नई दिल्ली म आज ले जी-ट्वेंटी के अठ्ठारवा शिखर सम्मेलन के सुरूआत होगे हे। उद्घाटन सत्र म प्रधानमंत्री नरेंद्र मोदी ह अफ्रीकी संघ के प्रमुख अजाली असोमनी ल स्थाई सदस्य के रूप म स्थान ग्रहण करे बर न्योतीन भारत ह सबका साथ, सबका विकास ए भावना संघ अफ्रीकी संघ ल जी-ट्वेंटी के स्थाई सदस्य बनाय बर प्रस्ताव राखे रिहीस। एक पृथ्वी के नाव ले राखे गे पहला सत्र म बोलत श्री मोदी ह किहीन कि सबका साथ ह देस के भीतरी अउ बाहरी समावेशी याने एक संघरा होके भावना के चिन्हारी हरय।
ओमन यहू किहीन कि भारत ह आज दूनिया ले आह्वन करे हे कि वैश्विक अविश्वास ल विश्वास म बदले के काम करय। अउ ए ह सबके आगू बाढ़े के बेरा हवय।
धान खरीदी-बैठक
प्रदेस म समर्थन भाव म धान बिसई अवइया एक नवंबर ले सुरू होही। जउन ह इकतीस जनवरी तक ले चलही। उंहे, मक्का याने भुट्टा के बिसइ घलो ह एक नवंबर ले सुरू हो के अठ्ठाईस फरवरी तक चलही। राज्य सरकार ह ए बछर रजिस्टर किसान मन ले एकड़ पाछू बीस कुंटल धान बिसाय के निर्णय ले हे। ए बछर एक सौ पचीस लाख मीट्रिक टन धान बिसाय के अनुमानित लक्ष्य राखे गे हे।
खाद्य मंत्री अमरजीत भगत के पगरइती म चालू खरीफ विपणन बछर म धान बिसई अउ कस्टम मिलिंग के नीति के समीक्षा करके सुझाव दे बर बनाय गे मंत्री-मंडलीय उप समिति के रईपुर म बइठका होइस।
भाजपा-राज्यपाल ज्ञापन
प्रदेस म माईलोगिन मन संग होवत अपराध, गैंगरेप के बाढ़त घटना अउ राज्य सरकार के कथित कुशासन ल लेके भारतीय जनता पार्टी के प्रदेस अध्यक्ष अरूण साव के अगुवई म प्रतिनिधि मंडल ह आज राजभवन म राज्यपाल विश्वभूषण हरिचंदन ले मुलाकात करके उनला ज्ञापन सौंपिन। प्रतिनिधि मंडल म पार्टी के प्रदेस प्रभारी ओम माथुर पूर्व मुख्यमंत्री डॉक्टर रमन सिंह, राज्यसभा सांसद सरोज पांडेय, सांसद सुनील सोनी समेत आने बड़का नेता अउ पदाधिकारी सामिल रिहीन।
इंही, बीच भाजपा के प्रदेस प्रवक्ता केदारनाथ गुप्ता ह प्रदेस म नारी-परानी मन संग होवत अपराध अउ गैंगरेप घटना उपर संसो जताइन हे। रईपुर म राखे गे पत्रकारवार्ता म श्री गुप्ता ह किहीन कि प्रदेस म अपराधी भीतरी पुलिस के डर सिरागे हे, अउ राज्य के कांग्रेस सरकार के कुशासन के चलत अब छत्तीसगढ़ ह अपराध गढ़ बन गे हवय। राज्य सरकार ह माईलोगिन मन उपर होवत अपराध ल नइ रोक पावत हे।
गोधन न्याय योजना
मुख्यमंत्री भूपेश बघेल ह आज गोधन न्याय योजना के चलत गोबर बेचइया स्व-सहायता समूह अउ गौठान समिति मन के बैंक खाता मन म करीबन चौबीस करोड़ रूपिया के रासि ऑनलाइन अंतरित याने दे गीस। ए मउका म मुख्यमंत्री किहीन कि ए बछर राज्य सरकार डहार ले समर्थन मूल्य म एक सौ पच्चीस लाख मीट्रिक टन धान बिसाय जाही।
मुख्यमंत्री-बुनकर सम्मेलन
प्रदेस म अवइया शैक्षणिक सत्र ले स्कूली लईका मन ल स्कूल ड्रेस आपूर्ति छत्तीसगढ़ राज्य हाथकरघा संघ डहार ले करे जाही। मुख्यमंत्री भूपेश बघेल ह ह रईपुर म राखे गे राज्य स्तरीय बुनकर सम्मेलन म ए घोषणा करीन। ए मउका म मुख्यमंत्री ह किहीन कि राज्य सरकार ह रेसम उत्पादन ल बढ़ावा दे के काम करत हे अउ रेसम कीट पालन ल अब खेती के दर्जा दे गे हे। एखर ले प्रदेस म रेसम के उत्पादन बाढ़े के संगे बुनकर मन ल रेसम आसानी ले मिल सकही।
राष्ट्रीय लोक अदालत
राष्ट्रीय विधिक सेवा प्राधिकरण डहार ले आज राष्ट्रीय लोक अदालत राखे गीस। ए दउरान प्रदेस के सबो जिला अउ व्यवहार न्यायालय मन म घलो लोक अदालत लगाय गीस। लोक अदालत म जुन्ना अउ माढ़े राजीनामा वाले प्रकरण के निपटारा करे गीस। एमा मोटर दुर्घटना दावा, चेक बाउंस, जल कर, संपत्ति कर, राजस्व संबंधी, ट्रैफिक चालान, भाड़ा नियंत्रण, बैंक अउ बिजली ले जुड़े प्रकरण घलो सामिल रिहीस। एखर संगे राजस्व न्यायालय खंडपीठ म खातेदार मनके बीच आपसी बंटवारा, दूरसंचार विभाग, नगर निगम अउ नगर पालिका परिषद म वसूली वाले माढ़े प्रकरण मनके घलो आपसी राजीनामा के आधार ले निपटारा करे गीस।
सामूहिक योगाभ्यास
छत्तीसगढ़ योग आयोग डहार ले काली बिहनिया राजधानी रईपुर के बुढ़ापारा स्थित इंडोर स्टेडियम म सेतूबंध आसन के संघरा प्रदर्सन करे जाही। कारीकरम म करीबन डेढ़ हजार ले जादा मनखे मन डहार ले सामूहिक रूप ले योगाभ्यास करके रिकार्ड बनाय के परयास होही। योग आयोग के अध्यक्ष ज्ञानेश शर्मा ह बताइन कि सामूहिक योगाभ्यास कारीकरम म आधा घंटा तक सेतुबंध आसन के संगेसंग आने आसन प्राणायाम अउ ध्यान के अभ्यास घलो कराय जाही। कारीकरम म अब्बड़ झिन जन-प्रतिनिधि अउ नागरिक सामिल होही। योग आयोग ह सबो नागरिक मन ले योग के प्रदर्सन म सामिल होय बर आरो दे हे।
स्वच्छ भारत मिशन के चलत राष्ट्रीय कैडेट कोर-एनसीसी डहार ले देस भर म पुनीत सागर अभियान के माध्यम ले लोगन मन ल तरिया, नदिया अउ बांध जघा मन म साफ-सफाई राखे के आरो दे जात हे। इही कड़ी म आज राजधानी रईपुर के तेलीबंाधा तरिया म पुनीत सागर अभियान करीकरम राखे गे रिहीस। ए मउका म तरिया,नदिया अउ बांध मन म साफ-सफाई राखे के संगे लोगन मन ल प्र्रेरित करे बर एनसीसी कैडेट मन ल सम्मानित करे गीस। ए दउरान एनसीसी कैडेट मन ल जल संरक्षण अउ ओखर ले जुड़े नारा घलो लगाइन। कारीकरम म एनसीसी रईपुर ग्रुप के कई ठिन संस्था मन के दू हजार ले जादा कैडेट्स मन भाग लीन। संगे एनसीसी कैडेट्स मन डहार ले नुक्कड़ नाटक पुनीत सागर गीत, नृत्य अउ भाषण प्रस्तुत करे गीस। ए मउका म ग्रुप कमाण्डर ब्रिगेडियर विक्रम ंिसंह चौहान ह एनसीसी कैडेट्स मन डहार ले छत्तीसगढ़ म होवत पुनीत सागर अभियान बारे म जानकारी दीन। उंहे, सैतीसवां सी.जी. बटालियन एनसीसी दुरूग डहार ले घलो पुनीत सागर अभियान जी-20 के चलत कई ठिन स्कूल अउ कॉलेज मनके एनसीसी कैडेट मन जागरूकता रैली निकालीन जउन ह दुरूग के पंडित रविशंकर स्टेडियम स्थित बटालियन परिसर ले सुरू होइस। ए दउरान प्लास्टिक झन बउरे अउ साफ-सफाई बनाय राखे बर लोगन मन ल जागरूक करे गीस। संगे शीतला माता मंदिर तरिया म घलो सफाई करे गीस।
माओवादी आत्मसमर्पण
सुकमा जिला म आठ लाख रूपिया वाले ईनामी माईलोगिन समेत तीन झिन माओवादी मन ह पुलिस अधीक्षक किरण चौहान अउ कोबरा बटालियन के अधिकारी मन के आगू म आत्मसमर्पण करे हे। ए माओवादी मन उपर टेकलगुड़ा माओवादी घटना समेत कई ठिन आने वारदात म सामिल रहे के आरोप हे। ए तीनों माओवादी मन ल राज्य सरकार के पुर्नवास नीति के चलत प्रोत्साहन रासि दे गीस।
हल्बी/गोण्डी-समाचार बुलेटिन
सुनइया, मन ल बतादन कि काली ईतवार केे ‘‘हल्बी‘‘ और ‘‘गोण्डी‘‘ बोली म समाचार बुलेटिन प्रसारित करे जाही। ए दूनों ठिन बुलेटिन आकाशवाणी केन्द्र, जगदलपुर लेे प्रसारित करे जाही। उहें, बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छै बजे ले प्रसारित करे जाही।
जिले की चिट्ठी
प्रादेशिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बज के पांच मिनट ले छै बज के दस मिनट तक होही। ए कारीकरम ल छत्तीसगढ़ स्थित आकाशवाणी के सबो केन्द्र म रिले करही। ए बार के अंक म ‘‘सुकमा‘‘ जिला के गतिविधि के बारे म जानकारी दे जाही।
अउ अब मौसम के हाल
प्रदेस म अवइया चौबीस घंटा के दउरान कोनो-कोनो जघा थोड़ बहुत पानी गिर सकत हे। उहें, एक-दू जघा म गरजई-चमकई के संगे गॉज गिरे के चेतावनी घलो दे गेहे। मौसम विभाग के मुताबिक एक ठन द्रोणिका जैसलमेर ले उत्तर पूर्व बंगाल के खाड़ी तक स्थित हे। उंहे, उपरी हवा के चक्रवाती घेरा घलो बने हवय। एखर प्रभाव छत्तीसगढ़ म घलो देखे बर मिलत हे। बीते चौबीस घंटा के दउरान राजधानी रईपुर समेत प्रदेस के कोनो-कोनो जघा म थोरकुन ले जादा बरसा दर्ज करे गेहे।