आज दिनभर के खबर ल अपन गुरतुर छत्तीसगढ़ी भाखा म पढ़व

आवासहीन पट्टा

राज्य सरकार नगरीय क्षेत्र मन म शासकीय भूमि म पाछू बीस अगस्त दू हजार सत्रह ले लगातार रहइया आवासहीन लोगन मन ल निःसुल्क पट्टा दीहि। राजस्व अउ आपदा प्रबंधन विभाग ह एखर बर पट्टाधृति अधिकार अधिनियम दू हजार तेइस के अधिसूचना के प्रकासन राजपत्र म कर देहे। नगर-निगम क्षेत्र म आवासहीन मनखे छै सौ वर्गफीट अउ नगर-पालिका अउ नगर-पंचायत क्षेत्र मन म आठ सौ वर्गफीट शासकीय भूमि के पट्टा बर पात्र होही। लेकिन एखर बर जल संरक्षण अधिनियम के प्रावधान अउ सर्वोच्च न्यायालय के निर्णय के पालन सुनिश्चित करना होही।
जम्मों नवा पट्टा निःसुल्क होही अउ सब्बों काम बर ए मन ल रियायती पट्टा माने जाही। शासकीय भूमि म कब्जा के सत्यापन बर आधार दस्तावेज दू हजार सत्रह ले पहिली जारी होना चाही। एमा मतदाता सूची, बिजली बिल, संपत्ति कर अउ आधार या ड्राइविंग लाइसेंस सामिल हरय। उंहे, कब्जा के भूमि ल लोकहित म खाली कराय जाय के जरूरत होय म प्रशासनिक अधिकारी के लिखित आदेस ले पात्र मनखे मन ल दूसर जघा व्यवस्थापित करे जा सकथे।

बारिश

प्रदेश म पाछू दू दिन ले होवत सरलग बरसा ले जनजीवन प्रभावित होगे हे। उंहे कई ठिन नदी नाला उफान म होय के सेती बहुत अकन रद्दा म अवई जवई बाधित हे।
मिले जानकारी अनुसार सक्ती जिला के बोराई नदी म पुलिया ले एक फीट उपर पानी बोहात हे, एखरे सेती डभराहसौद रद्दा म अवई जवई प्रभावित होय हे। प्रशासन कोति ले लोगन मन ल पुलिया पार नइ करे के समझाईश दे जात हे। उंहे जांजगीर चंापा जिला म रिंगनी-कुकदा के कंजीनाला म पुल ले दू फीट उपर पानी बहत हे, एखर सेती शिवरीनारायण-जांजगीर मुख्य मार्ग बाधित होय हे। सरलग बरसा के कारण बिलारी नाला पुल म घलो पानी बहत हे। इही बीच इही जिला के बलौदा अंतर्गत ग्राम पहरिया म खेत म काम करे के दौरान गाज गिरे ले एक महिला के मौत होगे, जबकि दू झन दूसर महिला झुलस गे, जेमन ल अस्पताल म भर्ती कराय गेहे।
एति बेमेतरा जिला म रूक रूकके बारिश होय के सेती जनजीवन अस्त व्यस्त होगे हे। शिवनाथ नदी म उफान होय के कारण आसपास के कुछएक गांव मन म पानी भर गेहे। उंहे नगर पंचायत नवागढ़ के बस स्टेण्ड म घलो पानी भर गेहे। एखर अलावा जलगांव म पानी घुसे के सेती सोसायटी म राखे गे राशन सामग्री घलो भींज गे । अइसने साजा विधानसभा के बिरनपुर गांव म घलो पानी भर गे जेखर ले अवई जवई बाधित होगे हे।
इही बीच मौसम विभाग ह अवइया चौबीस घंटा के दउरान प्रदेश के अनेक जगा मन म हल्का ले मध्यम बरसा होय या गरज चमक के संग गाज गिरे के आशंका जताय हे।

राज्यपाल दीक्षांत समारोह

शिक्षा एक आजीवन यात्रा हरय अउ सीखे के प्रक्रिया कभू रूकना नही चाही। विद्यार्थी मन म नवाचार रचनात्मकता अउ आजीवन सीखे के भावना होना चाही। ए बात राज्यपाल विश्वभूषण हरिचंदन ह आज आई.टी.एम. विश्वविद्यालय रायपुर के दीक्षांत समारोह के दौरान कहिन। पंडित दीनदयाल उपाध्याय ऑडिटोरियम म राखे गे आठवंा दीक्षांत समारोह म विद्यार्थी मन ल तेरा गोल्ड मेडल समेत तीन सौ सतहत्तर उपाधि वितरित करे गीस। ए मउका म केंद्रीय भंडार के सीईओ अउ एम.डी. मुकेश कुमार, आई.टी.एम. के प्रोफेसर आर.एस.एस. मनी अउ कर्नाटक संगीत विशेषज्ञ जी.शारदा सुब्रमण्यम ल विश्वविद्यालय के मानद उपाधि प्रदान करे गीस।

शिक्षक-आदेश निरस्तीकरण

प्रदेस म शिक्षक मन के पदोन्नति के बाद करे गे संशोधन आदेस निरस्तीकरण ल लेके निरदेस जारी करे गे हे। स्कूल शिक्षा विभाग के अनुसार छत्तीसगढ़ उच्च न्यायालय डहार ले दे गे निर्णय के परिप्रेक्ष्य म महाधिवक्ता कार्यालय ले अभिमत चाहे गे रिहीस। ए अभिमत के अनुसार जउन शिक्षक मन के संशोधित आदेस निरस्त करे गे रिहीस, यदि ओमन अपन इच्छा ले अपन मूल पदस्थापना जघा जिहां पदोन्नति के बाद सबले पहिली पदस्थ करे गे रिहीन उंहा कार्यभार ग्रहण कर सकत हे। महाधिवक्ता कार्यालय ले यहू कहे गे हे कि कोनो शिक्षक के खिलाफ व्यक्तिगत अवचार के कोनो प्रकरण होही त ओखर खिलाफ अनुशासनात्मक कार्रवाई करे जाही।

स्वच्छता पखवाड़ा

दक्षिण पूर्व मध्य रेलवे के रईपुर रेल मंडल म काली सोलह सितंबर ले स्वच्छता पखवाड़ा के आयोजन करे जाही। दू अक्टूबर तक चलइया ए पखवाड़ा के दउरान हरेक दिन आने-आने कारीकरम राखे जाही। काली स्वच्छता पखवाड़ा के सुभारंभ प्रभात फेरी निकाल के करे जाही। ए दउरान लोगन मन ल स्वच्छता के प्रति शपथ घलो दिलाय जाही। ए स्वच्छता रैली म रईपुर रेल मंडल के अधिकारी अउ स्काउड गाईड अउ खेल संघ के पदाधिकारी सामिल होहीं। अइसने सत्रह सितंबर के स्वच्छ संवाद, अठ्ठारा अउ उन्नीस सितंबर के स्वच्छ स्टेशन अउ बीस अउ इक्कीस सितंबर के स्वच्छ रेलगाड़ी बिसय उपर स्वच्छता अभियान चलाय जाही।

बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत पोषण माह उपर एम्स रायपुर के डॅाक्टर तुषार जगजापे ले लेगेे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली सोला सितंबर के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।

जनजातीय महिला कार्यशाला

राज्य के जनजातीय महिला मन बर लघु वनोपज के भंडारण पैकेजिंग अउ विपणन उपर नवा रायपुर म तेरा ले पंद्रह सितंबर तक प्रशिक्षण सह कार्यशाला के आयोजन करे गीस। आदिम जाति अनुसंधान अउ प्रशिक्षण संस्थान डहार ले राखे गे ए कार्यक्रम के माध्यम ले जनजातीय महिला मन ल आर्थिक उन्नति अउ उचित प्रबंधन के बारे म प्रशिक्षण दे गीस। संस्थान के संयुक्त संचालक प्रज्ञान सेठ ह बताइन कि जनजातीय क्षेत्र मन म वनोपज संग्रहण, भंडारण अउ ओखर पैकेजिंग ल आकर्षक बनाके बाजार म कइसे सुसज्जित रूप ले बेचे जा सकत हे एखर जानकारी महिला मन ल दे गीस।

आपात अलर्ट प्रणाली परीक्षण

राष्ट्रीय आपदा प्रबंधन प्राधिकरण-एनडीएमए ह आज आपदा प्रबंधन बर देशभर म आपात अलर्ट प्रणाली के परीक्षण करीस। देशभर म लोगन मन ल ए संबंध म ओमन के स्मार्ट फोन म फ्लैश मैसेज आवत हे। एनडीएमए अलर्ट प्रणाली के प्रभाव के आकलन करे अउ कोनो संभावित समस्या के पता लगाय बर ए परीक्षण करे जात हे ।

ईडी

ईडी ह ऑनलाइन सट्टा महादेव ऐप के खिलाफ बड़का कार्रवाई करत एखर ले जुड़े लोगन मन करा ले चार सौ सतरा करोड़ रूपिया नकद अउ आभूषण जब्त करे हे। ईडी ह ए कार्रवाई कोलकाता, भोपाल, मुंबई समेत कई ठिन शहर म तलाशी अभियान के दउरान करीस।

अभियंता दिवस

आज अभियंता दिवस हरय। प्रधानमंत्री नरेंद्र मोदी ह ए मउका म जम्मों इंजीनियर मन ल शुभकामना दीन हे। अपन संदेश म प्रधानमंत्री ह कहिन कि ओमन के नवोन्वेशी विचार अउ समर्पण देश के प्रगति बर महत्वपूर्ण हवय। अभियंता दिवस के मउका म श्री मोदी ह दूरदर्शी अउ प्रख्यात इंजीनियर सर मोक्षगुण्डम विश्वेश्वरैया ल श्रद्धंाजलि दीन।