे। उहें, नेता प्रतिपक्ष नारायण चंदेल अउ विधायक चंद्रदेव राय मन घलो राज्य सरकार उपर अवैध वसूली के आरोप लगइन।
ऐति दंतेवाड़ा ले सुरू होवइया पहिली परिवर्तन यात्रा आज रइपुर जिला के आरंग अमरिस। पार्टी के पदाधिकारी अउ कार्यकर्ता मन ए यात्रा के जोरदार स्वागत करीन। ए यात्रा म भाजपा प्रदेस अध्यक्ष अरूण साव सामिल होइन। सभा ल संबोधित करत श्री साव ह आरोप लगइन कि राज्य के कांग्रेस सरकार अपराध ल रोके म नकाम साबित होइस। ओमन किहीन कि ए दरी परिवर्तन होके ही रइही। परिवर्तन यात्रा म सांसद सुनील सोनी, शिवरतन शर्मा अउ अभनपुर ले भाजपा प्रत्याशी इन्द्रकुमार घलो सामिल होही।

क्रीडा-प्रतियोगिता

सरगुजा जिला के अंबिकापुर म चार दिवसीय तेइसवां राज्य स्तरीय शाला खेल प्रतियोगिता के आयोजन करे जावत हे। खाद्य अउ संस्कृति मंत्री अमरजीत भगत ह खेल प्रतियोगिता के सुभारंभ करीन। प्रतियोगिता म पांचों संभाग-दुरूग, रइपुर, बस्तर, बिलासपुर अउ सरगुजा संभाग के खिलाड़ी सामिल होवत हें। हर संभाग ले 78 खिलाड़ी के संग कुल 390 खिलाड़ी प्रतियोगिता म हिस्सा लेवत हें। संभाग स्तरीय खेल के विजेता खिलाड़ी राष्ट्रीय स्तर के प्रतियोगिता म प्रदेस के अगुवई करही।

ऋचा जोगी-ऐलान  

जनता कांग्रेस छत्तीसगढ़ के नेता ऋचा जोगी ह अकलतरा विधानसभा सीट ले चुनई लड़े के घोषणा करीन हें। जांजगीर-चांपा जिला के अकलतरा म आयोजित कार्यकर्ता सम्मेलन ल संबोधित करत ऋचा जोगी ह किहीन कि विधानसभा चुनई बर तइयारी सुरू कर देहे। अउ भरोसा जतइन हे कि ओमन ल जनता के आसीरवाद मिलही।
बतादन कि बछर दू हजार अठ्ठारा म अकलतरा विधानसभा सीट ले ऋचा जोगी ह अपन विपक्षी ले एक हजार आठ सौ चौव्वन बोट ले हार गे रिहीन।

राजभाषा आयोग-सम्मेलन  

राजभाषा आयोग के डहार ले राजधानी रइपुर म दू दिवसीय सातवां प्रांतीय सम्मेलन के आयोजन करे गिस। ए मउका म कारीकरम ल संबोधित करत नगरीय प्रशासन मंत्री शिव डहरिया ह किहीन कि राज्य सरकार छत्तीसगढ़ के संस्कृति अउ परंपरा ल आगू बढ़ाय के कारज करत हे। ओमन किहीन कि छत्तीसगढ़ म प्रतिभा के कमी नइ हे, अइसन प्रतिभा मन ल मउका मिले ले राज्य के एक अलग चिन्हारी होही।
ए मउका म छत्तीसगढ़ राजभाषा आयोग के सचिव डॉक्टर अनिल भतपहरी ह बतइन कि छत्तीसगढ़ी भाषा ल आठवीं अनुसूची म सामिल कराय के उदिम जारी हे। छत्तीसगढ़ी भाषा के मानकीकरण करे जावत हे। ओमन बतइन कि छत्तीसगढ़ी ल प्रदेस के पहिली ले पांचवी तक स्कूली पाठ्यक्रम सामिल करे के प्रक्रिया चलत हे। संगे बस्तर अउ सरगुजा संभाग म स्थानीय बोली मन ल पाठ्यक्रम म सामिल करे के कार्रवाही घलो जारी हे।