छत्तीसगढ़ लोक सेवा आयोग-पीएससी ह राज्य सेवा परीक्षा दू हजार बाईस के आखिरी परीक्षा परिणाम ल जारी कर देहे। रायगढ़ के सारिका मित्तल ह एक हजार अंक के साथ प्रावीण्य सूची म पहला स्थान ले हवय। उहें, अंबिकापुर के शुभम देव ह दूसरा, बिलासपुर के श्रेयांश पटेरिया ह तीसरा अउ बिलासपुर के ही शिक्षा शर्मा ह टॉप टेन म चौथा स्थान ले हवय। आयोग ले जारी सूची के अनुसार टॉप टेन म छै झिन नोनी मन अपन जगह बनाय म सफल होय हे।
खबर के मुताबिक छत्तीसगढ़ लोक सेवा आयोग ह उन्नीस ठन सेवा बर दू सौ दस पद म विज्ञापन जारी करे रिहीस, जेमा तीन हजार पंचानवे अभ्यर्थी मन ह मुख्य परीक्षा बर चुने गे रिहीन। उहें, छह सौ पच्चीस अभ्यर्थी मन ह साक्षात्कार दे रिहीन।
हाईकोर्ट-आदेश
छत्तीसगढ़ उच्च न्यायालय ह भिलाई के चर्चित करीबन एक सौ पैंसठ करोड़ रूपिया के लेनदेन के मामला म सोलह अक्टूबर तक राज्य सरकार ल जांच पूरा करे के अउ आरोपी मनके खिलाफ लुकआउट नोटिस जारी करे के आदेस दीन हे। हाईकोर्ट ह पुलिस जांच रिपोर्ट ले संतुष्ट नइ होय म बिसेस एजेंसी ल जांच ल सौंपे जाय के बात घलो कहिन हे।
मुख्य न्यायाधीश के युगल पीठ ह आज ए मामला म मुख्य सचिव अमिताभ जैन के जांच संबंधी सपथ पत्र म सुनवाई करीन।
मुख्यमंत्री-पत्र
मुख्यमंत्री भूपेश बघेल ह केन्द्रीय खाद्य अउ सार्वजनिक वितरण मंत्री पीयूष गोयल ल चिट्ठी लिखे हे, जेमा ओमन ह खरीफ विपणन बछर दू हजार तेईस-चौबीस म केन्द्रीय पुल म चावल खरीदी के लक्ष्य छियासी लाख पचास हजार मीटरिक टन राखे के अनुरोध करीन हे। संगेसंग परिणामी चावल के पैकेजिंग बर तीन लाख छप्पन हजार गठान नवा जुट बैग के आपूर्ति जूट कमिश्नर के माध्यम ले कराय जाय बर निरदेस जारी करे के घलो आग्रह करीन हे।
रमन सिंह-बयान
भारतीय जनता पार्टी के राष्ट्रीय उपाध्यक्ष अउ प्रदेस के पूर्व मुख्यमंत्री डॉक्टर रमन सिंह ह पार्टी कार्यकर्ता मन ल अवइया विधानसभा चुनाव बर तैयार रेहे बर किहीन हे। राजनांदगांव जिला के सोमनी गांव म विधानसभा ग्रामीण मंडल बूथ स्तरीय कार्यकर्ता सम्मेलन म डॉक्टर सिंह ह किहीन कि राज्य सरकार के नाकामी ल जनता के आगू लाय के बेरा आ गे हवय। पूर्व मुख्यमंत्री ह कार्यकर्ता मन ल एकजुट रेहे के अउ पार्टी के नीति के अनुसार अउ बूथ स्तर म चौबीस ठिन बिन्दु उपर काम करे के सलाह दीन। ओमन किहीन कि प्रदेस म अपराध के घटना म बढ़ोतरी होय हे। जनता ह राज्य के कांग्रेस सरकार ले नाराज हे अउ अवइया विधानसभा चुनाव म सरकार बदले के मन बना ले हवय। सम्मेलन म सांसद संतोष पांडेय घलो मौजूद रिहीन।
मतदाता जागरूकता अभियान
अवइया विधानसभा चुनाव ल देखत प्रदेस म राजनीतिक अउ प्रशासनिक गतिविधि तेज होगे हे। दूनोंच स्तर म विधानसभा चुनाव के तैयारी जोरसोर ले करे जावत हे। इही कड़ी म बेमेतरा जिला म हस्ताक्षर अभियान कार्यक्रम के आयोजन करे गीस, जेखर थीम रिहीस ‘‘बाकी काम ल छोड़ देबो, बेमेतरा वासी वोट देबो‘‘, बेमेतरा के एके पहिचान, शत-प्रतिशत होही मतदान‘‘।
ए मउका म जिला निर्वाचन अधिकारी पी.एस. एल्मा ह अधिकारी-कर्मचारी मन ल शत-प्रतिशत मतदान करे के शपथ देवइन। उहें, स्वीप कारीकरम के तहत स्कूली लइका, युवा, सियान, पुरूष अउ महिला संघरा सबो वर्ग के लोगन ल मताधिकार बर जागरूक करे जावत हे।
उहें, राजनांदगांव के चारभाटा के शासकीय उच्चतर माध्यमिक साला के नोनी मन ह शत-प्रतिशत मतदान बर हाथ म मेंहदी रचाके संदेस दीन।
जल जीवन मिशन
राज्य के ग्रामीण अंचल म निःशुल्क घरेलू नल कनेक्शन देके काम तेजी ले करे जावत हे। जल जीवन मिशन म घर मन म पीये के शुद्ध पानी के आपूर्ति बर चलाय जावत ए अभियान म अभी तक उनतीस लाख ले जादा परिवार ल घरेलू नल कनेक्शन दे गे हवय। एखरे संग उनचालीस हजार ले जादा स्कूल, साढ़े सैंतीस हजार आंगनबाड़ी केन्द्र अउ पन्द्रह हजार ले जादा ग्राम पंचायत भवन अउ सामुदायिक उप स्वास्थ्य केन्द्र म टेप नल के माध्यम ले शुद्ध पेयजल पहुंचाय के बेवस्था करे गेहे।
जांजगीर-चांपा जिला एक लाख पैंतालीस हजार ले जादा ग्रामीण परिवार ल घरेलू नल कनेक्शन देके मामला म पहिली स्थान म हवय। अइसने, रईपुर दूसर अउ महासमुंद जिला ह तीसरा पायदान म हवय। खबर के मुताबिक जल जीवन मिशन के तहत प्रदेस म उनचास लाख बयानवे हजार ले जादा परिवार ल घरेलू नल कनेक्शन दे जाय के लक्ष्य राखे गे हवय।
राजनांदगांव-भरोसे का सम्मेलन
राजनांदगांव जिला के ठेकवा गांव म काली आठ सितंबर के ‘‘भरोसे का सम्मेलन‘‘ कारीकरम के आयोजन करे जाही, जेखर मुख्य अतिथि राज्यसभा म नेता प्रतिपक्ष मल्लिकार्जुन खड़गे होही। कारीकरम के अध्यक्षता मुख्यमंत्री भूपेश बघेल करही। ए मउका म राजनांदगांव, मोहला-मानपुर-अंबागढ़ चौकी अउ खैरागढ़-छुईखदान-गंडई जिला बर तीन सौ पचपन करोड़ रूपिया ले जादा के लागत के आने-आने विकास काम के भूमिपूजन अउ लोकार्पण करे जाही। संगेसंग राज्य सरकार के आने-आने योजना बर साढ़े आठ हजार ले जादा हितग्राही मन ल तीन करोड़ पच्चीस लाख रूपिया ले जादा के सामग्री के वितरण करे जाही।
माओवादी स्मारक-ध्वस्त
नारायणपुर जिला म सुरक्षा बल ह एक ठन माओवादी स्मारक ल ध्वस्त कर देहे। मिले जानकारी के अनुसार जिला के छोटेडोंगर थाना क्षेत्र म डीआरजी, बस्तर फाईटर, जिला पुलिस बल अउ आईटीबीपी के संयुक्त दल तलाशी अभियान म निकले रिहीस। ए दउरान किलम गांव म बने एक ठन माओवादी स्मारक ल सुरक्षा बल ह तोड़ के ध्वस्त कर दीस।
जन्माष्टमी
भगवान श्रीकृष्ण के जनम उत्सव जन्माष्टमी आज छत्तीसगढ़ संघरा देस के आने-आने भाग म श्रद्धा अउ उछाह के संग मनाय जावत हे। जगह-जगह शोभा यात्रा निकाले जावत हे। उहें, कतकोन जघा म पालकी यात्रा घलो निकले हे। ए मउका म प्रदेस के कृष्ण मंदिर मन म जनम उत्सव बर जरूरी तैयारी कर ले गेहे। मंदिर अउ घर मन म आज रतिहा भगवान श्रीकृष्ण के विशेष रूप ले पूजा-अर्चना करके जनम उत्सव मनाय जाही। कान्हा ल माखन, मिश्री के अलावा कतकोन चीज के भोग लगाय जाही।
इही बीच, राजधानी रईपुर म घलो कृष्ण मंदिर के विशेष साज-सज्जा करे गेहे। ए मउका म भगवान के बाल रूप के श्रृंगार करके विशेष पोशाक पहिनाय जाही। राजधानी म टाटीबंध के ईस्कान मंदिर अउ समता कॉलोनी के राधा-कृष्ण मंदिर म बिहनियाच ले श्रद्धालु मन भगवान के दर्सन करीन।
ऐति, जगदलपुर म श्रीकृष्ण जन्माष्टमी के मउका म सरस्वती शिशु मंदिर के लइका मन ह सहर म सोभा यात्रा निकालीन। ए मउका म मटका फोड़ प्रतियोगिता के घलो आयोजन करे गीस। अइसने, प्रदेस के सबो सहर मन म जन्माष्टमी के परब ल धूमधाम ले मनाय जावत हे।
अउ अब पेस हे मौसम के हाल…
अवइया चौबीस घंटा के दउरान प्रदेस के कतकोन जघा म हल्का ले मध्यम बरसा होय के या गरज-चमक के संग छींटा पड़े के संभावना हे। उहें, एक-दू जघा म गरज-चमक के संग आंधी चले के अउ आकाशीय बिजली गिरे के चेतावनी घलो दे गेहे।
आज राजधानी रायपुर संघरा दुरूग जिला म हल्का बरसा होइस। उहें, राजनांदगांव म तेज बरसा होय के समाचार हे।
अउ अब थोरकुन समाचार सार म-
– काली अंतर्राष्ट्रीय साक्षरता दिवस हे। ए मउका म मुख्यमंत्री भूपेश बघेल ह प्रदेसावासी मन ल अपन सुभकामना दीन हे।
– प्रदेस म सिक्षक भर्ती परीक्षा बर अभ्यर्थी मनके दूसर चरण के ऑनलाइन काउंसिलिंग आज ले सुरू होगे हे, जउन ह बारह सितंबर तक चलही।
– छत्तीसगढ़ राज्य ग्रामीण आजीविका मिशन-बिहान के अंतर्गत डिजिटल फाइनेंस के क्षेत्र म सुघ्घर काम करइया पन्द्रह झन बीसी सखी मन ल काली रईपुर म सम्मानित करे जाही।
– रईपुर जिला के खोरपा म काली खारून ग्रामीण पुरस्कालय अउ ग्राम विकास शोध समाधान केन्द्र के सुरूवात करे जाही।
अउ
– चीन म राखे गे अंडर-अट्ठारह वूमेन एशिया कप प्रतियोगिता म भाग लेवइया बीजापुर जिला के दू झन खिलाड़ी अउ कोच के बीजापुर पहुंचे म स्थानीय विधायक अउ कलेक्टर ह स्वागत करीन।