प्रदेश म अवइया विधानसभा चुनाव ल देखत भाजपा कांग्रेस समेत सबो राजनीतिक दल ह अपन तियारी तेज कर देहे। इही कड़ी म भारतीय जनता पार्टी काली बारा सितंबर के दंतेवाड़ा ले परिवर्तन यात्रा शुरू करही। ये यात्रा के शुरूआत केंद्रीय गृहमंत्री अमित शाह करही, उंहे एखर अगवई प्रदेश अध्यक्ष अरूण साव करहीं। अइसने जशपुर ले सोला सितंबर के परिवर्तन यात्रा शुरू होही। जेखर शुभारंभ भाजपा के राष्ट्रीय अध्यक्ष जगतप्रकाश नड्डा करहीं, उंहे नेता प्रतिपक्ष नारायण चंदेल यात्रा के अगवई करहीं। ये दूनो यात्रा के समापन बिलासपुर म अठाईस सितंबर के होही।
खबर के मुताबिक ये परिवर्तन यात्रा प्रदेश के आने आने रद्दा म करीबन तीन हजार किलोमीटर के दूरी तय करही। दंतेवाड़ा ले निकलइया परिवर्तन यात्रा तीन संभाग के इंक्यावन विधानसभा क्षेत्र म पहुंचही, उंहे जशपुर ले निकलइया यात्रा दू संभाग के उनतालीस विधानसभा क्षेत्र म पहुंचही। ये दौरान हरएक दिन छै स्वागत सभा अउ तीन छोटे सभा होही। ये परिवर्तन यात्रा म हरएक दिन एक केंद्रीय मंत्री अउ राज्य के बड़का भाजपा नेता जनसभा ल संबोधित करही।
इही बीच भाजपा प्रदेश प्रभारी ओम माथुर ह आज रायपुर के प्रदेश भाजपा कार्यालय म परिवर्तन यात्रा रथ के विधि विधान ले पूजापाठ करके दंतेवाड़ा बर रवाना करीन। ये बेरा म भाजपा क्षेत्रीय संगठन महामंत्री अजय जामवाल, संगठन महामंत्री पवन साय समेत कतकेन बड़का पदाधिकारी मौजूद रीही। उंहे भाजपा प्रदेश अध्यक्ष अरूण साव ह परिवर्तन यात्रा ल लेके वीडियो संदेश जारी करे हे। ओमन कीहिन कि भारतीय जनता पार्टी छत्तीसगढ़ के खुशहाली अउ बढ़वार खातिर परिवर्तन यात्रा निकालत हे।
छेड़छाड़-दुष्कर्म सरकारी नौकरी
प्रदेश म अब नोनी अउ माइलोगन ले छेड़छाड़ अउ दुष्कर्म के आरोपी मन ल सरकारी नौकरी नइ मिलय। ए संबंध म सामान्य प्रशासन विभाग ह आदेश जारी कर देहे। आदेश के मुताबिक कोनो भी उम्मीदवार जउन ल महिला के विरूद्ध कोनो किसम के अपराध म दोषी ठहराय गेहे, वो कोनो किसम के सेवा या पद म नियुक्ति खातिर पात्र नइ होही। उंहे अइसन आरोपी जेखर खिलाफ छेड़छाड़, दुष्कर्म अउ पास्को एक्ट के धारा के तहत मामला न्यायालय म लंबित होही, त ओखर सरकारी सेवा अउ पद म नियुक्ति के मामला प्रकरण के आखरी फैसला तक लंबित राखे जाही।
मुख्यमंत्री लोकार्पण
मुख्यमंत्री भूपेश बघेल ह आज नगरी सिहावा के मुकुंदपुर म राखे गे समारोह म राम वनगमन पर्यटन परिपथ म भगवान श्रीराम के भव्य मूर्ति अउ करीबन दस करोड़ के लागत ले आने आने निर्माण काम के लोकार्पण करीन। संगेसंग मुख्यमंत्री ह कार्यक्रम म सिहावा, कर्णेश्वर रामायण महोत्सव के शुभारंभ घलो करीन। ये मउका म मुख्यमंत्री ह कहिन कि कर्णेश्वर महादेव अउ कुलेश्वर महादेव के पुण्य भूमि ले माघी पुन्नी मेला के शुरूआत होथे। भगवान श्रीराम के चरण जिहां जिहां पड़े हे, ओला विकसित करे के जिम्मेवारी राज्य सरकार के हे। उंहे धान बिसाय के संबंध म ओमन कीहिन कि कोनो किसम के दिक्कत आय राज्य सरकार हर हाल म किसान मनले एकड़ पाछू बीस कुंटल धान बिसाही।
कांग्रेस कमेटी गठित
अखिल भारतीय कांग्रेस कमेटी ह छत्तीसगढ़ विधानसभा चुनाव बर कोर कमेटी समेत चार ठिन नवा समिति के गठन करे हे। एमा चुनाव अभियान समिति, संचार समिति अउ प्रोटोकॉल समिति शामिल हे। प्रदेश प्रभारी कुमारी शैलजा ल कोर कमेटी के अध्यक्ष बनाय गेहे। उंहे विधानसभा अध्यक्ष डॅाक्टर चरणदास महंत ल चुनाव अभियान समिति के जिम्मेवारी दे गेहे। रविंद्र चौबे ल संचार समिति अउ अमरजीत भगत ल प्रोटोकाल के अध्यक्ष नियुक्त करे गेहे।
धान खरीदी बायोमेट्रिक
राज्य सरकार ह केंद्र सरकार ले धान बिसाय बर जरूरी करे गे बायोमेट्रिक सिस्टम ल लागू नइ करे के अनुरोध करे हे। खाद्य सचिव टोपेश्वर वर्मा ह केंद्रीय खाद्य सचिव ल चिट्ठी लिखके प्रदेश म बायोमेट्रिक सिस्टम ल लागू करे जाय के सेती किसान मन ल होवइया मुश्किल ल बताय हे।
ओमन चिट्ठी म लिखे हे कि राज्य के बस्तर अउ सरगुजा क्षेत्र के दूरदराज अउ पहाड़ी क्षेत्र म कतकोन जगा म इंटरनेट कनेक्टिवीटी के सुविधा के कमी होय के सेती बायोमेट्रिक आधारित खाद्यान्न खरीदी लागू करे म परसानी होही। अइसन म किसान मन ल समर्थन मूल्य म धान अउ मक्का बेचे म कतकेन किसम के दिक्कत के सामना करे बर पड़ही।
भाजपा बैठक
भारतीय जनता पार्टी के राष्ट्रीय उपाध्यक्ष अउ प्रदेश के पूर्व मुख्यमंत्री डॅाक्टर रमनसिंह ह आज राजनांदगांव म बूथ स्तर के पार्टी पदाधिकारी मनके बइठका लीन। ये दउरान डॅाक्टर सिंह ह कार्यकर्ता मनले प्रदेश म अवइया विधानसभा चुनई के संगेसंग अवइया बछर होवइया लोकसभा चुनाव के तियारी करे बर कीहिन। ओमन मेरा बूथ सबसे मजबूत के संकल्प के संग राज्य सरकार के कमी ल लोगन तक पहुंचाय अउ मोदी सरकार के उपलब्धि ल लोगन ल बताय बर कीहिन। बइठका म राजनांदगांव सांसद संतोष पांडेय ह राज्य सरकार उपर वादाखिलाफी के आरोप लगाइन।
उंहे डोंगरगांव म भाजपा ह विधानसभा स्तरीय नव मतदाता सम्मान समारोह के आयोजन करीन। ये कार्यक्रम म छत्तीसगढ़ी फिल्म अभिनेता अउ भाजपा नेता अनुज शर्मा शामिल होइन। ये मउका म भाजपा नेता मन ह डोंगरगांव विधायक दलेश्वर साहू के खिलाफ इक्कीस बिंदु म आरोप पत्र जारी करीन।
दूसर कोति मुख्यमंत्री भूपेश बघेल के काली राजनांदगांव आगमन म भाजपा के पूर्व पार्षद विट्ठल पटेल समेत साठ झिन कार्यकर्ता कांग्रेस म प्रवेश करीन।
कोरबा आंदोलन
राष्ट्रीय राजमार्ग बर अधिग्रहित किसान मनके भुंइया के मुआवजा नइ दे जाय के विरोध म कोरबा जिला के गांव पाली-मुनगाडीह राष्ट्रीय राजमार्ग म गांव के लोगन अउ किसान मन ह आज चक्काजाम करके विरोध जताइन। चक्काजाम के सेती बिलासपुर-पाली रद्दा म कई घंटा तक अवई जवई प्रभावित रीहिस। मौका म पुलिस प्रशासन के टीम मौज्ूद रीहिस।
उंहे एसईसीएल के आने आने परियोजना ले प्रभावित भू विस्थापित मनके कतकोन मांग ल लेके मार्क्सवादी कम्यूनिस्ट पार्टी के किसान सभा ह आजले कोरबा जिला के कुसमुंडा म आर्थिक नाकेबंदी शुरू कर देहे। यं आंदोलन म क्षेत्र के पचास ले जादा गांव के भू विस्थापित शामिल हे।
कामधेनु विवि कुलपति
राज्यपाल अउ कुलाधिपति विश्वभूषण हरिचंदन ह डॅाक्टर रामरण विजय सिंह ल दाउ वासुदेव चंद्राकर कामधेनु विश्वविद्यालय के कुलपति नियुक्त करे हे। ए संबंध म आदेश जारी कर देहे। डॅाक्टर सिंह के कार्यकाल उपलब्धि अउ सेवा सरत विश्वविद्यालय अधिनियम अउ परिनियम के प्रावधान के मुताबिक होही।
घड़वा कलाकार कार्यशाला
आदिवासी लोक कला अकादमी के तत्वावधान म राखे गे घड़वा कला कार्यशाला आजले राजधानी रायपुर के महंत घासीदास संग्रहालय परिसर म शुरू होगे हे। आदिवासी लोक कला अकादमी के अध्यक्ष नवल शुक्ल ह बताइन कि इक्कीस सितंबर तक चलइया ये कार्यशाला म बस्तर क्षेत्र के कतकोन कलाकार अपन कला देखावत हे। एमा कोंडागांव ले फूलसिंह बेसरा, नरेंद्र बेसरा, पीलू बघेल, मोहन नेताम अउ सिकंदर बघेल सामिल हे। एखर संगेसंग खोरखेसा ले गणेश कश्यप, करनपुर ले टेडूराम बघेल, अउ बरकई ले जयराम नाग अउ विश्राम नाग अपन कला के प्रदर्शन करही।
सड़क चौड़ीकरण मंजूरी
मुख्यमंत्री भूपेश बघेल ह वित्त विभाग ल राजधानी रायपुर के तात्यापारा ले शारदा चौक के बीच सड़क चौड़ीकरण के काम ल हप्ता भर के भीतरी मंजूर करे के निर्देश देहे। खबर के मुताबिक तात्यापारा ले शारदा चौक के रद्दा म यातायात के जादा दबाव रहिथे, जेखर ले लोगन ल परसानी होथे। रद्दा के चौड़ीकरण होय ले यातायात अउ लोगन के अवई जवई म सुविधा होही।
अउ अब पेस हे मौसम के हाल –
प्रदेश के दक्षिण भाग म कुछएक जगा म हल्का ले मध्यम बरसा होय के संभावना हरय। उंहे मौसम विभाग ह एक दू जगा म गरज-चमक संग गाज गिरे के चेतावनी देहे।