नई दिल्ली के भारत मंडपम म काली ले सुरू होय अठ्ठारवां जी-ट्वेंटी के शिखर सम्मेलन के आज समापन हो गिस। समापन समारोह म प्रधानमंत्री नरेंद्र मोदी ह ब्राजील के राष्ट्रपति लुईस इनासियों लूला डी सिल्वा ल औपचारिक रूप ले जी-ट्वेंटी के अध्यक्षता के प्रतीक चिनहा हथौड़ा सौंपिन। श्री मोदी ह बिस्वास जताइन कि ब्राजील के अध्यक्षता म जी-ट्वेंटी ह साझा लक्ष्य ल हासिल करे म समर्थ होही। ए मउका म श्री मोदी ह सम्मेलन म तय करे गे मुद्दा मन के समीक्षा बर नवंबर के आखिर म समूह के वर्चुअल सत्र आयोजित करे के प्रस्ताव घलो राखिन।
जी-20-छत्तीसगढ़ उपहार
नई दिल्ली म जी-ट्वेंटी शिखर सम्मेलन म आय मेहमान मन ल छत्तीसगढ़ के बस्तर जिला के माईलोगिन मन मिलेट्स ले बने कलेवा भेंट करीन। बस्तर के मिलेट बिसेस रूप ले रागी ले बने लाडू जी-ट्वेंटी म आय राष्ट्रअध्यक्ष अउ उंखर पत्नी मन ल भेंट करे गिस। नई दिल्ली के आई. ए. आर. आई. परिसर म कृषि प्रदर्सन के आयोजन करे गे रिहीस। जिहां विदेसी मेहमान ल बस्तर के पारंपरिक कलेवा ले चिन्हारी कराय गिस।
छत्तीसगढ़ के बस्तर के माईलोगिन मन मिलेट ले बनइया कलेवा के बिसेस तइयारी करे रिहीन। बस्तर जिला के बास्तानार ब्लाक के निवासी संगीता कश्यप ह बताइन कि ओमन मिलेट के लाडू, रागी के कुकीज, रागी चकली अउ कोदो -कुटकी के पकवान बनाय रिहीस।
आस्ट्रेलिया के पहिली महिला ल ओमन मिलेट ले बने कलेवा के टुकनी भेंट करत बस्तर आय के नेवता देइन हें। माईलोगिन मन के संगे छत्तीसगढ़ कृषि विभाग के नोडल अधिकारी रूखमणी कोट्टम ह बताइन कि पूसा म छत्तीसगढ़ कृषि विभाग के डहार ले स्टॉल लगाय गे रिहीस। जेमा विभाग ह बांस ले बने उत्पाद राखे रिहीस। जउन बिदेसी मेहमान मन ल बहुंतेच पसंद आइस। उंहे, छत्तीसगढ़ के ढोकराकला अउ नैचुरल डाई ले बने कोसा के स्टॉल घलो बिसेस आकर्षण रिहीस।
प्रधानमंत्री-दौरा
प्रधानमंत्री नरेंद्र मोदी चौदह सिंतबर के एक दिवसीय दउरा म रायगढ़ आवत हें। ए दउरान प्रधानमंत्री रायगढ़ म आयोजित कारीकरम म कतकोन परियोजना समेत रेलमार्ग के लोकार्पण करहीं। एखर सेती आज केंद्रीय स्वास्थ्य मंत्री मनसुख मांडविया तियारी के जायजा लेबर रायगढ़ पहुंचिन। ओमन कारीकरम स्थल के निरीक्षण करत अधिकारी मन ल जरूरी दिशा-निरदेस दीन हें। ए दउरान भाजपा प्रदेस अध्यक्ष अरूण साव घलो मौजूद रिहीन।
योगाभ्यास-गोल्डन बुक ऑफ वर्ल्ड रिकॉर्ड
छत्तीसगढ़ ह सेतुबंध आसन के प्रदर्सन बर गोल्डन बुक ऑफ वर्ल्ड रिकॉर्ड अपन नाव दर्ज करा ले हे। राजधानी रइपुर के बुढ़ापारा स्थित स्वर्गीय बलबीर सिंह जुनेजा इंडोर स्टेडियम म प्रदेसभर ले आय दू हजार ले जादा लोगन तिरंगा के प्रतिरूप बनावत ऐके संघरा वर्ल्ड रिकॉर्ड बर सेतुबंध आसन के सामूहिक प्रदर्सन करीन।
मुख्यमंत्री भूपेश बघेल ह ए उपलब्धि बर सुभकामना देवत किहीन कि ‘‘छत्तीसगढ़ जब तक करही योग, तब तक रइही निरोग‘‘। ओमन किहीन कि सेतुबंध आसन मन अउ शरीर ल पुल सरीक जोड़ के राखथे। गोल्डन बुक ऑफ वर्ल्ड रिकॉर्ड के एशिया प्रमुख डॉक्टर मनीष विस्नोई ह रिकॉर्ड बनाय के घोषणा करत छत्तीसगढ़ योग आयोग के प्रोविजनल सर्टिफिकेट प्रदान करीन।
ए मउका म छत्तीसगढ़ योग आयोग के अध्यक्ष ज्ञानेश शर्मा ह किहीन कि लोगन ल योग के महत्ता बर जागरूक करे के उद्देश्य ले कारीकरम के आयोजन करे गिस।
स्वर्ण प्राशन
प्रदेस के लइका मन म रोग-प्रतिरोधक क्षमता ल बढ़ाय बर राज्य सरकार डहार ले स्वर्ण प्राशन कारीकरम चलाय जावत हे। इही कड़ी म आज रइपुर के शासकीय आयुर्वेद महाविद्यालय चिकित्सालय म लइका मन ल स्वर्ण प्राशन कराय गिस। ए दवई लइका मन के रोग-प्रतिरोधक क्षमता बढ़ाय बर, सांस ले जुड़े रोग अउ आने-रोगरई ले रक्षा करे के संग स्मरणसक्ति बढ़ाय म लाभकारी हे। ए ह लइका मन के शारिरीक अउ मानसिक विकास म घलो मदद करथे।
बतादन कि आयुर्वेद महाविद्यालय चिकित्सालय म हर पुण्य नक्षत्र तिथि म सून्य ले 16 बछर के लइका मन ल स्वर्ण प्राशन कराय जाथे।
छत्तीसगढ़िया ओलंपिक
छत्तीसगढ़ म पारंपरिक खेल ल बढ़ावा दे बर चलइया छत्तीसगढ़िया ओलंपिक के आज ले संभाग स्तरीय प्रतियोगिता सुरू हो गेहे। जउन ह 20 सितंबर तक चलही।
छत्तीसगढ़िया ओलंपिक म युवा मन के संगेसंग लइका-सियान अउ माईलोगिन मन घलो बढ़-चढ़के हिस्सा लेवत हें। राज्य स्तरीय प्रतियोगिता म लंबी कूद, सौ मीटर दौड़ अउ कुस्ती खेल म अठ्ठारा ले चालीस बछर उमर वर्ग म अव्वल अवइया प्रतिभागी ल उत्कृष्ट खिलाड़ी माने जाही। ए प्रावधान इही बछर ले लागू होही। उंहे, संभाग स्तरीय प्रतियोगिता के समापन के बाद आखिरी चरण म राज्य स्तरीय छत्तीसगढ़िया ओलंपिक के आयोजन राजधानी रइपुर म 25 ले 27 सितंबर तक करे जाही।
बतादन कि छत्तीसगढ़िया ओलंपिक म प्रदेस के 16 ठन पारंपरिक खेल प्रतियोगिता दल अउ एकल श्रेणी म आयोजित करे जावत हे। दल श्रेणी म गिल्ली डंडा, पिठ्ठूल, संखली, लंगड़ी दौड़, कबड्डी, खो-खो, रस्साकसी अउ बांटी जइसन खेल विधा ल सामिल करे गेहे। उंहे, एकल श्रेणी के खेल विधा म बिल्लस, फुगड़ी , गेड़ी दौड़, भंवरा, सौ मीटर दौड़, लंबी कूद, रस्सीकूद अउ कुस्ती सामिल हंे।
प्रदेस म होवइया विधानसभा चुनाव ल देखत सबो राजनीतिक पार्टी मन तियारी सुरू कर दे हे। इही कड़ी म भारतीय जनता पार्टी ह प्रदेसव्यापी परिवर्तन यात्रा सुरू करत हे। ए यात्रा बर भाजपा डहार ले रथ तइयार कर ले गे हे। पहिली रथ यात्रा के सुभारंभ केंद्रीय गृहमंत्री अमित शाह 12 सितंबर के दंतेवाड़ा करहीं। उहें, 15 सितंबर के भाजपा के राष्ट्रीय अध्यक्ष जे.पी.नड्डा जशपुर ले परिवर्तन यात्रा के सुभारंभ करहीं।
भाजपा नेता महेश गागड़ा ह बताइन के प्रदेस के जनभावना ल बिस्तार दे बर भाजपा ह परिवर्तन के शंखनाद करत समृध्द छत्तीसगढ़ के संकल्प लेके यात्रा म निकलत हे। दूनों यात्रा के रथ आधुनिक सुरक्षा उपकरण ले लेस हे, अउ रथ के छत उपर मंच के व्यवस्था करे गे हे।
ट्रेन परिचालन
दक्षिण पूर्व मध्य रेलवे म सबो यात्री गाड़ी मन के नियमित परिचालन अपन निर्धारित बेरा म करे जावत हे। कोरोनाकाल के बेरा बंद होय सबो ट्रेन के परिचालन ल सुरू कर दे गेहे। एखर संगेसंग यात्री मन के सुविधा ल देखत कतकोन स्टेशन म आने-आने रेलगाड़ी के 53 ठहराव दे गेहे। जेमा नान्हे-नान्हे स्टेशन घलो सामिल हंे। रेल यात्री मन ल कंफर्म सीट उपलब्ध कराय बर अप्रैल महिना ले अब तक कतकोन ट्रेन म 78 कोच स्थायी रूप ले लगाय गिस। उंहे, तिहार अउ छुट्टी मन ल चेत म राखत ट्रेन मन म करीबन ढाई हजार अस्थायी रूप ले उपराहा कोच लगाय गे हंे।
इही बीच, रेलवे डहार ले रद्द करे गाड़ी गोंदिया-बरौनी-गोंदिया एक्सप्रेस ल रिस्टोर करत हुए आने रद्दा ले चलाय जाही।
मुख्यमंत्री-लोकार्पण
मुख्यमंत्री भूपेश बघेल काली धमतरी जिला के दउरा म रइहीं। जिहां मुख्यमंत्री ह नगरी के मुकुंदपुर म आयोजित समारोह म कतकोन बिकास कारज के सौगात दिहीं। कारीकरम म राम वनगमन पथ के तहत कराए गे नौ करोड़ इकसठ लाख के लागत ले बनइया आने-आने कारज के लोकार्पण करहीं।
मनेन्द्रगढ़-चिरमिरी-भरतपुर-वर्षगांठ
मनेन्द्रगढ़-चिरमिरी-भरतपुर जिला के पहिली स्थापना दिवस के मउका म कारीकरम के आयोजन करे गिस। मुख्य अतिथि सरगुजा विकास प्राधिकरण के उपाध्यक्ष गुलाब कमरो ह किहीन कि जिला बनाय ले क्षेत्र के जनता ल अब कोरिया जिला उपर निर्भर नइ रेहे ल पड़त हे। अब जिला स्तर म होवइया सबो प्रकार के कारज एमसीबी म होवत हे। एकर ले क्षेत्र के जनता के बेरा अउ मेहनत म होवइया खरचा घलो बांचत हे। ओमन किहीन कि क्षेत्र के जनता के जरूरत ल चेत म राखत कतकोन बिकास कारज करे जावत हंे।