भारत ह काली ले नई दिल्ली म सुरू होवइया अट्ठारहवां जी-ट्वेंटी शिखर सम्मेलन के सबो तैयारी ल पूरा कर लेहे। शिखर सम्मेलन म भाग ले बर विश्व के नेता मनके राजधानी पहुंचे के सिलसिला जारी हे।
इही बीच, आयोजन स्थल भारत मंडपम ल राष्ट्रीय अध्यक्ष अउ प्रतिनिधि मनके स्वागत बर सजाय गे हवय। प्रधानमंत्री नरेन्द्र मोदी तीन दिन तक विश्व के नेता मन संग पन्द्रह ले जादा द्विपक्षीय बइठका करही। श्री मोदी अमेरिकी राष्ट्रपति जो. बाइडेन, मॉरीशस के प्रधानमंत्री प्रविंद जगन्नाथ अउ बांग्लादेश के प्रधानमंत्री शेख हसीना संग आज अपन आवास म द्विपक्षीय बइठका करही।
एक ठन सोशल मीडिया पोस्ट म श्री मोदी ह किहीन कि ए बइठका ले ए देस मनके संग भारत के द्विपक्षीय संबंध के समीक्षा करे अउ सहयोग ल आगू बढ़ाय के मउका मिलही।
भरोसे का सम्मेलन
राजनांदगांव जिला के ग्राम ठेकवा म आज ‘‘भरोसे का सम्मेलन‘‘ कार्यक्रम के आयोजन करे गीस। ए मउका म राज्यसभा म नेता प्रतिपक्ष मल्लिकार्जुन खड़गे अउ मुख्यमंत्री भूपेश बघेल ह राजनांदगांव, मोहला-मानपुर-अंबागढ़ चौकी अउ खैरागढ़-छुईखदान-गंडई जिला बर तीन सौ पचपन करोड़ तेईस लाख रूपिया के लागत के आने-आने विकास काम के भूमिपूजन अउ लोकार्पण करीन। कार्यक्रम म राज्य सरकार के आने-आने योजना म साढ़े आठ हजार ले जादा हितग्राही मन ल सामग्री बांटे गीस।
कार्यक्रम म श्री खड़गे ह किहीन कि छत्तीसगढ़ के सरकार गरीब, दलित, पिछड़ा अउ किसान मनके सरकार हे। पाछु साढ़े चार बछर म कांग्रेस सरकार ह जउन वादा करे रिहीस, ओला पूरा तरीका ले निभाय हे। ओमन किहीन कि जतका सुघ्घर काम अभी छत्तीसगढ़ म होवत हे। वइसन, पहिली कभू नइ होय हे। श्री खड़गे ह किहीन कि नीति आयोग के रिपोर्ट के अनुसार छत्तीसगढ़ म पाछु पांच बछर म चालीस लाख लोगन गरीबी ले बाहिर अईन हे।
उहें, मुख्यमंत्री भूपेश बघेल ह किहीन कि राज्य सरकार आम जनता ल ताकतवर बनाय के काम करत हे। ओमन किहीन कि राज्य सरकार ह सामाजिक-आर्थिक सर्वें कराय हे, जेमा सैंतालीस हजार परिवार अइसे पाय गीस, जिखर मन तीर मकान नइ हे। अइसन परिवार ल राज्य सरकार ह आवास देवाय के फइसला ले हवय।
इही बीच, मुख्यमंत्री भूपेश बघेल आज रईपुर म छत्तीसगढ़ बुनकर शिल्पी संघ डहार ले राखे गे राज्य स्तरीय बुनकर सम्मेलन म सामिल होइन।
बिहान-राष्ट्रीय सम्मेलन
राष्ट्रीय ग्रामीण आजीविका मिशन-बिहान के लखपति दीदी मन बर काली राष्ट्रीय सम्मेलन के आयोजन करे गीस। जेमा केन्द्रीय ग्रामीण विकास अउ पंचायती राज मंत्री गिरिराज सिंह ह वर्चुअल रूप ले सामिल होइन। एमा राष्ट्रीय ग्रामीण आजीविका मिशन ले जुड़े देसभर के माईलोगिन, स्टाफ अउ अधिकारी मन घलो वर्चुअल रूप ले जुड़ीन। सम्मेलन म छत्तीसगढ़ के दू झन माईलोगिन दंतेवाड़ा जिला के गीदम के जानकी यादव अउ बस्तर जिला के नैना के कहानी साझा करे गीस। जानकी यादव ह मछलीपालन अउ सब्जी के खेती करके लखपति बने हे। ओ ह हर महीना बीस हजार रूपिया कमावत हे। उहें, श्रीमती नैना खेती के संग पशुपालन अउ मछलीपालन घलो करथे, जेखर ले ओमन ल हर बछर एक लाख चालीस हजार रूपिया के कमाई होवत हे।
अंतर्राष्ट्रीय साक्षरता दिवस
आज अंतर्राष्ट्रीय साक्षरता दिवस हे। ए बछर के अंतर्राष्ट्रीय साक्षरता दिवस के बिसय हे – ‘‘संक्रमण में दुनिया के लिए साक्षरता को बढ़ावा देना, टिकाऊ और शांतिपूर्ण समाजों की नींव का निर्माण‘‘। ए मउका म प्रदेस म कतकोन कार्यक्रम आयोजित करे जावत हे।
राजधानी रईपुर म राज्य स्तरीय वेबीनार के आयोजन करे गीस। एखर अलावा राज्य के सबो सासकीय अउ अशासकीय स्कूल अउ निजी सैक्षणिक संस्था मन म प्रभात फेरी संग साक्षरता रैली निकाले गीस।
राष्ट्रीय लोक अदालत
राष्ट्रीय विधिक सेवा प्राधिकरण डहार ले काली नौ सितंबर के राष्ट्रीय लोक अदालत के आयोजन करे जाही। ए दउरान प्रदेस के सबो जिला अउ व्यवहार न्यायालय मन म घलो लोक अदालत आयोजित करे जाही। ए मउका म पुराना अउ लंबा समय ले लंबित राजीनामा योग्य प्रकरण के निपटारा करे के परयास करे जाही। एमा मोटर दुर्घटना दावा, चेक बाउंस, जल कर, संपत्ति कर, राजस्व संबंधी, ट्रैफिक चालान, भाड़ा नियंत्रण, बैंक अउ विद्युत ले जुड़े प्रकरण ल घलो लोक अदालत के माध्यम ले सुलझाय जाही। एखर अलावा राजस्व न्यायालय म खंडपीठ म खातेदार मनके बीच आपसी बंटवारा, दूरसंचार विभाग, नगर निगम अउ नगर पालिका परिषद म वसूली ले जुड़े लंबित प्रकरण के आपसी राजीनामा के आधार म निपटारा करे जाही।
राम वनगमन पर्यटन परिपथ
प्रदेस के उप मुख्यमंत्री टी.एस. सिंहदेव ह काली ‘राम वनगमन पर्यटन परिपथ‘ म सामिल रामगढ़ म भगवान राम के पच्चीस फीट ऊंचा प्रतिमा के अनावरण करीन। एखर अलावा राम वाटिका अउ छिहत्तर लाख रूपिया के लागत के आने-आने विकास काम के लोकार्पण करीन। ए मउका म श्री सिंहदेव ह किहीन कि सरगुजा संभाग प्राकृतिक सौंदर्य ले भरे हे।
सुगम संगीत संध्या
आकाशवाणी केन्द्र रायपुर डहार ले जी-टवेंटी के तहत आज संझा भिलाई के महात्मा गांधी कला मंदिर सभागार सिविक सेंटर म ‘सुगम संगीत संध्या‘ के आयोजन करे जाही। ए कारीकरम म प्रभंजय चतुर्वेदी, पंडित अश्वनी वर्मा, प्राची कोकणठाणकर अउ साधना राहटगांवकर अपन प्रस्तुति दीहीं।
उहें, अवइया दस सितंबर के जगलदपुर म लोक संगीत संध्या के आयोजन करे जाही।
धान खरीदी-बैठक
प्रदेस म ए बछर समर्थन मूल्य म धान खरीदी अउ कस्टम मिलिंग के नीति के समीक्षा करके सुझाव दे बर बने मंत्रिमंडलीय उपसमिति के काली रईपुर म बइठका होही। खाद्य अमरजीत भगत के अगुवई म होवइया ए बइठका म सहकारिता अउ पंचायत मंत्री रविन्द्र चौबे, कृषि मंत्री ताम्रध्वज साहू, वन मंत्री मोहम्मद अकबर अउ उच्च सिक्षा मंत्री उमेश पटेल सामिल होही।
खबर के मुताबिक राज्य सरकार ह ए बछर प्रदेस के पंजीकृत किसान मन ले एक सौ पच्चीस लाख मीटरिक टन धान खरीदे लक्ष्य राखे हे।
भाजपा-प्रदर्शन
जांजगीर-चांपा जिला मुख्यालय म आज नेता प्रतिपक्ष नारायण चंदेल के अगुवई म भाजपा कार्यकर्ता मन ह सड़क म मवेसी मनके विचरण करे के विरोध म एसडीएम दफ्तर के आगू धरना-प्रदर्शन करीन। कार्यकर्ता मन ह मवेसी मन ल एसडीएम कार्यालय के अंदर ले जाय के परयास करीन। ए दउरान पुलिस अउ कार्यकर्ता मनके बीच झूमाझटकी घलो होइस।
बातों-बातों-में
नाव पलटी
दंतेवाड़ा जिला के इंद्रावती नदी म नाव पलटे ले दू झन ग्रामीण मन लापता होगे हे। उहें, चार झन दूसर लोगन नदी के बीच म फंसे हे।
मिले जानकारी के अनुसार बारसूर थाना क्षेत्र के कोडनार घाट के तीर आज मंझनिया एक ठन नाव पलट गे। नाव म सात झन बइठे रिहीन, जेमा ले एक झन ल सुरक्षित बाहिर निकाले गे हवय। उहें, दू झन लापता हे अउ नदी म फंसे चार झन लोगन ल बाहिर निकाले के परयास करे जावत हे।
तेंदुआ-हमला/मौत
गरियाबंद जिला के चिपरी गांव म आज एक ठन तेंदुआ ह पिता-पुत्र उपर हमला करके ओमन ल घायल कर दीस। दूनों झन ल अस्पताल म भर्ती कराय गे हवय। मिले जानकारी के अनुसार जंगल ले एक ठन तेंदुआ ह अचानके एक झन के घर म घुस गे अउ उहां पिता-पुत्र उपर हमला कर दीस। ए दउरान पिता-पुत्र ल बचाय खातिर तीर-तखार के लोगन मन तेंदुआ उपर लाठी-डंडा ले हमला कर दीन, जेखर ले तेंदुआ के मउत होगे। वन विभाग के टीम ह मउका पहुंच के जांच सुरू कर देहे।