शिक्षक दिवस-राज्यपाल
शिक्षक दिवस के मउका म आज राजभवन म होय समारोह म राज्यपाल विश्वभूषण हरिचंदन ह प्रदेश के अलग-अलग स्कूल ले चुने गे बावन झन उत्कृष्ट शिक्षक मन ल राज्य स्तरीय शिक्षक सम्मान ले विभूषित करीन। एमा ले अड़तालिस झन शिक्षक मन ल राज्य शिक्षक सम्मान अउ चार झन शिक्षक मन ल प्रदेश के महान साहित्यकार मनके नाम उपर स्मृति पुरस्कार ले सम्मानित करे गीस। एमा रायपुर जिला के ममता आहार ल डॅाक्टर पदुमलाल पुन्नाला बख्शी स्मृति पुरस्कार, कोंडागांव के मधु तिवारी ल डॅाक्टर मुकुटधर पांडेय स्मृति पुरस्कार, रायगढ़ के रश्मि वर्मा ल डॅाक्टर बलदेव प्रसाद मिश्र स्मृति पुरस्कार अउ खैरागढ़ छुईखदान गंडई जिला के इंदिरा चंद्रवंशी ल गजानन माधव मुक्तिबोध स्मृति पुरस्कार ले सम्मानित करे गीस। ये चारो शिक्षक मन ल प्रशस्ति पत्र के संगेसंग पचास हजार रूपिया के नगद राशि प्रदान करे गीस।
उंहे राज्य शिक्षक पुरस्कार ले सम्मानित अड़तालिस झिन शिक्षक मन ल इक्कीस हजार रूपिया अउ प्रशस्त्रि पत्र प्रदान करे गीस। ए मउका म राज्यपाल ह कहिन कि शिक्षक मनके संकल्प अउ समर्पण से ही राज्य म शिक्षा के क्षेत्र म नवा आयाम स्थापित होवत हे। ओमन कहिन कि शिक्षक मनके काम केवल ज्ञान देना नो हे बल्कि उनला विद्यार्थी मन ल नैतिक मूल्य से परिचित घलो कराना आय। समारोह के अध्यक्षता करत मुख्यमंत्री भूपेश बघेल ह कहिन कि राष्ट्र अउ समाज के निर्माण म शिक्षक मनके महत्वपूर्ण भूमिका हे। कार्यक्रम ल स्कूल शिक्षा मंत्री रविंद्र चौबे ह घलो संबोधित करीन।
मुख्यमंत्री शिक्षक नियुक्ति
मुख्यमंत्री भूपेश बघेल ह आज राजधानी रायपुर म एक हजार तीन सौ अठारा शिक्षक मन ल नियुक्ति पत्र प्रदान करीन। शिक्षा विभाग डहार ले आयोजित ये विशेष कार्यक्रम म ये शिक्षक मन ल नियुक्ति पत्र सौंपे गीस। श्री बघेल ह ये अवसर म मुख्यमंत्री स्कूल जतन योजना के अंतर्गत पूरा हो चुके सात हजार छै सौ अठासी मरम्मत काम अउ चार सौ चौंसठ अतिरिक्त कक्षा मनके निर्माण के लोकार्पण घलो करीन। बतादन कि ए स्कूल भवन मनके रंगरोगन बर गौठान म बने करीब दू लाख लीटर गोबर पेंट के इस्तेमाल करे गेहे।
भाजपा परिवर्तन यात्रा
प्रदेश म आगामी विधानसभा चुनाव ल देखत भाजपा ह ये महीना परिवर्तन यात्रा शुरू करने वाला हे। प्रदेश भाजपा अध्यक्ष अरूण साव ह आज पत्रकारवार्ता म बताइन कि ये यात्रा दंतेवाड़ा ले बारा सितंबर के अउ जशपुर ले सोला सितंबर के शुरू करे जाही। यात्रा के शुरूआत के कार्यक्रम म केंद्रीय गृहमंत्री अमित शाह शामिल होही। ओमन बताइन कि ये दूनो यात्रा के समापन बिलासपुर म अठाईस ले तीस सितंबर के बीच होही, जेमा प्रधानमंत्री नरंेद्र मोदी उपस्थित रीही।
मुख्यमंत्री-प्रधानमंत्री पत्र
मुख्यमंत्री भूपेश बघेल ह केंद्र सरकार ले राज्य म प्रधानमंत्री आवास योजना के अंतर्गत स्थायी प्रतीक्षा सूची म शामिल करीब सात लाख परिवार मनके अलावा राज्य सरकार के सामाजिक, आर्थिक सर्वेक्षण म पाय गे सैंतालिस हजार नब्बे परिवार मनके आवास निर्माण बर केंद्र डहार ले दे जाने वाला राशि ल जारी करे के अनुरोध करे हे।
मुख्यमंत्री ह पत्र म यहू लिखे हे कि केंद्र सरकार डहार ले बछर दू हजार ग्यारा म जनगणना के आधार म स्थायी प्रतीक्षा सूची तैयार करे गे रीहिस। उंहे बछर दू हजार अठारा म आवास प्लस श्रेणी के तहत एक दूसर सूची घलो बनाय गे रीहिस, जेमा स्थायी प्रतीक्षा सूची के अलावा करीबन आठ लाख बीस हजार परिवार पात्र पाये गे रीहिन। मुख्यमंत्री ह ये सबो परिवार मन ल प्रधानमंत्री आवास योजना के तहत मकान देवाय बर आवश्यक कार्रवाई करे के आग्रह करे हे।
राष्ट्रीय पोषण माह
लईका मन म कुपोषण अउ खून के कमी ल दूर करे के उद्देश्य ले प्रदेश म ये बखत राष्ट्रीय पोषण माह के तहत विशेष अभियान चलाये जात हे। ये अभियान बछर दू हजार अठारा म शुरू होय रीहिस। तीस सितंबर तक चलइया ये अभियान के तहत ये बखत संपूर्ण स्तनपान अउ उपरी आहार के जरिया लईका मन म कुपोषण अउ खून के कमी ल दूर करे के प्रयास करे जात हे। ये अभियान म जादा ले जादा लईका अउ शिशुवती माता मन ल जोड़े बर स्वस्थ बालक स्पर्धा, पोषण भी पढ़ाई भी अउ मिशन लाईफ जइसे गतिविधि मनके आयोजन करे जात हे।
रेलवे-नन्हें फरिश्ते अभियान
रेलवे सुरक्षा बल डहार ले चलाये जात नन्हे फरिश्ते अभियान के तहत ये बछर अगस्त महीना तक दू सौ नौ झन लइका मन ल उंखर परिजन मन ल सौंपे जा चुके हे। गौरतलब हे कि दक्षिण पूर्व मध्य रेलवे डहार ले अपन सामाजिक दायित्व के तहत रेलवे सुरक्षा बल के माध्यम ले ये अभियान चलाये जात हे। एखर तहत घर ले भागे हुए या अपन परिजन मनले बिडछ़े हुए लइका मन ल सकुशल उंखर घर पहुंचाय के बेवस्था करे जाथे। एखर बर रेलवे सुरक्षा बल डहार ले हेल्पलाइन सेवा घलो चलाये जात हे। जेमा कोनो भी मनखे गुमशुदा या बिछड़े हुए लइका मनके जानकारी दर्ज करा सकथे।
सिंहदेव केंद्रीय चुनाव समिति
प्रदेश के उप मुख्यमंत्री टीएस सिंहदेव ल कंाग्रेस के केंद्रीय चुनाव समिति म शामिल करे गेहे। ये समिति म शामिल होवइया ओमन प्रदेश के एकमात्र कंाग्रेस नेता आय। कंाग्रेस ह छत्तीसगढ़ समेत पांच राज्य म होवइया विधानसभा अउ आगू बछर लोकसभा चुनाव बर ये केंद्रीय समिति के गठन करे हे। ये समिति ह विधानसभा अउ लोकसभा चुनाव म पार्टी के प्रत्याशी मनके चयन करही। ये समिति म कंाग्रेस के राष्ट्रीय अध्यक्ष मल्लिकार्जुन खड़गे समेत पार्टी के पूर्व अध्यक्ष राहुल गांधी अउ सोनिया गांधी सहित सोला झन सदस्य शामिल हे।
भाजपा आरोप पत्र
प्रदेश म होवइया आगामी विधानसभा चुनाव ल देखत हुए आज राजनंादगंाव के भाजपा सांसद संतोष पांडेय ह कवर्धा म एक पत्रकार वार्ता लेके कांग्रेस के खिलाफ आरोप पत्र जारी करीन। ये मउका म कबीरधाम जिला इकाई के भाजपा अध्यक्ष अशोक साहू, उपाध्यक्ष अउ मीडिया प्रभारी जसविंदर बग्गा घलो उपस्थित रीहिन।
रायपुर कोर्ट गिरप्तारी वारंट
रायपुर के अदालत ह ऑनलाईन अउ मोबाइल एप ले संचालित सट्टा कारोबार ले जुड़े आरोपी रवि उप्पल अउ सौरभ चंद्राकर के खिलाफ गिरप्तारी वारंट जारी करे हे। ए दूनो आरोपी मनके खिलाफ रेड कॉर्नर नोटिस जारी करे बर प्रवर्तन निदेशालय ह इंटरपोल ले घलो संपर्क करे हे। ए दूनो आरोपी मनके दुबई म होय के आशंका जताय जात हे।
खाद-बीज
राज्य सरकार ह किसान मनले आग्रह करीन हे कि ओमन गुणवत्तायुक्त खाद लेबर पास मशीन के जरिया मिलइया खाद के उपयोग करंय। ए संबंध म राज्य के कृषि विभाग ह निजी अउ सरकारी विक्रेता मन ल घलो पास मशीन के जरिया ही खाद के बिक्री करे के निर्देश देहे।
गौरतलब हे कि ये बखत कृषि विभाग डहार ले राज्य के सबो जिला मन म बीज, खाद अउ कीटनाशक दवाई के गुणवत्ता ल जांचे बर कृषि आदान विक्रय केंद्र के लगातार निरीक्षण करे जात हे। संगेसंग खाद या बीज के बिक्री म गड़बड़ी पाय जाय ले कार्रवाई घलो करे जावत हे। कृषि विभाग ह किसान मनले यहू कीहिन कि वोमन कोनो भी सहकारी बिक्री केंद्र ले खाद ले के बाद उंहा ले बिल घलो अवश्य प्राप्त करंय।
माओवादी मुठभेड़
सुकमा जिला म आज सुरक्षा बल डहार ले होय मुठभेड़ म दू झन माओवादी मारे गेहे। जिला के पुलिस अधीक्षक किरण चौहान ह एखर पुष्टि करत बताइन कि ताड़मेटला के जंगल म तलाशी अभियान म निकले डीआरजी अउ सीआरपीएफ के जवान मन ल उंहा माओवादी मनके मौजूद होय के सूचना मिले रीहिस हे। जंगल म सुरक्षा बल के आहट मिलते ही माओवादी मन गोलीबारी शुरू कर दीन। सुरक्षा बलके जवाबी हमला म दू झिन माओवादी के मौत होगे, जेखर शव बरामद कर ले गेहे। सुरक्षा बलके जवान मन ह घटनास्थल ले एक रायफल अउ एक ठन पिस्तोल समेत दूसर समान बरामद करे हे। पुलिस अधीक्षक ह बताइन कि मुठभेड़ के बाद अभी भी तलाशी अभियान जारी हे।