राज्य के स्कूल मन म पढ़ईया लइका मन ल बडे़-बडे़ प्रसिक्षण संस्थान डहार ले इंजीनियरिंग अउ मेडिकल प्रतियोगी परीक्षा खातिर कोचिंग देवाय जाही। ए काम खातिर राज्य सरकार ह पच्चीस सितंबर परन दीन ले स्वामी आत्मानंद कोचिंग के सुरूआत करही। ए योजना के तहत राज्य के ए सौ छियालिस ठन विकासखण्ड मुख्यालय मन म बीआरसीसी केन्द्र या एखर तीर-तखार हायर सेकेण्ड्री स्कूल मन म ऑनलाइन पढ़ई के बेवस्था करे जाही। एखर अलावा रईपुर, दुरूग, बिलासपुर अउ कोरबा म सहरी स्त्रोत केंद्र चलाय जाही। राज्य शैक्षिक संस्थान अउ प्रसिक्षण परिसद के माध्यम ले छत्तीसगढ़ पाठ्य पुस्तक निगम ले चुने गे संस्था मन डहार ले, ए कोचिंग ल देवाय जाही। ए संबंध म स्कूल शिक्षा विभाग डहार ले जम्मों जिला कलेक्टर अउ जिला शिक्षा अधिकारी मन ल जरूरी दिसा-निरदेस जारी करे गे हे।
चॉक परियोजना
राज्य म स्कूली शिक्षा म गुणवत्ता सुधार करे खातिर चॉक परियोजना ल विश्व बैंक अउ केन्द्र सरकार डहार ले मंजूरी दे दे गेहे। ए परियोजना के दस्तावेज उपर काली विश्व बैंक, केंद्र अउ छत्तीसगढ़ सरकार डहार ले हस्ताक्षर करे गीस। खबर के मुताबिक विश्व बैंक के मदद ले शिक्षा गुणवत्ता सुधार के संगेसंग स्कूल मन ल बढ़िया बनाय के फइसला घलो ले गेहे। राज्य सरकार डहार ले पहिली चरन म चार सौ करोड़ रूपिया के प्रावधान करे गेहे। ए परियोजना के माध्यम ले अवईया पांच बछर म विश्व बैंक डहार ले करीबन पच्चीस सौ करोड़ रूपिया के सहायता रासि दे जाही। ए परियोजना के माध्यम ले स्कूल मन म जरूरी सुधार काम करे जाही।
भाजपा-परिवर्तन यात्रा-01
भारतीय जनता पार्टी डहार ले दंतेवाड़ा ले सुरू करे गे परिवर्तन यात्रा ह आज गरियाबंद जिला के मैनपुर पहुंचिन। ए दउरान भाजपा सांसद चुन्नी लाल साहू ह पार्टी के पदाधिकारी अउ कार्यकर्ता मन के सुवागत करीन। ए परिवर्तन यात्रा म भाजपा के प्रदेस अध्यक्ष अरूण साव ह घलो सामिल होइन। सभा म बोलत श्री साव ह आरोप लगइन कि राज्य के कांग्रेस सरकार ह भ्रष्टाचार अउ घोटाला म सामिल हे। ओमन यहू किहीन कि राज्य सरकार ह जनता के हित म एको ठन विकास काम नइ करत हे।
उहें, केंद्रीय मंत्री कृष्णा पाल गुर्जर ह राज्य सरकार उपर वादाखिलाफी के आरोप लगावत किहीन कि छत्तीसगढ़ म बेरोजगारी के संगेसंग अपराध के घटना ह लगातार बाढ़े हे।
ए दउरान केंद्रीय राज्य मंत्री अन्नपूर्णा देवी ह किहीन कि राज्य म महिला मन उपर अब्बड़ घटना होय हे। ओमन यहू किहीन कि केंद्र के नरेंद्र मोदी सरकार ह संसद म ‘‘नारी शक्ति वंदन‘‘ अधिनियम ल पास करा के महिला मन के अधिकार ल बढ़ाईन हे।
परिवर्तन यात्रा-02
ओति, जशपुर ले सुरू होय परिवर्तन यात्रा ह आज रायगढ़ पहंुचीन। ए परिवर्तन यात्रा म नेता प्रतिपक्ष नारायण चंदेल ह सामिल होइन। ए मउका म श्री चंदेल ह एक ठन पत्रकार वार्ता म किहीन कि राज्य के कांग्रेस सरकार ह भ्रष्टाचार अउ अपराध के मामला म पहिली नंबर म हवय। ए दउरान भारतीय जनता पार्टी के कई झन पदाधिकारी अउ कार्यकता मन ह सामिल होइन।
प्रसार भारती सचिव-बैठक
प्रसार भारती के सदस्य सचिव डी.पी.एस. नेगी ह किहीन हे कि स्वच्छता सेवा अभियान ह न सिरिफ साफ-सफाई ल बढ़ावा देवत हे, भलूक एखर ले उत्पादन घलो बाढ़त हे। आज रईपुर म दूरदर्सन अउ आकाशवाणी के अधिकारी मन के समीक्षा बइठका के अगुवई करत ओमन किहीन कि प्रसार भारती के तहत दूरदर्सन अउ आकाशवाणी ह ए अभियान ल पूरा जिम्मेंदारी के साथ काम करत हे। जेखर सेति न सिरिफ लोक प्रसारक के रूप म अपन छबि ल सुधारे हे, संगेसंग राजस्व घलो अर्जित करीन हे।
ऊर्जा संरक्षण-पुरस्कार
छत्तीसगढ़ राज्य अक्षय ऊर्जा विकास अभिकरण-क्रेडा ल ऊर्जा संरक्षण के क्षेत्र म राष्ट्रीय स्तर म बढ़िया प्रदर्सन करे खातिर परफॉर्मेंस अवार्ड ले सम्मानित करे गेहे।
खबर के मुताबिक सोसायटी ऑफ एनर्जी इंजीनियर्स एण्ड मैनेजर्स-सीम डहार ले नई दिल्ली म राखे गे आठवां नेसनल एनर्जी मैनेजमेंट अवार्ड समारोह म ए ईनाम ल दे गीस। क्रेडा के मुख्य कार्यपालन अधिकारी आलोक कटियार ह ऊर्जा दक्षता ब्यूरो-बी.ई.ई. के उप महानिदेशक डॉक्टर अशोक कुमार के मौजूदगी म ए पुरस्कार ल ग्रहण करीन। मुख्यमंत्री भूपेश बघेल ह ए ईनाम खातिर क्रेडा के टीम अउ प्रदेस के जनता मन ल हार्दिक बधाई अउ सुभकामना दीन हे।
मन की बात
प्रधानमंत्री नरेंद्र मोदी ह काली बिहनिया ग्यारा बजे आकाशवाणी म ‘‘मन की बात‘‘ कारीकरम म देस-विदेस के लोगन मन ले अपन बिचार साझा करही। ए हा मासिक रेडियो कारीकरम के एक सौ पचासवां कड़ी हरय। ए कारीकरम ल आकाशवाणी अउ दूरदर्शन के जम्मों चैनल मन म प्रसारित करे जाही। एखर अलावा एला आकाशवाणी के वेबसाइट के संगेसंग ‘‘न्यूज ऑन एआईआर मोबाइल एप‘‘ म घलो उपलब्ध कराय जाही।
मन की बात कारीकरम के आकाशवाणी, दूरदर्शन समाचार, प्रधानमंत्री कार्यालय अउ सूचना तथा प्रसारण मंत्रालय के यूट्यूब चैनल मन म घलो सीधा प्रसारण करे जाही। हिन्दी प्रसारण के तुरतेच बाद ए कारीकरम ल क्षेत्रीय भाषा म घलो प्रसारित करे जाही।
आरपीआई-पत्रकारवार्ता
भारतीय रिपब्लिकन पार्टी-आरपीआई के राष्ट्रीय अध्यक्ष प्रकाश अंबेडकर ह किहीन हे कि उंखर पार्टी ह छत्तीसगढ़ म होवइया विधानसभा चुनाव म जम्मों नब्बे ठन सीट म अपन उम्मीद्वार खड़ा करही। राजधानी रईपुर म एक ठन पत्रकार वार्ता म बोलत ओमन किहीन कि छत्तीसगढ़ संयुक्त मोर्चा बनाके ओखर पार्टी ह पिछड़ा, आदिवासी अउ दलित वर्ग के मनखे मन बर काम करही।
महासमुंद-प्राचीन मूर्तियां बरामद
महासमुंद जिला म सिंघोड़ा पुलिस के टीम अउ सायबर सेल के टीम ह रेहटीखोल चेकपोस्ट के तीर जुन्ना मूर्ति मन के तस्करी के मामला म तीन झन आरोपी मन ल गिरफ्तार करीन। ए आरोपी मन तीर ले बौध्द धर्म ले जुडे़ दू ठन जुन्ना मूर्ति बरामद करे गेहे। जेकर कीमत ह करीबन ढ़ाई करोड़ रूपिया बताय गेहे। बरामद करे गे मूर्ति ल दसवीं, ग्यारवीं सताब्दी के होय के पुष्टि पुरातत्व विभाग डहार ले करे गेहे।
मिले खबर के मुताबिक आरोपी मन ह ए मूर्ति ल ओड़िसा के अंगुल जिला के मंदिर ले चोरा के एक ठन कार म महासमुंद कोति आवत रिहीन। उहीं समय रेहटीखोल चेकपोस्ट के तीर पुलिस के टीम ह ए मन ल गिरफ्तार करीन।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ भाखा म समाचार बुलेटिन प्रसारित करे जाही। ए दूनो ठन बुलेटिन ल आकाशवाणी केंद्र जगदलपुर ले प्रसारित करे जाही। ए समाचार ल बस्तर संभाग म सुने जा सकत हे। ‘‘हल्बी‘‘ समाचार बुलेटिन ल बिहनिया साढ़े सात बजे अउ ‘‘गोण्डी‘‘ समाचार बुलेटिन ल संझा साढ़े छै बजे ले प्रसारित करे जाही।
जिले की चिट्ठी
प्रादेशिक समाचार एकांश आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण ल काली संझा छै बजे के पांच मिनट ले छै बज के दस मिनट तक करे जाही। ए कारीकरम ल प्रदेस के जम्मों आकाशवाणी केंद्र ह एके संघरा रिले करही। ए दारी दंतेवाड़ा जिला के गतिविधि के बारे म जानकारी दे जाही।
संक्षिप्त समाचार
– इन्दिरा गांधी राष्ट्रीय मुक्त विश्व विद्यालय इग्नू म जुलाई दू हजार तेईस सत्र बर कई ठन पाठ्यक्रम म ऑनलाइन प्रवेश पंजीयन अउ पुनः पंजीयन के तिथि ल तीस सितंबर तक बढ़ा दे गेहे।
– राज्य सरकार डहार ले सूरजपुर जिला के प्रभारी जिला शिक्षा अधिकारी अउ आरंग के विकासखंड जिला शिक्षा अधिकारी ल काम म लपरवाही बरते के सेति निलंबित कर दे गेहे।
– जांजगीर-चांपा जिला के तेंदुआ गांव के सरकारी मीडिल स्कूल म पदस्थ शिक्षक नरेश कुमार रत्नाकर ल निलंबित कर दे गेहे।
अउ
– राजनंादगांव जिला के घुमरिया नदी म नहाय के दउरान एक झन पन्द्रह साल के लइका ह बोहागे। पुलिस के टीम ह ए लइका के तलाश करत हे।