प्रधानमंत्री नरेंद्र मोदी ह आज विश्वकर्मा जयंती के मउका म नई दिल्ली के यशोभूमि स्थित इंटरनेशनल कन्वेंशन अउ एक्सपो सेंटर म पीएम विश्वकर्मा नांव ले एक योजना के सुरूआत करिन। ए मउका म प्रधानमंत्री ह किहीन कि योजना ह लाखों कारीगर अउ शिल्पकार मन बर आशा के किरन हे, जउन हाथ अउ औजार ले कारज करथें। प्रधानमंत्री ह यशोभूमि ल देस के हर श्रमिक अउ शिल्पकार मन ल समर्पित करत किहीन कि भगवान विश्वकर्मा हजारों बछर ले भारत के समृध्दि के मूल म रेहे हें। ओमन यहू किहीन कि प्रशिक्षण, प्रौद्योगिकीय अउ उपकरण हमर कारीगर मन बर महत्वपूर्ण हें।
श्री मोदी ह किहीन कि विश्वकर्मा भागीदार मन ल मान्यता देना ए बेरा के जरूरत हे, अउ ओमन ल हरसंभव सहयोग मिलना चाही।
पीएम विश्वकर्मा योजना-छत्तीसगढ़-02
प्रधानमंत्री विश्वकर्मा योजना के सुभारंभ के मउका म आज राजधानी रइपुर के पंडित दीनदयाल उपाध्याय ऑडिटोरियम म कारीकरम के आयोजन करे गिस। कारीकरम ल संबोधित करत केंद्रीय जनजातीय कार्य राज्यमंत्री रेणुका सिंह ह किहीन कि प्रधानमंत्री नरेंद्र मोदी देस के शिल्पकार अउ कारीगर मन ल सशक्त बनाय बर सरलग उदिम करत हें। आज सुरू होय पीएम विश्वकर्मा योजना ले न सिरिफ शिल्पकार-कारीगर मन के सम्मान बाढ़ही, भलुक उंखर आजीविका के अवसर बाढ़ही अउ उंखर भविष्य उज्जर होही। ए योजना के तहत पारंपरिक कारीगर अउ शिल्पकार मन ल आर्थिक सहायता दे जाही। पहिली चरण म कामगार मन ल 5 प्रतिशत ब्याज दर ले 1 लाख रूपिया लोन मिलही। ए योजना ले कारीगर अउ शिल्पकार मन ल प्रशिक्षण घलो मिलही, संगेसंग योजना के हितग्राही मन ल टूलकिट अउ स्टायपेंड घलो दे जाही।
कारीकरम ल संबोधित करत रइपुर लोकसभा क्षेत्र ले सांसद सुनील सोनी ह किहीन कि ए योजना ले न सिरिफ कारीगर मन अपन बेवसाय ल बढ़ा सकहीं, भलुक आने लोगन ल रोजगार देय बर घलो सक्षम होहीं।
प्रधानमंत्री विश्वकर्मा योजना के सुभारंभ के मउका म आज बिलासपुर के रेलवे सभागार म घलो कारीकरम के आयोजन करे गिस। कारीकरम के मुख्य अतिथि केंद्रीय ग्रामीण विकास अउ इस्पात राज्यमंत्री फग्गन सिंह कुलस्त रिहीन। ओमन किहीन कि प्रधानमंत्री ह ए बात ल भली-भांति जानत हें कि निम्न आय वर्ग के लोगन के उत्थान ले सक्षम भारत के सपना साकार होही। कारीकरम म विधायक धरमलाल कौशिक घलो मौजूद रिहीन।
जी-20 बैठक
जी-20 के चौथा फ्रेमवर्क वर्किंग ग्रुप के दू दिवसीय बइठका काली ले नवा रइपुर म सुरू होही। बइठका म हिस्सा ले बर बिदेस ले आए मेहमान मन के आज स्वामी विवेकानंद हवाईअड्डा म पारंपरिक रूप ले स्वागत करे गिस। ए बइठका म 28 देस के डेलीगेट्स सामिल होही।
बइठका म बिदेस मेहमान मन ल वनोपज ल बनाय खास उत्पाद के संगेसंग छत्तीसगढ़ के चिन्हारी के रूप म बस्तर आर्ट के उपहार भेंट करे जाही। जी-20 के माध्यम ले छत्तीसगढ़ी संस्कृति के प्रचार-प्रसार हो सकही।
स्वास्थ्य मंत्रालय-सम्मान
केंद्रीय स्वास्थ्य मंत्रालय ह रोगी सुरक्षा गतिविधि मन ल ‘‘सकुशल‘‘ माध्यम ले लागू करे के सेति छत्तीसगढ़ ल सम्मानित करे हे। विश्व रोगी सुरक्षा दिवस के मउका म नई दिल्ली म आयोजित कारीकरम म छत्तीसगढ़ ल एखर बर प्रोत्साहन प्रमाण पत्र प्रदान करे गिस। कारीकरम म केंद्रीय स्वास्थ्य मंत्रालय के संयुक्त सचिव विशाल चौहान ह प्रदेस के राष्ट्रीय गुणवत्ता आश्वासन प्रमाण पत्र मिले अस्पताल मन ल गुणवत्ता मानक बनाय राखे बर किहीन। ओमन सबो राज्य मन के सरकारी अस्पताल मन ल घलो जल्दी गुणवत्ता आश्वासन प्रमाण पत्र पाय के तइयारी करे बर किहीन, जेखर ले देस के सबो सरकारी अस्पताल म मरीज मन ल एक्केे बरोबर स्वास्थ्य सुविधा देय जा सकय।
बतादन कि रोगी मन के सुरक्षा के बारे म दुनियाभर के लोगन ल जागरूक करे के उद्देश्य ले हर बछर 17 सितंबर के विश्व रोगी सुरक्षा दिवस मनाय जाथे।
भाजपा-परिवर्तन यात्रा
भारतीय जनता पार्टी के डहार ले ए बेरा प्रदेस म परिवर्तन यात्रा निकाले जावत हे। दंतेवाड़ा ले सुरू होय पहिली यात्रा आज मोहला पहुंचिस। ए दौरान भाजपा कार्यकर्ता मन यात्रा के जोरदार स्वागत करिन। ए परिवर्तन यात्रा म गोवा के मुख्यमंत्री डॉक्टर प्रमोद सावंत अउ पूर्व मंत्री महेश गागड़ा सामिल होइन। एखर बाद परिवर्तन यात्रा खुज्जी पहुंचिस। भाजपा के प्रदेस अध्यक्ष अरूण साव यात्रा म सामिल होइन अउ एक आमसभा ल संबोधित करिन। ए मउका म भाजपा प्रत्यासी गीता साहू घलो मौजूद रिहीन।
उहें, जशपुर ले सुरू होय दूसर परिवर्तन यात्रा के रथ पत्थलगांव होवत आज बिहनिया सीतापुर पहुंचिस, जिहां आदिवासी नेता अउ पूर्व मंत्री रामविचार नेताम, संगे पूर्व प्रदेस अध्यक्ष विष्णुदेव साय ह सभा ल संबोधित करिन। ए मउका म श्री साय ह किहीन कि यात्रा ल मिलइया समर्थन ले ए बात जाहिर होवत हे, कि सरकार के वादाखिलाफी जवाब दे बर जनता चेत गेहे।
भाजपा घोषणा पत्र समिति बैठक
भारतीय जनता पार्टी के घोषणा पत्र समिति के बइठका प्रदेस संयोजक विजय बघेल के अगुवई म संपन्न होइस। रइपुर के कुशाभाऊ ठाकरे परिसर म आयोजित बइठका म समिति के जम्मो कारज के समीक्षा करे गिस। बइठका म घोषणा पत्र समिति ल बिस्तार देवत विभागवार 15 ठन उपसमिति बनाय गिस। पंकज झा ल समिति के सचिव बनाय गे हे। उंहे, डॉक्टर सलीम राज ल नवा सदस्य अउ समिति के प्रचार-प्रसार तकनीकी सहायता बर अनुराग अग्रवाल, सोशल मीडिया संयोजक सोमेश पांडे अउ सुनील पिल्लई ल आईटी विभाग के जिम्मेवारी सौंपे गिस हे।
बइठका म बताय गिस की समिति ल अभी तक सोशल मीडिया के जरिया ले सबो विधानसभा के सुझाव पत्रिका में ले, करीबन 1 लाख 35 सुझाव मिल चुके हे। ए समिति प्रदेस म 16 ले 30 सितंबर तक विधानसभावार भ्रमण करके आम जनता ले भेंट करही, अउ उंकर ले सुझाव मांगही।
विस चुनाव-परिवहन विभाग चेकिंग
अवइया विधानसभा चुनाव ल देखत निर्वाचन आयोग के निरदेस म प्रदेस के सबो 16 टोल पोस्ट अउ 7 उड़नदस्ता के संग परिवहन विभाग ह सघन जांच अभियान चलावत हे। चुनाव ल चेत म राखत सबो जांच स्थल म चारपहिया मालवाहक वाहन अउ संदिग्ध लोगन के जांच के निरदेस देय गेहे। संगे-संग निर्धारित मात्रा ले जादा नगद रकम, शराब, बिना वैध दस्तावेज के परिवहन करइया सोना-चांदी, अउ चुनाव ल प्रभावित करइया आने जिनिस के अवैध रूप ले परिवहन ल रोके बर विभाग डहार ले जरूरी प्रयास करे जावत हे।
भिलाई हत्या-अरूण साव
भिलाई के खुर्सीपार म बीते रतिहा एक युवक के मामूली बात ल लेके हत्या कर दे गिस। मिले जानकारी ले मलकीत सिंह नांव के युवक के कोनो बात ल लेके आने युवक मन ले विवाद होइस, जेखर बाद घुस्साय युवक मन पीट-पीट के हत्या कर देइन। मउका म पुलिस ह 5 झन आरोपी मन ल हिरासत म लेहे। उंहे, 1 झन आने युवक ले पूछताछ करत हे। ए घटना के बाद सिक्ख समाज के लोगन खुर्सीपार थाना म जमके विरोध प्रदर्सन करीन।
घटना उपर भाजपा के प्रदेस अध्यक्ष अरूण साव अउ पूर्व मंत्री प्रेमप्रकाश पांडेय ह आज मृतक के परिजन ले भेंट करीन। श्री साव ह किहीन कि सरेआम युवक के हत्या ए बताथे कि छत्तीसगढ़ के कानून बेवस्था कोन डहार जावत हे। ओमन ए मामला के फास्ट ट्रैक कोर्ट ले सुनवाई अउ पीड़ित परिवार ल तुरते 50 लाख रूपिया मुआवजा रासि देय के मांग करीन हें।
कांकेर-आत्महत्या
कांकेर म छत्तीसगढ़ सशस्त्र बल-सीएएफ के जवान ह खुद ल गोली मार के आत्महत्या कर लिस। जवान के नांव चन्द्रशेखर यादव बताय जात हे। जानकारी के मुताबिक जवान के पोस्टिंग कांकेर म रिहिस, अउ हल्वा चौकी मोर्चा ड्यूटी म तैनात रिहीस। ड्यूटी के बेरा जवान ह अपन सर्विस रिवाल्वर ले खुद ल गोली मार लिस। मृतक जवान धमतरी जिला के रूद्री के रहइया रिहीस हे। फेरहाल पुलिस ह घटना के जांच करत हे।