प्रधानमंत्री-छत्तीसगढ़ 01
प्रधानमंत्री नरेंद्र मोदी ह कहिन हे कि आधुनिक विकास के संग गरीब कल्याण के भारतीय मॉडल के दुनियाभर म तारीफ होवत हे। आज छत्तीसगढ़ के रायगढ़ म एक ठन कार्यक्रम म प्रधानमंत्री ह कहिन कि अमृत काल के अवइया पच्चीस बछर म देश ल विकसित बनाना हे। ए काम तभी पूरा हो सकत हे जब हर देशवासी एमा भाग लीही। ओमन कहिन कि हमन ल उर्जा के जरूरत ल पूरा करे के संगेच पर्यावरण के घलो चिंता करना हे। श्री मोदी ह कहिन कि केंद्र सरकार ह जउन दिशा म काम करत हे ओखर ले देश के पर्यावरण के रक्षा होही अउ संगेसंग वन संपदा ले खुशहाली के रद्दा घलो खुलही। ए प्रयास के लाभ ए क्षेत्र म रहइया जनजाती वर्ग के लोगन ल विशेष रूप ले मिलही।
प्रधानमंत्री ह कहिन कि पाछू नौ बछर म केंद्र सरकार ह छत्तीसगढ़ के बहुमुखी विकास बर सरलग काम करे हे। छत्तीसगढ़ हमर बर देश के विकास के पावर हाउस जइसन हे अउ देश ल आगू बढ़ाय के तभे मिलही, जब ओखर पावर हाउस अपन पूरा ताकत म काम करही। प्रधानमंत्री ह कहिन कि आज विकास म देश के हर राज्य हर इलाका ल बराबर प्राथमिकता मिलत हे।
ये मउका म प्रधानमंत्री ह छै हजार चार सौ करोड़ रूपिया ले जादा रेल परियोजना मन ल राष्ट्र ल समर्पित करीन। एमा छत्तीसगढ़ पूर्व रेल परियोजना चरण-एक, चंापा ले जमगा के बीच तीसरा रेललाइन, पेण्ड्रा रोड ले अनुपपूर के बीच तीसरा रेललाइन अउ तलाईपाली कोयला खदान ल एनटीपीसी लारा सुपर थर्मल पावर स्टेशन ले जोड़ने वाला परियोजना मेरी-गो-राउंड शामिल हे। ये रेल परियोजना मन ह ए क्षेत्र म यात्री मनके अवई जवई के संगेच माल ढुलाई ल घलो सुविधाजनक बनाके सामाजिक-आर्थिक विकास ल गति दीही।
प्रधानमंत्री-छत्तीसगढ़ 02
कार्यक्रम के दउरान प्रधानमंत्री ह छत्तीसगढ़ के नौ ठिन जिला-दुर्ग, राजनंादगंाव, कोंडागांव, गरियाबंद, जशपुर, सूरजपुर, सरगुजा, बस्तर अउ रायगढ़ म पचास बिस्तर वाले क्रिटिकल केयर ब्लॉक के आधारशिला राखीन। एखरे संग प्रधानमंत्री ह एक लाख सिकलसेल परामर्श कार्ड के वितरण घलो करीन। ए परामर्श कार्ड के वितरण राष्ट्रीय सिकलसेल एनीमिया उन्मूलन मिशन के तहत करे गे हवय।
प्रधानमंत्री भाजपा रैली
प्रधानमंत्री ह आज रायगढ़ के कोंडातराई म भारतीय जनता पार्टी डहार ले आयोजित विजय शंखनाद रैली ल घलो संबोधित करीन। ए मउका म ओमन कीहिन कि वंचित मन ल प्राथमिकता देना ही आज के भारत के प्राथमिकता हवय। ओमन कीहिन कि केंद्र के भाजपा सरकार के प्रयास ले पाछू पांच बछर म तेरा करोड़ ले जादा लोगन गरीबी रेखा ले उपर आगे हवय।
प्रधानमंत्री ह कहिन कि केंद्र के भाजपा सरकार छत्तीसगढ़ के विकास बर कोनो कसर नइ छोड़त हे। श्री मोदी ह आरोप लगाइन कि छत्तीसगढ़ के कंाग्रेस सरकार गरीब कल्याण के बजाय सिर्फ भ्रष्टाचार अउ घोटाला करे म लगे हे। ओमन कीहिन कि राज्य के कंाग्रेस सरकार के सेती केंद्र डहार ले लोगन के कल्याण बर चलाये जावत आने आने योजना जनता तक नइ पहुंच पावत हे।
भाजपा परिवर्तन यात्रा
भारतीय जनता पार्टी के दूसरा परिवर्तन यात्रा के रथ काली जशपुर ले रवाना होही। मॅंा रानी खुड़िया देवी के पूजा अर्चना के बाद पार्टी के राष्ट्रीय अध्यक्ष जे.पी. नड्डा ह ए रथ ल हरा झंडा देखाहीं। विधानसभा म नेता प्रतिपक्ष नारायण चंदेल ह ए यात्रा के अगवई करही। उंहे पूर्व सांसद रामविचार नेताम के अलावा मोतीलाल साहू अउ प्रदेश प्रवक्ता अनुराग सिंह देव ल एखर संयोजक बनाय गे हवय।
रायपुर के कुशाभाउ ठाकरे परिसर प्रदेश कार्यालय ले आज सांसद सुनील सोनी अउ पूर्व मंत्री बृजमोहन अग्रवाल ह ये रथ ल जशपुर बर रवाना करीन। जशपुर ले शुरू होवइया भाजपा के परिवर्तन यात्रा दू संभाग के चौदा ठन जिला के उनचालीस विधानसभा क्षेत्र तक पहुंचही। ये दउरान हर विधानसभा क्षेत्र म आमसभा घलो होही।
खबर के मुताबिक भाजपा के परिवर्तन यात्रा के पहला चरण बीते बारा सितंबर के दंतेवाड़ा ले शुरू होय हे।
नारायणपुर जलजीवन सर्वेक्षण
आंकाक्षी जिला नारायणपुर ल जल जीवन सर्वेक्षण म उत्कृष्ट काम बर केंद्रीय जलशक्ति मंत्रालय ह सम्मानित करे हे। ए उपलब्धि म मुख्यमंत्री भूपेश बघेल ह नारायणपुर के लोगन ल बधाई दीन हे। खबर के मुताबिक केंद्र सरकार डहार ले जलजीवन सर्वेक्षण एक अक्टूबर दू हजार बाईस ले तीस जून दू हजार तेईस तक कराये गीस। एमा आंकाक्षी जिला के अंतर्गत नारायणपुर जिला के काम ल सुघ्घर पाये गीस। ए जिला बर जल जीवन मिशन तीस हजार ले जादा परिवार तक पीये के साफ पानी पहुंचाये के लक्ष्य राखे रीहिस। एमा अठारा हजार ले जादा घर ल नल कनेक्शन दे जा चुके हे। चौदा ठन गांव अइसन हे जिहंा शत प्रतिशत परिवार ल ए सुविधा दे गेहे।
जल जीवन मिशन के संचालक आलोक कटियार ह बताइन कि वर्तमान स्थिति म राज्य म औसतन रोजाना सात हजार नल कनेक्शन दे जावत हे। अभी तक साठ प्रतिशत घर म जल आपूर्ति होवत हे।
हेल्थ फेडरेशन-हड़ताल स्थगित
बीते इक्कीस अगस्त ले जारी छत्तीसगढ़ हेल्थ फेडरेशन के प्रदेश स्तरीय हड़ताल स्थगित होगे हे। फेडरेशन के प्रतिनिधि मंडल ह काली रायपुर म मुख्यमंत्री भूपेश बघेल ले मुलाकात के दउरान ये जानकारी दीन अउ ओमन ल अपन मंाग ले जुड़े ज्ञापन घलो सौंपीन। मुख्यमंत्री ह उंखर मांग उपर विचार करे के आश्वासन दीन।
पोला पर्व
छत्तीसगढ़ के लोकपर्व पोरा आज प्रदेशभर म पारंपरिक उल्लास के संग मनाये जात हे। ए मउका म किसान मन ह बने फसल के कामना के संग हल अउ अपन बैला मनके पूजा-पाठ करीन। संगेसंग ठेठरी, खुरमी, चीला जइसे पारंपरिक छत्तीसगढ़ व्यंजन के भोग लगाइन। पोला तिहार कृषि संस्कृति म पशुधन के महत्ता ल बताथे। आज रायपुर संघरा प्रदेश के ग्रामीण क्षेत्र म ये परब धूमधाम ले मनाये जात हे। लईका मन ह माटी ले बने बैला अउ दूसर खिलौना के मजा लेवत हे।
रायपुर के मुख्यमंत्री निवास म घलो आज तीजा-पोरा तिहार धूमधाम ले मनाये गीस। एमा बड़ संख्या म माइलोगिन मन भाग लीन। कार्यक्रम म मुख्यमंत्री भूपेश बघेल सपरिवार शामिल होइन अउ माइलोगन मन ल तीज के उपहार दे गीस। मुख्यमंत्री ह खेती-किसानी के समृद्धि बर हल अउ नंदी बैला के पूजा करके प्रदेशवासी मनके खुशहाली के कामना करीन।
हिन्दी दिवस
देशभर म आज हिन्दी दिवस मनाये जावत हे। चौदा सितंबर उन्नीस सौ उनचास के संविधान सभा ह हिन्दी भाषा ल देश के आधिकारिक भाषा के रूप म अपनाये रीहिन। भारत के ज्यादातर जगा म हिन्दी बोले जाथे। तेखर सेती हिन्दी ल राजभाषा बनाये के फैसला ले गीस। हिंदी ह दुनिया म व्यापक रूप ले बोले जाने वाला भाखा म शामिल हे। अउ बावन करोड़ ले जादा लोगन के पहिली भाषा हवय।
प्रधानमंत्री नरेंद्र मोदी ह हिन्दी दिवस के मउका म देशवासी मन ल बधाई दीन हे। एक ठन सोशल मीडिया पोस्ट म श्री मोदी ह आशा जताइन कि हिन्दी भाखा राष्ट्रीय एकता अउ सद्भावना के सूत्र ल मजबूत करही।
उंहे छत्तीसगढ़ के मुख्यमंत्री भूपेश बघेल ह अपन शुभकामना संदेश म कीहिन कि राजभाषा हिन्दी बहुत समृद्ध अउ जीवंत भाषा हे। एखर लिपि देवनागरी ह विश्व के सबले पुराना अउ वैज्ञानिक लिपि मन म हवय।
संस्कृत विद्यामंडलम मान्यता
छत्तीसगढ़ संस्कृत विद्यामंडलम ल राष्ट्रीय मुक्त विद्यालयी शिक्षा संस्थान ले मान्यता मिल गेहे। ए संस्थान ले पढ़ाई करइया विद्यार्थी मन ल अब राष्ट्रीय स्तर म सरकारी नौकरी पाये अउ संस्कृत के क्षेत्र म आगू पढ़ाई करे के मउका मिल सकही। छत्तीसगढ़ संस्कृत विद्यामंडलम के अध्यक्ष सुरेश कुमार शर्मा ह बताइन कि राष्ट्रीय मुक्त विद्यालयी शिक्षा संस्थान म छत्तीसगढ़ संस्कृत विद्यामंडलम ल सेकण्डरी अउ सीनियर सेकण्डरी एजुकेशन बोर्ड के अधिकृत सूची म शामिल कर लेहे।