राष्ट्रपति द्रौपदी मुर्मू ह आज आयुष्मान भवः अभियान के सुभारंभ करीन। ए अभियान के उद्देश्य जम्मों लोगन मन ल बड़का स्तर म स्वास्थ्य सेवा देवाना हवय। राष्ट्रपति ह गांधीनगर म राजभवन ले वीडियो कान्फ्रेंसिंग के माध्यम ले केन्द्रीय स्वास्थ्य अउ परिवार कल्याण मंत्रालय के ए अभियान के सुरूवात करीन। ए मउका म ओमन किहीन कि कोनों भी गांव या जघा स्वास्थ्य सेवा ले छूटना नइ चाही। स्वस्थ भारत के हमर सपना ह तभे साकार हो सकही, जब जम्मों लोगन मन स्वस्थ रइही।
आयुष्मान भवः अभियान ल प्रधानमंत्री नरेन्द्र मोदी के जन्मदिन सत्रह सितंबर ले दू अक्टूबर तक चलइया सेवा पखवाड़ा म लागू करे जाही। ए अभियान ह जम्मों राष्ट्र अउ पूरा समाज ल साथ लेके चले के उद्देश्य उपर आधारित हे। ए अभियान के तीन भाग हे, जेमा आयुष्मान आपके द्वार, स्वास्थ्य अउ वेलनेस केन्द्र उपर आयुष्मान मेला अउ हर गांव हर पंचायत म सामुदायिक स्वास्थ्य केन्द्र अउ आयुष्मान सभा के आयोजन करना हे।
प्रधानमंत्री-दौरा
प्रधानमंत्री नरेन्द्र मोदी ह काली एक दिन के दउरा म रायगढ़ आवत हे। ए दउरान ओमन कोंडातराई म करीबन छह हजार तीन सौ पचास करोड़ रूपिया के रेल क्षेत्र के बड़का परियोजना मन ल राष्ट्र ल समर्पित करही। ए परियोजना म चंपा ले जमगा के बीच तीसर रेललाइन, पेण्ड्रा रोड ले अनूपपुर के बीच तीसर रेललाइन के संगेसंग कोयला खदान ल एनटीपीसी लारा सुपर थर्मल पावर स्टेसन ले जोड़इया एमजीआर प्रणाली सामिल हे।
कार्यक्रम के दउरान प्रधानमंत्री ह प्रदेस के नौ ठिन जिला – दुर्ग, राजनांदगांव, कोंडागांव, गरियाबंद, जशपुर, सूरजपुर, सरगुजा, बस्तर अउ रायगढ़ म पचास बिस्तर वाले क्रिटियल केयर ब्लॉक बनाय के घलो सिलान्यास करही। अउ संगेसंग एक लाख सिकलसेल परामर्श कार्ड बांटही। ए परामर्श कार्ड ल राष्ट्रीय सिकल सेल एनीमिया उन्मूलन मिशन कोति ले दे जाही। काली के कार्यक्रम म प्रधानमंत्री ह कोंडातराई म एक ठिन आमसभा ल घलो संबोधित करही।
केबिनेट-एलपीजी कनेक्शन
केन्द्र सरकार ह वित्त बछर दू हजार तेइस ले दू हजार छब्बीस के दौरान पचहत्तर लाख रसोई गैस कनेक्शन देवाय बर प्रधानमंत्री उज्जवला योजना के बेरा ल तीन साल तक बढ़ाय के मंजूरी दे देहे। प्रधानमंत्री के अध्यक्षता म आज केबिनेट के बइठका म ए फइसला ले गीस। एखर उपर एक हजार छै सौ पचास करोड़ रूपिया के खर्चा आही।
सूचना अउ प्रसारण मंत्री अनुराग सिंह ठाकुर ह नई दिल्ली म मीडिया ल बतइन कि ए बार घलो उज्जवला योजना के तहत पहिली जइसन एक ठिन भरे गैस सिलेण्डर अउ गैस चूल्हा मुफत मे दे जाही।
उंहे, केंद्रीय मंत्री मंडल ह चार साल बर सात हजार दू सौ दस करोड़ रूपिया के वित्तीय खर्चा के संग ई-कोर्ट मिशन के तिसर चरण ल घलो मंजूरी दे देहे। ई-कोर्ट के उद्देस्य न्याय प्रणाली ल ऑनलाइन अउ पेपर लेस बनाके लोगन मन बर जादा सरल बनाना हे।
हाईकोर्ट-शिक्षक पदोन्नति मामला
छत्तीसगढ़ उच्च न्यायालय ह शिक्षक मन के पदोन्नति अउ तबादला के मामला म जस के तस बनाय राखे के आदेस राज्य सरकार ल दे हे। ए मामला म हाईकोर्ट म छै सौ ले जादा याचिका शिक्षक मन कोति ले लगाय गे हे। राज्य सरकार ह दू हजार सात सौ तेइस शिक्षक मन ल एक-तरफा कार्य मुक्त कर दे रिहीन। जेखर बाद ए शिक्षक मन ह ट्रांसफर वाले जघा म जाके पदभार नइ ले रिहीन। जेखर सेति स्कूल मन म पढ़ई ह प्रभावित होवत रिहीस। इही दौरान करीबन छै सौ शिक्षक मन ह हाईकोर्ट म ए मामला म याचिका दायर करीन अउ राज्य सरकार डहार ले करे गे संसोधन ल निरस्त करे के मांग करे रिहीन। हाईकोर्ट के निर्णय के बाद अब दोनों पक्ष मन ल जइसे पहिली के स्थिति हे उसने बनाय राखे बर केहे हे।
भाजपा-परिवर्तन यात्रा
भाजपा के परिवर्तन यात्रा काली दंतेवाड़ा ले सुरू होगे। प्रदेश अध्यक्ष अरूण साव के अगुवई म निकले ए यात्रा के कतकोन जघा स्वागत होवत हे। इही कड़ी म काली संझा जगदलपुर म मां दंतेश्वरी मंदिर के तीर सीरासार म आमसभा होइस। सभा ल केन्द्रीय जनजातीय राज्यमंत्री रेणुका सिंह, नेता प्रतिपक्ष नारायण चंदेल, विधायक शिवरतन शर्मा, बृजमोहन अग्रवाल, संतोष पांडेय अउ केदार कश्यप ह संबोधित करीन। भाजपा नेता मन किहीन कि केन्द्र सरकार डहार ले लोगन मनके कल्याण बर कतकोन हितकारी योजना लागू करे गेहे, जेला छत्तीसगढ़ सरकार ह सही ढंग ले नइ चलावत हे।
भाजपा के परिवर्तन यात्रा ह आज बस्तर विधानसभा के करपावंड पहुंच गेहे।
ओजोन परत- प्रतियोगिता
अंतर्राष्ट्रीय ओजोन परत संरक्षण दिवस क मउका म छत्तीसगढ़ पर्यावरण संरक्षण मंडल डहार ले कतकोन जागरूकता कार्यक्रम चलाय जात हे। इही कड़ी म काली रईपुर के नवीन विश्राम गृह म स्कूल अउ कॉलेज के छात्र मन बर पोस्टर अउ इन्वायरोथॉन प्रतियोगिता राखे जाही। ए प्रतियोगिता म भाग लेबर प्रतिभागी मन ल आधार कार्ड के संग स्कूल अउ कॉलेज के पहिचान प्रमाण पत्र लाय बर पड़ही।
पोस्टर प्रतियोगिता के बिसय ‘‘ओजोन परत में सुधार और जलवायु परिवर्तन में कमी‘‘ राखे गेहे। उहें, ‘‘इन्वायरोथॉन प्रतियोगिता खजाने के लिए कचरा‘‘ विषय उपर आधारित रइही।
चित्र-प्रदर्शनी
केंद्रीय संचार ब्यूरो सूचना अउ प्रसार मंत्रालय कोति ले सेवा-सुसासन अउ गरीब कल्याण के नौ बछर उपर आधारित तीन दिन के मल्टी मीडिया चित्र प्रदर्शनी आज ले महासमुंद की बाघबाहरा म सुरू होइस। ए प्रदर्शनी के सुभारंभ महासमुंद के सांसद चुन्नीलाल साहू ह करीन। कारीकरम म केंद्रीय संचार ब्यूरो अउ प्रादेसिक कार्यालय रईपुर के प्रमुख शैलेष फायें घलो आय रिहीन। चित्र प्रदर्शनी के पहिली दिन कतकोन प्रतियोगिता अउ सांस्कृतिक कारीकरम होइस।
बाल पुरस्कार
प्रधानमंत्री राष्ट्रीय बाल पुरस्कार बर नामांकन पंद्रह सितंबर ले करे जा सकथे। केन्द्रीय महिला अउ बाल विकास मंत्रालय ह लइका मन म ऊर्जा, आत्म विस्वास, जोस अउ उछाह के परब मनाय बर हर साल प्रधानमंत्री राष्ट्रीय बाल पुरस्कार के आयोजन करथे। पुरस्कार के घोषणा छब्बीस दिसंबर के वीर बाल दिवस म करे जाही।
पोला
छत्तीसगढ़ के लोक परब पोला काली प्रदेस म उछाह के संग मनाय जाही। पोरा तिहार, खेती-किसानी ले जुड़े गाय-गरू के महत्ता ल बताय के परब हरय। ए दिन किसान मन अपन घर म पोसे बइला के संगेसंग माटी ले बने नांदिया बइला के पूजा-पाठ करथे, अउ बने फसल होय के भगवान ले प्रार्थना करथे। ए परब के दिन कतकोन जघा म बैल दौड़ के आयोजन करे जाथे। काली के पोरा तिहार ल लेके रईपुर के संगेसंग गांव-गंवतरी के बाजार मन म भीड़ बाड़ गे हे।
अउ अब पेस हे मौसम के हाल….
मौसम विभाग ह अवइया चौबीस घंटा के दउरान दक्षिण अउ उत्तर छत्तीसगढ़ के एक-दू जघा म भारी बरसा होय के चेतावनी देहे अउ संगेसंग ये जघा के कोनों-कोनों क्षेत्र म गाज गिरे के संभावना घलो जताय गेहे। मौसम विभाग ले मिले जानबा के मुताबिक एक ठिन उपरी हवा के चक्रवाती घेरा दक्षिण पूर्व उत्तरप्रदेश अउ ओखर ले लगे उत्तर-पूर्व मध्यप्रदेश के उपर बने हे, जेखर सेती काली कतकोन जघा म हल्का ले मध्यम बरसा होय के संभावना हवय।
अउ अब थोरकुन समाचार सार म-
– संघ लोक सेवा आयोग डहार ले होवइया सिविल सर्विस मुख्य परीक्षा पंद्रह सोलह, सत्रह, तेइस अउ चौबीस सितंबर के दू पाली म होही।
– इंदिरा गांधी राष्ट्रीय मुक्त विश्वविद्यालय-इग्नू म आने-आने पाठ्यक्रम मन म प्रवेस बर ऑनलाइन पंजीयन के काम ल बीस सितंबर तक बढ़ा दे गे हे।
– अनुसूचित जनजाति, अनुसूचित जाति अउ अन्य पिछड़ा वर्ग के पोस्ट मैट्रिक छात्रवृत्ति योजना बर ऑनलाइन अर्जी पंद्रह सितंबर ले दस अक्टूबर तक राखे गे हे।
– रईपुर के शंकरनगर स्थित शासकीय शिक्षक शिक्षा महाविद्यालय म सत्र दू हजार तेइस ले पच्चीस बर एमएड पाठ्यक्रम म प्रवेस बर विभागीय अउ सीधी भर्ती के अभ्यर्थी मनके अंतिम सूची जारी कर दे गेहे। अभ्यर्थी मन ए बारे म पंद्रह सितंबर तक दावा आपत्ति पेस कर सकथे।
अउ
– भूतपूर्व सैनिक मनके प्रतिभावान लइका मन बर जिला सैनिक कल्याण बोर्ड डहार ले छात्रवृत्ति योजना बर तीस अक्टूबर तक अर्जी मंगाए गेहे।