केन्द्र सरकार ह किसान मन बर कृषि ऋण अउ फसल बीमा संबंधी तीन ठिन परिवर्तनकारी योजना ल सुरू करे हे। नई दिल्ली म काली केन्द्रीय वित्तमंत्री निर्मला सीतारमण ह किसान ऋण पोर्टल, घर-घर किसान क्रेडिट कार्ड अभियान अउ मौसम सूचना नेटवर्क डाटा सिस्टम के शुभारंभ करीन। ए बेरा म ओमन ह किहीन कि भारत ह किसान मनके ऋण हवय। कोविड लॉकडाउन के बेरा म ग्रामीण भारत, किसनहा अउ खेती-बाड़ी ह ही देस ल आगू बढ़ाय हे। वित्तमंत्री ह कहिन कि किसान मन ह देस बर खाद्य सुरक्षा सुनिश्चित करीन अउ ग्रामीण भारत अर्थव्यवस्था बर सहारा बनीन। ओमन ह कहिन कि ए पोर्टल जानकारी दीही कि कतका लोगन मन ल सेवा ले फायदा मिले हे। श्रीमती सीतारमण ह ए बात के भरोसा दिलईन हे कि ए पहल ल सफल बनाय बर बैंक के घलो मदद मिलही।
भाजपा-परिवर्तन यात्रा
भारतीय जनता पार्टी ह आजकल परिवर्तन यात्रा निकालत हे। दंतेवाड़ा ले सुरू होय पहिली परितर्वन यात्रा म सामिल होय बर झारखंड के पूर्व मुख्यमंत्री रघुवर दास ह आज बेमेतरा पहुंचीन। उहां चलत एक ठिन पत्रकारवार्ता म श्री दास ह पीएससी परीक्षा म करे गे भर्ती म राज्य सरकार कोति ले गड़बड़ी करे जाय अउ जवान लइका मनके भविष्य के संग खिलवाड़ करे के आरोप लगईन। ओमन ह कहिन कि छत्तीसगढ़ म सराब अउ कोयला के सिंडीकेट बनाके बिचौलिया मन ह भ्रष्टाचार करत हे। कमीसन के आधार म ठेका दे जात हे। श्री दास ह कहिन कि वादा करे बावजूद राज्य सरकार ह अभू तक प्रदेस म सराबबंदी नइ करे हे। बल्कि एमा करोड़ों रूपिया के घोटाला करे हे। ओमन ह कहिन कि राज्य सरकार ह महिला स्व-सहायता समूह के ऋण ल घलो माफ नइ करे हे। उहें, धमधा म होय आमसभा ल घलो झारखंड के पूर्व मुख्यमंत्री श्री दास ह संबोधित करीन।
ओति, जशपुर ले सुरू होय दूसर परितर्वन यात्रा ह आज चिरमिरी पहुंचीस। ए यात्रा म नेता प्रतिपक्ष नारायण चंदेल, बृजमोहन अग्रवाल, ओ.पी. चौधरी समेत वरिष्ठ भाजपा नेता मन ह सामिल होइन। चिरमिरी म आमसभा ल संबोधित करत हुए बृजमोहन अग्रवाल ह कहिन कि राज्य सरकार कोति ले वृद्धा पेंशन के पइसा ल डेढ़ हजार रूपिया करे के भरोसा दिलाय रिहीस, फेर अभू तक हो नइ पाय हे।
रमन सिंह-बयान
भारतीय जनता पार्टी के राष्ट्रीय उपाध्यक्ष अउ प्रदेस के पूर्व मुख्यमंत्री डॉक्टर रमन सिंह ह कहिन कि कांग्रेस कोति ले उंखर खिलाफ करे गे एफ.आई.आर. ल खतम करे के आदेस छत्तीसगढ़ उच्च न्यायालय ह दीन हे। डॉक्टर सिंह ह आरोप लगईन कि छत्तीसगढ़ म कानून व्यवस्था के स्थिति ठीक नइ हे। कोरोना काल के बेरा म ओमन ह सोशल मीडिया म राज्य सरकार के काम के संबंध म एक ठिन पोस्ट करे रिहीन, जेखर बाद कांग्रेस कोति ले उंखर खिलाफ एफ.आई.आर. दरज कराय गे रिहीस। डॉक्टर सिंह कहिन कि राज्य सरकार पीएससी परीक्षा चयन मामला म पारदर्सी प्रक्रिया अपनाय म असफल रेहे हे।
उहें, संसद म पेस करे गे महिला आरक्षण बिल म डॉक्टर सिंह कहिन कि ए बिल ह माईलोगिन मनके सशक्तिकरण अउ उंखर भागीदार बर बड़का कदम हवय।
मुख्यमंत्री-रामवनगमन पर्यटन परिपथ
मुख्यमंत्री भूपेश बघेल ह मनेन्द्रगढ़-चिरमिरी-भरतपुर जिला के सीमामढ़ी-हरचौका म करीबन साढ़े सात करोड़ रूपिया के लागत ले बने रामवनगमन पर्यटन परिपथ के काम के लोकार्पण करीन। एखर संगेसंग मवई नदिया के तीर म रामवाटिका अउ आने-आने विकास के काम कराय गेहे। कार्यक्रम म मुख्यमंत्री ह मनेन्द्रगढ़-चिरमिरी-भरतपुर जिला बर लगभग तीन सौ साठ करोड़ रूपिया के आने-आने विकास काम के लोकार्पण अउ भूमिपूजन करीन।
कार्यक्रम ल संबोधित करत हुए मुख्यमंत्री ह कहिन कि राज्य सरकार ह छत्तीसगढ़ी संस्कृति ल सहेजे के दिसा म काम करत हे।
उहें, मुख्यमंत्री भूपेश बघेल ह काली भिलाई नगर निगम कोति ले आयोजित आभार सम्मेलन कार्यक्रम म सामिल होइन। इहां ओमन ह पैंसठ करोड़ रूपिया ले जादा के रासि के कतकोन निर्माण काम के लोकार्पण अउ भूमिपूजन करीन।
उहें, मुख्यमंत्री ह काली भिलाई के नेहरू नगर म दू करोड़ रूपिया के लागत ले बने तारामंडल के घलो लोकार्पण करीन।
हाईकोर्ट-पीएससी
छत्तीसगढ़ उच्च न्यायालय ह पीएससी म चयन ले संबंधित याचिका उपर सुनवाई करत हुए कहिन हे कि सबो नियुक्ति ह न्यायालय के आदेस के अधीन रइही अउ अवइया आदेस तक नियुक्ति के प्रक्रिया ल अंतिम रूप नइ दे जा सकही। हाईकोर्ट म आज पीएससी परीक्षा म चयन ले संबंधित याचिका उपर सुनवाई होइस। ए बेरा म हाईकोर्ट ह राज्य सरकार ले एखर बारे म अपन जवाब पेस करे बर किहीन हे।
इही बीच, राज्य सरकार कोति ले केहे गेहे कि ए प्रकरण के स्वयं जांच करके ओमन न्यायालय के समक्ष अपन जवाब पेस करही। संगेसंग यहू घलो केहे गेहे कि न्यायालय के अवइया आदेस तक नियुक्ति के प्रक्रिया ल अंतिम रूप नइ दे जाही। एखर संगेसंग जउन लोगन मनके नियुक्ति होगे हे, ओ ह यथास्थिति न्यायालय के आदेस के अधीन रइही।
इही बीच, भारतीय जनता पार्टी के प्रदेस अध्यक्ष अरूण साव ह पीएससी मामला म कहिन हे कि भाजपा ह सरलग राज्य सरकार के भूमिका उपर सवाल उठाय रिहीस अउ परीक्षा म होय कथित भ्रष्टाचार के जांच के मांग करे रिहीस।
उहें, भाजपा के महामंत्री ओ.पी. चौधरी ह काली रायपुर म आयोजित पत्रकारवार्ता म पीएससी परीक्षा म होय कथित गड़बड़ी के जांच ल सीबीआई ले कराय के मांग करीन हे।
माओवादी समाचार
दंतेवाड़ा जिला म आज सुरक्षा बल मनके संग होय मुठभेड़ म दू झिन महिला माओवादी मारे गेहे, जेखर सव ल बरामद कर ले गेहे। उहें, घटना वाले जघा ले एक ठिन बंदूक अउ एक ठिन बारा बोर के बंदूक मिले हे।
जिला के अतिरिक्त पुलिस अधीक्षक आर.के बर्मन ह बतईन कि ककाड़ी अउ नहाड़ी के जंगल म बड़का संख्या म माओवादी मनके रेहे के जानकारी मिले रिहीस। एखर बाद अरनपुर थाना ले डीआरजी अउ बस्तर फाइटर्स के संयुक्त टीम ल दंतेवाड़ा अउ सुकमा जिला ले लगे नहाड़ी, छोटे हिड़मा अउ डूंगिनपारा के जंगल म गश्ती बर भेजे गे रिहीस। इही बेरा माओवादी मन ह नहाड़ी कैंप के तीर म सुरक्षा बल मन उपर हमला सुरू कर दीन। तभे जवान मन कोति ले करे गे जवाबी कार्रवाई म दू झिन महिला माओवादी मन ह मारे गीन। करीबन आधा घंटा तक चले ए मुठभेड़ के बाद माओवादी मन ह घना जंगल के फायदा उठाके उहां ले तुरते भाग गीन।
उहें, एही जिला के अरनपुर-जगरगुंडा रद्दा म माओवादी मन कोति ले करे गे आईईडी विस्फोट के चपेट म आय ले सीआरपीएफ के एक झिन जवान घायल होगे हे। बताय जात हे कि अरनपुर ले जगरगुंडा के बीच रद्दा बनाय के कामबूता चलत हे। घायल जवान ह रोड ओपनिंग पार्टी म सामिल रिहीस।
नेहरू युवा केन्द्र-भाषण प्रतियोगिता
नेहरू युवा केन्द्र संगठन रायपुर कोति ले राज्य स्तरीय भाषण प्रतियोगिता के वर्चुअल तरीका ले रायपुर म करे गीस। एमा जिला स्तर म पहिली स्थान मिले वाले प्रतिभागी मन सामिल होइन। ए प्रतियोगिता ‘‘गांधी जी के वैश्विक प्रभाव-आज के परिवेश में गांधीवादी विचार की प्रासंगिकता‘‘ बिसय उपर आधारित रिहीस। कार्यक्रम के सुरूवात करत हुए नेहरू युवा केन्द्र संगठन के राज्य निदेशक श्रीकांत पांडेय ह किहीन कि युवा मन ल आगे बढ़ाय अउ ओमा बौद्धिक क्षमता विकसित करे बर अइसना आयोजन करे जात हे।
नेहरू युवा संगठन कोति ले दू अक्टूबर के राष्ट्रीय स्तर म भाषण प्रतियोगिता के आयोजन करे जाही।
अउ अब पेस हे मौसम के हाल..
प्रदेस म अवइया चौबीस घंटा के दउरान कतकोन जघा म भारी बरसा हो सकत हे, जेमा बलौदाबाजार, बलरामपुर, जांजगीर-चांपा, जशपुर, कोरबा, महासमुंद, रायगढ़, रायपुर अउ सरगुजा जिला म तेज बारिस हो सकत हे। उहें, उत्तर अउ दक्षिण छत्तीसगढ़ अउ ओखर ले लगे जिला म एक-दू जघा म गरज-चमक के संग भारी ले अतिभारी बारिस होय अउ बिजली गिरे के संभावना हे।
मौसम विभाग के अनुसार एक ठिन निम्नदाब के क्षेत्र उत्तर-पश्चिम बंगाल के खाड़ी अउ ओखर ले लगे तटीय पश्चिम बंगाल-ओड़िशा तट के उपर हवय। एखरे असर ले काली प्रदेस म ज्यादातर जघा म हल्का ले मध्यम बरसा हो सकत हे।