संसद के पांच दिन के विशेष सत्र आज प्रधानमंत्री नरेंद्र मोदी कोति ले लोकसभा म पचहत्तर बछर के संसदीय यात्रा म गोठबात संग शुरू होइस। ये मउका म प्रधानमंत्री नरेंद्र मोदी ह कहिन कि पाछू पचहत्तर बछर म संसद के सबले बड़े उपलब्धि रहे हे । एखर उपर लोगन के सरलग बाढ़त भरोसा संविधान सभा ले लेके उपलब्धि सुरता अउ संदेश के पचहत्तर बछर के संसदीय यात्रा म लोकसभा म गोठबात के शुरूआत करत प्रधानमंत्री ह कहिन कि भारतीय लोकतंत्र के सबो उतार चढ़ाव के साक्षी ये संसद भवन जनता के विश्वास अउ भरोसा के केंद्र बिंदु रेहे हे। श्री मोदी ह कहिन कि आज भारत के लोगन के उपलब्धि के गोठबात विश्वभर म होवत हे अउ इही संसद के पचहत्तर बछर के इतिहास के दउरान सामूहिक प्रयास के परिणाम हवय। ओमन कहिन कि चंद्रयान तीन के सफलता न सिरिफ भारत भलुक विश्वभर म गौरव के विषय हरय। एखर ले भारत के एक नवा शक्ति आगू आय हे, जउन विज्ञान, प्रौद्योगिकी, भारतीय वैज्ञानिक मनके क्षमता अउ एक सौ चालीस करोड़ देशवासी मनके सामूहिक शक्ति ले जुडे़ हे।
प्रधानमंत्री ह काली ले संसद के नवा भवन म जायके बात कहीन। ओमन कहिन कि हम ये ऐतिहासिक भवन ल बिदा देवत हन, जउन आजादी के पहिली साम्राज्यवादी विधायी परिषद रीहिस। ओमन यहू कीहिन कि आज भारत ह खुद ल विश्वमित्र के रूप म स्थापित करे हे अउ दुनियाभर के लोगन भारत ल अपन संगी मानत हे।
पीएम विश्वकर्मा योजना सब्सिडी
केंद्रीय वित्त मंत्री निर्मला सीतारमन ह कीहिन हे कि प्रधानमंत्री नरेंद्र मोदी कोति ले शुरू करे गे पीएम विश्वकर्मा योजना म कारीगर मन ल मिलइया कर्जा उपर आठ प्रतिशत तक के छूट दे जाही। वित्तमंत्री ह योजना के लांच कार्यक्रम के बेरा कीहिन कि केंद्र सरकार ह पहिली बजट म तेरा हजार करोड़ रूपिया के प्रावधान करे हे।
विश्वकर्मा योजना के विवरण साझा करत वित्तमंत्री ह कहिन कि कारीगर मन ल पांच प्रतिशत के बहुते सस्ता ब्याज म जमानत मुक्त ऋण दे जाही। ये येाजना म बढ़ई, सुनार, लोहार, राज मिस्त्री, पत्थर के मूर्ति बनइया मूर्तिकार, नाई अउ नाविक समेत अठारा क्षेत्र के पारंपरिक कारीगर शामिल हे। सरकार तीन लाख रूपिया तक के कर्जा देवाही।
जी-20 बैठक
भारत के जी-20 अध्यक्षता म, जी-20 फ्रेमवर्क कार्य समूह के चौथा आखरी बइठका आज नवा रायपुर म शुरू होइस। दू दिन के बइठका म विश्व के वर्तमान आर्थिक परिदृश्य अउ प्रमुख आर्थिक मुद्दा ल लेके नीतिगत मार्गदर्शन म गोठबात होही। फ्रेमवर्क कार्य समूह के अब तक के होय बइठका के निष्कर्ष देखे जाही अउ भविष्य के कार्यक्षेत्र के पता लगाय जाही।
बइठका म जी-20 देश, अतिथि देश अउ आने आने अंतर्राष्ट्रीय अउ क्षेत्रीय संगठन के पैंसठ ले जादा प्रतिनिधि भाग लेवत हे।
मुख्यमंत्री बीजापुर
मुख्यमंत्री भूपेश बघेल ह आज बीजापुर म चार सौ संतावन करोड़ रूपिया ले जादा के रकम के आने आने विकास काम के लोकार्पण अउ भूमिपूजन करीन। ए मउका म मुख्यमंत्री ह जिला अस्पताल बीजापुर के नामकरण महादेव राणा शासकीय जिला चिकित्सालय करे के घोषणा करीन। एखर संगेसंग श्री बघेल ह नवीन शासकीय आदर्श महाविद्यालय जावंगा के नामकरण विरांगना मासकदेवी नाग के नाव म करे के घोषणा करीन। उंहे बीजापुर जिला के आवापल्ली के उसूर चौक के नामकरण नागुल, दोरला चौक के नाव म करे गीस। ओमन मादेपुर अउ जारपल्ली म नवा प्राथमिक शाला अउ जिला के चेरपाल, वर्दली, संकनपल्ली, अउ पापनपाल म नवा धान खरीदी केंद्र खोले जाय के घोषणा करीन।
उंहे अपन दौरा के बेरा मुख्यमंत्री ह जिला के ईटपाल के बीजापुर गारमेंट फैक्ट्री के घलो लोकार्पण करीन। ये बेरा म ओमन गारमेंट फैक्ट्री म चलत कपड़ा बनाय के काम के जांच करीन अउ उंहा काम करत माइलोगिन मनले गोठबात करीन। श्री बघेल ह फैक्ट्री ले बजार बर तियार उत्पाद के पहिली खेप ल हरियर झंडी दिखाके रवाना करीन संगेसंग मुख्यमंत्री ह चार करोड़ रूपिया के लागत ले बने सेंट्रल लाइब्रेरी के लोकार्पण करीन। उंहे श्री बघेल जिला स्तरीय भरोसे का सम्मेलन कार्यक्रम म शामिल होइन अउ सम्मेलन म लगे आने आने विभाग के स्टॉल ल देखीन। एखर पहिली मुख्यमंत्री ह कलेक्टर कार्यालय परिसर म छत्तीसगढ़ महतारी के प्रतिमा के अनावरण करीन।
भाजपा परिवर्तन यात्रा
भारतीय जनता पार्टी कोति ले प्रदेश म परिवर्तन यात्रा निकाले जात हे। जशपुर ले शुरू होय दूसर परिवर्तन यात्रा के रथ आज बलरामपुर-रामानुजगंज जिला के सामरी विधानसभा के राजपूर पहुंचीस। ये बेरा म भाजपा कार्यकर्ता मन ह यात्रा के स्वागत करीन। ये परिर्तन यात्रा म उत्तर प्रदेश के उप मुख्यमंत्री केशव प्रसाद मौर्य, पूर्व प्रदेश भाजपा अध्यक्ष विष्णुदेव साय, पूर्व मंत्री रामविचार नेताम, अउ अनुराग सिंहदेव शामिल होइन।
ए मउका म राखे गे सभा म बोलत श्री मौर्य ह कीहिन कि उत्तर प्रदेश सरकार ह अमवार बांध बर छत्तीसगढ़ सरकार ल मुआवजा अउ क्षेत्रीय विकास खातिर नब्बे करोड़ रूपिया के रकम देहे। एमा घलो भ्रष्टाचार के आरोप लगत हे। कहूं भ्रष्टाचार होय भी हे त उत्तर प्रदेश सरकार मुकदमा दर्ज कराही अउ आरोपी मन ल छोड़े नइ जाही। ओमन कीहिन कि भाजपा गरीब मन के शोषण बर्दाश्त नइ करय। सभा ल पूर्व प्रदेश अध्यक्ष विष्णुदेव साय अउ रामविचार नेताम घलो संबोधित करीन।
उंहे दंतेवाड़ा ले शुरू होय पहिली परिवर्तन यात्रा आज मोहला मानपुर पहुंचीन। एखर पहिली राजनंादगांव म होय एक पत्रकार वार्ता म गोवा के मुख्यमंत्री डॅाक्टर प्रमोद सावंत ह छत्तीसगढ़ सरकार उपर भ्रष्टाचार के आरोप लगाइन अउ कीहिन कि प्रदेश म परिवर्तन जरूरी होगे हे। डॅाक्टर सावंत ह कहिन कि केंद्र सरकार ह छत्तीसगढ़ के विकास बर सरलग काम करे हे। उंहे पूर्व मुख्यमंत्री डॅाक्टर रमनसिंह ह राज्य के कंाग्रेस सरकार उपर निशाना साधीन अउ कहिन कि राजनांदगांव समेत प्रदेशभर म कानून व्यवस्था बदहाल होगे हे।
छत्तीसगढ़ बंद
दुर्ग जिला के भिलाई खुर्सीपार म पाछू दिन होय एक युवक के हत्या के विरोध म छत्तीसगढ़ सिख पंचायत कोति ले राखे गे छत्तीसगढ़ बंद के आज खुर्सीपार, सुपेला, पॉवर हाउस, छावनी अउ नेहरू नगर समेत तीर तखार के क्षेत्र म असर देखे गीस। बीहनिया शहर के सबो बजार अउ दुकान बंद रीहिस। बंद के समर्थन म सिख समाज के लोगन मन शहर म पैदल मार्च करीन। बंद ल भाजपा अउ चेबर ऑफ कॉमर्स ह अपन दे रीहिस।
केंद्र गरीब कल्याण योजना
सूचना अउ प्रसारण मंत्रालय के केंद्रीय संचार ब्यूरो क्षेत्रीय कार्यालय कंाकेर कोति ले कोंडागंाव जिला के गांव शामपुर म केंद्र के एनडीए सरकार के सेवा, सुशासन अउ गरीब कल्याण योजना के नौ बछर म विशेष प्रचार कार्यक्रम के आयोजन करे गीस। कार्यक्रम म मंा शारदा लोककला मंडली जगदलपुर के कलाकार मन ह सुघ्घर प्रस्तुती दीन संगेसंग चित्रकला, मेंहदी, रंगोली अउ कुर्सीदौड़ प्रतियोगिता राखे गीस। कार्यक्रम म आयुष्मान भारत योजना, प्रधानमंत्री उज्जवला योजना, प्रधानमंत्री अन्न योजना, के संगेसंग कौशल विकास अउ प्रधानमंत्री विश्वकर्मा योजना के संबंध म जानकारी दे गीस।
माओवादी
सुकमा जिला म आज एक लाख रूपिया के इनामी समेत छै झिन माओवादी मन ह आत्मसमर्पण करीन हे। खबर के मुताबिक पुलिस कोति ले चलाये जात पूना नरकोम अभियान म ये जम्मों माओवादी, जिला पुलिस बल अउ सीआरपीएफ के अधिकारी मनके आगू आत्मसमर्पण करीन। ये माओवादी एल्मागुंडा क्षेत्र क म सक्रिय रीहिन।
सुहाग के परब हरतालिका तीज-तीजा आज प्रदेशभर म भक्तिभाव अउ उछाह के संग मनाये जात हे। ये दिन सुहागिन निर्जला व्रत राखके अपन घर-गोसइया के लंबा उमर खातिर कामना करथे। राज्यपाल विश्वभूषण हरिचंदन अउ मुख्यमंत्री भूपेश बघेल ह तीजा के बधाई अउ शुभकामना दीन हे।
काली गणेश चतुर्थी हे। विघ्नहर्ता भगवान श्री गणेश काली विराजहीं। गणेश उत्सव के तियारी जगा-जगा जोरदरहा होवत हे। राज्यपाल विश्वभूषण हरिचंदन, मुख्यमंत्री भूपेश बघेल अउ विधानसभा अध्यक्ष डॅाक्टर चरणदास महंत ह प्रदेशवासी मन ल गणेश चतुर्थी के बधाई अउ शुभकामना देत अपन संदेश म कहिन कि ये परब सामाजिक समरसता के सुघ्घर उदाहरण हरय।