भारत के अध्यक्षता में जी-ट्वेंटी देश मनके फ्रेमवर्क वर्किंग ग्रुप के चौथा अउ आखिरी बइठका आज रईपुर म सिरईस। वित्त मंत्रालय के सलाहकार चांदनी रैना अउ ब्रिटेन के वित्त मंत्रालय के मुख्य आर्थिक सलाहकार सैम बैकेट ह ए बइठका के सामलात रूप ले अगुवई करीन। ए दू दिन के बइठका म जी-ट्वेंटी देस के संगेसंग अंतर्राष्ट्रीय अउ क्षेत्रीय संगठन के पैंसठ प्रतिनिधि सामिल होइन। बइठका म फ्रेमवर्क वर्किंग ग्रुप डहार ले मिले सुघ्घर काम के चिन्हारी करे के संगेसंग एला अउ आगू बढ़ाय उपर घलो गोठबात करे गीस। ए समूह डहार ले ए बछर जी-ट्वेंटी म आधारित दू प्रतिवेदन तैयार करे गीस, जेखर उल्लेख नई दिल्ली के लीडरशिप घोषणा पत्र म घलो करे गे रिहीस। ए दूनों रिपोर्ट समग्र अर्थव्यवस्था म खाद्य अउ ऊर्जा संबंधी असुरक्षा के संगेसंग जलवायु परिवर्तन अउ संक्रमण के खतरा ले होवइया प्रभाव उपर केन्द्रित हवय।
बइठका म जम्मों सदस्य मन ह ए वैश्विक चुनौती के समग्र अर्थव्यवस्था उपर पड़इया प्रभाव के जांच बर वैश्विक संवाद ल करना जरूरी बतईन।
भारतीय रिजर्व बैंक ह घलो जी-ट्वेंटी के चर्चा ल जादा ले जादा समावेशी अउ मानवकेन्द्रित बनाय बर जनभागीदारी म आधारित कतकोन कारीकरम आयोजित करीन। ए कारीकरम म आम लोगन अउ स्व-सहायता समूह के संग पढ़ईया लइका मन ल जोड़े गीस।
बइठका के समापन मउका म रतिहा खाना के संग सांस्कृतिक कारीकरम घलो होइस, जेमा बलाय अतिथि मन ल छत्तीसगढ़ के सांस्कृतिक विरासत अउ इहां के छत्तीसगढ़ के पारंपरिक खाना खाय के मउका मिलीस।
भाजपा-परिवर्तन यात्रा
भारतीय जनता पार्टी के दंतेवाड़ा ले निकले परिवर्तन यात्रा आज कवर्धा पहुंचीस। इहां पार्टी कार्यकर्ता मन ह यात्रा के अगुवई करत नेता अउ पदाधिकारी मनके स्वागत करीन। ए यात्रा म प्रदेस के पूर्व मुख्यमंत्री डॉक्टर रमन सिंह अउ यात्रा प्रभारी शिवरतन शर्मा समेत आने-आने पदाधिकारी मौजूद रिहीन।
कवर्धा के बाद ए यात्रा के अवइया पड़ाव बेमेतरा रिहीस। नगर के बेसिक मैदान म राखे गे आमसभा ल असम के मुख्यमंत्री हेमंत बिस्वा शर्मा समेत प्रदेस भाजपा के वरिष्ठ नेता मन ह संबोधित करीन। सभा ल संबोधित करत डॉक्टर रमन सिंह ह आरोप लगईन कि कांग्रेस के कार्यकाल म भ्रष्टाचार के मामला सरलग उजागर होवत हे।
एखर पहिली, परितर्वन यात्रा के डोंगरगढ़ पहुंचे म पार्टी के नेता मन ह उहां के स्थानीय कार्यकर्ता मनके संग गोठबात करीन।
ओति, जशपुर ले निकले परितर्वन यात्रा आज प्रतापपुर पहुंचीस। इहां नेता प्रतिपक्ष नारायण चंदेल ह कार्यकर्ता मन ले भेंट करे के बाद पत्रकारवार्ता ल संबोधित करीन। ओमन आरोप लगईन कि कांग्रेस ह अपन जनघोषणा पत्र म करे गे वादा ल पूरा नइ करत प्रदेसवासी मन ल ठगत हे। ओमन आरोप लगईन कि प्रदेस म अपराधी अउ भ्रष्टाचारी मन ल संरक्षण दे जावत हे।
अजय चंद्राकर-प्रेसवार्ता
भाजपा ह आरोप लगाय हे कि केन्द्र डहार ले छत्तीसगढ़ सरकार ल सौ लाख मीटरिक टन चाउर खरीदे के आश्वासन दे गेहे। फेर, राज्य सरकार ह अतका मात्रा म चाउर नइ देवा पावत हे। भाजपा के प्रदेस प्रवक्ता अउ विधायक अजय चंद्राकर ह रईपुर म पत्रकार मन ले गोठबात करत किहीन कि प्रदेस म जउन धान खरीदी करे जात हे, ओ ह केन्द्र के संग होय समझौता के आधार म ही होवत हे। श्री चंद्राकर ह किहीन कि धान के कीमत के अस्सी ले नब्बे प्रतिसत रासि केन्द्र सरकार ह देथे।
मुख्यमंत्री विशेष स्वास्थ्य सहायता योजना
मुख्यमंत्री भूपेश बघेल ह आज रईपुर के अंबेडकर अस्पताल म एडवांस कार्डियक इंस्टीट्यूट म मुख्यमंत्री विशेष स्वास्थ्य सहायता योजना के हितग्राही मनके कारीकरम म सामिल होइन। ए मउका म मुख्यमंत्री ह कहिन कि एडवांस कार्डियक इंस्टीट्यूट ल जल्दीच सात सौ बिस्तर वाले सुपर स्पेशलिटी अस्पताल के रूप म विकसित करे जाही। एखर निर्माण म सवा तीन सौ करोड़ रूपिया खरचा होही। मुख्यमंत्री ह किहीन कि डॉक्टर खूबचंद बघेल स्वास्थ्य योजना के दायरा म प्रदेस के करीबन उनहत्तर लाख परिवार ल सामिल करे गेहे। ए योजना के तहत पात्र हितग्राही मन ल इलाज बर अब तक छत्तीस सौ करोड़ रूपिया ले जादा के सहायता रासि देवाय गेहे।
रायगढ़-लूट
रायगढ़ के ढिमरापुर रोड स्थित एक्सिस बैंक म आज बिहनिया बैंक खुले के कुछेक देर बाद करीबन सात करोड़ रूपिया के लूट के घटना होगे। पुलिस के मुताबिक आज बिहनिया करीबन साढ़े नौ बजे तीन झन लोगन हेलमेट पहिन के बैंक के भीतरी घुसरीन। एमा ले एक झन ह मैनेजर उपर चाकू ले हमला कर दीस। एखर बाद ए तीनों आरोपी मन बैंक म राखे करीबन सात करोड़ रूपिया नगदी ल लूटके फटफटी ले भगा गे।
घटना के खबर मिलतेच पुलिस अधीक्षक सदानंद कुमार के संग पुलिस के आने-आने अधिकारी मन तुरते बैंक पहुंचीन अउ रायगढ़ ले बाहिर जवइया जम्मों रद्दा म नाकाबंदी करवाय के निरदेस दीन। पुलिस अधीक्षक ह बतईन कि बैंक म लगे सीसीटीवी कैमरा ले आरोपी मनके संबंध म जानकारी ले जावत हे। एखर संगेसंग बैंककर्मी मन ले घलो पूछताछ करे जावत हे। ओमन बतईन कि आरोपी मनके खोज चलत हे।
इही बीच, घायल बैंक मैनेजर ल इलाज बर अस्पताल म भर्ती कराय गेहे।
मलकीत सिंह हत्या-मामला
भिलाई म पाछु दिन होय मलकीत सिंह के हत्या मामला म प्रशासन ह मृतक के पत्नी ल खुर्सीपार अस्पताल म नौकरी दे अउ मृतक के लइका मन ल स्वामी आत्मानंद विद्यालय म प्रवेस देवाय के आश्वासन देहे। एखर बाद परिवार वाले मन ह अपन आंदोलन ल खतम कर दीस।
इही बीच, मृतक के सव के पोस्टमार्टम करे के बाद आज उंखर अंतिम संस्कार कर दे गीस। एखर पहिली, ए हत्याकांड ल लेके काली भिलाई अउ दुर्ग म सिक्ख समाज डहार ले बंद के ऐलान करे गे रिहीस। छत्तीसगढ़ चेंबर ऑफ कॉमर्स के संगेसंग भाजपा के स्थानीय इकाई ह घलो बंद ल समर्थन दे रिहीन हे। प्रदर्सनकारी मन ह खुर्सीपार म रैली घलो निकालीन। ए दउरान भिलाई अउ दुरूग के व्यावसायिक प्रतिष्ठान अउ दुकान मन बंद रिहीस। मृतक मलकीत सिंह के पिता कुलवंत सिंह ह बतईन कि दुरूग जिला प्रशासन ह पीड़ित परिवार ल पांच लाख रूपिया के मदद रासि देके संगेसंग मृतक के पत्नी ल स्थानीय अस्पताल म संविदा नियुक्ति देके आश्वासन देहे। उहें, भिलाई नगर के विधायक देवेन्द्र यादव ह घलो मृतक के परिवार ल पांच लाख रूपिया देके घोसना करे हे।
खबर के मुताबिक पाछु पन्द्रह सितंबर के भिलाई के खुर्सीपार इलाका म आपसी विवाद के बाद कुछेक लोगन मन ह मलकीत सिंह के संग मारपीट करे रिहीस। अस्पताल म इलाज के दउरान मलकीत सिंह के मउत होगे रिहीस।
हाईकोर्ट-पीएससी मामला
छत्तीसगढ़ उच्च न्यायालय ह राज्य लोक सेवा आयोग के परीक्षा परिणाम म कथित पक्षपात ल लेके भाजपा के वरिष्ठ आदिवासी नेता ननकीराम कंवर के याचिका म लोक सेवा आयोग ल नोटिस जारी करके जवाब मांगे हे। ननकीराम कंवर ह अपन याचिका म राजभवन के सचिव के बेटा-बेटी के डिप्टी कलेक्टर चुने जाय म सवाल खड़े करे हे। उहें, श्री कंवर ह कथित रूप ले लोक सेवा आयोग के अध्यक्ष के कुछेक रिश्तेदार मनके चयन होय म घलो याचिका म प्रश्न उठाय हे। उच्च न्यायालय के मुख्य न्यायाधीश रमेश सिन्हा ह आज ए याचिका के सुनवाई करत लोक सेवा आयोग ल नोटिस जारी करके जवाब मांगे हे। फेर, अदालत ह ए मामला म कोनों तरह के रोक लगाय के बजाय यथास्थिति बनाय राखे बर केहे हे।
गणेश चतुर्थी
छत्तीसगढ़ के संगेसंग देसभर म आज गणेश चतुर्थी के परब श्रद्धा अउ खुसी के संग मनाय जावत हे। बुद्धि, विवेक अउ कष्ट हरइया सौभाग्य-समृद्धि के प्रतीक भगवान गणेश के उत्सव आज ले सुरू होके दस दिन तक चलही। प्रदेस के जम्मों जिला के संगेसंग गांव-गतौरी मन म घलो भगवान गणेश के मूर्ति मन ल बाजा-गाजा के संग बइठाय जावत हे।
राज्यपाल विश्वभूषण हरिचंदन अउ मुख्यमंत्री भूपेश बघेल ह प्रदेस के जम्मों लोगन मन ल गणेश चतुर्थी के सुभकामना दे हवय।