लोकसभा ह माइलोगिन मन बर लोकसभा अउ राज्य विधानसभा के कुल सीट म एक तिहाई सीट ल आरक्षित राखे के मंाग करइया संविधान के एक सौ अठाईसवंा संशोधन विधेयक ल काली मंजूरी दे दीस। ए विधेयक ल नारी शक्ति वंदन अधिनियम कहे गेहे। एखर पक्ष म चार सौ चौवन सांसद मन ह मतदान करीन, फेर दू झन सांसद मन ह एखर विरोध म मतदान करीन। विधेयक म राज्यसभा म आज चर्चा होइस।
प्रधानमंत्री नरेंद्र मोदी ह लोकसभा म विधेयक पारित होय म अपन खुशी जताइन हे। एक ठन सोशल मीडिया पोस्ट म श्री मोदी ह कहिन कि नारी शक्ति वंदन अधिनियम एक ठन ऐतिहासक कानून हे, जउन ह महिला सशक्तिकरण ल अउ बढ़ावा दीही। एखर ले राजनीतिक प्रक्रिया म माइलोगिन मनके भागीदारी बढ़ही।
केंद्रीय गृहमंत्री अमित शाह ह कहिन कि ये ह देश बर एक ठन ऐतिहासिक कदम हे। उंहे कंाग्रेस के वरिष्ठ नेता सोनिया गांधी ह कहिन कि महिला आरक्षण विधेयक ल लागू करे म कोनो भी प्रकार के देरी ले भारतीय माइलोगिन मन संग अन्याय होही।
सूचना अउ प्रसारण मंत्री अनुराग सिंह ठाकुर ह अधिनियम के पक्ष म मतदान करइया सांसद मन ल धन्यवाद दीन ।
महिला समृद्धि सम्मेलन
राज्य म सांस्कृतिक ऐतिहासिक धरोहर अउ पर्यटन स्थल ल संवारे बर छत्त्ीसगढ़ महतारी सांस्कृतिक संवर्धन योजना लागू करे जाही। मुख्यमंत्री भूपेश बघेल ह आज भिलाई म राखे गे महिला समृद्धि सम्मेलन म ए घोषणा करीन। कार्यक्रम म कंाग्रेस के राष्ट्रीय महासचिव प्रियंका गांधी, उप मुख्यमंत्री टीएस सिंहदेव अउ विधानसभा अध्यक्ष डॅाक्टर चरणदास महंत के अलावा राज्य मंत्रिमंडल के कतकोन सदस्य मौजूद रीहिन। ए कार्यक्रम म मुख्यमंत्री ह तीन सौ नौ करोड़ रूपिया ले जादा के आने आने विकास काम के लोकार्पण अउ भूमिपूजन करीन।
महिला समृद्धि सम्मेलन म प्रियंका गांधी ह कहिन कि छत्तीसगढ़ म महिला सशक्तिकरण बर कतकेान काम करे गेहे, राज्य के कंाग्रेस सरकार ह माइलोगिन मन ल देखत कतकोन योजना शुरू करे हे। दस लाख ले जादा माइलोगिन मन ह स्व सहायता समूह ले जुड़के अपन रोजगार शुरू करीन हे। श्रीमती गांधी ह अपन संबोधन म राज्य सरकार के आंगनबाड़ी कार्यकर्ता मितानिन, अउ सहायिका मनके मानदेय म बढ़ोत्तरी करे के फैसला के संगेसंग दाई-दीदी क्लिनिक, महतारी जतन योजना अउ मुख्यमंत्री नोनी सशक्तिकरण जइसन योजना के बारे म घलो बताइन । ओमन कीहिन कि छत्तीसगढ़ सरकार डहार ले देगे राहत ले माइलोगिन मन ल महंगाई ले निपटे बर मदद मिले हे।
उंहे मुख्यमंत्री भूपेश बघेल ह कहिन कि छत्तीसगढ़ म पहिलीच ले माइलोगिन मन ल बराबरी के जगा मिले हे। उंखर सरकार ह आर्थिक रूप ले कमजोर किसान मन ल मजबूत करे के काम करे हे ।
मलकीत सिंह हत्या-सीबीआई जांच
भारतीय जनता पार्टी के परिवर्तन यात्रा म शामिल होय बर छत्तीसगढ़ पहुंचे झारखंड के पूर्व मुख्यमंत्री रघुवरदास ह कहिन हे कि मलकीत सिंह हत्याकांड बर कंाग्रेस सरकार ह सीबीआई जांच के मंाग करंय।
इही बीच भाजपा डहार ले निकाले जावत दूसर परिवर्तन यात्रा म आज कटघोरा म उत्तर प्रदेश के उप मुख्यमंत्री बृजेश पाठक अउ केंद्रीय राज्य मंत्री सोम प्रकाश घलो शामिल होइन।
सफाईकर्मी/रसोईया मानदेय
स्कूल शिक्षा विभाग ह अंशकालिन सफाईकर्मी अउ मध्यान्ह भोजन ले जुड़े रसोईया मनके मानदेय म हर महीना पांच सौ रूपिया बढ़ोत्तरी के आदेश जारी करे हे। ये आदेश ले राज्य के करीबन तिरालीस हजार अंशकालिन सफाईकर्मी अउ मध्यान्ह भोजन बनइया सत्यासी हजार ले जादा रसोईया मन ल फायदा मिलही। अब रसोईया मनके मानदेय बाढ़के दू हजार रूपिया हो जाही। उंहे सफाईकर्मी मनके वेतन म घलो पांच सौ रूपिया के बढ़ोत्तरी हो जाही।
नेहरू युवा केंद्र कार्यक्रम
नेहरू युवा केंद्र अउ राष्ट्रीय युवा स्वयं सेवक मन डहार ले कबीरधाम जिला के मोतिमपुर गांव म शिवशक्ति युवा मण्डल के सहयोग ले मेरी माटी मेरा देश कार्यक्रम के आयोजन करे गीस। ए दउरान युवा मन ह हाथ म तिरंगा लेके घर-घर पहुंचीन अउ कलश म चांउर सकेलीन। युवा मन ह लोगन ल पंचप्रण के शपथ घलो देवइन अउ एखर पालन करे बर लोगन ल जागरूक करीन।
उंहे जशपुर जिला के आठ ठन विकासखंड म राष्ट्रीय युवा स्वयं सेवक मन डहार ले ए कार्यक्रम के तहत लोगन के घर ले कलश म चांवल सकेले गीस।
यूनिसेफ कोंडागंाव
यूनिसेफ इंडिया संघरा यूनिसेफ के दक्षिण एशिया क्षेत्रीय संगठन के प्रतिनिधि मन ह कोंडागांव जिला के दौरा करीन। ओमन ह मया मड़ई, एनीमिया मुक्त कोंडागांव अभियान अउ युवोदय कोंडानार चौम्प्स जइसन कार्यक्रम के तारीफ करीन। ए दउरान ओमन ह कोंडागांव म चलत यूनिसेफ के कार्यक्रम के अवलोकन घलो करीन। ओमन ह आंगनबाड़ी कार्यकर्ता, मितानिन, एएनएम, ले टीकाकरण अउ एनीमिया मुक्त कोंडागांव के काम के बारे म जानकारी लीन।
जांजगीर-किसान धरना
जांजगीर म कृषक चेतना मंच के बैनर म किसान मन ह अपन छब्बीस सूत्रीय मंाग ल लेके रैली निकालिन अउ धरना दीन। सैकड़ो किसान मन ह गेड़ी म चढ़के डंडा नाच करत रैली म शामिल होइन। ए दउरान किसान मन ह भजन कीर्तन घलो करीन। रैली म शराब बंदी के मांग ल लेके बड़ संख्या म माइलोगिन मन घलो शामिल होइन।
नीट,पीजी, काउंसिलिंग
केन्द्रीय स्वास्थ्य मंत्रालय ह नीट, पीजी काउंसिलिंग बर स्नातकोत्तर पाठ्यक्रम के कटऑफ प्रतिशत ल घटा देहे। अब सबो श्रेणी म क्वालीफाइंग पर्सेंटाइल ल शून्य कर दे गेहे। मेडिकल काउंसिलिंग कमेटी-एमसीसी डहार ले जारी एक ठन अधिसूचना म ए घोषणा करे गीस। जउन उम्मीदवार मन ह नीट परीक्षा बर उपस्थित रीहिन ओमन ह अब काउंसिलिंग प्रक्रिया म भाग ले सकही।
चक्रधर समारोह
रायगढ़ म चलत अड़तालीसवंा चक्रधर समारोह के दूसर दिन काली स्कूली लईका मन ह अपन प्रस्तुती दीन। समारोह म राउत नाचा, सुआ, ददरिया, कर्मा जइसन छत्तीसगढी़ लोक नृत्य के संग देश के दूसर राज्य के लोक नृत्य के झलक देखे बर मिलिस। तीन दिन के ए समारोह के समापन आज रंगारंग कार्यक्रम के संग होही।
मौसम
राज्य म मानसून के सक्रियता एक घांव फेर बाढ़गे हवय। पाछू दू दिन ले रायपुर संगरा राज्य के कतकोन जगा म अच्छा बरसा होय हे।
मौसम विभाग ह अवइया चौबीस घंटा म प्रदेश के उत्तरी हिस्सा म एक दू जगा म भारी बरसा होय अउ आकाशीय बिजली गिरे के चेतावनी दीन हे। उंहे प्रदेश के कतकोन जगा म हल्का ले मध्यम बरसा होय के अउ गरज चमक संग छींटा पड़े के संभावना हे ।
संक्षिप्त समाचार
– शिक्षक भर्ती परीक्षा म चुने गे अभ्यर्थी मनके तीसरा चरण के ऑनलाईन काउंसिलिंग काली ले शुरू होही। चौबीस सितंबर तक चलइया ए काउंसिलिंग म एक हजार ले जादा अभ्यर्थी मन शामिल होही।
– फर्जी कॉल ऐप के माध्यम ले क्रेडिट कार्ड अपडेट करे के नाव म दुर्ग जिला के कुम्हारी के एक झन मनखे ले लाखो रूपिया के ठगी करे के मामला म रायपुर के साइबर क्राइम टीम ह दू झन अंतर्राज्यीय आरोपी मन ल दिल्ली ले गिरप्तार करे हे।
अउ
– राजनंादगांव जिला के ग्राम मोगरा मोड़ तीर मोटर के संग होय टक्कर म फटफटी म बइठे दू झिन युवक मनके मउकाच म मउत होगे, अउ इही जिला के मोटेरा के तीर तेज रफ्तार ट्रेक्टर के चपेट म आय ले मदनपुर पंचायत सचिव के मउत होगे।