प्रधानमंत्री नरेंद्र मोदी काली विश्वकर्मा जयंती के अवसर म नई दिल्ली के इंडिया इंटरनेशनल कन्वेंशन सेंटर म पीएम विश्वकर्मा योजना के वर्चुअल माध्यम ले सुभारंभ करही। देस भर म होवइया ए कारीकरम के तहत भारतीय जनजातीय सहकारी, विपणन विकास महासंघ ट्रायफेड डहार ले छत्तीसगढ़ के राजधानी रायपुर स्थित पंडित दीनदयाल उपाध्याय ऑडिटोरियम म कार्यक्रम आयोजित करे जाही। ए अवसर म केंद्रीय जनजातीय कार्य राज्यमंत्री रेणुका सिंह अउ रायपुर लोकसभा क्षेत्र के सांसद सुनील सोनी समेत दूसर जन-प्रतिनिधि मन मौजूद रइही। उंहे, बिलासपुर म आयोजित कार्यक्रम म केंद्रीय राज्य मंत्री फग्गन सिंह कुलस्ते मुख्य अतिथि के रूप म सामिल होही।
उल्लेखनीय हे कि पीएम विश्वकर्मा के उद्देश्य न केवल देसभर के ग्रामीण अउ सहरी क्षेत्र मनके कारीगर अउ शिल्पकार मन ल आर्थिक रूप ले समर्थन देना आय बल्कि स्थानीय उत्पाद, कला अउ शिल्प के माध्यम ले सदियों पुराना परंपरा, संस्कृति अउ विविध विरासत ल जीवित अउ समृध्द रखना घलो आय। श्री मोदी पारंपरिक शिल्प म लगे लोगन मन के सहायता करे उपर हमेसा ध्यान देवत रहिथे। अठ्ठारा ठन पारंपरिक शिल्पकार अउ करमी मन ल सामिल करइया ए योजना के मुख्य उद्देश्य उत्पाद अउ सेवा मन ल सर्व सुलभ अउ गुणवत्ता म सुधार करना आए।
पीएम विश्वकर्मा योजना शुभारंभ-02
केंद्र सरकार ह ए योजना म तेरह हजार करोड़ रूपिया खर्च करही। एखर तहत बायोमेट्रिक- आधारित पीएम विश्वकर्मा पोर्टल के उपयोग करके जन सेवा केंद्र मनके माध्यम ले विश्वकर्मा मनके निःसुल्क पंजीकरण करे जाही। उनला पीएम विश्वकर्मा प्रमाण पत्र अउ पहिचान पत्र दे जाही। जेखर ले उनला अपन कौसल म मान्यता मिलही। एखर अलावा बुनियादी अउ उन्नत प्रशिक्षण समेत कौशल उन्नयन अउ पंद्रह हजार रूपिया के टूलकिट प्रोत्साहन के रूप म दे जाही। विश्वकर्मा मन ल पांच प्रतिशत के रियायती ब्याज दर म पहिली किस्त म एक लाख रूपिया अउ दूसरया किस्त म दू लाख रूपिया के सहायता रासि बिना कोनो गारंटी के जाही।
भाजपा परिवर्तन यात्रा -01
भारतीय जनता पार्टी डहार ले सुरू करे गे परिवर्तन यात्रा के कुनकुरी पहंुचे ले कार्यकर्ता अउ आम लोगन मन डहार ले स्वागत करे गिस। कार्यक्रम म पूर्व केंद्रीय मंत्री अउ सांसद जुएल उरांव, नेता प्रतिपक्ष नारायण चंदेल, पूर्व प्रदेस अध्यक्ष विष्णुदेव साय, सांसद गोमती साय, गुहाराम अजगले अउ रामविचार नेताम समेत अलग-अलग पदाधिकारी अउ कार्यकर्ता मन सामिल होइन। ए अवसर म पूर्व केंद्रीय मंत्री श्री उरांव ह आरोप लगइन कि कांग्रेस ह कभू भी जनजातीय समुदाय ल आगू बढ़न नइ दिन। जबकि आज प्रधानमंत्री नरेंद्र मोदी के नेतृत्व वाले केंद्र सरकार म छह झन मंत्री जनजातीय समुदाय ले हवय। प्रदेस म ए बखत परिवर्तन होके रइही। कार्यक्रम के दौरान सैकड़ो लोगन मन भाजपा म प्रवेश घलो करीन।
एखरे संग कुनकुरी म समाज प्रमुख मन ले बइठका म जनजातीय समुदाय बर केंद्र सरकार डहार ले करे गे कार्य मन के विस्तार पूर्वक चर्चा करे गिस।
ओति, भारतीय जनता पार्टी के परिवर्तन यात्रा के आज राजनांदगांव जिला के डोंगरगांव पहुंचे ले भारतीय जनता युवा मोर्चा के कार्यकर्ता मन ह मोटर सायकल रैली निकाल के स्वागत करीन। अइसने बालोद जिला के डौण्डीलोहारा म घलो परिवर्तन यात्रा के स्वागत करे गिस। ए मउका म केंद्रीय पंचायत राज्य मंत्री कपिल मोरेश्वर अउ भाजपा के प्रदेस अध्यक्ष अरूण साव ह बालोद म गंगा मैइया मंदिर म पूजा अर्चना कर प्रदेस के खुशहाली बर कामना करीन। ए दौरान ओमन छत्तीसगढ़ के कांग्रेस सरकार उपर जनता के संग वादा खिलाफी करे समेत कई ठन आरोप लगइन।
प्रमोद सावंत-पत्रकारवार्ता
गोवा के मुख्यमंत्री प्रमोद सावंत ह किहीन हे कि भारतीय जनता पार्टी के परिवर्तन ल मिलत जन समर्थन ल देख के कांग्रेस अब मान चुके हे कि छत्तीसगढ़ म ओमन सत्ता म नइ आने वाला हे। श्री सावंत ह शनिवार के रायपुर के एकात्म परिसर स्थित भाजपा कार्यालय म पत्रकारवार्ता ल संबोधित करत हुए किहीन कि कांग्रेस डहार ले करे जात कथित घोटाला ले पूरा देस के जनता हैरान हे। केंद्र सरकार के पूरा मदद मिले के बावजूद कांग्रेस सरकार राज्य के जनता तक मदद नही पहुंचन देवत हे। श्री सावंत ह किहीन कि केंद्र अउ प्रदेस दूनों म भाजपा के सरकार होय ले छत्तीसगढ़ तेज गति ले विकास करही, अउ प्रधानमंत्री नरेंद्र मोदी के आकांक्षा के अनुरूप इंहा, घलो सेवा-सुशासन अउ गरीब कल्याण के मार्ग प्रशस्त होही। श्री सावंत ह किहीन कि किसान मन के ए प्रदेस म केंद्र सरकार ह कांग्रेस के सरकार होय के बावजूद चौहत्तर हजार करोड़ रूपिया के रासि धान खरीदी बर देहे, अउ पाछू पांच बछर म दू लाख करोड़ रूपिया ले जादा के रासि अलग-अलग योजना मनके क्रियान्वयन अउ कर मन के हिस्सेदारी के रूप म देहे।
कांग्रेस समिति बैठका
कांग्रेस कार्य समिति के पहिली बइठका आज तेलांगाना के हैदराबाद म आयोजित करे गिस। पार्टी के राष्ट्रीय अध्यक्ष मल्लिकार्जुन खड़गे के अध्यक्षता म आयोजित बइठका म छत्तीसगढ़ के मुख्यमंत्री भूपेश बघेल घलो सामिल होइन। ए बइठका म छत्तीसगढ़ समेत पांच ठन राज्य मन के आगामी विधानसभा चुनाव के तैयारी ल लेके चर्चा करे गिस। काली सत्रह सितंबर के कांग्रेस कार्य समिति के विस्तारित बइठका होही। एखर बाद कांग्रेस पार्टी विजयभेरी रैली म तेलांगाना बर छह ठन गारंटी के घोषणा करही।
स्वच्छता पखवाड़ा
दक्षिण पूर्व मध्य रेलवे डहार ले ‘‘स्वच्छ रेल-स्वच्छ भारत‘‘ के तहत आज ले स्वच्छता पखवाड़ा सुरू होवत हे। दू अक्टूबर तक चलइया ए पखवाड़ा के दौरान रेल यात्री मन ले यात्रा के दौरान ‘‘मेरी सीट मेरा डब्बा‘‘ अभियान के अंतर्गत साफ-सफाई अउ स्वच्छता बनाय रखे बर बिसेस आहवान करे जाही। स्वच्छता पखवाड़ा के सुभारंभ आज महाप्रबंधक कार्यालय बिलासपुर ले प्रभात फेरी निकाल के करे गिस ए प्रभात फेरी बिलासपुर रेलवे स्टेशन तक निकाले गिस। ए दौरान स्लोगन अउ पोस्टर के माध्यम ले स्वच्छता जागरूकता के संदेस दे गिस। जोनल मुख्यालय म पहलइया दिन दक्षिण पूर्व मध्य रेलवे के अपर महाप्रबंधक विजय कुमार साहू ह सबो विभागाध्यक्ष अउ अधिकारी, कर्मचारी मन ल स्वच्छता के सपथ दिलइन।
जोनल मुख्यालय के संगेसंग तीनों रेल मंडल म घलो अधिकारी कर्मचारी मन ल स्वच्छता के सपथ दिलाय गिस। स्वच्छता पखवाड़ा के दौरान सबो स्टेशन अउ ट्रेन म हर दिन के थीम के अनुसार अलग-अलग कार्यक्रम के आयोजन करे जाही।
उंहे, रायपुर रेल मंडल म घलो स्वच्छता पखवाड़ा अभियान के अंतर्गत आज मंडल रेल प्रबंधक संजीव कुमार ह रायपुर अउ नागपुर रेल मंडल के अधिकारी अउ कर्मचारी मन ल स्वच्छता के सपथ दिलइन।
माओवादी समर्पण/गिरफ्तार
सुकमा जिला म एक लाख के ईनामी समेत चार झन माओवादी मन ह पुलिस के पूना नार्कोम अभियान ले प्रभावित होके पुलिस के समक्ष आत्समर्पण कर दीन। पुलिस अधीक्षक किरण चव्हान ह बतइन कि आत्म समर्पित ए सबो माओवादी चिन्तागुफा थाना क्षेत्र म पाछू पांच बछर ले माओवादी संगठन म सक्रिय रिहीन। ए माओवादी मन के खिलाफ कई ठन थाना म अलग-अलग माओवादी वारदात म सामिल होय के आरोप हे।
उंहे, इही जिला के फूलबगड़ी थाना क्षेत्र म सर्चिंग के दउरान डीआरजी अउ जिला पुलिस बल के संयुक्त टीम ह ग्राम मुलेर अउ बड़ेसट्टी करा ले एक झन माओवादी ल गिरफ्तार करे हे। गिरफ्तार माओवादी करा ले एक ठन पांच किलो के टिफिन बम समेत दूसर माओवादी सामग्री बरामद करे गेहे।
स्काउट गाइड-शिविर
जांजगीर-चांपा के केंद्रीय विद्यालय म स्काउड गाइड के तीन दिवसीय प्रदेस स्तरीय तृतीय सोपान सिविर के आयोजन करे गिस। ए सिविर म प्रदेस के सत्ताईस ठन केंद्रीय विद्यालय के एक सौ पचहत्तर स्काउड गाइड समेत केंद्रीय विद्यालय के स्काउड गाइड ले जुड़े शिक्षक मन घलो सामिल होइन। सिविर म विद्यार्थी मन ल नैतिक शिक्षा के माध्यम ले कठिनाई मन के सामना के संबंध म प्रशिक्षण दे गिस।